ཐའེ་ཝན་གྱིས་རྒྱ་ནག་འཛམ་གླིང་ཚོང་འབྲེལ་ལྷན་ཚོགས་ལ་ཁྲིམས་གཏུག་བྱེད་རྒྱུ་ཡིན་ཚུལ་བརྗོད་འདུག 

རྒྱ་ནག་གིས་ཐའེ་ཝན་གྱི་དམིགས་བསལ་ཐོན་སྐྱེད་ཤིང་འབྲས་སྣ་ཁ་གཉིས་ནང་འདྲེན་བྱེད་མཚམས་འཇོག་རྒྱུ་ཡིན་ཚུལ་བཤད་རྗེས། ཐའེ་ཝན་གྱིས་གལ་སྲིད་རྒྱ་ནག་གིས་ཟླ་འདིའི་ཚེས་༣༠ ཡི་ནང་ཚུན་དུ་གཉིས་མོས་ཀྱི་ལམ་ནས་དཀའ་རྙོག་སེལ་བའི་རེ་སྐུལ་ལ་ཡ་ལན་མ་སྤྲད་པ་ཡིན་ན། འཛམ་གླིང་ཚོང་འབྲེལ་ལྷན་ཚོགས་(World Trade Organization) ལ་ཁྲིམས་གཏུག་བྱེད་རྒྱུ་ཡིན་པའི་འཇིགས་སྐུལ་བྱས་ཡོད་འདུག
བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ཉི་མའི་ཉིན་ཐའེ་ཝན་གྱིས་རྒྱ་ནག་འཛམ་གླིང་ཚོང་འབྲེལ་ལྷན་ཚོགས་ལ་ཞུ་གཏུག་བྱེད་རྒྱུ་ཡིན་པའི་འཇིགས་སྐུལ་བྱས་ཡོད་འདུག་ཅིང་། དེའི་རྒྱུ་མཚན་ནི་རྒྱ་ནག་གིས་ཐའེ་ཝན་གྱི་དམིགས་བསལ་ཐོན་སྐྱེད་ཤིང་འབྲས་སྣ་ཁ་གཉིས་(Sugar apple and wax apple) ནང་འདྲེན་བྱེད་མཚམས་འཇོག་རྒྱུ་ཡིན་སྐོར་བརྗོད་པས་ཡིན་འདུག 

འཛམ་གླིང་གི་དཔལ་འབྱོར་ཨང་གཉིས་པར་གྱུར་བའི་རྒྱ་ནག་གིས་ཨེ་ཤི་ཡའི་ཤར་མཐའ་རུ་ཆགས་པའི་གླིང་ཕྲན་རྒྱལ་ཁབ་ཐའེ་ཝན་“ང་ཚོའི་ཁ་བྲལ་ཐབས་མེད་པའི་ཆ་ཤས་ཡིན་”ཞེས་ཧམ་བཤད་བྱེད་ཀྱི་ཡོད་པ་མ་ཟད། ཉེ་བའི་ལོ་ཤས་ནང་ཐའེ་ཝན་གྱི་མཁའ་དབྱིངས་སུ་གནམ་གྲུ་རྒྱུན་ཆད་མེད་པར་བཏང་ནས་ཐའེ་ཝན་ལ་དྲག་པོའི་བཙན་འཛུལ་བྱེད་རྒྱུ་ཡིན་པའི་རྣམ་འགྱུར་ཤུགས་ཆེན་སྟོན་བཞིན་ཡོད། འོན་ཀྱང་། ནུབ་ཕྱོགས་དང་རྒྱ་ནག་གི་འགལ་བ་ཇེ་གསལ་དུ་འགྲོ་བཞིན་པའི་དུས་སྐབས་འདིར། ཨ་རིས་གཙོས་པའི་མང་གཙོའི་རྒྱལ་ཁབ་རྣམས་ཀྱིས་ཐའེ་ཝན་ལ་རྒྱབ་སྐྱོར་བྱེད་པ་ཤུགས་ཆེ་རུ་བཏང་ནས་ཐའེ་ཝན་དང་། ཞི་བདེ་རྒྱ་མཚོ་སྲུང་སྐྱོབ་བྱེད་རྒྱུ་དེ་ཕྱི་འབྲེལ་སྲིད་བྱུས་ཀྱི་གལ་གནད་དུ་འཛིན་བཞིན་ཡོད་པར་བརྟེན། རྒྱ་ནག་གིས་དངོས་སུ་ཐའེ་ཝན་ལ་བཙན་འཛུལ་བྱེད་མ་ཕོད་པར་ལྷག་ཡོད། 

རྒྱ་ནག་གི་ནང་འདྲེན་ཚོང་རྫས་དོ་དམ་ལས་ཁུངས་(Customs administration) ཀྱིས་ཐའེ་ཝན་གྱི་ཤིང་འབྲས་གཉིས་ལ་དུག་འབུ་ཡོད་ཚུལ་བཤད་དེ། འབྲེལ་ཡོད་ལས་ཁུངས་ཚང་མས་དེ་རིང་རེས་གཟའ་ཟླ་བ་ནས་བཟུང་སྟེ་ཤིང་འབྲས་དེ་གཉིས་ནང་འདྲེན་བྱེད་པའི་ཆོག་མཆན་སྤྲོད་མཚམས་འཇོག་དགོས་པའི་བཀའ་བཏང་ཡོད་འདུག 

ཐའེ་ཝན་གྱི་ཞིང་ལས་བློན་ཆེན་ཆན་ཆེ་ཆུན་(Chen Chi-chung) གྱིས་རྒྱ་ནག་གིས་ཚན་རིག་གི་དཔང་རྟགས་མེད་པར་དེ་ལྟར་ཐག་གཅོད་བྱས་པར་སྐྱོན་བརྗོད་བྱས་པ་དང་། “ང་ཚོས་འདི་དང་ལེན་བྱེད་ཐབས་བྲལ་ཡོད་”ཅེས་བཤད་པའི་ཐོག གལ་སྲིད་རྒྱ་ནག་གིས་ཟླ་འདིའི་ཚེས་༣༠ ཡི་ནང་ཚུན་ལ་གཉིས་མོས་ཀྱི་ལམ་ནས་དཀའ་རྙོག་སེལ་རྒྱུའི་རེ་སྐུལ་ལ་ཡ་ལན་མ་སྤྲད་པ་ཡིན་ན། འཛམ་གླིང་ཚོང་འབྲེལ་ལྷན་ཚོགས་(World Trade Organization) ལ་ཁྲིམས་གཏུག་བྱེད་རྒྱུ་ཡིན་ཚུལ་ཡང་བསྣན་ཡོད་འདུག 

དེ་མིན་ད་དུང་། ཐའེ་ཝན་གྱི་ཕྱི་སྲིད་བློན་ཆེན་ཇོ་སི་ཧྥི-ཝོའུ་(Joseph Wu) ཡིས་ད་ནི་རྒྱ་ནག་གིས་“ཚོང་ལས་དམག་གི་ལག་ཆར་བེད་སྤྱོད་གཏོང་བཞིན་ཡོད་”པས། བྱ་སྤྱོད་འདིས་བདུན་ཕྲག་གོང་མར་རྒྱ་ནག་ཞི་བདེ་རྒྱ་མཚོའི་ཚོང་འབྲེལ་ཡར་རྒྱས་མཐུན་ཚོགས་སུ་(CPTPP) འཛུལ་ཞུགས་བྱེད་རྒྱུའི་སྙན་ཞུ་ཕུལ་བ་དེར་དོགས་པ་ཟ་དགོས་པ་བཟོས་ཡོད་ཅེས་བཤད་དེ་རྒྱ་ནག་ལ་ཟུར་ཟ་དང་སྐྱོན་བརྗོད་བྱས་ཡོད་འདུག 

རྒྱ་ནག་གིས་ལོ་འདི་ལ་ཐའེ་ཝན་གྱི་ཤིང་འབྲས་ནང་འདྲེན་བྱེད་མཚམས་བཞག་པ་ད་ཐེངས་གཅིག་པུ་མ་ཡིན་པར། དེ་སྔོན་ཕྱི་ཟླ་༢ པའི་ནང་དུ་ཡང་ཐའེ་ཝན་གྱི་ཤིང་འབྲས་ཕན་ཨ་ཕོལ་(pineapple) ལ་གདོན་སྐྱོན་ཆེ་བའི་དུག་འབུ་ཡོད་ཚུལ་བཤད་དེ་ནང་འདྲེན་བྱེད་མཚམས་བཞག་པར། ཐའེ་ཝན་གྱིས་རྒྱ་ནག་གིས་ཆབ་སྲིད་འཁྲབ་བཞིན་པ་ལས་ཤིང་འབྲས་ལ་སྐྱོན་ཆ་གང་ཡང་མེད་ཚུལ་བརྗོད་ཡོད། ། 

གསར་འགོད་པ་དཀོན་མཆོག་རབ་བརྟན།