དགུ་བཅུ་གསུམ་ཨོ་སི་ཁྲུ་ལི་ཡར་སྤོ་སྲིད་དམ།

བོད་ཀྱི་བང་ཆེན་སྤྱིའི་འདོན་ཐེངས་ ༤༩༢   ཕྱི་ལོ་ ༢༠༡༤/༥/༢༨

ལོ་འདིའི་ནང་བོད་མིའི་སྒྲིག་འཛུགས་བདེ་སྲུང་ལས་ཁུངས་ནས་ཆབ་སྲིད་བཙོན་ཟུར་དང་ཆབ་སྲིད་འབྲེལ་ཆགས་ཆབ་སྲིད་འབྲེལ་ཡོད་ནང་མི་དང་བཅས་མི་༣༥༠ ཙམ་ཨོ་སི་ཁྲུ་ལི་ཡར་གཏོང་གི་ཡོད་པ་དང། འདིའི་སྔོན་དུའང་གང་མང་ཞིག་བཏང་ཡོད་པ་རེད། ལོ་འདིར་དགུ་བཅུ་གསུམ་ལས་འགུལ་ཚོགས་པའི་རྒྱུན་ལས་རེ་ཟུང་ཞིག་མ་གཏོགས་ཕལ་ཆེ་བ་ཨོ་སི་ཁྲུ་ལི་ཡར་འགྲོ་གཏན་ཁེལ་བས། ཉེ་ཆར་ཛ་དྲག་ཚོགས་ཆེན་འཚོགས་ནས་སླར་ཡང་རྒྱུན་ལས་ཁ་སྐོང་གི་འོས་འདེམས་བྱེད་དགོས་བྱུང་ཡོད་པ་རེད། གལ་སྲིད་ལོ་རྗེས་མའི་ནང་བསྐྱར་དུ་ཐེངས་གཅིག་བཏང་ན་རྒྱན་ཁུངས་སུ་འཛུལ་ཞུགས་མི་བྱེད་མཁན་རེ་ཟུང་ཙམ་ལས་གཞན་ཕལ་ཆེར་ཆབ་སྲིད་བཙོན་ཟུར་མེད་པ་ལྟ་བུར་འགྱུར་ངེས་རེད། བཙན་བྱོལ་བོད་པའི་སྤྱི་ཚོགས་ཁྱོན་ཡོངས་ནས་ནུབ་ཕྱོགས་ཀྱི་ཡུལ་གྲུ་ཁག་ཏུ་གཏན་བསྐྱོད་བྱ་རྒྱུ་དེ་དམིགས་ཡུལ་ཆེན་པོ་ཞིག་ཏུ་གྱུར་ཡོད་པས། གཞུང་ངོས་ནས་ཆབ་སྲིད་བཙོན་ཟུར་སོགས་ཀྱི་རེ་བ་སྐོང་ཐུབ་པ་དེ་ནི་ཧ་ཅང་གི་བཀའ་དྲིན་ཆེན་པོ་ཞིག་ཏུ་གྱུར་ཡོད།

ལོ་འདིའི་ནང་རྒྱན་ཐོབ་བྱུང་བ་བོད་མིའི་སྒྲིག་འཛུགས་ཀྱི་སྤྱི་འཐུས་དང་གཞུང་ཞབས་སོགས་ཀྱང་ཡོད་ལ། མཁན་སྤྲུལ་གྲྭ་བཙུན་ཡང་ཡོད། ད་ལྟའི་ཆར་ཆབ་སྲིད་བཙོན་ཟུར་མང་ཆེ་བ་ཨོ་སི་ཁྲུ་ལི་ཡར་གནས་སྤོས་བྱས་དང་བྱེད་བཞིན་པར་བརྟེན། མ་འོངས་པར་དགུ་བཅུ་གསུམ་ལས་འགུལ་ཚོགས་པ་ཡང་ཨོ་སི་ཁྲུ་ལི་ཡར་གནས་སྤོ་བྱེད་ཐུབ་ན་བྱེད་དགོས་པ་ཞིག་ཏུ་གྱུར་ཡོད། ཉེ་ཆར་དགུ་བཅུ་གསུམ་ཚོགས་པའི་ཛ་དྲག་ཚོགས་འདུའི་ཐོག་ཚོགས་པ་དེ་ཉིད་ཀྱི་ས་ཁང་སོགས་ཁ་དབང་ཡོངས་རྫོགས་གཞུང་ལ་རྩིས་འབུལ་དགོས་པའི་བསམ་ཚུལ་འདོན་མཁན་ཡང་ཡོད་འདུག་པ་དང། ཕྱོགས་ཡོངས་ཀྱི་གནས་ཚུལ་ལ་བསམ་བློ་བཏང་ནས་བལྟས་ན་དེ་ལྟར་ཡོང་མི་སྲིད་པའང་མ་རེད། ད་ལྟའི་ཆར་རྒྱ་ནག་གཞུང་གི་དམ་དྲག་ལ་བརྟེན་ནས་ཆབ་སྲིད་བཙོན་ཟུར་མང་པོ་ཞིག་བོད་ནས་རྒྱ་གར་ལ་བཙན་བྱོལ་དུ་ཡོང་ཐུབ་མཁན་ཧ་ཅང་དཀོན་པོར་གྱུར་ཡོད་ཀྱང། མ་འོངས་པར་ཡང་ཆབ་སྲིད་འབྲེལ་ཆགས་ཡིན་ཟེར་མཁན་དང། ཆབ་སྲིད་འབྲེལ་ཡོད་ཡིན་ཟེར་མཁན་དེ་འདྲ་སྔར་ལྟར་ཏན་ཏན་ཡོང་སྲིད་ཀྱི་རེད།

