ཏ་ལི་བྷན་གྱིས་བུད་མེད་སློབ་གྲྭ་བསྐྱར་དུ་སྒོ་འབྱེད་རྒྱུའི་ཐག་གཅོད་གློ་བུར་དུ་ཕྱིར་འཐེན་བྱས་འདུག 

ཨབ་གྷ་ནི་སེ་ཐན་ནང་གི་བུད་མེད་སློབ་མ་མང་པོ་ཞིག་གིས་རྒྱུན་རིང་ནས་སློབ་གྲྭ་སྒོ་འབྱེད་རྒྱུའི་རེ་སྒུག་བྱེད་བཞིན་ཡོད་ཀྱང་། སློབ་གྲྭ་སྒོ་འབྱེད་པའི་གཏན་འཁེལ་ཉིན་མོར་ཏ་ལི་བྷན་སྲིད་གཞུང་གིས་ཐག་གཅོད་དེ་གློ་བུར་དུ་ཕྱིར་འཐེན་བྱས་འདུག 

བདུན་ཕྲག་སྔོན་མར་ཏ་ལི་བྷན་སྲིད་གཞུང་གིས་ཨབ་གྷ་ནི་སེ་ཐན་ནང་གི་བུད་མེད་ཀྱི་འབྲིང་རིམ་སློབ་གྲྭ་རྣམས་ཟླ་༣ པའི་ཚེས་༢༤ ཉིན་ནས་བསྐྱར་དུ་སྒོ་འབྱེད་རྒྱུའི་གསལ་བསྒྲགས་སྤེལ་བས། བུད་མེད་སློབ་མ་རྣམས་དང་ཕ་མ་ཚོས་དགའ་བསུ་ཆེན་པོ་བྱས་ཡོད་པ་དང་། རྒྱལ་སྤྱིའི་ནང་ཨབ་གྷན་ནང་ཏ་ལི་བྷན་གྱི་སྲིད་གཞུང་འོག་བུད་མེད་ཀྱི་ཤེས་ཡོན་དང་ཐོབ་ཐང་ཐད་སེམས་འཚབ་བྱེད་མཁན་ཚོར་རེ་བ་ཆེན་པོ་ཞིག་སྐྱེས་ཡོད་ནའང་། ཚེས་༢༤ ཉིན་གློ་བུར་དུ་ཏ་ལི་བྷན་སྲིད་གཞུང་གིས་འབྲིང་རིམ་སློབ་གྲྭའི་བུད་མེད་སློབ་མ་རྣམས་ཀྱི་སྒྲིག་ཆས་གཏན་འབེབས་མ་བྱས་པའི་བར་དུ། སློབ་གྲྭ་བསྐྱར་དུ་སྒོ་འབྱེད་བྱེད་རྒྱུ་མིན་པའི་གསལ་བསྒྲགས་ཤིག་གློ་བུར་དུ་སྤེལ་ནས། བུད་མེད་སློབ་མ་རྣམས་སློབ་གྲྭར་འཛུལ་མ་བཅུག་པའི་གནས་ཚུལ་ཐོན་འདུག 

ཐག་གཅོད་དེ་དང་འབྲེལ་ནས་བུད་མེད་སློབ་མ་དང་ཕ་མ་མང་པོ་ཞིག་གིས་ཁོང་ཁྲོ་དང་སེམས་སྡུག་གི་རྣམ་པ་ཤུགས་ཆེན་བསྟན་འདུག 

ཏ་ལི་བྷན་སྲིད་གཞུང་གི་གསལ་བསྒྲགས་ནང་དུ་ཨབ་གྷན་གྱི་རིག་གཞུང་དང་ཁ་ཆེ་ཆོས་ལུགས་ཀྱི་ཁྲིམས་དང་མཐུན་པའི་བུད་མེད་སློབ་མའི་སྒྲིག་ཆས་གཏན་འབེབས་བྱས་ཟིན་པའི་རྗེས་སུ། འབྲིང་རིམ་སློབ་གྲྭ་རྣམས་སྒོ་འབྱེད་རྒྱུ་ཡིན་སྐོར་བརྗོད་འདུག 

ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་བུད་མེད་ཀྱི་ཤེས་ཡོན་འཐབ་རྩོད་པ་མཱ་ལཱ་ལཱ་ཡུ་སཱཧྥ་ཛའེ་ཡིས། ཏ་ལི་བྷན་སྲིད་གཞུང་གིས་བུད་མེད་རྣམས་གཞི་རིམ་སློབ་གྲྭ་ལས་མཐོ་རིམ་བར་སློབ་སྦྱོང་བྱེད་རྒྱུ་བཀག་འགོག་བྱེད་ཆེད་དུ་རྒྱུ་མཚན་འདྲ་མིན་ལ་སྙད་རྒྱུ་ཡིན་པ་དང་། སྲིད་གཞུང་དེས་བུད་མེད་ཤེས་ཡོན་པ་མེད་པའི་ཨབ་གྷན་རྒྱལ་ཁབ་གཅིག་བཟོ་རྒྱུའི་འཆར་གཞི་འཐེན་གྱི་ཡོད་སྐོར་བརྗོད་འདུག 

