ཐེ་ཝན་གྱི་ཐོག་ལ་དམག་འཁྲུག་བྱེད་རྒྱུ་ཐེ་ཚོམ་མེད་རབས་བརྗོད་འདུག

ཟླ་འདིའི་ཚེས་༡༠ཉིན་ཧིན་དྷུ་དུས་བབ་གསར་ཁང་གིས་གནས་ཚུལ་སྤེལ་གསལ་ལྟར་ན། ཨེ་ཤི་ཡའི་ཆེས་མཐོའི་བདེ་འཇགས་ལྷན་ཚོགས་ཞེས་པའི་ལྷན་ཚོགས་ཐེངས་བཅུ་དགུ་པ་དེ་ཟླ་འདིའི་ཚེས་བཅུའི་ཉིན་སིངྒ་པུ་རུ་འཚོགས་འགོ་བཙུགས་ཡོད་པ་དང་། ཐེངས་འདིའི་ཚོགས་འདུའི་ནང་དུ་མཉམ་ཞུགས་བྱེད་མཁན་ནི་རྒྱལ་ཁབ་བཞི་བཅུ་ལྷག་གི་ཚོགས་མི་ཕེབས་ཡོད་པ་དང་ལྷན་ཚོགས་ཀྱི་ཐོག་ཏུ་གཙོ་བོ་ཨེ་ཤི་ཡའི་ཞི་བདེ་རྒྱ་མཚོ་ཁུལ་གྱི་བདེ་འཇགས་སོགས་ཀྱི་ཐོག་ལ་གྲོས་བསྡུར་བྱེད་ཀྱི་ཡོད་འདུག

ཐེངས་འདི་ལྷན་ཚོགས་ཀྱི་ནང་དུ་ཨ་རི་དང་རྒྱ་ནག་གི་རྒྱལ་སྲུང་བློན་ཆེན་གཉིས་ཀྱང་ཕེབས་ཡོད་པ་དང་། ཚེས་༡༠ ཉིན་ཨ་རྒྱ་གཉིས་ཀྱི་རྒྱལ་སྲུང་བློན་ཆེན་གཉིས་ཟུར་ཐུག་གིས་བོད་དང་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། ཧོང་ཀོང་གི་ནང་དུ་འགྲོ་བ་མིའི་ཐོབ་ཐང་ཉམས་རྒུད་དུ་འགྲོ་བཞིན་པའི་གནད་དོན་སོགས་ཀྱི་ཐོག་ལ་ཆུ་ཚོད་གཅིག་ཙམ་རིང་གི་བཀའ་མོལ་ཅིག་གནང་ཡོད་པ་རེད་འདུག

སྐབས་དེར་རྒྱ་ནག་རྒྱལ་སྲུང་བློན་ཆེན་གྱིས་ཨུ་རུ་སུས་ཡུག་ཀེ་རེན་ཐོག་ལ་བཙན་འཛུལ་བྱེད་བཞིན་པའི་གནད་དོན་དེ་ནི་གཙོ་བོ་ཨ་རི་དང་བྱང་ཆིངས་རྩ་འཛུགས་ཀྱི་ནོར་འཁྲུལ་ཡིན་རབས་དང་ནུབ་ཕྱོགས་པ་ཚོས་ཡུག་ཀེ་རེན་ལ་གོ་མཚོན་མཁོ་སྤྲོད་བྱེད་པ་དེར་སྐྱོོན་བརྗོད་ཀྱང་བྱས་ཡོད་པའི་གནས་ཚུལ་ཐོན་འདུག

དེ་བཞིན་རྒྱ་ནག་རྒྱལ་སྲུང་བློན་ཆེན་གྱིས་ཐེ་ཝན་བེད་སྤྱོད་བྱས་ནས་རྒྱ་ནག་ལ་སྟངས་འཛིན་བྱེད་རྒྱུ་དེ་ནི་ཡོང་མི་སྲིད་པ་ཞིག་ཡིན་པའི་སྐོར་དང་། ཐེ་ཝན་ནི་རྒྱ་ནག་གི་ཐེ་ཝན་ཡིན་པ་མ་ཟད། རྒྱ་ནག་གཅིག་གི་སྲིད་བྱུས་དེ་ནི་ཨ་རྒྱ་གཉིས་ཀྱི་ཆབ་སྲིད་ཀྱི་འབྲེལ་ལམ་འཛུགས་སའི་རྨང་གཞི་ཡིན་པ་མ་ཟད། གལ་སྲིད་ཐེ་ཝན་གྱིས་རང་བཙན་ཡིན་པའི་གསལ་བསྒྲགས་གཏོང་པ་ཡིན་ན། རྒྱ་ནག་གཞུང་གིས་ཐེ་ཚོམ་གང་ཡང་མེད་པའི་ཐོག་ནས་དམག་འཁྲུག་འགོ་འཛུགས་བྱེད་རྒྱུ་ཡིན་རབས་སོགས་བརྗོད་ཡོད་པའི་གནས་ཚུལ་སྤེལ་འདུག

རྒྱ་ནག་གཞུང་གི་ཐེ་ཝན་ནི་རྒྱ་ནག་གི་ཆ་ཤས་སུ་ངོས་འཛིན་བྱེད་བཞིན་ཡོད་པ་དང་འདས་པའི་ལོ་ངོ་བཅུ་ཕྲག་ཁ་ཤས་ཀྱི་ནང་དུ་རྒྱ་ནག་གིས་ཡང་ནས་བསྐྱར་དུ་ཐེ་ཝན་ལ་སྡིགས་ར་དང་འཇིགས་སྐུལ་བྱས་དང་བྱེད་མུས་ཡིན་པའི་གནས་ཚུལ་སྤེལ་ཡོད་འདུག །

གསར་འགོད་པ་བློ་བཟང་རྒྱ་མཚོ།