ཐེ་ཝན་དུ་རྒྱ་ནག་མང་གཙོ་ཅན་དུ་འགྱུར་བར་ཤུགས་རྐྱེན་ཐེབས་ཐབས་ཀྱི་རྒྱལ་སྤྱིའི་བགྲོ་གླེང་ཆེན་མོ་སྐོང་འཚོགས་གནང་འདུག

ཟླ་འདིའི་ཚེས་ ༢༧ ཉིན་ཐེ་ཝན་སྐུ་ཚབ་དོན་གཅོད་ལས་ཁུངས་ཀྱི་ལམ་སྟོན་འོག་ཐེ་སྡོད་བོད་རིགས་ཚོགས་པས་ཐུན་མོང་གི་གཞི་རྟེན་འཚོལ་བ་ཞེས་པའི་བརྗོད་གཞིའི་ཐོག་ལོ་ལྟར་བགྲོ་གླེང་ཆེན་མོ་ཞིག་སྐོང་འཚོགས་ཞུ་བཞིན་ཡོད་པ་ལྟར། ལོ་འདིར་ཐེ་ཝན་དུ་དགུ་གཅིག་འོས་བསྡུ་ཆེན་མོའི་སྐབས་སུ་ཐེ་ཝན་གྱི་ཡང་དག་པའི་མང་གཙོ་འདི་བཞིན་རྒྱལ་སྤྱིའི་ནང་གོ་རྟོགས་གོང་སྤེལ་ཆེད་ཨ་རི་གཙོས་པའི་ཁེ་ན་ཊ་དང་། ཡུ་རོབ། ཨོ་གླིང་བཅས་རྒྱལ་ཁབ་ཁག་ནས་རྒྱ་རིགས་མང་གཙོ་དོན་གཉེར་བ་དང་། རྒྱ་མི་ཉམས་ཞིབ་པ་ཁག་ཅིག་འོས་བསྡུ་ཆེན་མོར་འཚམས་གཟིགས་ཕེབས་ཡོད་པ་དང་སྟབས་བསྟུན། ལོ་འདིའི་བགྲོ་གླེང་གི་བརྗོད་གཞི་ཐེ་བོད་ཀྱིས་མང་གཙོ་ཡང་དག་པ་ལག་བསྟར་བྱེད་བཞིན་པ་དེས་མ་འོངས་རྒྱ་ནག་མང་གཙོ་ཅན་དུ་འགྱུར་བར་ཤུགས་རྐྱེན་ཐེབས་ཐབས། ཞེས་པའི་ཐོག་རྒྱལ་སྤྱིའི་བགྲོ་གླེང་ཆེན་མོ་ཞིག་ཐེ་པེ་ཧྤུ་ཧཱ་མགྲོན་ཁང་དུ་སྐོང་འཚོགས་གནང་འདུག

ཚོགས་འདུ་དེ་ནི་ཐེ་ཝན་སྐུ་ཚབ་དོན་གཅོད་ལས་ཁུངས་ཀྱི་དུས་དེབ་ཀུན་གསལ་འོད་སྣང་གི་རྩོམ་སྒྲིག་པ་ལྕམ་ལོབ་ཧེའུ་ཇོན་ཀྱིས་གཙོ་སྐྱོང་གནང་བ་དང་། ཐོག་མ་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་གྱིས་བགྲོ་གླེང་ཆེན་མོ་འདི་ཉིད་སྐོང་འཚོགས་བྱས་དགོས་པའི་དམིགས་ཡུལ་དང་། ཚོགས་འདུའི་བརྩི་སྲུང་དགོས་པའི་སྒྲིག་ལམ་ཁག་ནན་བཤད་བྱས་རྗེས། ཚོགས་འདུ་གོ་སྒྲིག་པའི་མིང་ཐོག་ནས་ཐའེ་སྡོད་བོད་རིགས་ཚོགས་པའི་ཚོགས་གཙོ་བཀྲ་ཤིས་ཚེ་རིང་དང་། སློབ་དཔོན་ཆེན་མོ་སྐུ་ཞབས་ཙིམ་ཅན་ཡོན་གྱིས་དབུ་འཛུགས་ཀྱི་གཏམ་བཤད་གནང་རྗེས། ཚོགས་ཐུན་དང་པོར་མང་གཙོའི་གོ་རྟོགས་དང་ཉམས་མྱོང་སྤེལ་རེས་ཞེས་པའི་བརྗོད་གཞིའི་ཐོག་ཁྱད་ལས་མཁས་དབང་དྲུག་གིས་གསུང་བཤད་གནང་ཡོད་ལ། ཨ་རི་ནིའུ་ཡོག་གྲོང་ཁྱེར་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ཞྭ་མིང་གིས་རྒྱ་ནག་རང་དབང་ཤེས་ཡོན་ཅན་གྱི་མིང་ཐོག་ནས་མང་གཙོའི་ཤེས་བྱ་དང་། བཞུགས་སྒར་དྷ་རམ་ས་ལར་ཐེངས་བརྒྱད་ཙམ་བསྐྱོད་པའི་ཉམས་མྱོང་། ༸གོང་ས་མཆོག་གི་རླབས་ཆེན་གྱི་དགོངས་གཞི་དང་། བཙན་བྱོལ་བོད་མིའི་མང་གཙོ་དང་འབྲེལ་བའི་སྐོར་གསུང་བཤད་གནང་ཡོད་འདུག

