ཏ་ལི་བྷན་གྱིས་དབང་བསྒྱུར་བྱས་ནས་ལོ་གཅིག་འཁོར་འདུག

ཟླ་འདིའི་ཚེས་༡༦ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཏ་ལི་བྷན་ཤོག་ཁག་གིས་ཨབ་གྷ་ཎི་སི་ཐན་ལ་དབང་བསྒྱུར་བྱས་ནས་ལོ་གཅིག་ཧྲིལ་པོ་འཁོར་ཡོད་པ་དང་། ད་ལྟའི་ཆར་ཏ་ལི་བྷན་གྱི་དབང་འོག་ཏུ་ཡོད་པའི་ཨབ་གྷ་ཎི་སི་ཐན་ལ་དཔལ་འབྱོར་ཉམས་ཉེས་དང་རྒྱལ་ཁབ་ཏུ་མི་མང་ལ་བདེ་འཇགས་མེད་པའི་དཀའ་ངལ། སྤྱི་ཚོགས་ཀྱི་ནང་དུ་བརྟན་ལྷིང་མེད་པ་སོགས་ཀྱི་དཀའ་ངལ་ཆེན་མོ་འཕྲད་བཞིན་ཡོད་པའི་གནས་ཚུལ་ཐོན་འདུག

སྤྱི་ལོ་༢༠༢༡ ཟླ་༨ པའི་ནང་དུ་ཨ་རི་གཞུང་གིས་ཨབ་གྷ་ཎི་སི་ཐན་དུ་ཡོད་པའི་ཨ་རིའི་དམག་དཔུང་ཡོངས་རྫོགས་ཕྱིར་འཐེན་བྱས་ཡོད་པ་དང་། དུས་དེ་ནས་བཟུང་ཏ་ལི་བྷན་གྱིས་རིམ་བཞིན་ཨབ་གྷ་ཎི་སི་ཐན་ལ་སླར་ཡང་དབང་བསྒྱུར་བྱེད་འགོ་བཙུགས་ནས་ད་བར་ལོ་གཅིག་ཧྲིལ་པོ་འཁོར་ཡོད་འདུག

ཏ་ལི་བྷན་གྱིས་ཨབ་གྷ་ཎི་སི་ཐན་ལ་དབང་བསྒྱུར་མ་བྱས་པའི་སྔོན་དུ་ཨབ་གྷ་ཎི་སི་ཐན་གྱི་དཔལ་འབྱོར་གྱི་བརྒྱ་ཆ་༧༥% ནི་ཕྱིའི་རོགས་སྐྱོར་ལ་བསྟེན་ནས་ཡོང་གི་ཡོད་པ་དང་།  ཏ་ལི་བྷན་གྱིས་དབང་བསྒྱུར་བྱས་པའི་རྗེས་སུ་དགེ་རྩ་ཚོགས་པ་མང་པོ་ཨབ་གྷ་ཎི་སི་ཐན་ནས་ཕྱིར་འཐེན་བྱས་ཡོད་པ་མ་ཟད། རྒྱལ་སྤྱིའི་ཐོག་ནས་རོགས་རམ་བྱེད་མཁན་ཡང་ཇེ་ཉུང་དུ་འགྲོ་བཞིན་ཡོད་པར་བརྟེན། ཨབ་གྷ་ཎི་སི་ཐན་གྱི་ཡུལ་མི་ཚོ་ལ་རོགས་རམ་མེད་པའི་དཀའ་ངལ་འཕར་མ་ཞིག་འཕྲད་འགོ་བཙུགས་ཡོད་འདུག

