དཀར་མཛེས་བོད་རིགས་རང་སྐྱོང་ས་ཁུལ་དུ་ས་ཡོམ་གྱི་དོན་རྐྱེན་བྱུང་འདུག

དེ་རིང་རྒྱ་གར་གྱི་ཞོགས་པ་ཆུ་ཚོད་༡༠།༣༠ དང་བོད་ནང་གྱི་ཆུ་ཚོད་༡༢།༥༢ ཐོག་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ས་ཁུལ་དུ་ཚད་རིམ་༦་༦ཅན་གྱི་ས་ཡོམ་བརྒྱབ་སྟེ་ས་གནས་མི་མང་གི་སྡོད་ཁང་དང་གཞུང་ལམ་སོགས་ལ་རྡིབ་སྐྱོན་བྱུང་བའི་གནས་ཚུལ་ཐོན་འདུག

དེ་བཞིན་རྒྱལ་སྤྱིའི་གསར་ཁང་ཁག་གིས་གནས་ཚུལ་སྤེལ་བ་ལྟར་། ཟླ་འདིའི་ཚེས་༥ ཉིན་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ས་ཁུལ་དུ་ཚད་རིམ་༦་༦ ཅན་གྱི་ས་ཡོམ་དོན་རྐྱེན་བྱུང་ནས་མི་མང་གི་སྡོད་ཁང་དང་གཞུང་ལམ་སོགས་ལ་རྡིབ་སྐྱོན་བྱུང་ནས་གཏོར་སྐྱོན་ཚབས་ཆེན་བྱུང་ཡོད་པ་མ་ཟད། ས་ཡོམ་གྱི་ལྟེ་བ་དེ་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ས་ཁུལ་གྱི་ལྕགས་ཟམ་རྫོང་ལ་བྱུང་ཡོད་པ་དང་། ཐེངས་འདིའི་ས་ཡོམ་གྱི་དོན་རྐྱེན་ཁྲོད་ད་ལྟའི་ཆར་མི་གྲངས་ཤི་རྨས་ཀྱི་སྐོར་ལ་གནས་ཚུལ་གང་ཡང་ཐོན་མི་འདུག

ཐེངས་འདིའི་དོན་རྐྱེན་དང་འབྲེལ་ནས་བཙན་བྱོལ་ནང་དུ་གནས་སྡོད་བྱེད་བཞིན་པའི་ས་གནས་དེའི་ཡུལ་མི་ཁག་ཅིག་ལ་ས་ཡོམ་གྱི་ཁྲོད་མི་མང་ཤི་རྨས་བྱུང་བའི་གནས་ཚུལ་རིགས་ཤེས་རྟོགས་བྱུང་ཡོད་སྐོར་ལ་བཅར་འདྲི་ཞུས་པའི་སྐབས་གསུངས་དོན་ལ། ད་ལྟའི་ཆར་བོད་ནང་དུ་ཏོག་དབྱིབས་ནད་དུག་ཁྱབ་གདལ་འགྲོ་བཞིན་པའི་དུས་སྐབས་དེར་རྒྱ་ནག་གཞུང་གིས་བོད་ས་ཡོངས་རྫོགས་བཀག་སྡོམ་བྱེད་བཞིན་ཡོད་པ་མ་ཟད། མང་ཚོགས་རྣམས་རང་ཉིད་ཀྱི་ཁྱིམ་དུ་བཀག་ཉར་བྱས་ནས་ཕྱིར་ཐོན་མི་འཇུག་པར་བརྟེན། ས་གནས་ས་ཐོག་ནས་ད་ལྟའི་ཆར་མི་མང་ཤི་རྨས་ཀྱི་གནས་ཚུལ་གང་ཡང་གོ་རྒྱུ་མེད་སྐོར་བརྗོད་གནང་སོང་།

དེ་བཞིན་སྤྱི་ཚོགས་དྲ་རྒྱའི་སྟེང་མི་ཉག་དར་རྩེ་ནས་ཡིན་པའི་བུད་མེད་ཅིག་གིས་མི་ཉག་ལོག་སྐད་ཐོག་གསུངས་དོན་ “གྲོགས་པོ་ཚོ། ཁྱེད་ཚོའི་ས་གནས་སུ་ས་ཡོམ་བརྒྱབ་གྱི་འདུག་གམ། ང་ཚོའི་ས་ལ་ས་ཡོམ་མུ་མཐུད་རྒྱག་བཞིན་འདུག ད་ལྟ་དེ་ལ་རི་ཚང་མ་ཉིལ་ཡོང་གི་འདུག ལམ་དང་ཁང་པ་ཚང་མ་ཕར་ཚུར་གཡོ་འགུལ་གཏོང་གི་འདུག དཔེ་མི་སྲིད་པའི་ཞེ་སྣང་ཚ་པོ་འདུག ང་ནི་དངངས་སྐྲག་གི་བླ་བརླག་གྲབས་བྱེད་ཀྱི་འདུག བླ་མ་དཀོན་མཆོག་མཁྱེན་”ཅེས་བཤད་པའི་བརྙན་ཐུང་ཞིག་སྤྱི་ཚོགས་དྲ་རྒྱའི་ཐོག་མཐོང་རྒྱུ་འདུག

གཞན་ཡང་ཐེངས་འདིའི་ས་ཡོམ་དོན་རྐྱེན་དེའི་རྐྱེན་པས་དཀར་མཛེས་བོད་རིགས་རང་སྐྱོང་ས་ཁུལ་གྱི་མི་ཉག་དར་རྩེ་མདོའི་ས་ཁུལ་ལ་གནོད་འཚེ་ཚབས་ཆེན་ཕོག་ཡོད་པ་མ་ཟད། ས་ཁུལ་དེ་དག་གི་ནང་ནས་མི་ཉག་ས་བདེ་དང་སི་ཧུ་རོང་བཅས་སུ་རི་ཉིལ་བ་དང་འགྲོ་ལམ་དང་སྡོད་ཁྱིམ་སོགས་རྡིབ་སྐྱོན་བྱུང་ནས་ད་ལྟ་གནས་སྟངས་ཛ་དྲག་ཏུ་གྱུར་ཡོད་འདུག།

གསར་འགོད་པ། ཆོས་གྲགས།