བོད་ནས་གསར་དུ་འབྱོར་བ་ཞིག་ཡིན་ན་རྒྱ་གར་དུ་རྒྱུན་རིང་གནས་སྡོད་བྱེད་པར་སྡོད་ཁང་དང་གནས་སྟངས་མཐུན་རྐྱེན་གང་ཐད་ནས་རྒྱུན་རིང་པོར་འཚོ་སྡོད་བྱེད་རྒྱུར་དཀའ་ལས་ཁག་པོ་ཡིན་པ་དང། ད་ལྟའི་ཆར་གསར་འབྱོར་རྣམས་ཀྱི་ཆེད་དུ་གཞུང་ལ་འཆར་གཞི་ཆུང་ངུ་རེ་ཟུང་ཞིག་ཡོད་ཚོད་ཀྱང། དེ་དག་ཀྱང་བར་པ་སླེབས་དུས་རལ་པ་ཆད་པའི་དཔེ་རུ་འགྱུར་མི་སྲིད་པ་མ་རེད། མ་འོངས་པར་དགུ་བཅུ་གསུམ་ལས་འགུལ་ཚོགས་པའི་ཚོགས་མི་ཡང་ཡིན་གཅིག་མིན་གཅིག་ཆབ་སྲིད་བཙོན་ཟུར་སོགས་ཡིན་དགོས་པའི་ངེས་པ་མེད་པར་འགྱུར་སྲིད་པ་དང། ད་ལྟ་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་དེ་ཡང་བོད་ཡུལ་མིག་གིས་མཐོང་མ་མྱོང་བར་བཙན་བྱོལ་དུ་སྐྱེས་ཤིང་འཚར་ལོང་བྱུང་བ་ཞིག་ཡིན་ཚུལ་འདུག མུ་མཐུད་དེ་ལྟར་གྱུར་སོང་ན་ཚོགས་མིའི་ཡོང་ཁུངས་ཡང་རྒྱ་ཆེ་རུ་འགྲོ་བ་དང། ཚོགས་པ་དེ་ཉིད་རྩ་སྟོངས་སུ་མི་འགྱུར་བར་ཡང་ཕན་ཐོགས་ཡོད་ངེས་རེད། དེར་བརྟེན་གནད་དོན་འདིའི་ཐོག་ལའང་བསམ་བློ་ངེས་པར་དུ་གཏོང་དགོས་པ་ཞིག་ཏུ་གྱུར་མེད་དམ་སྙམ།

