ངོ་དེབ་ཚོང་ལས་ཁང་ལ་ཁྲིམས་ཀྱི་སྟངས་འཛིན་དགོས་སྐོར་བརྗོད་འདུག 

ཨ་རིའི་གྲོས་ཚོགས་ནང་དུ་ངོ་དེབ་ཚོང་ལས་ཁང་གི་ལས་བྱེད་ཟུར་པ་ཞིག་གིས། ཚོང་ལས་ཁང་དེའི་དྲ་ཐོག་བརྒྱུད་ལམ་དང་མཉེན་ཆས་ཁག་གིས་ཕྲུ་གུའི་སེམས་ཁམས་ལ་གནོད་ཀྱི་ཡོད་པ་མ་ཟད། འཛམ་གླིང་ནང་དྲག་སྤྱོད་དང་འགལ་ཟླ་བཟོ་ཡི་ཡོད་པ། དེ་བཞིན་མང་གཙོར་གཏོར་བཤིག་གཏོང་གི་ཡོད་པས་ཁྲིམས་ཐོག་ནས་སྟངས་འཛིན་བྱེད་པའི་ཛ་དྲག་དུས་ལ་སླེབས་ཡོད་སྐོར་བརྗོད་འདུག 

ཟླ་༡༠ པའི་ཚེས་༦ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཚེས་༥ ཉིན་ཨ་རིའི་གྲོས་ཚོགས་ཀྱི་ཚོང་དོན་ཚོགས་ཆུང་གི་མདུན་དུ། ངོ་དེབ་ཚོང་ལས་ཁང་གི་ལས་བྱེད་ཟུར་པ་ལྕམ་ཧྥེ་རན་སེས་ཧཱོ་གྷན་གྱིས་བདེན་དཔང་གཏམ་བཤད་དང་དྲི་བར་ལན་འདེབས་བྱས་ཡོད་པ་རེད་འདུག 

ལྕམ་ཁོང་གིས་འབར་མ་དང་ཨཱི་ཐོ་པཱི་ཡའི་ནང་དུ་མི་རིགས་བར་གྱི་དམར་གསོད་ཀྱི་དྲག་སྤྱོད་དང་། དེ་བཞིན་རྒྱ་ནག་དང་ཨི་རན་གྱིས་རྒྱལ་སྤྱིའི་ནང་དུ་ངོ་དེབ་བརྒྱུད་སོ་མྱུལ་དང་གནོན་ཤུགས་ཀྱི་བྱེད་ལས་སོགས་ནི་ངོ་དེབ་བརྒྱུད་ནས་བྱུང་བའི་གནད་དོན་ཡིན་པ་དང་། དེའི་ཐོག་ངོ་དེབ་ཚོང་ལས་ཁང་གི་མཉེན་ཆས་གཞན་ཨན་སེཌ་གྷེ་རམ་(Instagram) སོགས་ཀྱི་ཐོག་ཏུ་བརྙན་པར་སོགས་ཀྱི་ཐོག་ཏུ་སྟངས་འཛིན་མེད་རྐྱེན། ཕྲུ་གུ་དང་གཞོན་སྐྱེས་ཀྱི་སེམས་ཁམས་སུ་འགྲན་སེམས་དང་འཁོན་འཛིན་སྐྱེས་བ། བློ་ཞུམ་པ་སོགས་ཤུགས་ཆེན་སླེབས་ནས་སེམས་ཁམས་ལ་གནོད་འཚེ་ཆེན་པོ་གཏོང་གི་ཡོད་པ་དེ་ཚོང་ལས་ཁང་གིས་ཤེས་ཀྱི་ཡོད་ཀྱང་། ཁེ་བཟང་གི་དོན་དུ་གནད་དོན་དེ་རིགས་མེད་པ་བཟོ་ཆེད་དུ་དོན་ཕན་ལྡན་པའི་ལས་དོན་གང་ཡང་སྤེལ་གྱི་མེད་པས། གྲོས་ཚོགས་ནས་སྟངས་འཛིན་བྱེད་པའི་ཛ་དྲག་དུས་ལ་སླེབས་ཡོད་སྐོར་བརྗོད་འདུག 

