ཏཱ་ལའི་བླ་མའི་ནཱ་ལེནྡྲའི་རིག་གནས་སློབ་གཉེར་ཁང་ཞིག་འཛུགས་འཆར།

ཟླ་འདིའི་ཚེས་༡༦ ཉིན་༸གོང་ས་མཆོག་གིས་གནས་མཆོག་རྡོ་རྗེ་གདན་གྱི་བཞུགས་སྒར་དགའ་ལྡན་འཕེལ་རྒྱས་གླིང་གི་མཇལ་འཕྲད་ཁང་དུ་ཨ་རི་བ་དང་། བོད་རིགས། འབྲུག་པ། ཧི་མ་ལ་ཡ་རི་རྒྱུད་ཀྱི་མི་རིགས། དེ་བཞིན་རྒྱ་ནག་སྐམ་ས་ཆེན་པོ་དང་ཐའེ་ཝན་གྱི་རྒྱ་རིགས། རྒྱ་གར་བ་སོགས་ཁྱོན་མི་གྲངས་༢༦༠ བརྒལ་བར་དམིགས་བསལ་མཇལ་ཁ་དང་བཀའ་སློབ་གནང་སྐབས། ཏཱ་ལའི་བླ་མའི་ནཱ་ལེནྡྲའི་རིག་གནས་སློབ་གཉེར་ཁང་ཞིག་འཛུགས་འཆར་ཡོད་སྐོར་བཀའ་སློབ་གནང་། 

༧གོང་ས་མཆོག་གིས་བཀའ་སློབ་གནང་དོན། “ཐེངས་འདིར་རྡོ་རྗེ་གདན་ལ་བསྡད་ནས་སང་ཉིན་ངོས་རང་པཱཌ་ནར་ཕྱིན་ནས་མངའ་སྡེའི་སྤྱི་ཁྱབ་བློན་ཆེན་མཆོག་དང་མཇལ་འཕྲད་ཅིག་ཡོད། ངོས་ལ་བསམ་བློ་གསར་པ་ཞིག་ཡོད། རྡོ་རྗེ་གདན་གྱི་ཉེ་འཁོར་དུ་བླ་མ་བཟོད་པ་རིན་པོ་ཆེའི་ས་ཆ་ཞིག་ཡོད་པ་རེད། ངོས་རང་དེ་སྔ་དེར་ཕྱིན་པ་ཡིན། དེའི་ཉེ་འཁོར་དུ་རིམ་བཞིན་ཏཱ་ལའི་བླ་མའི་ནཱ་ལེནྡྲའི་རིག་གནས་སློབ་གཉེར་ཁང་ཞིག་འཛུགས་རྒྱུ་དང་།  གང་ལྟར་ཆོས་གཅིག་པུ་མིན་པར་སེམས་ཁམས་རིག་པ་དང་། ཚད་མ་རིག་པ། ལྟ་གྲུབ་སོགས་སློབ་སྦྱོང་བྱེད་ས་ཡོད་པའི་སློབ་གཉེར་བསྟི་གནས་ཁང་ཞིག་ཡོང་རྒྱུ་ཕལ་ཆེར་གཏན་འཁེལ་བ་ཡིན།   དེ་ལྟ་བུ་ཞིག་བང་རིམ་སྒྲིག་བཞིན་ཡོད། དེར་བརྟེན་སང་ཉིན་པཱཌ་ན་ལ་མངའ་སྡེའི་སྤྱི་ཁྱབ་བློན་ཆེན་དང་བཀའ་མོལ་ལྷོད་ལྷོད་ཞུ་རྩིས་ཡོད། སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་གནས་ཧ་ཅང་རྩ་ཆེན་པོ་རེད། དེའི་ཉེ་འདབས་ལ་དཔལ་ནཱ་ལེནྡྲའི་ཆོས་བརྒྱུད་ཤེས་ཡོན་གྱི་སྡེ་ཚན་ནང་ལ་བཞག་ནས་སློབ་སྦྱོང་བྱ་རྒྱུ་ཡོད་པ་ཞིག་ལ་ངོས་ཀྱིས་བསམ་བློ་གཏོང་གི་ཡོད་པ་རེད། ས་གནས་གཞུང་གིས་ཀྱང་ཐུགས་ཁུར་ཧ་ཅང་བཞེས་ཀྱི་འདུག