ཆབ་སྲིད་བཙོན་པ་ཞིག་གློད་གྲོལ།
རྒྱ་གཞུང་གིས་བོད་དོན་ལས་འགུལ་སྤེལ་བའི་ཉེས་མིང་འོག་ལོ་གསུམ་གྱི་བཙོན་འཇུག་ཁྲིམས་བཅད་པའི། ཁམས་དཀར་མཛེས་རྫོང་ནས་ཡིན་པའི་ཆབ་སྲིད་བཙོན་པ་བསོད་ནམས་ཆོས་རྒྱལ་ཉེ་ཆར་གློད་གྲོལ་ཐོབ་ཡོད་པ་རེད།
དེ་ཡང་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཕྱི་ལོ་༢༠༡༡ ལོར་ཁམས་དཀར་མཛེས་རྫོང་ཐོག་ཏུ་བསོད་ནམས་ཆོས་རྒྱལ་གྱིས་བོད་ལ་རང་དབང་དགོས་ཞེས་ཞི་བའི་ངོ་རྒོལ་སྐད་འབོད་གནང་སྐབས་རྒྱ་ནག་གི་ཉེན་རྟོག་པས་འཛིན་བཟུང་བྱས་རྗེས། དཀར་མཛེས་རྫོང་འབྲིང་རིམ་མི་དམངས་ཁྲིམས་ཁང་གིས་རྒྱལ་ཁབ་ཁ་བྲལ་གྱི་ཉེས་མིང་བཙུགས་ནས་ཁོང་ལ་ལོ་གསུམ་གྱི་ཁྲིམས་ཐག་བཅད་དེ། ཁྲིན་ཏུའུ་གྲོང་ཁྱེར་གྱི་ཉེ་འཁྲིས་སུ་ཡོད་པའི་མན་ཡངས་བཙོན་ཁང་ནང་བཙོན་འཇུག་བྱས་ཡོད་པ་རེད།
འོན་ཀྱང་ཁོང་གི་ཁྲིམས་ཐག་གི་དུས་ཡུན་ཚང་རྒྱུར་ཟླ་བ་བདུན་ཙམ་ཡོད་པའི་སྔོན་ཏེ་ཟླ་འདིའི་ཕྱི་ཚེས་༧ ཉིན་གློད་གྲོལ་བཏང་ཡོད་འདུག་པ་དང་། ཁོང་བཙོན་གྲོལ་ཐོབ་ནས་ཕྱིར་རང་ཁྱིམ་དུ་ཡོང་སྐབས་ཉེ་འཁོར་གྱི་ས་གནས་བོད་མི་ཚོས། ཁོང་གི་ལས་དོན་ལ་རྒྱབ་སྐྱོར་དང་རྗེས་སུ་ཡི་རངས་མཚོན་ཕྱིར་མཇལ་དར་བསྒྲོན་པས་མཚོན་ཕེབས་བསུ་ཟབ་རྒྱས་ཞུས་ཡོད་པ་རེད་འདུག་ལ། རྩ་བས་རྒྱ་གཞུང་གིས་དེ་སྔོན་ཡང་བཙོན་འཇུག་གི་དུས་ཡུན་མ་ཚང་བའི་སྔོན་ནས་བོད་མི་ཁག་ཅིག་གློད་གྲོལ་བཏང་ཡོད་པ་རེད།