དེ་ནས་ཐེ་ཝན་ཆབ་སྲིད་གཙུག་ལག་སློབ་གཉེར་ཁང་གི་སློབ་དཔོན་ཆེ་མོ་ལི་ཡུ་ཏི་ཡིས་ཐེངས་འདི་ཐའེ་ཝན་གྱི་ས་གནས་འོས་བསྡུ་ཆེན་མོའི་མཇུག་འབྲས་ལས་མ་འོངས་རྒྱ་ནག་དང་ཐེ་ཝན་དབར་གྱི་འབྲེལ་ལམ་ཕེབས་ཕྱོགས། ཐེ་ཝན་གཞུང་གིས་སྲིད་བྱུས་འཛིན་སྟངས་དང་རྒྱལ་སྤྱིའི་གནས་བབ་ཐོག་གཏམ་བཤད་གནང་བ་དང་། ཐེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་གྱིས་བོད་མི་རྣམས་བཙན་བྱོལ་དུ་འབྱོར་མ་ཐག་༸གོང་ས་མཆོག་གི་བཀའ་སློབ་ལམ་སྟོན་གཞིར་བཟུང་། མང་གཙོའི་ཕེབས་རིམ་དང་བཙན་བྱོལ་ནང་ཁ་འཐོར་གྱི་གནས་བབ་འོག་འཛམ་གླིང་ཡུལ་གྲུ་ཁག་ཏུ་ཉིན་བརྒྱ་དུས་གཅིག་ལ་འོས་བསྡུ་ཇི་ལྟར་བྱས་ཐུབ་པའི་ཉམས་མྱོང་སོགས་ཀྱི་ཐོག་ལ་གསུང་བཤད་གནང་ཡོད་འདུག། དེ་ནས་ཉི་འོང་གི་གྲགས་ཅན་གསར་འགོད་པ་དང་རྒྱ་ནག་གི་ཉམས་ཞིབ་པ་སྐུ་ཞབས་ཧྲི་པང་མིང་ཧྲུ་ཡིས་ཡུན་རིང་ཐའེ་ཝན་དུ་བཞུགས་པའི་ཕྱི་མི་ཞིག་གིས་ཐའེ་ཝན་གི་མང་གཙོར་བལྟ་སྟངས་སྐོར་གསུང་བཤད་གནང་བ་དང་།  དེ་སྔ་ཧོང་ཀོང་ས་གནས་ཀྱི་གྲོས་ཚོགས་འཐུས་མི་དང་། དེང་སང་ཐེ་ཝན་དུ་གནས་བཞུགས་སྐུ་ཞབས་ཞོས་པེ་ཏིལ་གྱིས་ཧོང་ཀོང་དང་འབྲེལ་བའི་གཏམ་བཤད་གནང་ཡོད་འདུག། གཞན་ཡང་གཏམ་བཤད་གནང་མཁན་གཙོ་བོ་མཁས་དབང་མིང་ཇུས་ཀྲིན་ཡིས་དུས་ཐོག་ཕེབས་མ་ཐུབ་ཀྱང་། ཚོགས་འདུར་རྒྱབ་སྐྱོར་མཚོན་ཆེ་དགོང་མོ་ཞལ་ལག་ཐོག་ཕེབས་ཏེ་ཚོགས་ཞུགས་པ་ཚང་མར་ངོ་སྤྲོད་ཀྱི་གཏམ་བཤད་ཡང་གནང་ཡོད་འདུག། བགྲོ་གླེང་ཚོགས་ཐུན་གཉིས་པ་དེ་བཞིན་དུས་ཐུང་སྐར་མ་གསུམ་རེའི་རང་དབང་གཏམ་གླེང་གི་དུས་སྐབས་ཡིན་ཞིང་། ཚོགས་ཞུགས་པ་ཚང་མས་འཚང་ཁ་ཤིག་ཤིག་ངང་ད་ཐེངས་འོས་བསྡུའི་མྱོང་ཚོར་སྐོར་དང་འོས་བསྡུའི་རྗེས་སུ་བགྲོ་གླེང་ཚོགས་འདུ་གོ་སྒྲིག་གནང་ཐུབ་པར་བསྔགས་བརྗོད་ཆེན་མོ་བྱས་ཡོད་འདུག

