གོ་ལའི་ཁོར་ཡུག་ཚོགས་ཆེན་ཐེངས་ ༢༦ པའི་ཐོག ༧གོང་ས་མཆོག་གིས་བོད་ཀྱི་ཁོར་ཡུག་གལ་ཆེ་བའི་སྐོར་གྱི་གསུང་འཕྲིན་བསྩལ་འདུག

ཕྱི་ཟླ་ ༡༠ ཚེས་ ༣༡ ཉིན་སི་ཀོཊ་ལེནཌ་ཡི་གྲོང་ཁྱེར་ག་ལཱ་སི་གོར་(Glasgow)ལ་མཉམ་འབྲེལ་རྒྱལ་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༦ (COP26) འཚོགས་པའི་སྐབས། ༸གོང་ས་མཆོག་གིས་ཁོར་ཡུག་སྲུང་སྐྱོབ་ཀྱི་གལ་ཆེའི་རང་བཞིན་དང་འབྲེལ་བའི་གསུང་འཕྲིན་ཞིག་བསྩལ་བའི་ནང་། བོད་ནི་“འཛམ་གླིང་གི་སྣེ་གསུམ་པ་”དང་། ཨེ་ཤ་ཡའི་མི་འབོར་དུང་ཕྱུར་ཉི་ཤུ་མ་ཟིན་ཙམ་གྱི་འཚོ་རྟེན་དུ་གྱུར་བའི་གཙང་བོ་དང་ཆུ་ཆེན་དག་གི་འགོ་ཁུངས་ཡིན་པས། བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུ་གལ་གནད་ཆགས་ཡོད་སྐོར་གསུངས་འདུག
ཁ་སང་རེས་གཟའ་ཉི་མའི་ཉིན་བསྩལ་བའི་གསུང་འཕྲིན་ནང་། ༧རིན་པོ་ཆེ་མཆོག་གིས་“གོ་ལའི་ཚ་དྲོད་འཕེལ་བ་འདི་དངོས་གནས་ཛ་དྲག་ཅིག་རེད། ང་ཚོ་སུས་ཀྱང་འདས་པ་ལ་འགྱུར་བ་གཏོང་མི་ཐུབ་ཀྱང་། ང་ཚོ་ཚང་མར་མ་འོངས་པ་སྔར་ལས་བཟང་བ་ཞིག་འབྱུང་བར་ཞབས་འདེགས་ཞུ་ཐུབ་པའི་གོ་སྐབས་ཡོད། ངེད་ཅག་སོ་སོ་དང་ད་ཡོད་འགྲོ་བ་མི་དུང་ཕྱུར་བདུན་ཅུ་བརྒལ་བ་ཚང་མར་ཞི་བདེ་དང་ཉེན་ཁ་མེད་པའི་ཐོག་མུ་མཐུད་གནས་པར་བྱ་རྒྱུའི་འགན་ཏན་ཏན་ཡོད་པས། རེ་བ་དང་ཆོད་སེམས་བརྟན་པོས་རང་རང་སོ་སོ་དང་གྲོང་པ་ཁྱིམ་མཚེས་ཡོངས་ལ་ངེས་པར་དུ་གཅེས་སྐྱོང་བྱེད་དགོས་”ཞེས་གསུངས་པའི་ཐོག “ང་ཚོའི་མེས་པོ་རྣམས་ཀྱིས་སའི་གོ་ལ་འདི་ནི་ལོངས་སྤྱོད་ཕུན་སུམ་ཚོགས་པ་ཞིག་ཏུ་འདོད་པ་དེ་དེ་བཞིན་རེད། དེ་ལས་ཀྱང་གལ་ཆེ་བ་ནི་འཛམ་གླིང་འདི་ང་ཚོའི་རང་ཁྱིམ་ཁོ་ན་དེ་ཡིན། འདི་ཉིད་སྲུང་སྐྱོབ་བྱ་རྒྱུ་ནི་ང་ཚོ་ཁོ་ནའི་ཆེད་དུ་མིན་པར་མི་རབས་རྗེས་མ་རྣམས་དང་། ང་ཚོ་དང་མཉམ་དུ་ལོངས་སྤྱོད་མཁན་གྱི་ས་ཡི་གོ་ལའི་སྐྱེས་ལྡན་རིགས་ཡོད་དོ་ཅོག་གི་ཆེད་དུའང་རེད་”ཅེས་བསྣན་འདུག
