ཇོ་བྷ་ཌན་སྲིད་འཛིན་གྱི་འོས་མི་ནས་ཕྱིར་འཐེན་དང་སྲིད་འཛིན་གཞོན་པ་འོས་མིར་ལང་རྒྱུར་རྒྱབ་སྐྱོར།
དེ་སྔོན་ཕྱི་ཟླ་༦ ཚེས་༢༧ ཉིན་ཨ་རིའི་སྲིད་འཛིན་འོས་མི་གཉིས་བར་བགྲོ་གླེང་བྱས་རྗེས་ཨ་རིའི་མང་གཙོ་ཚོགས་པའི་མི་མང་ཁྲོད། ལས་ཐོག་སྲིད་འཛིན་ཇོ་བྷ་ཌན་ལོ་ན་ཆེ་དྲགས་པའི་རྐྱེན་གྱིས་ཁ་གཏད་འོས་མི་ལ་འགྲན་རྒྱུ་ཁག་པོ་ཡིན་པར་མཐོང་སྣང་བྱུང་ཡོད་པར་བརྟེན། ལས་ཐོག་སྲིད་འཛིན་ཇོ་བྷ་ཌན་མ་འོངས་སྲིད་འཛིན་འོས་མིའི་ཁྲོད་ནས་ཕྱིར་འཐེན་བྱེད་དགོས་པ་གཅིག་རྗེས་གཉིས་མཐུད་ཀྱིས་རྗོད་མཁན་བྱུང་བས། ད་ཆར་ཇོ་བྷ་ཌན་གྱིས་སྲིད་འཛིན་འོས་མི་ནས་དགོངས་པ་ཞུས་ཏེ་སྲིད་འཛིན་གཞོན་པ་འོས་མི་ལ་འཇོག་རྒྱུར་རྒྱབ་སྐྱོར་བྱས་འདུག
ཕྱི་ཚེས་༢༢ ཉིན་རྒྱལ་སྤྱིའི་གསར་ཁང་ཆེ་ཁག་གིས་གནས་ཚུལ་སྤེལ་གནས་ལྟར་ན། གཟའ་ཉི་མའི་ཉིན་སྲིད་འཛིན་ཇོ་བྷ་ཌན་གྱིས་ཁོང་འབྱུང་འགྱུར་སྲིད་འཛིན་འོས་མིའི་ཁྲོད་ནས་ཕྱིར་འཐེན་བྱས་ནས་ད་ལྟའི་ལས་ཐོག་སྲིད་འཛིན་གཞོན་པ་ཀ་མ་ལ་ཧ་རི་སི་འོས་མི་ལ་ལང་རྒྱུར་རྒྱབ་སྐྱོར་བྱེད་ཀྱི་ཡོད་འདུག ཇོ་བྷ་ཌན་གྱིས་ཀ་མ་ལ་ཧ་རི་སི་འོས་མིར་འཇོག་རྒྱུ་ནི་མང་གཙོ་ཚོགས་པའི་ནང་ཁུལ་དུ་མཐུན་སྒྲིལ་ཡོང་ཆེད་དང་། ཨ་རིའི་མི་མང་ཁྲོད་དུ་ཡང་མཐུན་པོ་ཡོང་ཐབས་ཀྱི་ཆེད་དུ་ཡིན་པར་བརྗོད་འདུག ཇོ་བྷ་ཌན་ད་ལོར་ལོ་ན་༨༡ ཡིན་འདུག་ལ། ཨ་རིའི་ལོ་རྒྱུས་ཁྲོད་སྲིད་འཛིན་ལོ་ན་རྒན་ཤོས་དེ་ཆགས་ཀྱི་ཡོད་འདུག
