དཔལ་འབྱོར་བཀའ་བློན་བྷེལ་ལྗམ་དུ་ཕེབས་པ།

ཟླ་འདིའི་ཚེས་ ༢༤ ཉིན་དཔལ་འབྱོར་བཀའ་བློན་ཚེ་རིང་དོན་གྲུབ་ལགས་བྷེལ་ལྗམ་(Belgium)རྒྱལ་ས་བྷུརུ་སེལ་(Brussel)ལ་ཕེབས་སྟེ། ས་གནས་མི་མང་ལ་དཔྱ་ཁྲལ་ལག་དེབ་དང་འབྲེལ་བའི་དཀའ་ངལ་སེལ་ཐབས་ཀྱི་སྐོར་ལ་ལན་སྟོན་བཀའ་སློབ་གནང་ཡོད་པ་རེད།

དེ་ཡང་ཚེས་༢༤ ཉིན་གྱི་སྔ་དྲོ་ས་གནས་ཀྱི་ཆུ་ཚོད་༡༡ ཐོག་བྷུརུ་སེལ་ནཱལེན་ཌའི་དགོན་པར་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་དང་། སྐུ་ཚབ་དོན་གཅོད་ཚེ་བརྟན་བསམ་གྲུབ་ལགས། བོད་རིགས་ཚོགས་པའི་ཚོགས་གཙོ་ཐུབ་བསྟན་འཕེལ་རྒྱས་སོགས་ས་གནས་ཀྱི་གནད་ཡོད་མི་སྣ་རྣམས་དང་། མི་མང་༣༠ ཙམ་འདུ་འཛོམས་བྱུང་འདུག་པ་དང་། སྐུ་ཚབ་དོན་གཅོད་ཚེ་བརྟན་བསམ་གྲུབ་ཀྱིས་ཐོག་མར་བཀའ་བློན་ཚེ་རིང་དོན་གྲུབ་ལགས་ས་གནས་སུ་དཔྱ་ཁྲལ་ལག་དེབ་སྐོར་ཀྱི་དཀའ་ངལ་སེལ་ཐབས་དང་འབྲེལ་བའི་བཀའ་སློབ་ལམ་སྟོན་གནང་བར་ཆེད་དུ་ཕེབས་པ་ཡིན་སྐོར་སོགས་ངོ་སྤྲོད་གནང་སོང་། དེ་ནས་བོད་རིགས་ཚོགས་པས་ཚོགས་པའི་ལས་བསྡོམས་མདོར་བསྡུས་ཤིག་ངོ་སྤྲོད་གནང་རྗེས་བཀའ་བློན་མཆོག་གིས་མི་མང་ལ་གསུང་བཤད་གནང་དོན།

བོད་མི་རྣམས་ཀྱིས་༸རྒྱལ་བ་རིན་པོ་ཆེའི་བཀའ་དྲིན་བསམ་ཤེས་དགོས་པ་དང་། བོད་མིའི་སྒྲིག་འཛུགས་ལ་བརྩི་བཀུར་དགོས་པའི་ལམ་སྟོན་གནང་ཡོད་པ་དང་། ལྷག་པར་བོད་མི་རྣམས་ཀྱིས་སོ་སོ་མི་སྒེར་ཀྱི་དཀའ་ངལ་སེལ་དགོས་པ་དང་། བོད་མིའི་སྒྲིག་འཛུགས་དཀའ་ངལ་ལས་སྐྱོབ་དགོས་པ། དེ་བཞིན་དུ་བོད་མི་ཚང་མས་སྤྱི་བའི་ལས་དོན་ཐོག་འགན་ཁུར་བྱེད་དགོས་པ་སོགས་ཀྱི་ལམ་སྟོན་གནང་སོང་།