དེ་བཞིན་ཏ་ལི་བྷན་གྱིས་ཨབ་གྷ་ཎི་སི་ཐན་ལ་དབང་བསྒྱུར་བྱེད་འགོ་བཙུགས་པ་དང་རྒྱལ་སྤྱིའི་ཐོག་ནས་ཏ་ལི་བྷན་ཤོག་ཁག་ལ་ཉེས་ཆད་དུ་མ་ཞིག་བཀལ་ཡོད་པ་དང་། ཨབ་གྷ་ཎི་སི་ཐན་ནི་རྒྱལ་སྤྱིའི་དཔལ་འབྱོར་ལམ་ལུགས་ཀྱི་ཁྲོམ་ར་ནས་ཟུར་དུ་བཏོན་ཡོད་པ་དང་།རྒྱུ་མཚན་དེ་ལ་བརྟེན་ནས་ཨབ་གྷན་གྱི་དངུལ་ཁང་དག་གིས་ཀྱང་ལས་དོན་བྱེད་མ་ཐུབ་པའི་དཀའ་ངལ་འཕྲད་ཡོད་འདུག་ལ། ད་ལྟའི་ཆར་ཨབ་གྷ་ཎི་སི་ཐན་གྱི་མི་མང་བརྒྱ་ཆ་༩༠% ལྷག་ལ་ཟས་རིགས་ཉུང་སྐྱོན་གྱི་དཀའ་ངལ་འཕྲད་བཞིན་ཡོད་འདུག འཛམ་གླིང་འཕྲོད་བསྟེན་ལྷན་ཚོགས་ཀྱིས་བརྗོད་གསལ་ལྟར་ན། ཨབ་གྷ་ཎི་སི་ཐན་གྱི་ཡུལ་དུ་བྱིས་པ་ས་ཡ་གཅིག་ལྷག་ལ་ཟས་བཅུད་མ་འདང་པའི་དཀའ་ངལ་འཕྲད་བཞིན་ཡོད་རབས་བརྗོད་འདུག

ཏ་ལི་བྷན་གྱིས་དབང་བསྒྱུར་བྱས་ནས་བཟུང་ད་བར་ལོ་གཅིག་གི་རིང་། ཨབ་གྷ་ཎི་སི་ཐན་གྱི་མི་མང་ས་ཡ་གཅིག་མ་ཟིན་ཙམ་གྱིས་ལས་ཀའི་གོ་སྐབས་ཤོར་ཡོད་པ་དང་། ཡུལ་དེའི་བུད་མེད་ཚོ་ལ་འཛིན་རིམ་དྲུག་པ་ཙམ་ལས་སློབ་སྦྱོང་གི་གོ་སྐབས་མེད་པ་སོགས་ཀྱི་དཀའ་ངལ་ཆེན་མོ་འཕྲད་ཀྱི་ཡོད་པའི་གནས་ཚུལ་ཐོན་འདུག

འདས་པའི་མི་ལོ་ཉི་ཤུ་ཡི་རིང་ཏ་ལི་བྷན་ཤོག་ཁག་གིས་ཨབ་གྷ་ཎི་སི་ཐན་གཞུང་དང་དེའི་ཕྱོགས་ཁག་ཨ་རི་སོགས་ལ་འཐབ་རྒོལ་བྱས་ནས་ད་ལྟའི་ཆར་ཨབ་གྷ་ཎི་སི་ཐན་ལ་དབང་བསྒྱུར་བྱས་ཐུབ་ཡོད་མོད་ཀྱང་། ཏ་ལི་བྷན་ནི་རྒྱལ་སྤྱིའི་ཐོག་ཁྲིམས་མཐུན་གྱི་སྲིད་གཞུང་ཞིག་ཏུ་ངོས་འཛིན་བྱེད་མཁན་རྒྱལ་ཁབ་གཅིག་ཀྱང་མེད་པའི་ཐོག་ད་ལྟའི་ཆར་དཔལ་འབྱོར་ཉམས་ཉེས་གཙོས་པའི་དཀའ་ངལ་མང་པོ་འཕྲད་བཞིན་ཡོད་པའི་གནས་ཚུལ་ཐོན་འདུག།

གསར་འགོད་པ་བློ་བཟང་རྒྱ་མཚོ།