ཐེ་ཝན་མཚོ་ཁ་རུ་རྒྱ་ནག་གིས་དམག་སྦྱོང་མཚམས་འཇོག་བྱས་ཡོད་སྐོར་བརྗོད་འདུག
བདུན་སྔོན་མའི་ནང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པོ་ལོ་སི་གིས་སྣེ་ཁྲིད་པའི་གྲོས་ཚོགས་འཐུས་མའི་སྐུ་ཚབ་ཚོགས་ཆུང་ཞིག་ཐེ་ཝན་གྱི་རྒྱལ་ཐའེ་པེ་ནང་དུ་འཚམས་གཟིགས་སུ་ཕེབས་པའི་སྐབས་རྒྱ་ནག་གིས་ཐེ་ཝན་མཚོ་ཁ་ཡི་ཉེ་འགྲམ་དུ་བཅིངས་གྲོལ་དམག་མི་འགྲེམ་འཇོག་གིས་དམག་སྦྱོང་བྱེད་བཞིན་པ་རྣམས་ད་ལྟ་མཚམས་འཇོག་བྱས་ཡོད་ལུགས་བརྗོད་འདུག
ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པོ་ལོ་སི་མཆོག་ཐེ་ཝན་ལ་འཚམས་གཟིགས་མ་ཕེབས་གོང་རྒྱ་ནག་གིས་ཨ་རིར་ཉེན་བརྡ་ཐེངས་མང་བཏང་ཡོད་རུང་། ཟླ་འདིའི་ཕྱི་ཚེས་ ༢ ཉིན་ལྕམ་ནེན་སི་པེ་ལོ་སི་གཙོས་པའི་གྲོས་ཚོགས་འཐུས་མའི་སྐུ་ཚབ་ཚོགས་ཆུང་ནས་ཐེ་ཝན་གྱི་སྲིད་འཛིན་ཚེ་ཨིན་ཝན་མཆོག་དང་ལྷན་དུ་མཇལ་འཕྲད་གནང་ཡོད་པར་བརྟེན། རྒྱ་ནག་བཅིངས་གྲོལ་དམག་གི་མཁའ་དམག་དང་ས་དམག་སོགས་ཀྱིས་ཐེ་ཝན་གྱི་མཐའ་སྐོར་མཚོ་ཁ་རུ་དམག་སྦྱོང་བྱས་ནས་སྡིགས་ར་སྐུལ་ཡོད་པ་མ་ཟད། རྒྱ་ནག་དང་ཚོང་འབྲེལ་ཡོད་པའི་ཐེ་ཝན་གྱི་ཁེ་ལས་ཁང་བརྒྱ་ལྷག་ཙམ་དང་ཚོང་འབྲེལ་བྱེད་རྒྱུ་བཀག་སྡོམ་བྱས་ཡོད་འདུག
དེ་བཞིན་རྒྱ་ནག་གི་དམག་དོན་ཚན་པས་བརྗོད་དོན་ལ། ཐེངས་འདིའི་རྒྱ་ནག་གི་མཁའ་དམག་དང་ས་དམག་སོགས་ཀྱིས་ཐེ་ཝན་གྱི་མཐའ་སྐོར་མཚོ་ཁ་རུ་དམག་སྦྱོང་བྱེད་པ་རྣམས་ལམ་ལྷོངས་བྱུང་ཡོད་སྐོར་དང་། ཐེ་ཝན་གླིང་ཕྲན་རྒྱ་ནག་སྐམ་ས་ཆེན་པོར་ཕྱིར་ལོག་ཡོངས་རྒྱུར་བཙན་པོ་དབང་ཤུགས་ཀྱི་བྱ་ཐབས་བེད་སྤྱོད་བྱེད་དགོས་ཀྱང་བྱེད་རྒྱུ་ཡིན་པ་བརྗོད་པར་བརྟེན། ཐེ་ཝན་གཞུང་གིས་རྒྱ་ནག་གི་བྱེད་སྟངས་དེ་ནི་ཐེ་ཝན་ལ་བཙན་འཛུལ་བྱེད་རྒྱུའི་གྲ་སྒྲིག་བྱེད་བཞིན་པའི་སྐྱོན་བརྗོད་བྱེད་ཀྱི་ཡོད་པ་མ་ཟད། ཐེ་ཝན་ནི་རང་དབང་དང་དམངས་གཙོ་ལྡན་པའི་གླིང་ཕྲན་ཞིག་ཡིན་པས་དུས་རྣམས་ཡང་རྒྱ་ནག་གི་ཆ་ཤས་སུ་བསྒྱུར་སྲིད་ཀྱི་མ་རེད་བཅས་ནན་བརྗོད་བྱས་ཡོད་འདུག
