ཐའེ་ཝན་གྱིས་པེ་ཅིང་ཨོ་ལིམ་ཕིག་རྩེད་འགྲན་ཐོག་གཞུང་འབྲེལ་མི་སྣ་གཏོང་རྒྱུ་མིན་པའི་གསལ་བསྒྲགས་སྤེལ། 

དེ་རིང་སྟེ་ཕྱི་ཟླ་༡ ཚེས་༢༧ ཉིན་ཐའེ་ཝན་གསར་འགྱུར་ཁང་(Taiwan News) ནས་སྤེལ་བའི་གནས་ཚུལ་ལྟར་ན། ཤར་ཨེ་ཤི་ཡའི་གླིང་ཕྲན་རྒྱལ་ཁབ་ཐའེ་ཝན་གྱིས་འཚོགས་ལ་ཉེ་བའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོའི་དབུ་འབྱེད་དང་། མཇུག་བསྡུའི་མཛད་སྒོ་ལ་ཐའེ་ཝན་གྱི་གཞུང་འབྲེལ་སྐུ་ཚབ་མི་སྣ་གཅིག་ཀྱང་གཏོང་རྒྱུ་མིན་པའི་གསལ་བསྒྲགས་བྱས་ཡོད་འདུག 

རྒྱ་ནག་གིས་ཤར་ཏུར་ཀི་སི་ཐན་དང་། བོད། སོག་པོ་ལ་སོགས་པའི་བཙན་འོག་ཏུ་ཡོད་པའི་ས་ཁུལ་ཁག་ཏུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་དང་། གྲངས་ཉུང་མི་རིགས་ཀྱི་སྐད་དང་ཡི་གེ། ཆོས་ལུགས་དང་གོམས་སྲོལ་རྣམས་“རྒྱ་ནག་ཅན་”དུ་བསྒྱུར་ནས་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱས་དང་བྱེད་མུས་སུ་ཡོད་པར་བརྟེན། ཨ་རི་དང་། ཁ་ན་ཌ། དབྱིན་ཇི། ཨོ་སི་ཁྲུ་ལི་ཡས་མཚོན་པའི་མང་གཙོའི་སྟོབས་ཆེན་རྒྱལ་ཁབ་ཁ་ཅིག་གིས་དངོས་སུ་གཞུང་འབྲེལ་ཐོག་ནས་རྩེད་འགྲན་ཆེན་མོ་དེ་བཀག་སྡོམ་(diplomatic boycott) བྱས་ཡོད་ལ། དེ་བཞིན་ཉི་ཧོང་དང་ཇར་མན་ལྟ་བུའི་རྒྱལ་ཁབ་འགས་དངོས་སུ་གཞུང་འབྲེལ་ཐོག་ནས་བཀག་སྡོམ་བྱས་པའི་གསལ་བསྒྲགས་སྤེལ་མེད་ན་ཡང་། གཞུང་འབྲེལ་མི་སྣ་གཅིག་ཀྱང་པེ་ཅིང་ལ་གཏོང་རྒྱུ་མིན་སྐོར་བསྒྲགས།

པེ་ཅིང་གི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་དེ་ཟླ་རྗེས་མའི་ཚེས་༤ ཉིན་དངོས་སུ་འགོ་འཛུགས་རྒྱུ་ཡིན་པ་དང་། དེ་ནི་༢༠༠༨ ལོའི་དབྱར་ཁའི་ཨོ་ལིམ་ཕིག་རྩེད་འགྲན་ཆེན་མོའི་རྗེས་སུ་རྒྱ་ནག་ཏུ་འཚོགས་པའི་རྒྱལ་སྤྱིའི་རྩེད་མོའི་འགྲན་སྡུར་ཆེ་ཤོས་དེ་ཆགས་ཀྱི་ཡོད། འོན་ཀྱང་། ད་ལྟ་མང་གཙོའི་འཛམ་གླིང་གི་མིག་ལམ་དུ་རྒྱ་ནག་གི་རང་བཞིན་ཉིན་རེ་བཞིན་ཇེ་གསལ་དུ་འགྱུར་བཞིན་ཡོད་སྟབས། རྒྱ་ནག་གིི་རེ་བ་ལྟར་རྒྱལ་སྤྱིའི་རྩེད་འགྲན་ཆེན་མོ་དེ་དཔལ་འབྱོར་དང་སྟོབས་ཤུགས་ངོམ་སའི་སྡིངས་ཆ་ཞིག་ཏུ་འགྱུར་བ་ལས་ལྡོག་སྟེ་འགྲོ་བ་མིའི་ཐོབ་ཐང་གི་གནས་བབ་གསལ་པོར་མཐོང་སའི་མེ་ལོང་ཞིག་ཏུ་འགྱུར་བཞིན་ཡོད་འདུག །
གསར་འགོད་པ་དཀོན་མཆོག་རབ་བརྟན།