ལོ་སྔོན་མའི་ཟླ་༨ པའི་ནང་ཏ་ལི་བྷན་དྲག་སྤྱོད་རུ་ཁག་གིས་ཨབ་གྷན་གྱི་སྲིད་དབང་བཙན་འཕྲོག་བྱས་ཡོད་པ་དང་། ད་ལྟ་བར་དུ་འབྲིང་རིམ་སློབ་གྲྭའི་བུད་མེད་སློབ་མ་རྣམས་སློབ་གྲྭར་འགྲོ་ཐུབ་མེད་པ་རེད། དེ་ཡང་དེ་སྔོན་ཏ་ལི་བྷན་སྲིད་གཞུང་གི་ཤེས་ཡོན་བློན་ཆེན་གཞོན་པས་ཕྱི་ལོ་༢༠༢༢ ནང་ཤེས་ཡོན་སྲིད་བྱུས་གསར་པ་ཞིག་གཏན་འབེབས་མ་བྱས་པའི་བར་དུ། འབྲིང་རིམ་སློབ་གྲྭའི་ནང་དུ་བུད་མེད་སློབ་མ་ཚོ་སློབ་སྦྱོང་བྱེད་མི་ཆོག་པ་དང་། ད་ལྟའི་ཕྱིར་འགྱངས་དེ་ནི་གཞུང་གིས་བུད་མེད་ཚོར་བདེ་འཇགས་ལྡན་པའི་ཁོར་ཡུག་གཅིག་བསྐྲུན་ཐབས་བྱེད་བཞིན་ཡོད་པས་ཡིན་པ། དེ་བཞིན་སློབ་གྲྭའི་ནང་བུ་དང་བུད་མེད་གཉིས་ཀྱི་འཛིན་གྲྭ་ལོགས་སུ་དབྱེ་རྒྱུ་གལ་ཆེན་ཡིན་སྐོར་བརྗོད་འདུག དེ་ཡང་ཏ་ལི་བྷན་དྲག་སྤྱོད་རུ་ཁག་གིས་སྲིད་དབང་བཙན་བཟུང་བྱས་པ་ནས་བཟུང་། ཨབ་གྷན་གྱི་སློབ་གྲྭ་ཁག་ཏུ་བུ་དང་བུད་མེད་ཀྱི་འཛིན་གྲྭ་ལོགས་སུ་བཟོས་ཟིན་ཡོད་པ་འདུག 

ཏ་ལི་བྷན་གྱིས་ཨབ་གྷན་གྱི་སྲིད་དབང་བཙན་བཟུང་བྱས་ཟིན་རྗེས་གསར་འགོད་ལྷན་ཚོགས་ཐོག་ཏུ། ཏ་ལི་བྷན་གྱི་སྲིད་དབང་འོག་ཏུ་ཁ་ཆེའི་ཆོས་ལུགས་ཀྱི་ཁྲིམས་ལུགས་འོག་ཏུ་བུད་མེད་ཀྱི་ཐོབ་ཐང་ལ་གུས་བརྩི་བྱེད་རྒྱུ་ཡིན་པ་དང་། དེ་དང་བསྟུན་ནས་བུད་མེད་རྣམས་ཀྱིས་ལས་ཀ་བྱེད་ཆོག་པ་དང་སློབ་སྦྱོང་བྱེད་ཆོག་སྐོར་བརྗོད་ཡོད་ནའང་། ཟླ་བ་༧ གྱི་རྗེས་བུད་མེད་ཀྱི་གནས་སྟངས་ལ་ཡར་རྒྱས་གང་ཡང་ཕྱིན་མེད་པ་རེད། 

དེ་སྔོན་ཕྱི་ལོ་༡༩༩༦ ནས་༢༠༠༡ བར་ཏ་ལི་བྷན་གྱིས་སྲིད་དབང་བཟུང་བའི་སྐབས་སུ། ཁ་ཆེའི་ཁྲིམས་ལུགས་ཤཱ་རི་ཡ་ཁྲིམས་ལུགས་ལྟར་ཁྲིམས་འགལ་རྣམས་ལ་ཉེས་ཆད་གཏོང་རྒྱུར་རྒྱབ་སྐྱོར་བྱས་ཡོད་པ་དང་། དུས་སྐབས་དེའི་རིང་བུད་མེད་ཀྱི་ཐོབ་ཐང་ཤིན་ཏུ་ཆུང་ཆུང་ཡིན་པས། འགྲོ་བ་མིའི་ཐོབ་ཐང་ཚོགས་པ་མང་པོ་ཞིག་གིས་དུས་ངན་དེ་བསྐྱར་ལོག་ཡོང་སྲིད་པའི་སེམས་འཚབ་བྱེད་བཞིན་འདུག །

གསར་འགོད་པ་སྐལ་བཟང་དོན་གྲུབ།