གྲོས་ཚོགས་ཚོགས་དུས་བརྒྱད་པའི་ལས་ཉིན་༧ པར་ལྷན་ཁང་གཉིས་དང་བསྐྱར་བཅོས་ཁྲིམས་འཆར་དང་བཅས་པའི་བགྲོ་གླེང་།
ཕྱི་ཚེས་༡༨ ཉིན་གྲོས་ཚོགས་ཚོགས་དུས་བརྒྱད་པའི་ལས་ཉིན་༧ པའི་སྔ་དྲོར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ལས་བསྡོམས་དང་འབྲེལ་བའི་སྤྱི་ཡོངས་བགྲོ་གླེང་དང་སྤྱི་འཐུས་རྣམ་པའི་དྲི་བར་ལན་འདེབས་བཅས་གནང་ཞིང་། སྐབས་དེར་ཉེ་ཆར་ཧྥ་རན་སིའི་རྒྱལ་སར་ཡོད་པའི་འགྲེམས་སྟོན་ཁང་གཉིས་ཀྱི་ནང་། བོད་ཀྱི་དངོས་པོ་འགའ་དང་འབྲེལ་བའི་ངོ་སྤྲོད་དུ་བོད་མིང་ཚབ་ཏུ་རྒྱ་ནག་གིས་བཏགས་པའི་ཤིས་ཙང་ཟེར་བ་ཞིག་བྲིས་ཡོད་པས། དེ་ལ་ངེས་པར་དུ་ངོ་རྒོལ་དང་ཞུ་གཏུག་བྱེད་དགོས་པ། དེ་བཞིན་ཉེར་ཆར་བོད་ཀྱི་ཟློས་གར་ཚོགས་པའི་ཚོགས་ཁང་དུ་གཞི་རིམ་མི་མང་རེ་འབོད་ཚོགས་པའི་ལས་འགུལ་དབུ་འབྱེད་སྐབས་སུ་དེར་བོས་པའི་མི་ཞིག་གིས་༧གོང་ས་མཆོག་གི་དབུ་མའི་ལམ་གྱི་དགོངས་པ་འགྲེལ་ལོག་བརྒྱབས་པ་དེ་ནི་ནོར་འཁྲུལ་ཡིན་པ་དང་། བོད་དོན་རྒྱབ་སྐྱོར་བ་རྒན་པ་མང་པོ་ཞིག་ད་ཆར་བགྲེས་སོང་དུ་འགྱུར་བཞིན་ཡོད་པར་བརྟེན། ང་ཚོའི་ངོས་ནས་ཁོང་རྣམས་ལ་མུ་མཐུད་ནས་འབྲེལ་བ་བྱེད་རྒྱུ་དང་ཁོང་ཚོའི་བུ་ཕྲུག་ཚོ་མ་འོངས་པར་བོད་དོན་ཐད་རྒྱབ་སྐྱོར་ཡོང་ཐབས་བྱེད་རྒྱུ་གལ་ཆེན་པོ་ཡིན་སྐོར། ད་ལྟའི་བཀའ་ཤག་གི་ངོས་ནས་ཁོང་རྣམ་པ་འབྲེལ་བ་བྱེད་ཀྱི་ཡོད་མེད།
ལྡི་ལིའི་ནང་འདི་ལོར་བོད་ཀྱི་དུས་སྟོན་འཚོགས་ཡོད་པ་དེ་མ་འོངས་པར་ཡང་ལོ་རྟག་པར་འཚོགས་ཐུབ་ན་བོད་དོན་དྲིལ་བསྒྲགས་བྱེད་རྒྱུའི་གོ་སྐབས་ཡག་པོ་ཡིན་པ་དང་། དེ་ཡང་གཟའ་མཇུག་སྐབས་འཚོག་ཐུབ་ན་དེ་ལས་མི་མང་མང་བ་ཡོང་རྒྱུའི་རེ་བ་ཡོད་པ། ཉེ་ཆར་ཨོ་སི་ཁྲུ་ལི་ཡའི་ནང་གནས་སྡོད་སེང་གེ་ཟེར་བ་ཞིག་གིས་༧གོང་ས་མཆོག་ལ་མཚན་སྨད་ཞུས་པ་དང་བོད་མིའི་སྒྲིག་འཛུགས་གཏོར་དགོས་པ་སོགས་བརྗོད་ཡོད་པ་དེར།