ད་ལྟའི་ལས་ཐོག་སྲིད་འཛིན་གཞོན་པ་ཀ་མ་ལ་ཧ་རི་སི་ད་ལྟ་རང་ལོ ༥༩ ཡིན་པ་དང་། ཁོང་མོས་འོས་བསྡུ་ཡོང་རྒྱུར་ད་དུང་ཉིན་གྲངས་༡༠༧ ལྷག་ཡོད་པས། དེའི་རིང་ང་ཚོས་མཉམ་རུབ་ཀྱི་ཐོག་ནས་སྤྱི་མཐུན་ཚོགས་པའི་འོས་མི་ཌོ་ནལ་ཊམ་ཕམ་ཉེས་གཏོང་དགོས་ཞེས་བརྗོད་ཡོད་འདུག མང་གཙོ་ཚོགས་པའི་ངོས་ནས་ད་ལྟ་ཀ་མ་ལ་ཧ་རི་སི་འོས་མིར་འཇོག་རྒྱུ་སྤྱི་མོས་ཀྱི་ཐག་གཅོད་བྱུང་ཡོད་མི་འདུག་ཀྱང་། ཕྱི་ཟླ་༨ པར་མང་གཙོ་ཚོགས་པའི་ཚོགས་ཆེན་ཞིག་ཚོགས་འཆར་ཡོད་འདུག་པར་བརྟེན། ཚོགས་ཆེན་དེའི་ཐོག་ཐག་གཅོད་བྱེད་རྒྱུ་ཡིན་པ་ཚོད་དཔག་བྱེད་ཀྱི་ཡོད་འདུག བདུན་ཕྲག་སྔོན་མའི་གཟའ་ཉི་མའི་ཉིན་ཇོ་བྷ་ཌན་གྱིས་སྲིད་འཛིན་འོས་མིའི་ཁྲོད་ནས་ཕྱིར་འཐེན་གྱི་ཐག་གཅོད་བྱས་རྗེས་མང་གཙོ་ཚོགས་པའི་གནད་ཡོད་མི་སྣ་མང་པོ་ཞིག་གིས་ཐག་གཅོད་དེ་ལ་བསྔགས་བརྗོད་བྱས་ཡོད་འདུག་ལ། ཨ་རིའི་གྲོས་ཚོགས་འོག་མའི་ཚོགས་གཙོ་ (Nancy Pelosi)་དང་སྲིད་འཛིན་ཟུར་པ་(Bill Clinton) དེ་བཞིན་མང་གཙོ་ཚོགས་པའི་སྲིད་འཛིན་འོས་མི་ཟུར་པ་(Hillary Clinton)་བཅས་ཀྱིས་སྲིད་འཛིན་གཞོན་པ་ཀ་མ་ཧ་རི་སི་ལ་རྒྱབ་སྐྱོར་བྱེད་ཀྱི་ཡོད་འདུག་ཀྱང་། སྲིད་འཛིན་ཟུར་པ་ཨོ་བྷ་མས་ཀ་མ་ལ་ཧ་རི་སི་ལ་རྒྱབ་སྐྱོར་ཡོད་ཚུལ་གང་ཡང་བརྗོད་ཡོད་མི་འདུག
ཨ་རིའི་མངའ་སྡེ་ཀ་ལི་ཧྥོར་ནི་ཡའི་(California)སྲིད་སྐྱོང་(Gavin Newsom)ཟེར་བ་དེ། ཨ་རིའི་སྲིད་འཛིན་ལང་རྒྱུར་འདོད་མོས་ཡོད་མཁན་ཞིག་ཡིན་འདུག་པ་དང་། ཇོ་བྷ་ཌན་ཕྱིར་འཐེན་བྱེད་དུས་ཁོང་གིས་བསྔགས་བརྗོད་ཆེན་པོ་བྱས་ཡོད་འདུག
