གྲགས་ཅན་གྱི་འགུལ་བརྙན་ཞིག་གི་ལེ་ཚན་གཅིག་ཧོང་ཀོང་ནང་བཀག་སྡོམ་བྱས་འདུག

རྒྱ་ནག་གི་གནམ་སྡེ་སྒོ་མོ་ཐང་ཆེན་གྱི་དམར་གསོད་དང་མའོ་ཙེ་ཏུང་ལ་ཟུར་ཟ་ཡོད་པའི་འགུལ་བརྙན་གྱི་ལེའུ་ཞིག ཧོང་ཀོང་གི་དྲ་ལམ་ནས་བཀམ་སྡོམ་བྱས་ཏེ་བལྟ་རྒྱུ་མེད་པ་བཟོས་འདུག 

ཟླ་༡༡ པའི་ཚེས་༣༠ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཉེ་ཆར་ཧོང་ཀོང་ནང་དུ་དྲ་ཐོག་གློག་བརྙན་བལྟ་བྱེད་ཀྱི་མཉེན་ཆས་(Disney +) ཞེས་པ་དེ་ཧོང་ཀོང་གི་དྲ་ཐོག་ཏུ་གསར་འགྲེམས་བྱས་ཡོད་ཀྱང་། ལྟད་མོ་བ་ཚོས་མཉེན་ཆས་དེའི་ཐོག་ཏུ། རྒྱལ་སྤྱིའི་ནང་ཆེ་མཐོང་ཆེན་པོ་བྱེད་ཀྱི་ཡོད་པའི་འགུལ་བརྙན་(The Simpsons) ཞེས་པ་དེའི་ལེའུ་༡༦ གི་ལེ་ཚན་༡༢ དེ་མེད་པ་དོ་སྣང་བྱུང་འདུག 

དེ་ཡང་རྒྱ་ནག་གཞུང་གིས་ཧོང་ཀོང་ནང་དུ་རྒྱལ་ཁབ་ཀྱི་བདེ་འཇགས་ཁྲིམས་དང་འགལ་བའི་དཔེ་དེབ་དང་གློག་བརྙན། གཞས་སྣ་སོགས་བཀག་སྡོམ་བྱེད་བཞིན་ཡོད་པའི་སྐབས་དེར་གནད་དོན་དེ་བྱུང་བ་ཞིག་རེད་འདུག 

དྲ་ཐོག་ནས་ཕྱིར་འཐེན་བྱས་པའི་ལེ་ཚན་དེའི་ནང་དུ། (The Simpsons) ནང་མི་རྣམས་རྒྱ་ནག་ཏུ་འགྲོ་ཡི་ཡོད་འདུག་པ་དང་། ཁོ་ཚོ་གནམ་སྡེ་སྒོ་མོ་ཐང་ཆེན་དུ་སླེབས་སྐབས་སུ་བྱང་ཡིག་གཅིག་ཡོད་པ་དང་། དེའི་ཐོག་ཏུ་ཕྱི་ལོ་༡༩༨༩ ལོར་ས་གནས་འདི་གར་གནད་དོན་གང་ཡང་བྱུང་མེད་ཅེས་པ་ཞིག་བཞག་ཡོད་འདུག དེ་ནི་རྒྱ་ནག་གི་བདེན་པའི་གནས་ཚུལ་ཞིབ་བཤེར་སྟངས་འཛིན་བྱེད་ཀྱི་ཡོད་པ་དེ་ཟུར་ཟ་བྱས་ཡོད་པ་ངོས་འཛིན་བྱེད་བཞིན་འདུག 

དེ་བཞིན་ལེ་ཚན་དེའི་ཆ་ཤས་གཞན་ཞིག་གི་སྐབས་སུ་ནང་མི་རྣམས་མའོ་ཙེ་ཏུང་གི་ཕུང་པོ་འཇོག་ཡུལ་དུ་འགྲོ་ཡི་ཡོད་འདུག་པ་དང་། སྐབས་དེར་ནང་མིའི་ཕ་རྒན་(Homer) གྱིས་མའོ་ཙེ་ཏུང་ནི་མི་མང་ས་ཡ་༥༠ བསད་མཁན་གྱི་ལྷའི་ཕོ་ཉའམ་ལྷ་(angel) རེད་ཅེས་བརྗོད་ཀྱི་ཡོད་འདུག 

ལེ་ཚན་དེའི་ནང་ཕྱི་ལོ་༡༩༨༩ ལོར་རྒྱ་ནག་གཞུང་གིས་གནམ་སྡེ་སྒོ་མོ་ཐང་ཆེན་དུ་སློབ་ཕྲུག་མང་པོ་ཞིག་དམར་གསོད་བཏང་ཡོད་ཀྱང་། ལོ་རྒྱུས་དེའི་བདེན་པའི་གནས་ཚུལ་རྣམས་ནག་གསུབ་གཏོང་ཐབས་དང་། དྲ་ཐོག་སོགས་ནས་ཞིབ་བཤེར་སྟངས་འཛིན་བྱེད་ཀྱི་ཡོད་པའི་གནས་ཚུལ་དེ་ཟུར་ཟའི་ཐོག་ནས་གསལ་སྟོན་བྱས་ཡོད་ཁར། དེ་བཞིན་རྒྱ་ནག་དམར་ཤོག་ཚོགས་པས་མའོ་ཙེ་ཏུང་དེ་རླབས་ཆེན་གྱི་མི་སྣ་ཞིག་ཡིན་པའི་དྲིལ་བསྒྲགས་ལས་འགུལ་ཆེན་པོ་བྱེད་བཞིན་ཡོད་ཀྱང་། ཁོའི་སྲིད་བྱུས་ཁག་ལ་བརྟེན་ནས་མི་མང་ས་ཡ་མང་པོའི་ཚེ་སྲོག་ཤོར་ཡོད་པའི་བདེན་པའི་གནས་ཚུལ་དེ་གསལ་སྟོན་བྱས་ཡོད་འདུག་པས། ཧོང་ཀོང་གི་དྲ་ཐོག་ནས་ལེ་ཚན་དེ་ཕྱིར་འཐེན་བྱས་པ་ཡིན་འདུག 