མ་འོངས་པར་མི་དེ་ལ་ཉེས་ཆད་གཅོད་དགོས་པ་དང་གནས་ཡུལ་གཞུང་གི་ཁྲིམས་ལ་གཏུག་དགོས་པ། ཕྱི་དྲིལ་ཡུལ་གྲུ་ཁག་ཏུ་བོད་རིགས་སྤྱི་མཐུན་ཚོགས་པ་མང་དུ་འགྲོ་བཞིན་ཡོད་པར་བརྟེན། བོད་རིགས་སྤྱི་མཐུན་ཚོགས་པ་ཁག་ལ་དཀའ་ངལ་འཕྲད་པའི་སྐབས། དོན་གཅོད་བརྒྱུད་དཀའ་ངལ་སེལ་ཐབས་ཀྱི་ལམ་སྟོན་ཡོད་དགོས་པ་གལ་ཆེན་ཡིན་པ། ཨ་རིའི་དོན་གཅོད་ཁྱབ་ཁོངས་སུ་བོད་རིགས་འབྲེལ་མཐུད་པ་ཡོད་པ་དེའི་ངོ་བོ་དང་ལས་འགན་གསལ་བོ་དགོས་པ་གལ་ཆེན་ཡིན་པ།
རྒྱ་གར་ནང་བོད་དོན་རྒྱབ་སྐྱོར་ཚོགས་པ་ག་ཚོད་ཡོད་མེད། དང་བླང་བོད་དོན་ཞུ་གཏུག་ལས་འགུལ་ཐོག་ཤུགས་རྒྱག་དགོས་པ། ཕྱི་ལོག་ཏུ་ཡོད་པའི་རྒྱ་རིགས་དམངས་གཙོ་དོན་གཉེར་བའི་ནང་རྒྱ་གཞུང་གི་གསང་ཉུལ་བ་ཐོན་ཡོང་གི་ཡོད་པ་དང་། ཕྱི་དྲིལ་ལས་ཁུངས་ནས་དོན་གཅོད་དང་རྒྱ་རིགས་འབྲེལ་མཐུད་པ་རྣམས་ལ་མ་འོངས་པར་རྒྱ་རིགས་དམངས་གཙོ་དོན་གཉེར་བ་ཚོ་ལ་འབྲེལ་བ་མཐུད་ཕྱོགས་སྐོར་ལམ་སྟོན་གནང་ཡོད་མེད། ལྡི་ལི་འཕགས་བོད་འབྲེལ་མཐུད་ལས་ཁང་གི་ནུས་པ་ཤུགས་ཆེ་རུ་གཏོང་དགོས་པ་སོགས་ཀྱི་ཐོག་ལ་དགོངས་ཚུལ་དང་དོགས་དྲི་གནང་བར། ཕྱི་དྲིལ་བཀའ་བློན་ནས་ཧྥ་རན་སིར་བོད་མིང་རྒྱ་སྒྱུར་བྱས་པ་དེ་འབྲེལ་ཕྱག་ལས་གནང་རྒྱུ་ཡིིན་པ།༧གོང་ས་མཆོག་གིས་གང་གསུངས་པའི་དབུ་ལམ་གྱི་དགོངས་དོན་དེ་ཁ་ཞེ་གཉིས་མེད་ཡིན་པ་ལས་གཞན་རྒྱབ་མདུན་གྱི་སྐད་ཆ་གང་ཡང་མེད་པ། ད་ལྟ་རྒྱ་གར་ནང་བོད་དོན་རྒྱབ་སྐྱོར་ཚོགས་པ་༢༠ ཡོད་པ་དང་ཚོགས་མི་༡༡༩༩༥༠ཙམ་ཡོད་པ་དང་། བོད་དོན་རྒྱབ་སྐྱོར་ཚོགས་པའི་ཚོགས་མི་མང་པོ་ཞིག་ད་ཆར་བགྲེས་སོང་ཆགས་བཞིན་པ་ནི་དངོས་ཡོད་ཡིན་དུས་དེ་དག་ལ་འབྲེལ་བ་མུ་མཐུད་ནས་འབྲེལ་བ་བྱེད་བཞིན་པ།ལྡི་ལིར་བོད་ཀྱི་དུས་སྟོན་ལོ་ལྟར་འཚོག་ཐུབ་རྒྱུའི་རོགས་དངུལ་དང་ལས་མི་སོགས་ཁག་པོ་ཡིན་ཡང་། མ་འོངས་པར་འབད་རྩོད་བྱེད་རྒྱུ་ཡིན་པ། དེ་བཞིན་འདི་ལོར་བོད་ཀྱི་དུས་སྟོན་དེ་གཟའ་མཇུག་སྐབས་སུ་ཚོགས་མ་ཐུབ་པ་ནི་ཨ་རིའི་གཞུང་ཚབ་མི་སྣར་དུས་ཚོད་མ་འདང་བ་སོགས་ཀྱིས་དུས་འགྱང་བྱེད་དགོས་བྱུང་བ། ཨོ་གླིང་དུ་གནས་སྡོད་༧གོང་ས་མཆོག་ལ་མཚན་སྨད་ཞུ་མཁན་དང་འབྲེལ། གྲོས་ཚོགས་ཚར་རྗེས་ཚོགས་འདུ་འཚོགས་ནས་ཐག་གཅོད་ག་རེད་བྱུང་ཡང་སྐུ་ཚབ་དོན་གཅོད་ལ་ལན་སྤྲད་ནས་ལག་བསྟར་ནན་ཏན་བྱེད་རྒྱུ་སོགས་ལན་འདེབས་གནང་སོང་།
དེའི་རྗེས་འཕྲོད་བསྟེན་ལས་ཁུངས་མ་ལག་དང་བཅས་པའི་ཕྱི་ལོ་༢༠༢༣-༢༠༢༤ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་། སྤྱི་འཐུས་རྒྱུན་ལས་ཀྱིས་འཕྲོད་བསྟེན་ལས་ཁུངས་མ་ལག་དང་བཅས་པའི་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྙན་སྒྲོན། གོང་གསལ་སྙན་ཐོ་ནང་གསལ་སྤྱི་འཐུས་རྒྱུན་ལས་ཀྱི་དྲི་བ་ཁག་ལ་བཀའ་ཤག་གི་ལན་འདེབས་གསལ་བཤད། འཕྲོད་བསྟེན་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་ཡོངས་བགྲོ་གླེང་དང་བཀའ་ཤག་གི་ལན་འདེབས་གསལ་བཤད་གནང་སོང་ལ། སྐབས་དེར་རྒྱ་གར་ལྷོ་ཕྱོགས་སུ་མཚོན་ན་ནད་པ་མང་པོ་ཞིག་མགོ་སྐོར་བསླུ་བྲིད་ཐེབས་ནས་དཔེ་ཤག་ཕོན་ཆེན་ཤོར་བཞིན་པས། ཆེད་ལས་སྨན་ཁང་ཁག་ཏུ་འབྲེལ་བ་འཛུགས་རྒྱུ་གལ་ཆེ་བ། ཟས་བཅུད་ཀྱི་འཕྲོད་བསྟེན་སྐོར་ལས་འགུལ་རྒྱ་ཆེན་པོ་སྤེལ་དགོས་པ། སེམས་ཁམས་འཕྲོད་བསྟེན་ཐད་དཀའ་ངལ་སེལ་ཐབས་ག་རེ་བྱས་མིན་དང་ནང་ཆོས་ཀྱི་ཐབས་ལམ་ལ་བརྟེན་ནས་བྱས་ཡོད་མེད།
འཕྲོད་བསྟེན་བཀའ་བློན་གཞུང་འབྲེལ་ཕྱོགས་ཕེབས་སྐབས་ལས་དོན་སྤེལ་ཕྱོགས།བུད་མེད་ཟླ་མཚན་དང་འབྲེལ་བུད་མེད་ཙམ་མིན་པར་སྐྱེས་པ་དང་ཚང་མར་ཤེས་རྟོགས་ཡོང་བའི་ལས་དོན་སྤེལ་དགོས་པ། གཞུང་ཞབས་རྣམས་དུས་མིན་གྲོངས་པ་སོགས་ལ་བརྟེན་ནས་ཁོང་རྣམས་ཀྱི་འཕྲོད་བརྟེན་ལ་ལྟ་སྐྱོང་གནང་དགོས་པ། རིན་ཆེན་རིལ་བུ་འཚོང་ཕྱོགས། སྨན་རྩིས་ཁང་གི་ལས་བྱེད་རྣམས་ཀྱི་གླ་ཕོགས་སོགས་ཀྱི་སྐོར་དོགས་འདྲི་དང་། འཕྲོད་བསྟེན་བཀའ་བློན་ནས་དེ་འབྲེལ་གྱི་ལན་འདེབས་གནང་གྲུབ་རྗེས། སྲིད་སྐྱོང་ནས་བཅའ་ཁྲིམས་བསྐྱར་བཅོས་ཁྲིམས་འཆར་ཞིག་ཁྱེར་འདུག་པ་དང་། དེ་ཡང་གྲོས་ཚོགས་སྐབས་སྔོན་མར་སྤྱི་འཐུས་རྒྱུན་ལས་ཀྱི་ཚོགས་ཆུང་ནས་ཁྱེར་ཡོང་བ་ཡིག་ཆ་ཨང་༣༡ དོན་ཚན་སོ་བདུན་པར་བོད་མི་མང་སྤྱི་འཐུས་ལྷན་ཚོགས་གྲུབ་ཆའི་ཁྲིམས་འཆར་དེའི་ཐོག་ཇོ་ནང་གི་སྤྱི་འཐུས་གཉིས་སྣོན་རྒྱུའི་བསྐྱར་བཅོས་ཀྱི་ཁྲིམས་འཆར་ཞིག་དང་། དོན་ཚན་རེ་གསུམ་ནང་གསེས་གཉིས་པའི་ག་པར། སྔར་གྱི་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ལོ་དུས་སུམ་ཅུ་ནས་བཞི་བཅུ་བར་ཕར་འགྱང་གི་བསྐྱར་བཅོས་ཁྲིམས་འཆར་ཞིག་བཅས་ཁྱེར་འདུག་ལ། ཁྲིམས་འཆར་དང་པོ་དེ་དུས་དང་སྐབས་སུ་མ་བབས་པ་སོགས་ཀྱི་དགག་པ་བྱུང་བས། རྗེས་སུ་མང་མོས་ཀྱིས་ཚུད་པར་བརྟེན་དེའི་ཐོག་བརྗོད་པ་དང་པོར་བགྲོ་གླེང་གནང་སོང་།
ཁྲིམས་འཆར་གཉིས་པ་དེ་ལའང་གྲོས་སྐབས་སྔོན་མར་དེ་རང་ཁྱེར་ཡོད་པས། དེ་དུས་བཀའ་ཤག་གིས་བཟོ་བཅོ་ཁྲིམས་འཆར་ཁྱེར་ཏེ་བཀག་པ་དང་། དེ་རིང་སྔར་གྱི་དེ་རང་ཁྱེར་ཡོང་བས་ཀུན་སློང་ལ་དོགས་པ་ཡོད་པ་སོགས་ཀྱིས་དགག་བྱ་བྱུང་ཡང་མཐར་མང་མོས་ཀྱིས་ཚུད་ཅིང་། བརྗོད་པ་དང་པོའི་ཐོག་བགྲོ་གླེང་གནང་སོང་། སྐབས་དེར་དོན་ཚན་སོ་བདུན་པ་སླེབ་དགོས་དོན། ཇོ་ནང་ཆོས་རྒྱུད་ཀྱི་བང་རིམ་སྒྲིག་སྟངས། ཕྱོགས་བཞུགས་སྤྱི་འཐུས་བཞག་སྟེ་ཇོ་ནང་གཅིག་པུའི་ཁྲིམས་འཆར་འཁྱེར་དགོས་དོན། སྤྱི་འཐུས་ཤིག་གིས་བཀའ་བློན་བསྐོ་མི་བསྐོ་དེ་སྲིད་སྐྱོང་གི་དབང་ཚད་ཡིན་ཡང་། སྲིད་སྐྱོང་གི་རྒྱབ་སྐྱོར་བ་ཚོས་མང་ཚོགས་ནང་སྲིད་སྐྱོང་གིས་བཀའ་བློན་བསྐོ་གི་མི་འདུག་ཅེས་མ་ལབ་པར། དེ་ལས་ལྡོག་སྟེ་གྲོས་ཚོགས་འཐུས་མི་ཚོས་བཀའ་བློན་བསྐོ་ཡི་མེད་པ་དང་། ལྷག་པར་དུ་ཆོས་རྒྱུད་སྤྱི་འཐུས་ཚོས་བཀག་འདུག་ཅེས་ལབ་ཀྱི་ཡོད་པར་བརྟེན། སྲིད་སྐྱོང་གིས་བཀའ་བློན་བསྐོ་བའི་དབང་ཚད་སྲིད་སྐྱོང་ལ་ཡོད་པ་དང་བཀའ་བློན་བསྐོ་ཡི་མེད་ཅེས་གསུངས་ནས་གསལ་པོ་བཟོ་བའི་རེ་སྐུལ་ཞུས་པར། སྲིད་སྐྱོང་གིས་གཅིག་ནི་དེ་རིང་འོས་མི་བཏོན་པ་ཡིན་ན། ཡང་གྲོས་ཚོགས་ཀྱི་འཐུས་མི་ཚོ་ཡར་ལངས་ནས་མར་འགྲོ་སྲིད་པས་བཀའ་ཤག་དང་གྲོས་ཚོགས་བར་གདོང་ཐུག་ཐེབས་ས་རེད་དྲན་སོང་ཞེས་དང་། གཉིས་ནི་ལོ་གཅིག་དང་ཕྱེད་ཀ་མ་གཏོགས་ལྷག་མེད་པས་ལོ་གཅིག་དང་ཕྱེད་ཀའི་ནང་།
ད་ལྟའི་ལས་གཞི་མང་པོ་ཞིག་འགྲོ་བསྡད་ཡོད་པ་དང་། ལས་གཞི་མང་པོ་འགྲོ་སྡོད་པའི་སྐབས་སུ། བཀའ་བློན་གསར་པ་ཞིག་བསྐོས་པ་ཡིན་ན། བཀའ་བློན་དེས་ལས་ཀ་དེ་རྒྱུས་ལོན་བྱེད་པར་ཟླ་བ་གསུམ་བཞི་འགོར་འགྲོ་ཡི་ཡོད་པ་དང་། ད་ལྟ་(NDI)སོགས་ལས་གཞི་འགྲོ་བསྡད་པ་དེ་ཚོ་ཡང་རྒྱུས་ལོན་བྱེད་དགོས་ཀྱི་ཡོད་པས་དེར་དོ་ཕོག་འགྲོ་རྒྱུའི་ཉེན་ཁ་ཞིག་ཆགས་ཡོད་པ། གནས་དོན་གཞན་པ་ད་ནས་ལོ་གཅིག་དང་ཕྱེད་ཀ་ཙམ་མ་གཏོགས་ལྷག་མེད་དུས། སུ་འདྲ་ཞིག་བཀའ་བློན་ལ་བསླེབས་པ་ཡིན་ཡང་། དགུང་ལོ་ཆུང་བ་འདྲ་ཞིག་ཡིན་ན། སྐབས་གཉིས་བྱེད་རྒྱུའི་འདོད་པ་ཡོད་པས་ལོ་གཅིག་དང་ཕྱེད་ཀ་དེ་སྐབས་གཅིག་བརྩི་འགྲོ་དུས། དེ་སྔར་འབྲེལ་བ་བྱེད་སའི་དོ་བདག་ཚོས་ད་ལྟ་མ་བཏོན་ན་འགྲིག་ས་རེད་ཅེས་གསུང་གི་ཡོད་པ། སྲིད་སྐྱོང་གི་ངོས་ནས་ལོ་གཅིག་དང་ཕྱེད་ཀ་མ་གཏོགས་ལྷག་མེད་པ། ད་བར་ལོ་གསུམ་དང་ཕྱེད་ཀའི་ནང་འགན་མང་པོ་ཁྱེར་བའི་རྒྱུ་མཚན་ལ་བརྟེན་ནས། ལས་དོན་ལ་འཐུས་ཤོར་ནི་གང་ཡང་བཏང་མེད་པ། ད་ལྟ་ལོ་གཅིག་དང་ཕྱེད་ཀའི་ནང་ལས་དོན་མུ་མཐུད་འགྲོ་ཐུབ་ཀྱི་རེད་བསམ་པའི་དོན་དག་རྒྱུ་མཚན་གསུམ་ལ་བརྟེན་ནས་དེ་རིང་ཁྱེར་མེད་ཅེས་གསུངས་སོང་། དེའི་རྗེས་སྤྱི་འཐུས་རྡོ་རྗེ་ཚེ་བརྟན་གྱིས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཁྲིམས་འཆར་དང་འབྲེལ་བའི་བསྐྱར་ཞིབ་ཆེད་འཛུགས་ཚོགས་ཆུང་གི་ལས་བསྡོམས་སྙན་སྒྲོན་དང་འབྲེལ། དེའི་བརྗོད་པ་དང་པོའི་ཐོག་བགྲོ་གླེང་གནང་སོང་།
གསར་འགོད་པ། བསོད་ནམས་ཕུན་ཚོགས། བློ་བཟང་རྒྱ་མཚོ།