ལྕམ་ནེན་སི་པེ་ལོ་སི་མཆོག་ཐེ་ཝན་ནས་ཕྱིར་ལོག་བྱས་པའི་རྗེས་རྒྱ་ནག་གིས་ཐེ་ཝན་མཚོ་ཁ་ཉེ་འགྲམ་དུ་ཉིན་༤ བསྟུད་མར་མེ་སྒྱོགས་དང་མེ་ཤུགས་འཕུར་མདའ་སོགས་འཕངས་ནས་དམག་སྦྱོང་བྱས་ཡོད་འདུག སྐབས་དེར་རྒྱ་ནག་བཅིངས་གྲོལ་དམག་གིས་མུ་མཐུད་ནས་ཐེ་ཝན་མཚོ་ཁ་རུ་དམག་མི་འགྲེམ་འཇོག་བྱས་ནས་ལྟ་སྲུང་བྱེད་རྒྱུ་ཡིན་ལུགས་དང་། དེ་བཞིན་ཐེ་ཝན་གྱི་ཁ་བྲལ་པའམ་ཕྱིའི་ཤུགས་རྐྱེན་བཅས་ཀྱིས་རྒྱ་ནག་གི་ཚད་འཛིན་ས་ཚིག་ཐིག་ལས་བརྒལ་ཚེ་དྲག་ཤུགས་ལྡན་པའི་བྱ་ཐབས་སྤྱོད་རྒྱུ་ཡིན་པ་བརྗོད་ཡོད་པ་དང་། གཞན་ཡང་རྒྱ་ནག་གིས་ཐེ་ཝན་མཚོ་ཁ་ཉེ་འགྲམ་དུ་ད་ལྟ་དམག་སྦྱོང་མཚམས་འཇོག་བྱས་ཡོད་སྐོར་བརྗོད་ཡོད་ཀྱང་། ཐེ་ཝན་གྱི་རྒྱལ་སྲུང་བློན་ཆེན་གྱིས་དམག་སྦྱོང་མཚམས་འཇོག་པའི་གནས་ཚུལ་དེ་དག་རྒྱ་ནག་གི་རྫུན་གཏམ་བཤད་བཞིན་ཡོད་པ་མ་ཟད། རེས་གཟའ་ལྷག་པའི་ཉིན་རྒྱ་ནག་གི་མཁའ་དམག་གནམ་གྲུ་ ༣༦ དང་དམག་གྲུ་༡༠ ལྷག་ཐེ་ཝན་གྱི་ཉེ་འཁོར་དུ་ལྟ་སྲུང་བྱེད་བཞིན་ཡོད་པ་བརྗོད་འདུག
དེ་ཡང་ལྕམ་ནེན་སི་པེ་ལོ་སི་མཆོག་ཐེ་ཝན་ལ་འཚམས་གཟིགས་ཕེབས་པའི་རྗེས། ཐེ་ཝན་དང་རྒྱ་ནག་བར་གྱི་འབྲེལ་ལམ་ཇེ་སྡུག་ཏུ་སོང་ཡོད་པར་བརྟེན། ཐེ་ཝན་གྱིས་རྒྱ་ནག་ལ་ཁ་གཏད་གཅོག་རྒྱུ་ཐད་ཨ་རི་དང་ཁྱིམ་མཚེས་རྒྱལ་ཁབ་ཁག་ལས་གོ་མཚོན་གསར་པ་ཉོ་སྒྲུབ་བྱེད་བཞིན་པ་མ་ཟད། ཐེ་ཝན་གླིང་ཕྲན་གྱི་མཐའ་སྐོར་རུ་འཛིང་རགས་དང་མི་མང་ཡིབ་སྡོད་བྱེད་སའི་ས་འོག་ཕུག་ལམ་སོགས་གསར་བསྐྲུན་བྱེད་བཞིན་ཡོད་འདུག །
གསར་འགོད་པ། ཆོས་གྲགས།