ད་ལྟའི་ཆར་ལེ་ཚན་དེ་ཕྱིར་འཐེན་བྱེད་པའི་ཐག་གཅོད་སུས་བྱས་པའི་གནས་ཚུལ་ཐོན་མེད་འདུག་ཁར། དྲ་ཐོག་མཉེན་ཆས་དེས་ཀྱང་བརྒྱུད་ལམ་ཁག་གི་དྲི་བར་ལན་འདེབས་བྱས་མི་འདུག 

ཟླ་༡༠ པའི་ཚེས་༢༧ ཉིན་རྒྱ་ནག་དང་ཧོང་ཀོང་གཞུང་ལ་རྒྱབ་སྐྱོར་བྱེད་མཁན་ཤ་སྟག་གིས་ཁེངས་པའི་ཧོང་ཀོང་གྲོས་ཚོགས་ཀྱིས། རྒྱལ་ཁབ་ཀྱི་བདེ་འཇགས་ཁྲིམས་སྲུང་སྐྱོབ་ཆེད་དུ་གློག་བརྙན་ཞིབ་བཤེར་གྱི་ཁྲིམས་གསར་པ་གཏན་འབེབས་བྱས་འདུག གསར་དུ་གཏན་འབེབས་བྱུང་བའི་གློག་བརྙན་ཞིབ་བཤེར་གྱི་ཁྲིམས་ནང་དུ། ཧོང་ཀོང་ནང་དབང་ཆ་མཐོ་ཤོས་གཉིས་པ་སྤྱི་ཁྱབ་དྲུང་ཆེས། གལ་ཏེ་གློག་བརྙན་ཞིག་རྒྱལ་ཁབ་ཀྱི་བདེ་འཇགས་ཁྲིམས་དང་འགལ་ཟླ་འགྲོ་ཡི་ཡོད་པ་མཐོང་ཚེ། གློག་བརྙན་དེ་ཁྲོམ་རར་འགྲེམས་སྤེལ་ཆོག་པའི་ལག་ཁྱེར་ཕྱིར་བསྡུ་བྱེད་ཆོག་གི་ཡོད་འདུག ཁྲིམས་དེ་དང་འགལ་མཁན་ཚོར་ལོ་གསུམ་གྱི་བཙོན་འཇུག་ཁྲིམས་ཆད་དང་ཧོང་ཀོང་སྒོར་མོ་ས་ཡ་གཅིག་བར་གྱི་དཔལ་འབྱོར་ཉེས་ཆད་འཕོག་སྲིད་པ་རེད་འདུག 

ཧོང་ཀོང་གཞུང་གིས་ཁྲིམས་གསར་པ་དེ་ནི་རྒྱལ་ཁབ་ཀྱི་བདེ་འཇགས་ལ་ཉེན་ཚབས་བཟོ་སྲིད་པའི་བྱ་སྤྱོད་ལ་རྒྱབ་སྐྱོར་དང་ཆེ་བསྟོད། སེམས་ཤུགས་སྤར་བ། བརྒྱུད་སྐུལ་བྱེད་མཁན་གྱི་བརྗོད་བྱ་རྣམས་ལ་དམིགས་ཀྱི་ཡོད་པ་དང་། དམིགས་ཡུལ་ནི་གློག་བརྙན་ཞིབ་བཤེར་གྱི་ལམ་ལུགས་ཡར་རྒྱས་བཏང་ནས། རྒྱལ་ཁབ་ཀྱི་བདེ་འཇགས་ལ་ཉེན་ཚབས་བཟོ་བའི་བྱ་སྤྱོད་རྣམས་བཀག་འགོག་བྱེད་ཆེད་ཡིན་སྐོར་བརྗོད་འདུག འོན་ཀྱང་ཁྲིམས་གསར་དེར་སྐྱོན་བརྗོད་བྱེད་མཁན་ཚོས་ཁྲིམས་དེ་ནི་ཆབ་སྲིད་ཀྱི་ཞིབ་བཤེར་ཞིག་ཡིན་པ་དང་། ཁྲིམས་དེས་ཧོང་ཀོང་གི་སྙན་གྲགས་ཆེ་བའི་གློག་བརྙན་བཟོ་སྐྲུན་གྱི་སྡེ་ཚན་ལ་དོ་ཕོག་ཆེན་པོ་གཏོང་ངེས་པ། གློག་བརྙན་འཁྲབ་ཁྲིད་པ་རྣམས་ཀྱི་སྨྲ་བརྗོད་རང་དབང་ལ་ཚད་བཀག་བཟོ་རྒྱུ་ཡིན་པ་མ་ཟད། ཞེད་སྣང་གི་ཁོར་ཡུག་གཅིག་བསྐྲུན་རྒྱུ་ཡིན་སྐོར་བརྗོད་བཞིན་འདུག །

གསར་འགོད་པ་སྐལ་བཟང་དོན་གྲུབ།