གྷུ་གྷལ་ད་དུང་ཡང་གྲག་འགུལ་མི་འདུག

ཕྱི་ཟླ་༡༡ པའི་ཚེས་༡༠ ཉིན་བོད་ཀྱི་གྲོང་གསེབ་ཁག་༡༠༠༠ ལྷག་གི་ས་མིང་བོད་ཡིག་གི་ལམ་ནས་གྷུ་གྷལ་(Google) ས་ཁྲར་ནང་འཇུག་བྱས་པ་དང་བསྟུན། གྷུ་གྷལ་དྲ་ལམ་དོ་དམ་ཁང་ནས་ས་ཁྲའི་སྟེང་ལ་བོད་སླར་གསོ་ཞེས་པའི་ལས་འགུལ་ལག་བསྟར་བྱེད་དགོས་པའི་གསར་འགོད་གསལ་བསྒྲགས་ཤིག་རྒྱ་གར་དྷ་རམ་ས་ལ་དང་སུ་སིད་གྲོང་ཁྱེར་འཛུ་རིག་གཉིས་སུ་སྤེལ།

ཡོ་རོབ་བོད་ཀྱི་གཞོན་ནུའི་མཐུན་ཚོགས་ཀྱིས་ལོ་འདིའི་ཟླ་བ་༢ པར་གཞུང་འབྲེལ་མ་ཡིན་པའི་ཚོགས་པ་ཆེ་གྲས་ཁག་ཅིག་གིས་རྒྱབ་སྐྱོར་འོག་ས་ཁྲའི་སྟེང་ལ་བོད་སླར་གསོ་ཡོང་སླད་དགོས་འདུན་བཏོན་པའི་ཐད། སྤྱི་ཚོགས་བརྒྱུད་ལམ་འདྲ་མིན་ནས་མི་གྲངས་ས་ཡ་༥.༥ ལྷག་གིས་གྷུ་གྷལ་ཚོགས་པས་ང་ཚོའི་དགོས་འདུན་ལ་བརྩི་འཇོག་གི་རྣམ་འགྱུར་ལ་སྒུག་བཞིན་ཡོད། ང་ཚོ་མཐུན་ཚོགས་ཀྱི་ངོས་ནས་གྲོང་གསེབ་༡༠༠༠ ལྷག་གི་མིང་བོད་ཡིག་གི་ནང་དུ་ཁ་སྣོན་གྱིས་གྲག་འགུལ་མེད་བའི་དྲ་རྒྱའི་བརྒྱུད་ལམ་དོ་དམ་པ་ཆེ་ཤོས་གྷུ་གྷལ་(Google) ལ་བརྡ་ལན་སློང་བཞིན་ཡོད། ཡོ་རོབ་བོད་ཀྱི་གཞོན་ནུ་མཐུན་ཚོགས་ཀྱི་ངོས་ནས་བོད་ཀྱི་ས་གནས་ཁག་གི་ས་མིང་དང་གྲོང་མིང་༡༠༠༠ ལྷག་ཅིག་ངེད་ཅག་གི་དྲ་ཚུགས་http://www.tibetonthemap.com ནང་དུ་གསར་སྣོན་གྱི་གྷུ་གྷལ་ལ་མུ་མཐུད་ས་ཁྲའི་སྟེང་ལ་བོད་སླར་གསོའི་ལས་འགུལ་འདིར་ངོས་ལེན་ཡོང་བའི་དགོས་འདུན་འདོན་བཞིན་ཡོད། ཡོ་རོབ་གཞོན་ནུས་གོང་གི་དྲ་ཚིགས་ཀྱི་ནང་དུ་ཁྱོན་བསྡོམས་པས་བོད་ཀྱི་གྲོང་སྡེ་ཆིག་སྟོང་དྲུག་བརྒྱ་དྲ་ལམ་དུ་བོད་ཡིག་གི་ནང་མཐོང་ཐུབ་པ་བཟོས་ཡོད། དེ་ཡང་ངའི་ཚོགས་པའི་དམིགས་ཡུལ་གཙོ་བོ་གྷུ་གྷལ་དྲ་ལམ་དོ་དམ་ཁང་གིས་ཆེད་གཉེར་གྱི་ས་ཁྲའི་ཐོག་བོད་ཀྱི་ས་མིང་རྒྱ་ཡིག་དང་དབྱིན་ཡིག་གཉིས་པོ་མ་ཡིན་པར་བོད་ཡིག་ཐོག་གཞུང་འབྲེལ་ངོས་ལེན་བརྒྱུད་འཇོག་ཐུབ་པ་བྱ་རྒྱུ་དེ་ཡིན།

ད་ལྟའི་ཆར་དྲ་ལམ་ས་ཁྲའི་སྟེང་ལ་བོད་ཡིག་ཡོད་པ་ཞིག་མེད་རྐྱེན། གྷུ་གྷལ་དྲ་ལམ་དོ་དམ་ལྷན་ཁང་གིས་གནད་དོན་འདིར་འགྱུར་བ་གཏོང་བའི་མཐུན་རྐྱེན་བསྐྲུན་དགོས། མ་མཐའ་ཡང་སི་རེ་ལེ་ཁུའི་ཡིག་རིགས་སོགས་བཀོད་ཟིན་པའི་དྲ་ལམ་ས་ཁྲའི་ནང་ཅི་ཕྱིར་བོད་ཡིག་འགོད་མི་ཆོག་གམ།།