ཉི་ཧོང་གིས་རྒྱ་ནག་གི་བཟོ་ཚོང་ཁང་ལ་དཔལ་འབྱོར་ཉེས་ཆད་ཐོག་མ་དེ་བཅད་ཡོད་འདུག
ད་ཆར་ཨུ་རུ་སུ་དང་ཡུག་རེན་གཉིས་བར་དམག་འཁྲུག་འགོ་བཙུགས་ནས་ལོ་གཉིས་ལྷག་ཙམ་འགྲོ་བཞིན་ཡོད་པ་དང་། དུས་ཡུན་དེ་དག་གི་རིང་ཡུག་རེན་ལ་ནུབ་ཕྱོགས་རྒྱལ་ཁབ་ཚོས་གོ་མཚོན་མང་པོའི་རོགས་རམ་བྱས་ཡོད་འདུག་པ་དང་། ད་དུང་རོགས་རམ་མུ་མཐུད་དུ་བྱེད་རྒྱུ་ཡིན་འདུག ཨུ་རུ་སུ་ལ་མཚོན་ན་རྒྱ་ནག་དང་བྱང་ཀོ་རི་ཡ། ཨི་རན་སོགས་ནས་གོ་མཚོན་ཉོ་ཡི་འདུག་པར་བརྟེན། ད་ཆར་རྒྱ་ནག་གིས་ཨུ་རུ་སུ་ལ་གོ་མཚོན་བཟོ་ཆེད་རྒྱུ་ཆའི་རིགས་དང་། གོ་མཚོན་གྱི་དངོས་ཟོག་བཙོངས་པའི་རྐྱེན་གྱིས་ཉི་ཧོང་གིས་རྒྱ་ནག་ལ་དཔལ་འབྱོར་གྱི་ཉེས་ཆད་ཐོག་མ་དེ་བཅད་ཡོད་འདུག
ཕྱི་ཚེས་༢༡ ཉིན་རྒྱ་གར་གྱི་(Wion)གསར་ཁང་གིས་གནས་ཚུལ་སྤེལ་གསལ་ལྟར་ན། དེ་རིང་ཉི་ཧོང་གི་ཕྱི་འབྲེལ་ལྷན་ཁང་ནས་བརྗོད་དོན། ཉི་ཧོང་གིས་རྒྱ་ནག་ནང་དུ་ཡོད་པའི་རྒྱ་ནག་གི་ཚོང་གཉེར་ཁང་འགའ་ཤས་དང་། རྒྱ་གར་ནང་ཡོད་པའི་ཚོང་གཉེར་ཁང་འགའ་ཤས། དེ་བཞིན་ཨུ་ཛུ་བྷེ་ཁི་སི་ཐན། ཀ་ཛག་སི་ཐན་སོགས་ཀྱི་ནང་ཡོད་པའི་རྒྱ་ནག་གི་ཚོང་གཉེར་ཁང་འགའ་ཤས་བཅས་ལ་དཔལ་འབྱོར་གྱི་ཉེས་ཆད་བཅད་ཡོད་འདུག རྒྱུ་མཚན་ནི་ཚོང་གཉེར་ཁང་དེ་དག་གིས་ཨུ་རུ་སུའི་ནང་ཡོད་པའི་གོ་མཚོན་བཟོ་ཚོང་ཁང་དག་ལ་གོ་མཚོན་བཟོ་ཆེད་ཀྱི་དངོས་ཟོག་དང་། རྒྱུ་ཆའི་རིགས་མང་པོ་ཞིག་འཚོང་གི་ཡོད་པའི་རྐྱེན་གྱིས་དཔལ་འབྱོར་ཉེས་ཆད་བཅད་ཡོད་འདུག ད་ཐེངས་ཀྱི་དཔལ་འབྱོར་ཉེས་ཆད་དེ་ཉི་ཧོང་གིས་རྒྱ་ནག་ཐོག་དཔལ་འབྱོར་གྱི་ཉེས་ཆད་བཅད་པ་ཐོག་མ་དེ་ཆགས་ཀྱི་ཡོད་འདུག