ད་ལྟ་མང་གཙོ་ཚོགས་པའི་ཁྲོད་སྲིད་འཛིན་འོས་མི་ལང་རྒྱུར་འདོད་མོས་ཡོད་མཁན་འགའ་ཤས་ཡོད་འདུག་པ་ལས། (Pennsylvania)་མངའ་སྡེའི་སྲིད་སྐྱོང་(Josh Shapiro)ཟེར་བ་དེ་དང་། ད་ལྟའི་ཨ་རིའི་འགྲིམ་འགྲུལ་བློན་ཆེན་(Pete Buttigieg) དེ་བཞིན་(Michigan)མངའ་སྡེའི་སྲིད་སྐྱོང་ (Gretchen Whitmer)ཟེར་བ་སོགས་ཡིན་འདུག ཇོ་བྷ་ཌན་ཕྱིར་འཐེན་བྱེད་དགོས་དོན་ནི་དེ་སྔོན་ཌོ་ནལ་ཌམ་དང་བྷ་ཌན་གཉིས་གདོང་དང་གདོང་ཐུག་ནས་བགྲོ་གླེང་བྱེད་དུས་ཇོ་བྷ་ཌན་གྱིས་ལན་འདེབས་ཡག་པོ་བྱེད་མ་ཐུབ་པ་དང་། རང་གིས་ལས་དོན་གང་བྱས་པ་དག་བཤད་མ་ཐུབ་པ་སོགས་བགྲོ་གླེང་སྐབས་མང་གཙོ་ཚོགས་པའི་མི་མང་ཁྲོད་སེམས་འཚབ་ཆེན་པོ་བྱུང་ཡོད་འདུག་པ་དང་། དེ་རྗེས་བྱང་ཆིངས་སྒྲིག་འཛུགས་ཀྱི་ཚོགས་འདུའི་ཐོག་ཡུག་རེན་གྱི་སྲིད་འཛིན་གདན་འདྲེན་ཞུ་དུས་ཨུ་རུ་སུའི་སྲིད་འཛིན་གྱི་མིང་བོས་པ་ལས་ཡུག་རེན་གྱི་སྲིད་འཛིན་མིང་མ་དྲན་པ་དང་། སྐབས་དེ་དུས་ཨ་རིའི་སྲིད་འཛིན་གཞོན་པ་ཀ་མ་ལ་ཧ་རི་སིའི་མིང་འབོད་དགོས་དུས། ཡང་སྲིད་འཛིན་ཟུར་པ་ཌོ་ནལ་ཊམ་གྱི་མིང་བོས་པ་སོགས་དྲན་ཤེས་བརླགས་པའི་དོན་རྐྱེན་མང་པོ་བྱུང་བར་བརྟེན། མང་གཙོ་ཚོགས་པའི་ཁྲོད་ཇོ་བྷ་ཌན་ལ་དགོངས་པ་ཞུ་དགོས་པའི་དགོས་འདུན་འདོན་མཁན་མང་པོ་བྱུང་ཡོད་འདུག ད་དུང་བདུན་ཕྲག་སྔོན་མའི་གཟའ་པ་སངས་ཉིན་ཇོ་བྷ་ཌན་ལ་ཏོག་དབྱིབས་ནད་དུག་ཀྱང་ཕོག་ཡོད་འདུག
ཕྱི་ཚེས་༢༡ གཟའ་ཉི་མའི་ཉིན་མང་གཙོ་ཚོགས་པའི་རྒྱུན་ལས་རྣམས་ཛ་དྲག་ཐོག་ཚོགས་འདུ་ཞིག་འཚོགས་ནས། ཕྱི་ཟླ་༨ ཚེས་༡༩ ཉིན་མང་གཙོ་ཚོགས་པའི་ཚོགས་ཆེན་ཞིག་འཚོག་རྒྱུ་ཐག་གཅོད་བྱུང་ཡོད་འདུག ཚོགས་ཆེན་ཐོག་མང་གཙོ་ཚོགས་པའི་འོས་མི་དངོས་སུ་ཐག་གཅོད་རྒྱུ་ཡིན་པ་ཚོད་དཔག་བྱེད་བཞིན་འདུག
གསར་འགོད་པ། བསོད་ནམས་ཕུན་ཚོགས།
