ཐེར་འབུམ་གཅིག་གི་གྱེན་ལངས་ལས་འགུལ།

འདི་ལོའི་ཐེར་འབུམ་གཅིག་གི་གྱེན་ལངས་ལས་འགུལ་གྱི་ཆ་ཤས་སུ་ཞི་བདེ་དང་གནམ་གཤིས་སྐོར་ལ་དྲང་བདེན་ཡོང་ཆེད་ཀྱི་བགྲོ་གླེང་ཐོག དྷ་སའི་ཧིན་བོད་གཉིས་ཀྱི་མང་ཚོགས་མཉམ་ཞུགས་བྱས་ཡོད་པ་རེད།

དེ་ཡང་ཟླ་འདིའི་ཚེས་༣༠ ཉིན་བོད་མིའི་སྒྲིག་འཛུགས་དང་། བོད་རང་བཙན་སློབ་ཕྲུག་ཚོགས་པ། བོད་ཀྱི་བུད་མེད་ལྷན་ཚོགས། བོད་ཀྱི་རྩོད་རྙོག་འདུམ་སྒྲིག་ཁང་། རྒྱ་གར་གྱི་ས་གནས་ཇ་གོ་རི་ཞེས་པའི་བུད་མེད་རང་དབང་འཐབ་རྩོད་ཚོགས་པ་བཅས་ཀྱིས། གོ་ལའི་ཐེར་འབུམ་གཅིག་གི་ལས་འགུལ་བརྒྱུད་དེ་རིང་འཛམ་གླིང་ནང་རྩོད་རྙོག་འདུམ་སྒྲིག་གིས་ཞི་བདེ་བསྐྲུན་རྒྱུ་དང་། གནམ་གཤིས་འགྱུར་ལྡོག་གི་དཀའ་ངལ་ལ་གདོང་ལེན་བྱ་ཕྱོགས་ཀྱི་གནད་དོན་རྒྱ་གར་ཡུལ་མི་དང་བཙན་བྱོལ་བོད་མིའི་བར་ཕན་གོ་བརྡ་སྤྲོད་ཐབས་བགྲོ་གླེང་འཚོགས་ཡོད་པ་རེད།

ཐེར་འབུམ་གཅིག་གྱེན་ལངས་ཀྱི་ལས་འགུལ་ཞེས་པ་འཛམ་གླིང་ནང་བུད་མེད་གསུམ་ཆ་གཅིག་ལ་ལོ་ལྟར་བཙན་གཡེམ་དང་རྡུག་རྡེག་བཅས་པའི་འོག་ཏུ་དཀའ་སྡུག་མྱོང་བཞིན་ཡོད་པའི་ཞིབ་འཇུག་གི་གྲུབ་ཐོ་ཐོན་རྗེས། གོ་ལའི་བུད་མེད་ཐེར་འབུམ་གཅིག་ལོ་ལྟར་དཀའ་སྡུག་དེ་འདྲའི་འོག་མྱངས་བཞིན་པར་རྒྱབ་སྐྱོར་གྱི་ཚུལ་དུ། ཕྱི་ལོ་༢༠༡༢ ལོ་ནས་བཟུང་མི་ཐེར་འབུམ་གྱེན་ལངས་ཀྱི་ལས་འགུལ་འགོ་འཛུགས་བྱས་པ་ཞིག་ཡིན་འདུག

བགྲོ་གླེང་ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་སྤྱི་དྲིལ་བཀའ་བློན་བདེ་སྐྱིད་ཆོས་ཀྱིས་གསུང་བཤད་གནང་བ་དང་། ལས་འགུལ་དེ་དང་འབྲེལ་བའི་གློག་བརྙན་ཐུང་གྲས་དང་གླུ་གཞས་གཏོང་བ་བཅས་བྱས་ཡོད་པ་རེད།

བོད་རང་བཙན་སློབ་ཕྲུག་ཚོགས་པའི་ཚོགས་གཙོ་བསྟན་འཛིན་ཚེ་ལྷ་དང་། དེ་བཞིན་བོད་མི་དང་རྒྱ་གར་བ་ཁག་ཅིག་གིས་གསུང་བཤད་དང་མི་མང་བར་བགྲོ་གླེང་བྱས་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།