གོང་ས་༧སྐྱབས་མགོན་ཆེན་པོ་མཆོག་གིས་སྐུའི་འཁྲུངས་སྐར་ལ་གནང་བའི་གསུང་འཕྲིན་གསར་པ།

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲངས་༨༩ ལ་ཕེབས་པའི་སྐུའི་འཁྲུངས་སྐར་ལ། མགོན་པོ་གང་ཉིད་ཀྱིས་བོད་རིགས་གཙོས་པའི་དད་ལྡན་ཡོངས་ལ་གསུང་འཕྲིན་ཞིག་བསྩལ་གནང་བ་དང་། གསུང་འཕྲིན་གྱི་ནང་དུ་དེ་རིང་གཞིས་བྱེས་བོད་མི་མང་པོ་ཞིག་གིས་སྐུའི་འཁྲུངས་སྐར་ལ་རྟེན་འབྲེལ་བྱེད་ཀྱི་ཡོད་རེད་ལ། སྤྲོ་སེམས་འཁོལ་ནས་བསྡད་ཡོད་རེད། དེར་བརྟེན་དེ་རིང་གི་དུས་ཚོད་དེར། གཞིས་བྱེས་བོད་མིའི་སྡེར་གཏོགས་དང་ཧི་མ་ལ་ཡའི་མི་མང་ནས་སྐུའི་འཁྲུངས་སྐར་གྱི་དུས་ཆེན་ཐོག་ལ་ཚང་མས་སྨོན་ལམ་རྒྱག་གི་ཡོད་པ་དང་། དེར་མགོན་པོ་གང་གིས་ཐུགས་རྗེ་ཆེ་ཞེས་གསུངས་གནང་ཞིང་། སྐུའི་དགུང་ལོ་དགུ་བཅུའི་ཡས་མས་ཕེབས་ཡོད་པ་དང་། ཞབས་ཕྲན་བུ་མ་བདེ་བ་ལས་གཞན་སྐུ་གཟུགས་ཆ་ཚང་བདེ་ཐག་ཆོད་ཡིན་པར་གསུངས། གཞིས་བྱེས་བོད་མི་ཚང་མས་སྐུའི་འཁྲུངས་སྐར་ལ་སྨོན་ལམ་རྒྱག་པ་སོགས་བྱེད་ཀྱི་ཡོད་པས་ཚང་མ་ལ་ཐུགས་རྗེ་ཆེ་ཞེས་བཀའ་གནང་། ༧གོང་ས་མཆོག་ཁོང་མདོ་སྨད་ཀྱི་ས་ཆ་ནས་འཁྲུངས་པ་ཞིག་དང་། ༧རྒྱལ་དབང་གི་མཚན་ཐོགས་ཤིང་གཞིས་ལ་བཞུགས་པའི་སྐབས་སུ་ཧུར་ཐག་གནང་བ་དང་། ལྷག་ཏུ་ང་ཚོ་བཙན་བྱོལ་བ་བྱས་ནས་བསྡད་པའི་རིང་གང་ཡོང་ཅི་ཡོང་ཧུར་ཐག་གནང་སྟེ། དེའི་ཚེ་ཕན་ཐོགས་ཡང་རྒྱ་ཆེན་པོ་བྱུང་ཡོད་པ་དང་འཛམ་བུ་གླིང་འདིའི་སྒང་ལ་དོ་སྣང་ཆེ་རུ་འགྲོ་བཞིན་ཡོད་པ། དེ་བཞིན་ཁོང་གིས་བོད་བསྟན་སྲིད་ཀྱི་ཞབས་འདེགས་ཕྲན་བུ་འགྲུབ་ཡོད་བསམ་པ་དྲན་གྱི་འདུག