ཧོང་ཀོང་ནང་དུ་ཡོད་པའི་རྒྱ་ནག་གི་ཚོང་གཉེར་ཁང་འགའ་ཤས་ལ་དཔལ་འབྱོར་གྱི་ཉེས་ཆད་བཅད་ཡོད་འདུག རྒྱ་ནག་གི་ཚོང་གཉེར་ཁང་དེ་དག་གིས་ཨུ་རུ་སུ་ལ་མི་མེད་ཀྱི་གནམ་གྲུ་བཟོ་ཆེད་(microchips)ཟེར་བ་དེ་འཚོང་གི་ཡོད་འདུག དངོས་ཟོག་དེ་མི་མེད་གནམ་གྲུའི་འཕྲུལ་འཁོར་མ་ལག་ནང་དགོས་མཁོ་ཆེ་བའི་གློག་གི་མ་ལག་གལ་ཆེན་ཞིག་ཡིན་འདུག་ལ། ཨུ་རུ་སུ་དང་ཡུག་རེན་གཉིས་ཀྱི་དམག་འཁྲུག་ཁྲོད་མི་མེད་གནམ་གྲུ་ནི་མེད་དུ་མི་རུང་བ་ཞིག་ཡིན་འདུག ཐེངས་འདིར་ཉི་ཧོང་གིས་རྒྱ་ནག་ལ་དཔལ་འབྱོར་གྱི་ཉེས་ཆད་བཅད་པ་དེ་ཨ་རིའི་གཞུང་གིས་དེ་སྔོན་དཔལ་འབྱོར་ཉེས་ཆད་བཅད་པ་དག་དང་འདྲ་མཚུངས་ཆགས་ཀྱི་ཡོད་འདུག ཨ་རིའི་གཞུང་གིས་དེ་སྔོན་ནས་རྒྱ་ནག་གཞུང་གིས་ཨུ་རུ་སུ་ལ་གོ་མཚོན་བཟོ་ཆེད་ཀྱི་དངོས་ཟོག་དང་རྒྱུ་ཆའི་རིགས་མཁོ་སྤྲོད་བྱེད་ཀྱི་ཡོད་པའི་རྐྱེན་གྱིས་སྐྱོན་བརྗོད་ཤུགས་ཆེན་བྱེད་ཀྱི་ཡོད་འདུག་པ་དང་། དེ་ཡང་རྒྱུ་ཆའི་ནང་མི་མེད་གནམ་གྲུ་བཟོ་ཆེད་ཀྱི་རྒྱུ་ཆ་དང་། མེ་སྒྱོགས་རིགས་བཟོ་ཆེད་ཀྱི་རྒྱུ་ཆ་སོགས་མཁོ་སྤྲོད་བྱེད་ཀྱི་ཡོད་འདུག བདུན་ཕྲག་སྔོན་མར་ཨ་རིའི་གཞུང་གིས་ཨུ་རུ་སུ་ལ་དཔལ་འབྱོར་གྱི་ཉེས་ཆད་གཅོད་རྒྱུ་ཤུགས་ཆེ་རུ་བཏང་ཡོད་འདུག་པ་དང་། དཔལ་འབྱོར་གྱི་ཉེས་ཆད་དེ་དག་གི་ཁོངས་སུ་རྒྱ་ནག་གི་བཟོ་ཚོང་ཁང་མང་པོ་ཚུད་ཡོད་འདུག འོན་ཀྱང་། ནུབ་ཕྱོགས་རྒྱལ་ཁབ་ཚོས་དཔལ་འབྱོར་གྱི་ཉེས་ཆད་བཅད་མིན་ལ་མ་ལྟོས་པར་ཨུ་རུ་སུ་དང་རྒྱ་ནག་གཉིས་བར་དཔལ་འབྱོར་ཡར་རྒྱས་གཏོང་སླད་མཉམ་ལས་བྱེད་རྒྱུར་ཤུགས་ཆེ་རུ་བཏང་ཡོད་འདུག
གསར་འགོད་པ། བསོད་ནམས་ཕུན་ཚོགས།
