ཉམས་ཞིབ་ཀྱི་གནས་ཚད་དེ་རྒྱལ་སྤྱིའི་ཐོག་སླེབས་ཐབས་དགོས།

ཟླ་འདིའི་ཚེས་༢༡ ཉིན་གྱི་སྔ་དྲོ་དྷ་ས་གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེས་བོད་ཀྱི་སྲིད་བྱུས་ཉམས་ཞིབ་ཁང་གིས་བཏོན་པའི་དཔེ་དེབ་<<བོད་ཀྱི་སྲིད་བྱུས་ཉམས་ཞིབ་དུས་དེབ་>> འདོན་ཐེངས་གཉིས་པ་དབུ་འབྱེད་གནང་ཡོད་པ་རེད།

ཉམས་ཞིབ་ཁང་དེའི་འགན་འཛིན་ཐུབ་བསྟན་བསམ་འཕེལ་གྱིས་བོད་ཀྱི་སྲིད་བྱུས་ཉམས་ཞིབ་ཁང་གིས་ཉམས་ཞིབ་དུས་དེབ་འདོན་ཐེངས་དང་པོ་དབྱིན་ཡིག་ཐོག་ལོ་སྔོན་མར་འདོན་སྤེལ་བྱས་ཡོད་པ་དང་། དེའི་བརྗོད་གཞི་གཙོ་དབྱིན་བོད་བར་གྱི་སིམ་ལའི་ཆིངས་ཡིག་ལ་མིང་རྟགས་བཀོད་ནས་མི་ལོ་༡༠༠ ཧྲིལ་པོ་འཁོར་བ་དང་སྟབས་བསྟུན་དེའི་སྐོར་ཞིབ་འཇུག་བྱས་ཡོད་སྐོར་འགྲེལ་བརྗོད་གནང་ཡོད་པ་རེད།

ད་ཐེངས་བོད་ཡིག་ཐོག་འདོན་སྤེལ་བྱས་པའི་དེབ་དེ་བོདཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ལྔས་རྩོམ་ཡིག་ཕྱོགས་སྒྲིག་བྱས་ཡོད་པ་དང་། བརྗོད་གཞི་དང་པོར་ཨཱ་ཅཱརྱ་བློ་བཟང་གི་ཆེད་རྩོམ་བོད་འབྲེལ་གནད་དོན་ཐད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་ཁྲིད་ཀྱི་དགོངས་པ་གླེང་བ་ཞེས་པ་དང་། གཉིས་པར་ཉམས་ཞིབ་པ་ཤར་ཙོང་བདེ་ལྡན་གྱི་ཆེད་རྩོམ་རྒྱ་ནག་གཞུང་གིས་བོད་ཁུལ་དུ་གྲོང་ཁྱེར་འཛུགས་སྐྲུན་གྱི་དམིགས་ཡུལ་ཞེས་པ། ཉམས་ཞིབ་པ་བསྟན་འཛིན་པདྨའི་ཆེད་རྩོམ་བོད་ནང་བོད་ཀྱི་སྐད་ཡིག་གི་གནས་སྟངས་ཞེས་པ། དེ་བཞིན་བྱམས་པ་བསྟན་འཛིན་གྱི་ཆེད་རྩོམ་གྲོས་མཐུན་དོན་ཚན་བཅུ་བདུན་གྱི་ཁྲིམས་ལུགས་གནས་བབས་ལ་དཔྱད་པ། ཚེ་བསོད་ཀྱི་ཆེད་རྩོམ་ལྟ་ཚུལ་ཕྱོགས་རེ་བ་ཙམ་གྱིས་མི་རིགས་ཧྲིལ་པོ་དགྲར་བལྟ་བ་བཅས་ཡིན་པ་རེད།

དུས་དེབ་དབུ་འབྱེད་མཛད་སྒོའི་ཐོག་བོད་ཀྱི་སྲིད་ཇུས་ཉམས་ཞིབ་ཁང་བཙུགས་དགོས་པའི་དམིགས་ཡུལ་ངོ་སྤྲོད་གནང་བ་དང་། བོད་མིའི་སྒྲིག་འཛུགས་ཀྱིས་མཐུན་རྐྱེན་སྦྱོར་གྱི་ཡོད་པ་ལས། ཉམས་ཞིབ་ཁང་དེའི་ལས་དོན་གཙོ་བོ་རང་དབང་གི་ཐོག་ནས་ཉམས་ཞིབ་ཐོག་ཤུགས་སྣོན་རྒྱག་དགོས་སྐོར། མ་འོངས་པར་བོད་ཀྱི་ཉམས་ཞིབ་པ་མང་པོ་གསོ་སྐྱོང་ཡོང་ཐབས་བྱེད་དགོས་སྐོར་དང་། ཐོག་མའི་དམིགས་ཡུལ་ལྟར་བོད་ཀྱི་ཉམས་ཞིབ་པ་ཡར་རྒྱས་ཡོང་གི་སྐོར་གསུངས་སོང། དེ་བཞིན་སྲིད་སྐྱོང་བློ་བཟང་སེང་གེས་ཉམས་ཞིབ་ཀྱི་དེབ་མང་པོ་འདོན་དགོས་སྐོར་དང་། རྩོམ་དེ་ཚོ་བོད་པའི་སྤྱི་ཚོགས་ནང་གཅིག་པུ་མིན་པར། བོད་པའི་ཉམས་ཞིབ་ཀྱི་གནས་ཚད་དེ་རིམ་པས་རྒྱ་གར་དང་རྒྱལ་སྤྱིའི་སྡིངས་ཆའི་ཐོག་སླེབས་ཐབས་དགོས་སྐོར་གསུངས་སོང་།།
གསར་འགོད་པ་ཆོས་ཉིད་འོད་ཟེར།