གསུམ་བཅུའི་དུས་དྲན་ཐུག་ཉེའི་མཚམས་བོད་དོན་རྒྱབ་སྐྱོར་བ་ཁག་ཅིག་རྡ་སར་ཕེབས་སོང་།
རྒྱལ་ཁབ་བཞིའི་གྲོས་ཚོགས་ཀྱི་འཐུས་མི་བོད་དོན་རྒྱབ་སྐྱོར་ཆེད་དུ་གསུམ་བཅུའི་དུས་དྲན་དང་བསྟུན་ནས་རྡ་སར་ཕེབས་ཡོད་པ་རེད།
ཕྱི་ལོ་ ༢༠༡༩ ཟླ་༣ པའི་ཚེས་༨ ཉིན་གྱི་ཕྱི་དྲོའི་ཆུ་ཚོད་༣ དང་སྐར་མ་༣༠ ཡས་མས་སུ་གངས་སྐྱིད་ཚོགས་ཁང་གསར་པའི་ནང་དུ་རྒྱལ་ཁབ་བཞིའི་གྲོས་ཚོགས་ཀྱི་འཐུས་མི་དྲུག་ཕེབས་ཏེ་གསུམ་བཅུའི་དུས་དྲན་དང་འབྲེལ་བོད་དོན་རྒྱབ་སྐྱོར་གྱི་གཏམ་བཤད་གནང་ཡོད་པ་དང་། རྒྱལ་ཁབ་བཞི་ནི་འཇར་མན་དང་ཁེ་ན་ཌ། སི་ལོ་ཝ་ཀི་ཡ། ཐའེ་ཝན་བཅས་ཡིན་པ་རེད སྐབས་དེར་སྲིད་སྐྱོང་མཆོག་གིས་གྲོས་ཚོགས་འཐུས་མི་རྣམས་ལ་དགའ་བསུའི་འཚམས་འདྲི་ཞུས་པ་དང་སྦྲགས། ༧གོང་ས་མཆོག་གི་ཐུགས་རྗེའི་འོག་བཙན་བྱོལ་གཞུང་དང་བོད་མི་རྣམས་འཚོ་ཚུལ་དང་ རྒྱ་ནག་གཞུང་གིས་བོད་ས་དབང་སྒྱུར་བྱས་ནས་མི་ལོ་ ༦༠ འཁོར་ཡང་གཞིས་བྱེས་བོད་མིའི་སྙིང་སྟོབས་ཞུམ་པ་མེད་ཐོག་བོད་དོན་
བདེན་མཐའ་གསལ་ཐབས་འབད་བཞིན་ཡོད་པའི་སྐོར། དེ་བཞིན་མང་གཙོའི་ཀ་བ་གསུམ་གྱི་ཆ་ལག་ཡོངས་སུ་རྫོགས་པའི་མང་གཙོའི་ལམ་ལུགས་ལག་བསྟར་བྱེད་ཚུལ། བཙན་བྱོལ་བོད་མིའི་རང་དབང་དང་འགྲོ་བ་མིའི་ཐོབ་ཐང་། འཚེ་མེད་ཞི་བའི་འཐབ་རྩོད་སོགས་ཀྱི་སྐོར་གསུངས་ཡོད་པ་མ་ཟད།བོད་མིའི་འཐབ་རྩོད་མུ་མཐུད་གནས་ཐུབ་པ་ནི་གཙོ་བོ་བོད་དོན་རྒྱབ་སྐྱོར་བ་རྣམས་ཀྱི་བཀའ་དྲིན་ལ་བརྟེན་ནས་ཡིན་ཞེས་དང་། ཟླ་ ༣ ཚེས་ ༡༠ ཉིན་མོ་ནི་བོད་མི་ཚོར་དུས་ཚོད་ཧ་ཅང་གལ་གནད་ཆེ་བ་ཞིག་ཡིན་པར་བརྟེན་རྒྱ་ནག་གཞུང་ལ་མཚོན་ནའང་དུས་ཚོད་དེ་ནི་ཆབ་སྲིད་ཀྱི་གནད་འགག་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད་པས།འབྲེལ་ཡོད་རྒྱལ་ཁབ་ཁག་གི་ནང་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་བོད་དོན་རྒྱབ་སྐྱོར་གྱི་ལས་འགུལ་ནང་ཆ་ཤས་ལེན་རྒྱུ་མེད་པ་དངོས་ཤུགས་བརྒྱུད་ནས་གནོན་ཤུགས་སྤྲོད་བཞིན་ཡོད་པ་རེད་ལ།ཐེངས་འདིར་ཡང་ཁྱེད་རྣམ་པ་ཁག་གཅིག་ལ་འདི་ག་གསུམ་བཅུའི་དུས་དྲན་མཛད་སྒོར་མཉམ་ཞུགས་མ་གནང་རོགས་ཞེས་འབོད་སྐུལ་བྱས་པ་མ་ཟད། ཅི་སྟེ་མཉམ་ཞུགས་བྱས་ཚེ་སླད་ཕྱིན་རྒྱ་ནག་དང་འབྲེལ་ལམ་ཉེན་བརྡ་བཏང་བའི་སྐོར་སོགས་གསུངས་པ་དང་འབྲེལ། དེ་རིང་འདིར་ཕེབས་མཁན་རྣམས་དཀའ་ངལ་མང་པོ་ཁྱད་དུ་བསད་ནས་འདིར་བོད་མི་ཚོར་གདུང་སེམས་མཉམ་སྐྱེད་ཞུ་བཞིན་ཡོད་པས། ངས་ཁྱེད་རྣམས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་སོགས་གསུངས་ཡོད་པ་རེད།
དེ་རྗེས་རྒྱལ་ཁབ་ལྔའི་གྲོས་ཚོགས་འཐུས་མི་ཚོས་འཚེ་མེད་ཞི་བའི་འཐབ་རྩོད་སྐོར་ལ་བསྔགས་བརྗོད་དང་འབྲེལ། སོ་སོའི་རྒྱལ་ཁབ་ནང་བོད་མིའི་ཆོས་དད་རང་དབང་དང་འགྲོ་བ་མིའི་ཐོབ་ཐང་གིས་མཚོན་བོད་དོན་ལ་རྒྱབ་སྐྱོར་ཤུགས་ཆེན་བྱེད་བཞིན་ཡོད་ཚུལ། གཞན་ཡང་༧གོང་ས་མཆོག་དང་མཇལ་ཞིང་ཁོང་གི་ཕྱག་དེབ་བཀླགས་པའི་སེམས་ཚོར་སོགས་བརྗོད་ཡོད་པ་དང་། དེ་བཞིན་འཐུས་མི་རྣམས་ཀྱིས་སོ་སོའི་རྒྱལ་ཁབ་ཀྱི་སྔོན་ཆད་གཞན་དབང་གིས་འཕྲད་པའི་དཀའ་སྡུག་གི་ལོ་རྒྱུས་དང་སྦྱར་ཏེ་བོད་དོན་གཏམ་བཤད་གནང་ཐོག་སླད་ཕྱིན་བོད་དོན་ལ་རྒྱབ་སྐྱོར་བྱ་རྒྱུ་ཡིན་པའི་རྣམ་པ་ཤུགས་ཆེན་བསྟན་ཡོད་པ་རེད།།
གསར་འགོད་པ་བསྟན་འཛིན་ལམ་བཟང་།