ཁོང་གིས་མུ་མཐུད་དུ། བཙན་བྱོལ་བོད་མིའི་དང་བླངས་དཔྱ་དངུལ་གྱི་བྱུང་རབས་དང་འབྲེལ། དེང་སྐབས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དགོངས་དོན་འོག་དཔྱ་དངུལ་བསྡུ་འབུལ་བྱེད་ཕྱོགས་ཀྱི་ལམ་སྟོན་གནང་སྐབས། དཔྱ་དངུལ་ཕུལ་བ་ནི་བོད་མི་རྣམས་ཀྱིས་བཙན་བྱོལ་བོད་མིའི་སྒྲིག་འཛུགས་དེ་རང་ཉིད་ཀྱི་ཁྲིམས་མཐུན་གྱི་སྒྲིག་འཛུགས་ཤིག་ལ་ངོས་འཛིན་མཚོན་བྱེད་ཅིག་ཡིན་པས་མ་ཚད། དཔྱ་ཁྲལ་ཕུལ་བས་རང་ཉིད་ཀྱིས་བོད་བསྟན་སྲིད་རང་དབང་སླར་གསོ་བྱེད་པར་དཔལ་འབྱོར་ཀྱིས་རམ་འདེགས་ཤིག་ཀྱང་བྱེད་ཀྱི་ཡོད་པ་རེད། དེར་བརྟེན་དཔྱ་ཁྲལ་ཕུལ་བ་དེ་རང་ཉིད་ཀྱི་འགན་འཁྲི་ཤིག་ལ་བརྩིས་ནས་ཕུལ་ན་དགེ་མཚན་ཆེན་པོ་ཡོད་པའི་ངོ་སྤྲོད་གནང་སོང་ལ། འདས་པའི་གནས་ཚུལ་ནང་བཙན་བྱོལ་བོད་མི་ཚོའི་མི་སྒེར་སོ་སོའི་མི་ཚེའི་གནས་བབ་ལ་འགྱུར་བ་ཕྱིན་པའི་བརྒྱུད་རིམ་ཁྲོད་དཔྱ་ཁྲལ་ལག་དེབ་ནང་འཁོད་པའི་མིང་དང་སྐྱེས་ལོ་ཟླ་ཚེ་སོགས་བསྐྱར་བཅོས་བྱེད་དགོས་པ་དང་། དཔྱ་ཁྲལ་དུས་ཐོག་འབུལ་མ་ཐུབ་པའམ། ཆ་ཚང་འབུལ་མི་ཐུབ་པའི་དཀའ་ངལ་ཡོད་མཁན་དག་གི་དཀའ་ངལ་སེལ་ཐབས་ཀྱི་ལམ་སྟོན་གནང་བ་དང་། དེ་འབྲེལ་མི་མང་གི་དྲི་བར་ལན་འདེབས་ཀྱང་གནང་སོང་།

གཞན་ཡང་དེང་སྐབས་ས་གནས་བོད་རིགས་ཚོགས་པའི་རྒྱུན་ལས་འཕོ་འགྱུར་གྱི་སྔོན་འགྲོའི་འོས་བསྡུ་བྱས་ཟིན་པར་བརྟེན། དངོས་གཞིའི་འོས་ཁོངས་སུ་སླེབས་པའི་བོད་མི་ཚང་མས་སྤྱི་བའི་ལས་དོན་དེ་གལ་ཆེན་དོན་ཞིག་ལ་བསམ་བློ་བཏང་ནས། ཚང་མ་མཉམ་རུབ་ཀྱི་ནུས་པ་ཞིག་སྤྱི་བའི་ཐོག་སྤུངས་ཐུབ་པའི་ཆེད་དུ་ཆ་ཤེས་ལེན་དགོས་པ་སོགས་ཀྱི་རྒྱུད་སྐུལ་ཡང་གནང་སོང་། འབྲེལ་ཡོད་ནས་རྒྱུས་ལོན་བྱུང་བ་ལྟར་ན་བཀའ་བློན་མཆོག་གིས་ཕྱི་ཚེས་ ༢༣ ཉིན་བྷེལ་ལྗམ་གྲོང་ཁྱེར་ཨན་ཋ་ཝེར་ཕན་(Antewerpen)ནས་ཀྱང་བོད་མི་རྣམས་ལ་དཔྱལ་ཁྲལ་ལག་དེབ་དང་འབྲེལ་བའི་དཀའ་ངལ་སེལ་ཐབས་ཀྱི་བཀའ་སློབ་ལམ་སྟོན་གནང་ཡོད་པ་རེད་འདུག ། བྷེལ་ལྗམ་རྒྱལ་ཁབ་དུ་བོད་མི་སུམ་སྟོང་བརྒལ་བ་ཞིག་ཡོད་པ་ལས་རྒྱལ་ས་བྷུརུ་སེལ་ལ་བོད་མི་༥༠༠ ལྷག་ཡོད་པར་ཚོད་དཔག་བྱེད་ཀྱི་ཡོད་པ་རེད།

ས་གནས་ནས་གསར་འགོད་པ་བཀྲ་ཤིས་བདེ་ལེགས།