བོད་ཀྱི་ཁོར་ཡུག་དང་འབྲེལ་བའི་ཐད་ལ། ༧གོང་ས་མཆོག་གིས་“བོད་མཐོ་སྒང་ནི་འཛམ་གླིང་གི་བྱང་སྣེ་དང་ལྷོ་སྣེ་གཉིས་ཕུད་པའི་གངས་དང་འཁྱགས་པའི་གན་མཛོད་ཆེ་ཤོས་ཡིན་པའི་དབང་གིས་“འཛམ་གླིང་གི་སྣེ་གསུམ་པ་”ཞེས་ཡང་ཡང་འབོད་བཞིན་ཡོད། བོད་ནི་འཛམ་གླིང་གི་རྒྱུགས་ཆུ་ཆེ་གྲས་ཡར་ཀླུང་གཙང་པོ་དང་། གངྒཱ། སེངྒེ་གཙང་པོ། རྫ་ཆུ། རྒྱ་མོ་རྔུལ་ཆུ་དང་རྨ་ཆུ། འབྲི་ཆུ་བཅས་ཐེ་བས་ཆུ་བོ་ཆེ་ཁག་འགའི་འབྱུང་ཁུངས་ཡིན། གཙང་པོ་དེ་དག་ནི་འཚོ་རྟེན་གྱི་རྩ་བ་ཡིན་ཏེ། ཨེ་ཤ་ཡའི་མི་འབོར་དུང་ཕྱུར་ཉི་ཤུ་མ་ཟིན་ཙམ་གྱི་འཐུང་ཆུ་དང་ཞིང་འདྲེན་ཡུར་ཆུ། དེ་བཞིན་གློག་བཟོ་སྐྲུན་བཅས་ལ་ཉེ་བར་མཁོ་བར་གྱུར་ཡོད། བོད་ཀྱི་ཁ་བའི་འཁྱགས་རོམ་མང་དག་ཅིག་བཞུ་བ་དང་།  གཙང་པོར་ཆུ་མཛོད་ཀྱི་རགས་བརྒྱག་པ། ཆུ་ཁ་བསྒྱུར་བ། གཞི་རྒྱ་ཆེ་བའི་ཤིང་ནགས་གཅོད་བྲེགས་སོགས་ས་རྒྱུད་གཅིག་ཏུ་ཁོར་ཡུག་ལ་སྣང་ཆུང་བྱས་རྐྱེན་གྱིས་ས་ཕྱོགས་གང་སར་དེའི་ངན་འབྲས་འབྱུང་བ་གསལ་པོར་མཚོན་ཡོད་”ཅེས་གསུངས་འདུག
གཞན་ཡང་། ཁོང་གིས་ངེད་ཅག་འགྲོ་བ་མི་རྣམས་ནི་འཇིག་རྟེན་འདི་གཏོར་བཤིག་གཏོང་བའི་ནུས་པ་ཆེ་ཤོས་ཡོད་པའི་སྲོག་ཆགས་གཅིག་པུ་དང་། དེ་བཞིན་ཡང་འཇིག་རྟེན་འདི་སྲུང་བའི་ནུས་པ་ཆེ་ཤོས་ལྡན་པའི་སྲོག་ཆགས་ཤིག་ཆགས་ཀྱི་ཡོད་པས། གནམ་གཤིས་འགྱུར་ལྡོག་གི་གནད་དོན་འདི་ལ། ཚང་མས་ངེས་པར་དུ་འཕྱར་བ་གྲུ་འདེགས་གྱིས་འགན་ཁུར་དང་གདོང་ལེན་བྱེད་དགོས་པ་དང་། མི་རེ་ངོ་རེའི་ངོས་ནས་ཀྱང་སོ་སོའི་ནུས་པ་གང་ཡོད་ངེས་པར་འདོན་དགོས་པའི་བཀའ་སློབ་ལམ་སྟོན་གནང་བ་མ་ཟད། མི་རབས་གཞོན་པ་རྣམས་ཀྱིས་གནམ་གཤིས་འགྱུར་ལྡོག་གི་ཐད་ལ་ཁ་ཞེ་གཉིས་མེད་ཀྱིས་ལག་བསྟར་བྱེད་དགོས་པའི་འབོད་སྐུལ་ཐོས་སྐབས། ༧རིན་པོ་ཆེ་མཆོག་ལ་སེམས་ཤུགས་དང་རེ་བ་ཡོང་གི་ཡོད་ཚུལ་སོགས་གསུངས་འདུག །

གསར་འགོད་པ་དཀོན་མཆོག་རབ་བརྟན།