ཉི་ཧོང་དང་ཐའེ་ཝན་གཉིས་ཀྱིས་མཉམ་འབྲེལ་ཐོག་ནས་རྒྱལ་སྲུང་བྱེད་རྒྱུའི་མོས་མཐུན་བྱས་འདུག
ཨེ་ཤི་ཡའི་ཤར་མཐའི་མང་གཙོའི་རྒྱལ་ཁབ་ཉི་ཧོང་དང་ཐའེ་ཝན་གཉིས་ཀྱིས་མཉམ་འབྲེལ་ཐོག་ནས་རྒྱལ་མཚམས་མཚོ་འགག་སྲུང་རྒྱུའི་མོས་མཐུན་བྱས་ཡོད་འདུག
བདུན་ཕྲག་གོང་མའི་རེས་གཟའ་སྤེན་པའི་ཉིན་ཉི་ཧོང་གི་གཞུང་འཛིན་རང་དབང་མང་གཙོ་ཚོགས་པ་(LDP)དང་། ཐའེ་ཝན་གྱི་གཞུང་འཛིན་མང་གཙོ་ཡར་ཐོན་ཚོགས་པ་(DPP)གཉིས་ཀྱིས་རྒྱལ་ཁབ་གཉིས་ཀྱི་འབྲེལ་ལམ་དང་། རྒྱལ་སྲུང་སྲིད་བྱུས་སྐོར་གྱི་དྲ་ཐོག་ཚོགས་འདུ་ཞིག་འཚོགས་པའི་ཐོག ཕྱོགས་གཉིས་ཀྱིས་མཉམ་འབྲེལ་ཐོག་ནས་ཐའེ་ཝན་གྱི་མཚོ་འགག་དང་། རྒྱལ་མཚམས་སྲུང་སྐྱོབ་བྱེད་རྒྱུའི་མོས་མཐུན་བྱས་ཡོད་འདུག
ཕྱོགས་གཉིས་ཀྱིས་རྒྱ་ནག་གི་དམག་གྲུ་དང་གནམ་གྲུ་ཡང་ཡང་རྒྱལ་ཁབ་གཉིས་ཀའི་ནང་དུ་འཛུལ་གྱི་ཡོད་སྐོར་གླེངས་འདུག་པ་དང་། ཐའེ་ཝན་གྱི་མང་གཙོ་ཡར་ཐོན་ཚོགས་པའི་སྐུ་ཚབ་འཐུས་མི་ལོའོ་ཆི་ཆན་(Lo Chik-cheng)གྱིས་རྒྱལ་ཁབ་གཉིས་ཀས་ཐའེ་ཝན་གྱི་མཚོ་འགག་གི་གནས་སྟངས་དང་། རྒྱ་ནག་གི་ཉེན་ཁ་ལ་སེམས་ཁྲལ་གཅིག་མཚུངས་བྱེད་ཀྱི་ཡོད་སྐོར་བཤད་ཡོད་འདུག
ཚོགས་འདུ་དེའི་ཐོག ཨེ་ཤི་ཡའི་གླིང་ཕྲན་རྒྱལ་ཁབ་གཉིས་ཀྱིས་ཕུན་ཚུན་གནས་ཚུལ་བརྗེ་རེས་བྱས་ཏེ་མཉམ་འབྲེལ་ཐོག་ནས་རྒྱལ་སྲུང་ནུས་པ་ཡར་རྒྱས་གཏོང་ཕྱོགས་སྐོར་བགྲོ་གླེང་བྱས་པའི་ཐོག ཨ་རིའི་ངོས་ནས་ཐའེ་ཝན་སྲུང་སྐྱོབ་བྱེད་པའི་ཆོད་སེམས་ཇི་ཙམ་ཡོད་མེད་ཐད་ལའང་གླེང་སློང་བྱས་ཡོད་འདུག