སྲིད་སྐྱོང་དང་ཡང་ངོས་རང་སྔོན་མ་སྐད་ཆ་བྱུང་བ་རེད། ཁོ་རང་སེམས་ཤུགས་འཕར་ནས་དེའི་སྟེང་ལ་ལས་ཀ་བྱེད་ཀྱི་ཡོད་རེད། རིམ་བཞིན་བཅོམ་ལྡན་འདས་སངས་རྒྱས་པའི་གནས་རྩ་ཆེན་པོ་ཡིན་པ་ཙམ་དུ་མ་ཟད། དེའི་ཉེ་འདབས་ལ་སྔོན་གྱི་ནཱ་ལེནྡྲ་སྐད་གྲགས་ཡོད་པ་དེར་ནཱ་ལེནྡྲ་གཉིས་པ་ཞིག་ཆོས་ཕྱོགས་ཀྱི་སྐད་ཆ་གཅིག་པུ་མིན་པར་ཤེས་ཡོན་གྱི་སྡེ་ཚན་བྱས་ནས་འཛུགས་རྒྱུའི་བང་སྒྲིག་ཡོད་པ་རེད། རིམ་བཞིན་སློབ་སྦྱོང་བྱེད་སའི་བསྟི་གནས་ཤིག་ཆགས་སོང་ན་དེར་སློབ་སྦྱོང་ལ་ཡོང་མཁན་མང་པོ་ཞིག་ཡོང་གི་རེད་ལ། ངོས་ཀྱང་དེར་དུས་ནས་དུས་སུ་སླེབ་ཀྱི་རེད། རྡོ་རྗེ་གདན་ལའང་ཡོང་གི་རེད། ཤེས་ཡོན་གྱི་བསྟི་གནས་གསར་པ་ཞིག་འཛུགས་ཐུབ་པ་དེས་ངོས་རང་འདིར་ཡོང་རྒྱུར་འབྲེལ་བ་ཞིག་ཆགས་ཀྱི་ཡོད་པ་རེད་”ཅེས་བཀའ་སློབ་གནང་འདུག 

ནང་ཆོས་སློབ་གཉེར་དགོས་སྐོར་ལ་བཀའ་སློབ་གནང་དོན། “བཅོམ་ལྡན་འདས་ཀྱི་ཆོས་ཀྱི་འགྲོ་སྟངས་རྩ་བ་འདི་རེད། སློབ་སྦྱོང་བྱས། རྩད་གཅོད་བྱས་ཏེ་སེམས་ཁམས་རིག་པའི་ཐོག་ནས་ནང་བསམ་བློར་རྩད་གཅོད་བྱས་ཏེ་ཉོན་མོངས་ཆགས་སྡང་སྐྱེས་པའི་རྒྱུ་དང་རྐྱེན་ཇི་ལྟར་ཡོང་གི་ཡོད་པ་ཤེས་པར་བྱས་ཏེ་བློ་ལ་འགྱུར་བ་གཏོང་རྒྱུ་ཞིག ཆོས་ཉིད་བདེན་པ་བསྟན་པས་གྲོལ་བར་འགྱུར་ཞེས་པ་དེ་ལྟར་རེད། བཅོམ་ལྡན་འདས་ལ་དད་པ་བྱེད་མཁན་ཚོས་སངས་རྒྱས་པའི་ཆོས་ལ་སློབ་སྦྱོང་བྱེད་རྒྱུ་གལ་ཆེན་པོ་རེད། དད་པ་གལ་ཆེན་པོ་དང་རྩ་ཆེན་པོ་རེད། འོན་ཀྱང་དད་པ་ལ་གཉིས་ཡོད། དབང་རྣོན་ཆོས་ཀྱི་རྗེས་འབྲང་གི་དད་པ་གཅིག་དང་། དབང་རྟུལ་དད་པའི་རྗེས་འབྲང་གི་དད་པ་གཅིག་བྱས་ཏེ་དད་པ་ལ་རིགས་མི་འདྲ་བ་གཉིས་འདུག