གཙོ་བོ་གཞིས་ལུས་རྒྱ་ཆེའི་མི་མང་རྣམས་བློ་བདེ་བོ་བྱས་ནས་བཞུགས་རོགས་ཞེས་དང་། ཁོང་གི་སྐུ་གཟུགས་ཕྲན་བུ་བདེ་མ་བདེ་ཡོང་གི་ཡོད་པ་ནི་སྐུ་ན་རྒས་དུས་ཡོང་གི་ཡོད་པ་དང་། གཞན་སྐུ་གཟུགས་བདེ་ཐག་ཆོད་ཡོད་པར་གསུངས། ཚང་མ་ཐུགས་ལྷོད་ལྷོད་དང་བློ་བདེ་བོ་བྱས་ནས་བཞུགས་རོགས་ཞེས་གསུངས་པ་དང་། དམིགས་བསལ་བར་སྐབས་ཁོང་གི་ཞབས་པུས་བཤའ་བཅོས་ཕྲན་བུ་ཕྲན་བུ་གནང་སྟེ་ཏོག་ཙམ་མ་བདེ་བ་བྱུང་ཡང་། ད་ལྟ་དྲག་ཡོང་གི་འདུག་པས་གལ་མི་འདུག་གསུངས། ཡང་གནས་ཚུལ་གསལ་ལ་མ་གསལ་བྱས་ནས་༧རྒྱལ་བ་རིན་པོ་ཆེ་སྨན་ཁང་ནང་ཕེབས་པ་རེད་ཟེར་བ་འདྲ་བོ། སྨན་བཅོས་གནང་གི་ཡོད་རེད་ཟེར་བ་འདྲ་བོ་བཤད་མཁན་ཡོང་གི་རེད་དེ། དོ་བདག་མགོན་པོ་གང་ཉིད་ལ་ཆ་བཞག་ན་ཞབས་པུས་ཕྲན་བུ་ཞིག་མ་བདེ་བ་བྱུང་བས་སྨན་ཁང་དུ་བརྟག་དཔྱད་གནང་སྐབས། ཚང་མས་བརྩེ་སེམས་ལྡན་པའི་ཐོག་ནས་ཧུར་ཐག་བྱས་སོང་། དེ་རིང་གོ་སྐབས་འདི་བརྒྱུད་ནས་ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན་ཞེས་དང་། མང་ཚོགས་ལ་ཆ་བཞག་ནས་རྒྱལ་བ་རིན་པོ་ཆེ་སྨན་བཅོས་ཕྲན་བུ་ཕྲན་བུ་བྱས་ཡོད་རེད་དེ། གང་ལྟར་གཞི་རྩའི་སྐུ་གཟུགས་ཡག་ཐག་ཆོད་ཡོད་བསྡད་པས་ཚང་མ་བློ་བདེ་བོ་བཞུགས་རོགས་ཞེས་ནན་གྱིས་གསུངས། མགོན་པོ་གང་ཉིད་ཀྱིས་ད་ལྟ་བར་དུ་རྒྱལ་དབང་གི་མཚན་འཆང་ནས་བོད་ཕྱི་ནང་དང་འཛམ་གླིང་གི་ཡུལ་གྲུ་མང་པོ་ཞིག་ལ་བསྟན་པའི་ཞབས་འདེགས་གང་འཚམ་ཞིག་བསྒྲུབས་ཡོད་པ་དང་། ད་དུང་ཡང་ཁོང་གིས་མུ་མཐུད་བསྟན་པའི་ཞབས་འདེབས་བསྒྲུབ་བསམ་པའི་ཐུགས་ཐག་བཅད་ཅིང་སེམས་ཤུགས་ཀྱང་སྐྱེ་བཞིན་བཞུགས་ཡོད་པ། བོད་མི་ཕྱི་ནང་ས་ཁུལ་གང་དུ་ཡོད་ཀྱང་སྐུའི་འཁྲུངས་སྐར་དུས་ཆེན་འདིར་སྨོན་ལམ་རྒྱག་པ་སོགས་ཧུར་ཐག་གནང་རོགས་ཞེས་བཀའ་བསྩལ་སོང་། 

གསར་འགོད་པ། བསྟན་འཛིན་ལམ་བཟང་།