ཇོ་བྷ་ཌན་གྱིས་སྨན་པས་འཕྲོད་བསྟེན་གྱི་དཀའ་ངལ་ཡོད་པར་བརྗོད་ན་སྲིད་འཛིན་འོས་མི་ནས་དགོངས་པ་ཞུ་རྒྱུ་ཡིན་པར་བརྗོད།
ཟླ་འདིའི་ཚེས་༡༨ ་ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཨ་རིའི་སྲིད་འཛིན་བྷ་ཌན་ལ་རྒྱ་ནད་འགོས་ཡོད་པ་དང་། སྲིད་འཛིན་བྷ་ཌན་གྱིས་གལ་སྲིད་སྨན་པས་ཁོང་ལ་འཕྲོད་བསྟེན་གྱི་དཀའ་ངལ་ཡོད་པ་ཤེས་ན་ཁོང་ཉིད་སྲིད་འཛིན་གྱི་འོས་མི་ནས་ཕྱིར་འཐེན་བྱེད་རྒྱུ་ཡིན་ཞེས་བརྗོད་ཡོད་པའི་གནས་ཚུལ་ཐོན་འདུག
ཟླ་འདིའི་ཚེས་༡༧ ་ཉིན་ཨ་རིའི་སྲིད་འཛིན་བྷ་ཌན་འོས་བསྡུའི་དྲིལ་བསྒྲགས་ཀྱི་ཆེད་ས་གནས་(Las Vegas) ་འགྲོ་བའི་སྐབས། ཁོང་ལ་རྒྱ་ནད་(COVID-19) ནད་རྟགས་ཐོན་པར་བརྟེན། ཁྱིམ་དུ་ལོག་ནས་ཟུར་བཀར་བསྡད་དགོས་བྱུང་ཡོད་འདུག ཕྱི་ལོ་༢༠༢༢ ལོར་ཁོང་ལ་རྒྱ་ནད་ཐེངས་གཉིས་ཙམ་ཕོག་ཡོད་འདུག
བསླེབ་ལ་ཉེ་བའི་ཨ་རིའི་སྲིད་འཛིན་གྱི་འོས་བསྡུའི་ཆེད། ཆབ་སྲིད་ཚོགས་པ་གཉིས་ཀྱིས་སོ་སོའི་གཞུང་འབྲེལ་སྲིད་འཛིན་འོས་མི་དང་མ་འོངས་པའི་སྲིད་འཛིན་གཞོན་པ་བསྐོ་གཞག་བྱེད་དགོས་པ་ལྟར། ཟླ་འདིའི་ཚེས་༡༦ ་ཉིན་ཨ་རིའི་སྤྱི་མཐུན་ཚོགས་པའི་འཐུས་མི་རྒྱས་འཛོམས་དེ་མངའ་སྡེ་ཝི་སི་ཀོན་(Milwaukee) ་ལ་ཚོགས་ནས་སྲིད་འཛིན་ཟུར་པ་ཊོམ་ཕུ་ནི་ཆབ་སྲིད་ཚོགས་པའི་གཞུང་འབྲེལ་གྱི་སྲིད་འཛིན་འོས་མི་དང་། ལོ་ན་༣༩ ་ལ་སོན་པའི་གྲོས་ཚོགས་འཐུས་མི་(J.D. Vance) ་ནི་ཁོང་གི་ལས་རོགས་སུ་འདེམས་ཐོན་བྱུང་ཡོད་འདུག ཟླ་བ་རྗེས་མའི་ཚེས་༡༩ ་ཉིན་ཨ་རིའི་མང་གཙོ་ཚོགས་པའི་ཐུས་མི་རྒྱས་འཛོམས་དེ་མངའ་སྡེ་(Chicago) ་ལ་ཚོགས་ནས་མང་གཙོ་ཚོགས་པའི་གཞུང་འབྲེལ་གྱི་སྲིད་འཛིན་འོས་མི་འདེམས་རྒྱུ་རེད་འདུག
དེ་བཞིན་ཟླ་༩ པའི་ཚེས་༡༠ ་ཉིན་ཨེ་བྷི་སི་བརྙན་འཕྲིན་ལས་ཁང་གི་གོ་སྒྲིག་འོག་སྲིད་འཛིན་འོས་མི་གཉིས་ཀྱི་བགྲོ་གླེང་ཐེངས་གཉིས་པ་དེ་འཚོག་རྒྱུ་དང་། ཟླ་༡༡ པའི་ཚེས་༥ ་ཉིན་དངོས་གཞིའི་འོས་བསྡུ་དང་ཕྱི་ལོ་༢༠༢༥ ཟླ་༡ ཚེས་༢༠ ཉིན་སྲིད་འཛིན་གསར་པའི་དམ་འབུལ་གྱི་མཛད་སྒོ་འཚོག་རྒྱུ་རེད་འདུག
ཟླ་བ་སྔོན་མའི་ནང་སི་ཨན་ཨན་བརྙན་འཕྲིན་ཁང་གི་གཙོ་སྐྱོང་འོག ཨ་རིའི་སྲིད་འཛིན་འོས་མི་གཉིས་ཀྱི་བར་བགྲོ་གླེང་ཐེངས་དང་པོའི་ཐོག་སྲིད་འཛིན་བྷ་ཌན་ལ་ཕམ་ཉེས་ཆེན་པོ་བྱུང་བར་བརྟེན། ཨ་རིའི་མང་གཙོའི་ཚོགས་པ་ལ་དཔལ་འབྱོར་འདུ་འགོད་ཀྱི་རོགས་པ་བྱེད་མཁན་དང་། ལྷག་པར་དུ་མང་གཙོ་ཚོགས་པའི་འཐུས་མི་མང་པོས་ཁོང་ཉིད་སྲིད་འཛིན་གྱི་འོས་མི་ནས་དགོངས་པ་ཞུ་དགོས་པའི་འབོད་སྐུལ་ཞུས་ཡོད་ཀྱང་། ཁོང་གིས་སོ་སོའི་ཁ་གཏད་སྲིད་འཛིན་ཟུར་པ་ཊོམ་ཕུ་ཕམ་ཉེས་གཏོང་རྒྱུ་དང་འོས་མི་ནས་དགོངས་པ་ཞུ་རྒྱུ་མིན་རབས་བརྗོད་ཡོད་འདུག ཡིན་ན་ཡང་། ཉེ་ཆར་བཅར་འདྲི་ཞིག་གི་སྐབས། ཁོས་གལ་སྲིད་སྨན་པས་འཕྲོད་བསྟེན་གྱི་དཀའ་ངལ་འདུག་ཅེས་བརྗོད་ན། ཁོང་ཉིད་སྲིད་འཛིན་འོས་མི་ནས་ཕྱིར་འཐེན་བྱེད་རྒྱུ་ཡིན་ཞེས་ཨ་རིའི་མང་གཙོ་ཚོགས་པའི་སྲིད་འཛིན་གྱི་འོས་མི་ནས་ཕྱིར་འཐེན་བྱེད་སྲིད་པའི་གོ་རྒྱུ་ཐེངས་དང་པོ་བཏང་འདུག།
གསར་འགོད་པ། བློ་བཟང་རྒྱ་མཚོ།