སྐབས་དེར་གྲོས་ཚོགས་འཐུས་མི་ཚོས་གནད་དོན་དེ་དང་འབྲེལ་ནས། རྒྱལ་ཁབ་ཀྱི་བདེ་འཇགས་ཀྱི་ཚོགས་འདུ་འཚོགས་དགོས་པ་ཆགས་སྲིད་པ། ངོ་དེབ་ཚོང་ལས་ཁང་གིས་རང་གི་ཁེ་ཕན་དང་རང་མཐོང་ལ་གནོད་འཚེ་བཏང་བ་དེ་ནི་མི་རབས་ནས་མི་རབས་ལྷག་རྒྱུ་ཡིན་པས་འགྱུར་བ་གཏོང་བའི་དུས་ལ་སླེབས་ཡོད་སྐོར་བརྗོད་འདུག དེ་བཞིན་ངོ་དེབ་ཀྱིས་ཕྲུ་གུའི་སེམས་ཁམས་སོགས་ལ་གནོད་འཚེ་གཏོང་གི་ཡོད་པའི་གནད་དོན་དང་འབྲེལ་ནས་ཛ་དྲག་གི་ལས་དོན་སྤེལ་བའི་དུས་ལ་སླེབས་ཡོད་སྐོར་བརྗོད་འདུག 

ངོ་དེབ་ཚོང་ལས་ཁང་གིས་བསྒྲགས་གཏམ་ཞིག་སྤེལ་ནས་ཚོང་ལས་ཁང་དེའི་ལས་བྱེད་ཟུར་པ་ཁོང་གིས་གནད་དོན་མང་པོ་ཞིག་ལ་སྐྱོན་མེད་སྐྱོན་འཛུགས་བྱས་པར་ངོས་ལེན་མེད་པ་དང་། ཁོང་ནི་ཚོང་ལས་ཁང་གི་ལས་སྣེ་མཐོ་བའི་ཚོགས་འདུ་ཁག་ལ་ཡོང་མྱོང་མེད་པས། གནད་དོན་དེ་རིགས་ཐོག་ལ་ཐག་གཅོད་གང་བྱས་སྐོར་ཤེས་ཀྱི་མེད་སྐོར་བརྗོད་འདུག འོན་ཀྱང་དྲ་རྒྱ་སྟངས་འཛིན་གྱི་ཁྲིམས་བསྐྱར་བཅོས་མཐའ་མ་དེ་ལོ་ངོ་༢༥ སྔོན་ལ་བྱས་ཡོད་པས། ཁྲིམས་བསྐྱར་བཅོས་བྱེད་པའི་དུས་ལ་བབ་པར་ངོས་འཛིན་བྱེད་ཀྱི་ཡོད་ཀྱང་། ཁྲིམས་བསྐྱར་བཅོས་ནི་གྲོས་ཚོགས་ཀྱིས་བྱེད་དགོས་པ་ལས། ཚོང་ལས་ཁང་གིས་བྱེད་པར་རེ་བ་བྱེད་མི་རུང་བས། གྲོས་ཚོགས་ཀྱིས་དེ་ལྟར་བྱེད་པའི་དུས་ལ་བབ་ཡོད་སྐོར་བརྗོད་འདུག 