བཙན་བྱོལ་ནང་གི་བོད་མི་ཕལ་མོ་ཆེའི་རེ་བ་ཇི་བཞིན་ཆབ་སྲིད་བཙོན་ཟུར་དང་འབྲེལ་ཆགས་འབྲེལ་ཡོད་སོགས་ཕྱི་རྒྱལ་དུ་བསྐྱོད་པར་མི་འགྲིག་པ་གང་ཡང་མེད་ཀྱང། ཕྱི་རྒྱལ་དུ་སླེབས་ཟིན་པའི་རྗེས་སུ་གཞན་དང་མི་འདྲ་བར་དམིགས་བསལ་གྱི་འགན་འཁྲི་ཆེན་པོ་ཞིག་ཡོད་པ་དེ། ཕྱོགས་གཅིག་ནས་རྒྱལ་ཁབ་དང་མི་རིགས་ཀྱི་ཆེད་དུ་བློས་གཏོང་ཆེན་པོ་གནང་མཁན་གྱི་རྒྱལ་གཅེས་དཔའ་བོ་དཔའ་མོའི་མིང་ཡོད་མཁན་ཞིག་ཡིན་པས་བོད་པ་གཞན་ལ་མིག་དཔེ་སྟོན་དགོས་པ་དང། ཕྱོགས་གཅིག་ནས་གཞུང་གི་གཟིགས་སྐྱོང་འོག་ནས་ཕྱི་རྒྱལ་དུ་བཏང་བ་ཞིག་ཡིན་པར་བརྟེན་དམའ་མཐའ་ས་ནས་དང་བླངས་དཔྱ་ཁྲལ་ཙམ་དུས་ཐོག་ཆད་ལུས་མེད་པར་འབུལ་དགོས་པ་དེ་རྒྱུ་འབྲས་ཀྱི་ཆོས་ཉིད་ཁོ་ནའི་ཐོག་ནས་ཀྱང་ཧ་ཅང་གལ་ཆེན་པོར་གྱུར་ཡོད། འོན་ཀྱང་གཞུང་ངོས་ནས་དམིགས་བསལ་ཕྱི་རྒྱལ་དུ་བཏང་བའི་རྒྱལ་གཅེས་དཔའ་བོ་དཔའ་མོའི་མཚན་ཁུར་མཁན་དེ་དག་གི་ནང་དུ་དང་བླངས་དཔྱ་ཁྲལ་མི་འབུལ་མཁན་གྱི་བརྒྱ་ཆ་ཚད་ཧ་ཅང་མཐོན་པོ་ཡིན་ཚུལ་གོ་རྒྱུ་ཡོད་པ་ནི་ཧ་ཅང་བློ་ཕམ་གྱི་རང་བཞིན་དུ་གྱུར་འདུག

ད་དུང་ཁག་ཅིག་གིས་རྒྱ་ནག་གི་གཞུང་ཚབ་དང་མཉམ་དུ་འབྲེལ་བ་བཙུགས་ནས་བོད་མིའི་སྒྲིག་འཛུགས་ཀྱི་ཁ་གཏད་ལྟ་བུ་བྱེད་མཁན་ཡང་ཡོད་ཚུལ་འདུག་པ་མ་ཟད། བོད་དུ་སྡོད་མ་ཐུབ་པའི་ཆབ་སྲིད་བཙོན་ཟུར་དེ་དག་རྒྱ་ནག་གཞུང་ཚབ་བརྒྱུད་བོད་དུ་གཉེན་འཕྲད་དང་ལྟ་སྐོར་དུ་བསྐྱོད་མཁན་མང་པོ་ཡོད་པ་དེ་དག་ཀྱང། ཕྱོགས་གཅིག་ནས་བལྟས་ན་ཐེ་ཚོམ་དང་དོགས་པའི་རང་བཞིན་དུ་གྱུར་པ་ཞིག་དང། ཕྱོགས་གཅིག་ནས་ཡུལ་དེའི་མི་སེར་ཆགས་ཟིན་རྗེས་རྒྱ་ནག་ཏུ་བསྐྱོད་པ་ཞིག་ཡིན་ན་དེ་མི་འགྲིག་པ་ཞིག་མིན་ཡང། གལ་སྲིད་རྒྱ་ནག་གཞུང་ཚབ་ཀྱི་ངོས་ནས་ཕྱི་སྡོད་རང་མིའི་ལག་ཁྱེར་ཟེར་བ་དེ་བླངས་ནས་བོད་དུ་སོང་བ་ཞིག་ཡིན་ན་ཆབ་སྲིད་ཀྱི་ཐོག་ནས་ཏག་ཏག་མ་བསྡད་པའི་གནས་ཚུལ་ཞིག་ཏུ་གྱུར་ཡོད། མདོར་ན་དགུ་བཅུ་གསུམ་ལས་འགུལ་ཚོགས་པ་མ་འོངས་པར་ཨོ་སི་ཁྲུ་ལི་ཡར་གནས་སྤོས་བྱེད་ཐུབ་པ་བྱུང་ན། ཚོགས་པ་དེའི་ཚོགས་མིའི་མཐུན་རྐྱེན་སོགས་ཀྱང་འགྲིག་ངེས་ཤིག་ཡོང་རྒྱུའི་རེ་བ་ཡོད་པ་རེད།།