གྲོས་ཚོགས་ཚོགས་དུས་བརྒྱད་པའི་ལས་ཉིན་གསུམ་པར་དཔལ་འབྱོར་དང་ཤེས་རིག་ལས་ཁུངས་ཀྱི་ལས་བསྡོམས་དང་འབྲེལ་བའི་བགྲོ་གླེང་གནང་།  

ཟླ་འདིའི་ཚེས་༡༣ ་ཉིན་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་གསུམ་པ་དེ་དཔལ་ལྡན་ཚོགས་གཞོན་དབུ་བཞུགས་ཐོག་དབུ་འཛུགས་གནང་ནས་དཔལ་འབྱོར་ལས་ཁུངས་ཁྱབ་ཁོངས་དང་བཅས་པའི་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་ཀྱི་ལས་རིམ་ཐོག་ཕེབས་སོང་།

བགྲོ་གླེང་སྐབས་སྤྱི་འཐུས་རྣམ་པས་ཡིད་ཆེས་དགེ་རྩ་དང་སྤྱི་ཚོགས་ཡར་རྒྱས་ཐེབས་རྩའི་སྐོར་དང་། ཕྱི་རྒྱལ་ཡུལ་གྲུ་ཁག་ནས་དཔྱ་དངུལ་འབུལ་མཁན་དང་དཔྱ་དངུལ་ལག་དེབ་ཆག་ཡང་ཐོག་གསར་བཟོ་གནང་མཁན་ག་ཚོད་ཡོད་མེད། དགུན་ཚོང་སོགས་ལ་བུན་གཡར་གནང་སྟངས། དྲྭ་ཐོག་ནས་འཛིན་སྐྱོང་དང་གློག་འཕྲུལ་ཡིག་ཚགས་ཀྱི་ལས་གཞིའི་སྐོར། བརྡ་འཕྲིན་སྲིད་བྱུས་དགོས་གལ་ཆེན་པོ་ཡིན་པ།༧གོང་ས་མཆོག་གི་བཀའ་དྲིན་སོགས་ལ་བརྟེན་ནས་འཛིན་སྐྱོང་གིས་འབད་བརྩོན་གནང་ན་གངས་ལྗོངས་དཔལ་འབྱོར་ཞབས་ཞུ་ཁང་ལ་རེ་བ་ཡོད་ཀྱང་། བཀའ་ཤག་གིས་རེ་བ་མི་འདུག་ཟེར་ནས་བསྡད་པ་ནི་འཐུས་ཤོར་ཞིག་ལ་མཐོང་གི་ཡོད་པ། ནང་སྲིད་ལས་འཕྲོས་པ་གཞིས་སྤོའི་ཆེད་དུ་སྦེལ་ཀོབ་གཙོ་བོ་བྱས་པར་ས་ཆ་སྤོ་གཡུག་བྱེད་མཁན་ལ་ལེགས་སྐྱེས་ས་ཆའི་རྒྱ་ཁྱོན་ལྟར་འབུལ་རྒྱུ་དེར་བཀའ་འཁྲོལ་ཐོབ་མིན་སོགས་ཀྱི་ཐོག་ལ་དགོངས་ཚུལ་གསུངས་པ་དང་དོགས་དྲི་གནང་བར། དཔལ་འབྱོར་བཀའ་བློན་གྱིས་དྲྭ་རྒྱ་བརྒྱུད་ནས་དཔྱ་ཁྲལ་འབུལ་རྒྱུའི་ལས་གཞིར་བསྐྱར་ཞིབ་དགོས་པ་དང་གློག་འཕྲུལ་ཡིག་ཚགས་ཀྱི་ལས་གཞིའི་ཐོག་རིམ་པ་དང་པོ་དབུས་ཀྱི་ལས་ཁུངས་ཁག་གི་ནང་ལག་བསྟར་འགྲོ་མུས་ཡིན་པ་དང་། མ་འོངས་པར་རིམ་པ་གཉིས་པ་དབུས་སའི་ལས་ཁུངས་དབར་གནང་འཆར་ཡོད་པ། ཕྱི་ལོ་༢༠༢༢-༢༠༢༣ བར་ཕྱི་རྒྱལ་ཡུལ་གྲུ་ཁག་ནས་དཔྱ་དངུལ་འབུལ་མཁན་གྲངས་༡༧༠༣༤ དང་། ཕྱི་ལོ་༢༠༢༣-༢༠༢༤ ་ཕྱི་རྒྱལ་ཡུལ་གྲུ་ཁག་ནས་དཔྱ་དངུལ་འབུལ་མཁན་གྲངས་༣༠༥༨༨ ཡོད་པ་བཅས་འདས་པའི་ལོ་ངོ་གསུམ་ནང་མང་དུ་སོང་ཡོད་པ། གངས་ལྗོངས་དཔལ་འབྱོར་ཞབས་ཞུ་ཁང་གི་མ་ཤེར་བརྒྱ་ཆ་༡༧% དེ་བོད་མིའི་སྒྲིག་འཛུགས་ཀྱི་ཡིན་པ་དང་། མ་ཤེར་བདག་པོ་བརྒྱ་ཆ་༦༣% གྱིས་སྒོ་རྒྱག་དགོས་ཀྱི་འདུག་ཅེས་གསུངས་ཡོད་པ། ད་ལྟའི་གནས་སྟངས་ལ་བལྟས་ན་ཕྱི་ལོ་༢༠༢༦ ལོར་སྒོ་རྒྱག་དགོས་པའི་གནས་སུ་གྱུར་ཡོད་པ་སོགས་ཀྱི་ལན་འདེབས་བསལ་བཤད་གནང་། ས་ཆ་སྤོ་གཡུག་ཐད་བཀའ་འཁྲོལ་ཐོབ་མིན་སོགས་ཀྱི་ཐད་གླེང་སློང་མང་པོ་བྱུང་སྟབས་ད་ལྟ་སྤྱི་འཐུས་ནས་ཚོགས་ཆུང་ཟུར་འཛུགས་ཀྱིས་ཞིབ་འཇུག་བྱེད་བཞིན་ཡོད་འདུག དེ་རིང་ཚོགས་ཐུན་གསུམ་པའི་ཐོག་དཔལ་འབྱོར་ལས་ཁུངས་ཁྱབ་ཁོངས་དང་བཅས་པའི་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་གྲུབ་རྗེས།