ཕྱི་ལོ་༢༠༡༨ ལོར་མཉམ་འབྲེལ་རྒྱལ་ཚོགས་ཀྱིས་འབར་མའི་ནང་ཁ་ཆེ་གྲངས་ཉུང་མི་རིགས་ལ་འཁོན་འཛིན་སློང་བྱེད་ཀྱི་བརྒྱུད་ལམ་བེད་སྤྱོད་ཆེ་ཤོས་ངོ་དེབ་ཡིན་ཡང་། ངོ་དེབ་ཚོང་ལས་ཁང་གིས་གནད་དོན་དེ་རིགས་འཕེལ་རྒྱས་འགྲོ་བར་བཀཀ་སྡོམ་བྱེད་པའི་ལས་དོན་ལ་འཐུས་ཤོར་བཏང་བའི་སྐྱོན་བརྗོད་བྱས་རྐྱེན། ཚོང་ལས་ཁང་དེས་རང་དབང་ཅན་གྱི་ཞིབ་འཇུག་ཁང་ཞིག་ལ་གནད་དོན་དེའི་ཐད་ཞིབ་འཇུག་བྱེད་པའི་ཆ་རྐྱེན་བསྐྲུན་ཡོད་པ་དང་། ཞིབ་འཇུག་སྙན་ཐོ་ཐོན་སྐབས་སུ། འབར་མའི་ནང་ཁ་ཆེ་གྲངས་ཉུང་མི་རིགས་ལ་དྲག་སྤྱོད་དངོས་སུ་བརྒྱུད་སྐུལ་བྱེད་ཆེད་ངོ་དེབ་བརྒྱུད་ལམ་བེད་སྤྱོད་བྱས་ཡོད་ཀྱང་། ཚོང་ལས་ཁང་གིས་དེ་རིགས་བཀག་འགོག་ཡོང་ཆེད་འབད་བརྩོན་གང་ཡོང་བྱས་མེད་སྐོར་དང་། ཕྱི་ལོ་༢༠༢༠ ལོའི་འབར་མའི་རྒྱལ་ཡོངས་གྲོས་ཚོགས་འོས་བསྡུའི་སྐབས། ངོ་དེབ་ཀྱིས་དོ་དམ་ནན་པོ་བྱེད་དགོས་སྐོར་འཁོད་ཡོད་པ་རེད། དེ་བཞིན་རྒྱ་གར་ནང་དུ་ཡང་ངོ་དེབ་དང་དེའི་མཉེན་ཆས་ཝ་ཛེ་ཨེབ་བརྒྱུད་ནས་གནས་ཚུལ་རྫུན་མ་ཁྱབ་སྤེལ་དང་། ཁ་ཆེར་འཁོན་སེམས་བསླངས་བ་སོགས་བྱས་ཡོད་པའི་གནས་ཚུལ་དང་། དེ་བཞིན་དབང་ཤུགས་ལྡན་པའི་སྲིད་དོན་མི་སྣ་ཁག་ཅིག་གིས་ངོ་དེབ་བརྒྱུད་ནས་གནས་ཚུལ་རྫུན་མ་དང་ཁ་ཆེ་མི་རིགས་ལ་འཁོན་སེམས་སློང་བའི་སྐད་ཆ་བཤད་ཡོད་ཀྱང་། དེ་རིགས་ཆེད་དུ་མངགས་ནས་བཀག་འགོག་བྱས་མེད་པའི་གནས་ཚུལ་ཐོན་ཡོད་པ་རེད།

དེ་ཡང་ཨ་རི་གཙོས་པའི་རྒྱལ་སྤྱིའི་ནང་ངོ་དེབ་ཚོང་ལས་ཁང་གི་བརྒྱུད་ལམ་དང་མཉེན་ཆས་རྣམས་ཀྱི་ཤུགས་རྐྱེན་ཚད་ལས་བརྒལ་བ་ཆེ་རུ་འགྲོ་བཞིན་ཡོད་པས། དེར་ཁྲིམས་ཀྱི་སྟངས་འཛིན་ནམ་ཚོང་ལས་ཁང་དེ་ཁ་འཐོར་གཏོང་དགོས་པའི་དགོས་འདུན་དང་བསམ་ཚུལ་འཛིན་མཁན་མང་པོ་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།