ད་ལོ་ཡང་ལོ་ནོ་སྦེལ་གཟེངས་རྟགས་འབུལ་བཞེས་ཀྱི་མཛད་སྒོ་དེ་གཟེངས་རྟགས་འཐོབ་མཁན་སོ་སོའི་རྒྱལ་ཁབ་ཏུ་འཚོགས་རྒྱུ་རེད་འདུག 

ནོ་སྦེལ་ཐེབས་རྩ་ཁང་ནས་ཝུའུ་ཧན་ཏོག་དབྱིབས་ནད་ཡམས་(Covid-19) ཀྱི་དཀའ་ཉེན་ལ་བརྟེན་ནས་ད་ལོའི་རྩོམ་རིག་དང་ཚན་རིག་གི་གཟེངས་རྟགས་འབུལ་བཞེས་ཀྱི་མཛད་སྒོ་དེ་འཐོབ་མཁན་སོ་སོའི་རྒྱལ་ཁབ་ཏུ་འཚོགས་གཏན་འཁེལ་བ་ཡིན་པའི་གསལ་བསྒྲགས་སྤེལ་ཡོད་འདུག 

བདུན་ཕྲག་འདིིའི་རེས་གཟའ་ཕུར་བུའི་ཉིན་སྤེལ་བའི་གསལ་བསྒྲགས་ནང་། ནོ་སྦེལ་གཟེངས་རྟགས་གོ་སྒྲིག་ཞུ་མཁན་ཏེ། ནོ་སྦེལ་ཐེབས་རྩ་ཁང་གིས་ཞི་བདེའི་གཟེངས་རྟགས་འབུལ་བཞེས་ཀྱི་མཛད་སྒོ་དེ་སྔར་སྲོལ་ལྟར་ནོར་ཝེ་(Norway) རུ་འཚོགས་དགོས་སམ། ཡང་ན་འཐོབ་མཁན་གྱི་རྒྱལ་ཁབ་ཏུ་འཚོགས་དགོས་མིན་གྱི་ཐག་གཅོད་ད་དུང་ཐུབ་མེད་ན་ཡང་། ནོར་ཝེ་རུ་འཚོགས་ཐུབ་པའི་རེ་བ་རྒྱག་གི་ཡོད་ཚུལ་བསྒྲགས་ཡོད་འདུག 

ནོ་སྦེལ་ཐེབས་རྩ་ཁང་གི་སྤྱི་ཁྱབ་འགན་འཛིན་ཝ་ཌར་(Vidar Helgesen) གྱིས་“མི་ཚང་མས་ཏོག་དབྱིབས་ནད་ཡམས་ཀྱི་མཇུག་རྫོགས་ན་དྲན་ཡོད་རུང་། ང་ཚོ་ད་དུང་དེར་བསླེབས་མེད་”ཅེས་གསུངས་པའི་ཐོག “རྒྱལ་སྤྱིའི་འགྲིམ་འགྲུལ་དང་། ནད་ཡམས་ཀྱི་གནས་སྟངས་ཅི་ཡོང་མི་ཤེས་པར་བརྟེན་ནས་༢༠༢༡ ལོའི་གཟེངས་རྟགས་འབུལ་བཞེས་ཀྱི་མཛད་སྒོ་དེ་འཐོབ་མཁན་སོ་སོའི་རྒྱལ་ཁབ་ཏུ་འཚོགས་རྒྱུ་ཡིན་”ཞེས་བསྣན་འདུག 

ནོ་སྦེལ་གཟེངས་རྟགས་ནི་འཛམ་གླིང་སྟེང་གི་གཟི་བརྗིད་དང་། ཆེ་མཐོང་ཆེ་ཤོས་ཀྱི་གཟེངས་རྟགས་དེ་ཆགས་ཡོད་པ་དང་། དེ་ནི་སུའུ་ཌན་གྱི་གསར་གཏོད་པ་ཆེན་པོ་ཨལ་ཧྥ་ཊི-ནོ་སྦེལ་(Alfred Nobel) གྱི་ཞལ་ཆེམས་ལྟར་འགོ་ཚུགས་པ་ཞིག་ཡིན་ཞིང་། གཟེངས་རྟགས་ཐོག་མ་དེ་ཕྱི་ལོ་༡༩༠༡ ལོར་སྟེར་ཡོད་པ་རེད། 

ནོ་སྦེལ་གཟེངས་རྟགས་རྣམས་ལོ་རེ་རེའི་ནང་ལས་རིགས་མི་འདྲ་བ་འགའི་ཐོག་ནས“འགྲོ་བ་མིའི་རིགས་ལ་ཕན་རླབས་ཆེ་ཤོས་སྒྲུབ་མཁན་གྱི་མི་སྣ་དག་”ལ་འབུལ་བ་དང་། གཟེངས་རྟགས་འཐོབ་མཁན་རྣམས་ལ་དངོས་པོ་གསུམ་སྟེ། ནོ་སྦེལ་གྱི་ལག་ཁྱེར་གཅིག་དང་། རྟགས་མ་གཅིག དེ་བཞིན་དངུལ་བཅས་འབུལ་ཞིང་། གལ་སྲིད་གཟེངས་རྟགས་གཅིག་མི་གཉིས་སམ་གསུམ་ལ་ཐོབ་ན། གཟེངས་རྟགས་ཀྱི་དངུལ་བགོ་བཤའ་རྒྱག་པ་དང་། དངུལ་ལེན་པ་ལ་ངེས་པར་དུ་གཏམ་བཤད་ཅིག་སྤེལ་དགོས་པ་རེད།།

གསར་འགོད་པ་དཀོན་མཆོག་རབ་བརྟན།