དཔལ་ལྡན་ཚོགས་གཞོན་དབུ་བཞུགས་ཐོག་ཤེས་རིག་ལས་ཁུངས་ཁྱབ་ཁོངས་དང་བཅས་པའི་ཕྱི་ལོ་༢༠༢༣-༢༠༢༤ལོའི་ལས་བསྡོམས་སྙིང་བསྡུས་སྙན་སྒྲོན་ཞུས་པ་དང་། སྤྱི་འཐུས་རྒྱུན་ལས་ཀྱིས་ཤེས་རིག་ལས་ཁུངས་ཁྱབ་ཁོངས་དང་བཅས་པའི་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྙན་སྒྲོན་ཞུས། སྙན་ཐོའི་ནང་གསལ་གྱི་སྤྱི་འཐུས་རྒྱུན་ལས་ཀྱི་དྲི་བ་ཁག་ལ་བཀའ་ཤག་གི་ལན་འདེབས་གནང་རྗེས། ཤེས་རིག་ལས་ཁུངས་ཁྱབ་ཁོངས་དང་བཅས་པའི་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀག་ཤག་གི་ལན་འདེབས་གསལ་བཤད་གནང་བའི་ལས་རིམ་ཐོག་ལས་གཉིས་གསུམ་པ་མཇུག་བསྡུས་སོང་།

གསར་འགོད་པ། བློ་བཟང་རྒྱ་མཚོ།