ངའི་མི་ཚེ་དང་། བོད་མིའི་ལས་དབང་།

བོད་ཀྱི་དཔེ་མཛོད་ཁང་ནས་ལོ་རྒྱུས་དེབ་ཕྲེང་༦༠ པའི་ངོ་བོར་པར་སྐྲུན་བྱས་པའི་ནུབ་ཁང་བྱམས་པ་བསྟན་འཛིན་གྱིས་རྩོམ་སྒྲིག་བྱས་པའི་དངོས་གྲུབ་དབང་འདུས་ཀྱི་མི་ཚེའི་ལོ་རྒྱུས་དཔེ་དེབ་དེའི་ནང་། ནི་བོད་ས་རྒྱ་ལག་ཏུ་ཤོར་རྗེས་བཙན་བྱོལ་དུ་གྱུར་བའི་བོད་མི་དཀྱུས་མ་ཞིག་གི་མི་ཚེའི་ལོ་རྒྱུས་ཡིན་ཞིང་། བོད་མི་དཀྱུས་མ་དེ་ནི་བོད་ཕྲུག་ཁྱིམ་སྡེའི་ནང་བོད་ཕྲུག་ན་གཞོན་ཚོའི་ཤེས་ཡོན་སློབ་གསོའི་ཐོག་བློ་གཅིག་སེམས་གཅིག་གིས་ཞབས་འདེགས་ཧུར་ཐག་ཞུ་མཁན་སྐུ་ངོ་དངོས་གྲུབ་དབང་ འདུས་ཀྱི་སྐུ་ཚེའི་ལོ་རྒྱུས་དེབ་འདིའི་ནང་རང་གི་བརྩེ་བའི་ཕ་མ་སྤུན་མཆེད་དང་། ཕ་ཡུལ། བཙན་བྱོལ་དུ་ཕེབས་དགོས་བྱུང་བའི་སྡུག་བསྔལ། ད་དུང་ལམ་བར་དུ་ལུས་སེམས་གཉིས་ལ་དཀའ་ངལ་ཇི་ཕྲད་སོགས་བོད་པ་བཙན་བྱོལ་བ་མི་ཐོག་དང་པོ་ཚོའི་ཐུན་མོང་གི་མྱོང་བ་གླེང་འདུག དེ་བཞིན་རང་ཉིད་སྒེར་གྱི་མི་ཚེའི་ལོ་རྒྱུས་དང་མཉམ་དུ་བོད་ཕྱི་ནང་དུ་བྱུང་བའི་གནས་ཚུལ་གལ་ཆེན་མང་དག་ཅིག་མི་རབས་རྗེས་མ་ཚོའི་ཤེས་རྟོགས་སླད་གོ་རིམ་ལྡན་པར་བཀོད་ཡོད་པས་དེབ་འདི་ཕྱོགས་གཅིག་ནས་བཤད་ན་རྒྱ་མི་དམར་པོས་བོད་ལ་བཙན་འཛུལ་བྱེད་འགོ་བཙུགས་པ་ནས་དེང་དུས་བར་གྱི་གཞིས་བྱེས་བོད་མི་ཡོངས་རྫོགས་ཀྱི་ལོ་རྒྱུས་དེབ་ཅིག་ཀྱང་ཆགས་ཡོད་པ་རེད།།