ཉི་ཧོང་གི་རང་དབང་མང་གཙོ་ཚོགས་པའི་ངོས་ནས་རྒྱལ་སྲུང་འགྲོ་གྲོན་མང་དུ་གཏོང་བ་དང་། ཉི་ཧོང་རྒྱ་མཚོའི་(the Sea of Japan)ཉེ་འཁོར་དུ་མཁའ་སྲུང་མ་ལག་ལེགས་སུ་གཏོང་རྒྱུའི་ཁས་ལེན་བྱས་ཡོད་འདུག་ལ། ཐའེ་ཝན་གྱིས་ཀྱང་བྱང་ཤར་གྱི་མཚོ་འགག་ཏུ་རང་སྲུང་གི་ནུས་པ་ཤུགས་ཆེ་རུ་གཏོང་རྒྱུའི་མོས་མཐུན་བྱས་ཡོད་འདུག
དྲ་ཐོག་ཚོགས་འདུའི་རྗེས་སུ། ཉི་ཧོང་གིས་ཐའེ་ཝན་དང་ལྷན་དུ་དྲ་རྒྱ་དང་དཔལ་འབྱོར་གྱི་བདེ་འཇགས་ཐོག་ནས་ཀྱང་མཉམ་འབྲེལ་བྱེད་འདོད་ཡོད་སྐོར་བཤད་པ་མ་ཟད། ཐའེ་ཝན་མགྱོགས་མྱུར་ཞི་བདེ་རྒྱ་མཚོའི་ས་ཁུལ་སྲུང་སྐྱོབ་དང་སྲ་བརྟན་བཟོ་བའི་ལས་འཆར་གཞི་རྒྱ་ཆེན་པོའི་ནང་དུ་ཞུགས་པའི་རེ་བ་འཆང་བཞིན་ཡོད་ཚུལ་ཡང་བརྗོད་ཡོད་འདུག
རྒྱ་ནག་གི་སྟོབས་ཤུགས་ཇེ་ཆེར་རྒྱས་པ་དང་ལྷན་དུ། ཁྱིམ་མཚེས་རྒྱལ་ཁབ་རྣམས་ལ་ཧམ་བཤད་ངོམ་པ་དང་། ཐའེ་ཝན་ལ་བཙན་འཛུལ་བྱེད་རྒྱུའི་འཇིགས་སྐུལ་ཆེ་རུ་གཏོང་བཞིན་པར་བརྟེན། ཉི་ཧོང་གིས་རྒྱ་ནག་གི་ཉེན་ཁ་ལ་སེམས་འཚབ་ཆེན་པོ་བྱས་ཏེ་དེ་ལ་གདོང་ལེན་བྱེད་པའི་གྲ་སྒྲིག་བྱེད་ཀྱི་ཡོད་པ་མ་ཟད། “རྒྱ་ནག་གཅིག་”གི་སྲིད་བྱུས་ལའང་བསྐྱར་ཞིབ་གཟབ་ནན་བྱེད་སྒང་ཡིན་འདུག
ཟླ་གོང་མར་བཏོན་པའི་ཉི་ཧོང་གི་ལོ་འཁོར་རྒྱལ་སྲུང་སྙན་ཐོ་(Defense of Japan white paper)གསར་ཤོས་ནང་། ཉི་ཧོང་རྒྱལ་སྲུང་ལས་ཁུངས་ཀྱིས་རྒྱ་ནག་དང་ཐའེ་ཝན་གཉིས་དབྱེ་བ་ཕྱེ་སྟེ་རྒྱ་ནག་གི་ས་ཁྲ་ནས་ཐའེ་ཝན་མར་ལོགས་སུ་བཏོན་ཡོད་ཅིང་། དེ་ནི་འདས་པའི་ལོ་ངོ་བཅུ་ཕྲག་གི་ལོ་རྒྱུས་ནང་ཆེས་ཐོག་མར་བྱུང་བ་ཞིག་ཆགས་ཡོད་འདུག །
གསར་འགོད་པ་དཀོན་མཆོག་རབ་བརྟན།