དབང་རྣོན་ཆོས་ཀྱི་རྗེས་འབྲང་གི་དད་པ་ནི་སངས་རྒྱས་པའི་ཆོས་ཀྱི་རྒྱུ་མཚན་དང་གནད་འགག་ག་འདྲ་རེད་འདུག་དཔྱད་པ་བྱས་ཏེ་དད་པ་སྐྱེས་ཡོང་བ་དེ་དབང་རྣོན་ཆོས་ཀྱི་རྗེས་འབྲང་གི་དད་པ་རེད། སངས་རྒྱས་བཅོམ་ལྡན་འདས་རྩ་ཆེན་པོ་རེད་ཟེར་བའི་གྲགས་པ་ཙམ་གྱི་རྗེས་སུ་འབྲངས་ནས་བཅོམ་ལྡན་འདས་ལ་དད་པ་བྱེད་རྒྱུ་ནི་དབང་རྟུལ་དད་པའི་རྗེས་འབྲང་ཟེར་བ་དེ་རེད། ང་ཚོ་དུས་རབས་༢༡ པའི་ནང་པ་རེད། དེར་བརྟེན་སངས་རྒྱས་པའི་ཆོས་ཀྱི་གནད་འགག་ཕྲན་བུ་ཤེས་པ་བྱས་ཏེ་སངས་རྒྱས་པའི་ཆོས་ལ་དད་པ་བྱུང་བ་ཡིན་ན། དད་པ་དེ་རྒྱུ་མཚན་ལྡན་པའི་དད་པ་དང་དད་པ་བརྟན་པོ་ཆགས་ཀྱི་ཡོད་པ་རེད།  དེང་སང་གིས་དུས་ཚོད་ལ་ནང་པའི་ཆོས་ལ་དོ་སྣང་ཡོད་མཁན་ཚོས་ནང་པའི་ཆོས་ཇི་ལྟར་ཡིན་པ་སློབ་སྦྱོང་བྱེད་རྒྱུ་དང་། སྔོན་ལ་སྤྱོད་འཇུག་ལས་སླ་བོ་རེད། བྱང་ཆུབ་སེམས་དཔའི་སྤྱོད་པ་ལ་འཇུག་པའི་སྤྱོད་འཇུག་གི་དེབ་དེ་བོད་ཡིག་ཙམ་མ་ཟད། ཧིན་དི་དང་ཨིན་ཇི། རྒྱ་ཡིག་ནང་དུའང་ཡོད་པ་རེད། སྤྱོད་འཇུག་ཕྲན་བུ་བལྟ་ཐུབ་ན། སྤྱོད་འཇུག་གི་ལེའུ་དྲུག་པ་བཟོད་པའི་ལེའུ་ནང་ཁོང་ཁྲོ་ལ་སྐྱོན་གང་ཡོད་པ་ཧ་ཅང་ཤུགས་ཆེན་པོ་གསུངས་ཡོད། འདིར་བསམ་བློ་ཏོག་ཙམ་གཏོང་ཐུབ་ན་ཁོང་ཁྲོ་ཟེར་བ་དེ་རྒྱུ་མཚན་མི་ལྡན་པ་ཡིན་པར་སོ་སོའི་སེམས་དཀྲུགས། མི་ལའང་མི་བདེ་བ་ཡོང་མཁན་ཞིག་ཡིན་པར་དེར་བརྟེན་བཟོད་པའི་ལེའུ་དེ་སེམས་ནང་ཁོང་ཁྲོ་ཆུང་དུ་གཏོང་སླད་ཧ་ཅང་ཕན་ཐོགས་འདུག་”ཅེས་བཀའ་སློབ་གནང་འདུག །

ཕྱི་ཟླ་༡ ཚེས་༡༧ ཉིན་གྱི་སྔ་དྲོ་མགོན་པོ་གང་ཉིད་དང་སྐུ་འཁོར་ལྷན་རྒྱས་དགའ་ལྡན་འཕེལ་རྒྱས་གླིང་ནས་སྟོན་པའི་སྐུ་བརྙན་རིན་པོ་ཆེའི་མདུན་དུ་༸ཞབས་སོར་འཁོད་མཚམས་ཐོག་མར་སྣང་གསལ་མར་མེ་ཞལ་ཕྱེ་གནང་རྗེས། བདེན་ཚིག་སྨོན་ལམ་སོགས་གསུང་འདོན་གནང་སྟེ་ཐུགས་སྨོན་མཛད་རྗེས། ༧གོང་ས་མཆོག་གནས་མཆོག་རྡོ་རྗེ་གདན་ནས་རླངས་འཁོར་བརྒྱུད་རྒྱ་གར་གྱི་མངའ་སྡེ་བྷི་ཧར་གྱི་བསྟི་གནས་པཱ་ཊི་ནར་ཆིབས་སྒྱུར་བསྐྱངས་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།