ཆབ་སྲིད་བཙོན་ཟུར་དོན་གྲུབ་དབང་ཆེན་ནོ་སྦེལ་ཞི་བདེ་གཟེངས་རྟགས་ཀྱི་འོས་མིའི་གྲས་སུ་མིང་འདོན་གནང་།

༢༠༢༢ ལོའི་ནོ་སྦེལ་ཞི་བདེ་གཟེངས་རྟགས་ཀྱི་འོས་མིའི་གྲས་སུ་ནོར་ཝེ་རྒྱལ་ཁབ་ཀྱི་ལྗང་གུ་ཚོགས་པའི་གྲོས་ཚོགས་འཐུས་མི་རཱ་སི་མ་ ཧོན་སེམ་(Rasmus Hansson) གྱིས་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་མིང་འདོན་གནང་ཡོད་པ་རེད།

ཟླ་འདིའི་ཚེས་༣ ཉིན་ནོར་ཝེ་རྒྱལ་ཁབ་ཀྱི་ལྗང་གུ་ཚོགས་པའི་གྲོས་ཚོགས་འཐུས་མི་རཱ་སི་མ་ ཧོན་སེམ་ (Rasmus Hansson) གྱིས་ཡོངས་ཁྱབ་འཕྲིན་ཡིག་ཅིག་གནང་ཡོད་པ་དང་། “དོན་གྲུབ་དབང་ཆེན་ནི་ཞི་བའི་ངང་བོད་ཀྱི་འགྲོ་བ་མིའི་ཐོབ་ཐང་རྩོད་ལེན་གནང་མཁན་ཞིག་ཡིན་པའི་ཆ་ནས་འདི་ལོའི་ནོ་སྦེལ་ཞི་བདེ་གཟེངས་རྟགས་ཀྱི་འོས་མིའི་གྲས་སུ་མིང་འདོན་གནང་འོས་པ་དང་འོས་བབ་ཡོད་པ་ཞིག་རེད་”ཅེས་བརྗོད་འདུག གྲོས་ཚོགས་འཐུས་མི་ཁོང་ནི་བོད་རང་དབང་ཆེད་རྒྱབ་སྐྱོར་གནང་མཁན་ནོར་ཝེ་གྲོས་ཚོགས་ཀྱི་ལྗང་གུ་ཚོགས་པའི་ཚོགས་མི་ཞིག་ཡིན་པ་རེད།

དོན་གྲུབ་དབང་ཆེན་གྱིས་༢༠༠༨ ལོར་བོད་མི་ཚོར་བཅར་འདྲི་བྱས་ཏེ་བོད་ནང་གི་དངོས་ཡོད་གནས་སྟངས་འཇིགས་བྲལ་ཞེས་པའི་གློག་བརྙན་བཟོ་སྐྲུན་བྱས་སྟབས། རྒྱ་ནག་གཞུང་གིས་ལོ་དྲུག་རིང་བཙོན་འཇུག་བྱས་པ་དང་། ༢༠༡༤ ལོའི་ཕྱི་ཟླ་༦ ཚེས་༥ ཉིན་མཚོ་སྔོན་ཟི་ལིང་བཙོན་ཁང་ནས་ཀློད་གྲོལ་བཏང་། ༢༠༡༧ ལོའི་ཕྱི་ཟླ་༡༢ པའི་ཚེས་༢༥ ཉིན་ཨ་རིར་སྐྱབས་བཅོལ་དུ་འབྱོར་བ་དང་། རྒྱལ་སྤྱིའི་ནང་བོད་དོན་ཞུ་གཏུག་གི་ལས་འགུལ་སྣེ་མང་སྤེལ་ཡོད་པ་རེད།

ཆབ་སྲིད་བཙོན་ཟུར་དོན་གྲུབ་དབང་ཆེན་གྱིས། “གནས་ཚུལ་དེ་གོ་ཐོས་བྱུང་བ་དང་། བཤད་མ་ཤེས་བའི་ཚོར་བ་ཞིག་དང་དེ་བཞིན་དགའ་སྤྲོ་ཆེན་པོ་བྱུང་། ཉེ་ལམ་ནོར་ཝེ་རུ་བོད་ནང་གི་ཛ་དྲག་གི་གནས་སྟངས་ངོ་སྤྲོད་དང་། ལྷག་པར་རྒྱ་ནག་གཞུང་གིས་འཆར་གཞི་ལྡན་པའི་སྒོ་ནས་མི་རིགས་རྩ་མེད་བཟོ་བའི་སྲིད་ཇུས་ལག་བསྟར་བྱེད་བཞིན་པ་སོགས་ངོ་སྤྲོད་བྱེད་རྒྱུ་བྱུང་ལ། གྲོས་ཚོགས་འཐུས་མི་ཁོང་གིས་ཀྱང་ཐུགས་སྣང་ཆེན་པོ་གནང་བྱུང་། ད་རེས་ཀྱི་གནས་ཚུལ་འདིའི་ཐོག་ནས་ཕྱི་རྒྱལ་གྱི་གནད་ཡོད་མི་སྣ་ཚོས་བོད་ཀྱི་བདེན་པ་ལ་རྒྱབ་སྐྱོར་དང་། ལྷག་པར་བོད་ནང་གི་གནས་སྟངས་ལ་ཐུགས་སྣང་གིས་རྒྱབ་སྐྱོར་གནང་བཞིན་པར་ངོས་འཛིན་བྱེད་ཀྱི་ཡོད་”ཅེས་གསར་འགྱུར་བརྒྱུད་ལམ་དུ་གསུངས་འདུག

ནོར་ཝེ་བོད་དོན་རྒྱབ་སྐྱོར་ཚོགས་པའི་ངོས་ནས་ངོ་དེབ་ཐོག་ད་རེས་སྐུ་ཞབས་ Hansson གྱིས་དོན་གྲུབ་དབང་ཆེན་ལ་དེ་ལྟ་བུའི་ཆེ་བསྟོད་ཞུས་པར་བཀྲིན་ཆེ་ཞེས་ཞུས་པ་མ་ཟད། དེ་ནི་བོད་མིའི་འཚེ་མེད་ཞི་བའི་འཐབ་རྩོད་ལ་ངོས་འཛིན་ཐོབ་པ་ཞིག་ཏུ་འགྲེལ་བརྗོད་གནང་བ་དང་ཆབས་ཅིག བོད་ནང་གི་བོད་མི་རྣམས་རྒྱ་ནག་གི་བཙན་དབང་འོག་དཀའ་སྡུག་མྱོང་བཞིན་ཡོད་ཀྱང་རྒྱལ་སྤྱིའི་ཚོགས་སྡེ་ཁག་ད་དུང་ཁུ་སིམ་པོར་བཞུགས་པར་བློ་ཕམ་ཡོད་སྐོར་གསུངས་འདུག །

གསར་འགོད་པ་ཆོས་ཉིད་འོད་ཟེར།