བགྲོ་གླེང་ཚོགས་ཐུན་གསུམ་པ་ནི་བསྒྲགས་གཏམ་གྱི་རགས་ཟིན་ལ་བགྲོ་གླེང་བྱ་རྒྱུ་ཡིན་ཅིང་། བསྒྲགས་གཏམ་གྱི་རགས་ཟིན་ལ་སྔོན་གླེང་དང་། ཐའེ་ཝན་དང་བོད་ཀྱིས་མང་གཙོ་ཡང་དག་པ་ལག་བསྟར་བྱེད་བཞིན་པ་དེས་མ་འོངས་རྒྱ་ནག་མང་གཙོ་ཅན་དུ་འགྱུར་ཐབས་ལ་ཐུན་མོང་གིས་ཤུགས་བརྒྱབ་སྟེ་འཛམ་གླིང་ཞི་བདེར་ལེགས་སྐྱེས་འབུལ་དགོས་པའི་གནད་དོན་ཁག་བཀོད་རྗེས་མཐའ་མ་དོན་ཚན་བཞི་ཅན་གྱི་བསྒྲགས་གཏམ་དོན་ཚན་རེ་རེར་ཚོགས་ཞུགས་པ་ཚོས་སྣོན་འཕྲི་སྤོར་འཇོག་དང་ལེགས་བཅོས་ཀྱི་དགོངས་འཆར་ཧ་ལས་པ་གནང་ཡོད་འདུག

བགྲོ་གླེང་ཚོགས་ཐུན་བཞི་པ་ནི་བསྒྲགས་གཏམ་སྤེལ་རྒྱུའི་དུས་ཚོད་ཡིན་ཞིང་། ཚོགས་ཐུན་འདིའི་གཙོ་སྐྱོང་བ་ནི་རྒྱ་ནག་མང་གཙོ་དོན་གཉེར་བ་མིན་ཀྲིན་ཚོགས་པའི་ཚོགས་གཞོན་ལྕམ་ཧྲིན་ཤོད་ཡིན་པ་དང་། བསྒྲགས་གཏམ་སྒྲོགས་སྦྱང་གནང་མཁན་ནི་རྒྱ་ནག་མང་གཙོ་དོན་གཉེར་བ་མིང་ལན་ཚོགས་པའི་ཚོགས་གཙོ་འབུམ་རམས་པ་ཀྲུང་ཅིང་ཅང་ཡིན། དེ་རྗེས་སྐུ་ཚབ་དོན་གཅོད་འབའ་སྐལ་བཟང་རྒྱལ་མཚན་གྱིས་མཇུག་བསྡོམས་གཏམ་བཤད་གནང་རྗེས་ཚོགས་འདུ་རྒྱལ་ཁའི་ངང་གྲོལ་ཡོད།

ཐེངས་འདིའི་བགྲོ་གླེང་ཆེན་མོ་དེ་བཞིན་ཀུན་གསལ་འོད་སྣང་ངོ་དེབ་ཐོག་ཆ་ཚང་ཐད་གཏོང་ཞུས་ཡོད་པ་དང་། གཞན་ཡང་ལས་རིགས་འདྲ་མིན་དང་། གསར་འགྱུར་བརྒྱུད་ལམ་ཁག་ནས་མི་གྲངས་ ༧༠ ལྷག་ཕེབས་ཡོད་པ་མ་ཟད། སྐུ་ཚབ་དོན་གཅོད་ལས་ཁུངས་ནས་ཚོགས་ཞུགས་པ་ཚང་མར་དགོང་མོའི་གསོལ་སྟོན་ཡང་ཕུལ་ཡོད་འདུག་པ་བཅས་སོ།།

གསར་འགོད་པ། བློ་བཟང་རྒྱ་མཚོ།