དབྱིན་ཇིའི་གྲོས་ཚོགས་ལ་རྒྱའི་གསང་མྱུལ་བའི་སིམ་འཛུལ་བྱེད་ཀྱི་ཡོད་པའི་ཉེན་བརྡ།

དབྱིན་ཇིའི་གསང་བའི་ལས་ཁུངས་ནས་དབྱིན་ཇིའི་གྲོས་ཚོགས་འཐུས་མི་རྣམས་ལ་རྒྱ་ནག་དམར་ཤོག་ཚོགས་པའི་འཐབ་ཕྱོགས་གཅིག་སྒྱུར་ལས་ཁུངས་དང་འབྲེལ་བ་ཡོད་པའི་བུད་མེད་ཅིག་གིས་དབྱིན་ཇིའི་ཆབ་སྲིད་ལ་ཐེ་བྱུས་བྱས་དང་བྱེད་མུས་སུ་ཡོད་པའི་ཉེན་བརྡ་བཏང་ཡོད་འདུག

མང་གཙོའི་སྟོབས་ཆེན་རྒྱལ་ཁབ་རྣམས་ཀྱིས་རྒྱ་ནག་དང་རྒྱ་ནག་གི་བྱ་སྤྱོད་ལ་སྔར་དང་མི་འདྲ་བའི་ཞིབ་འཇུག་དང་། དོགས་ཟོན་ནན་པོ་བྱེད་བཞིན་པའི་དུས་འདིར། དབྱིན་ཇིའི་གསང་བའི་ལས་ཁུངས་(MI5) ཀྱིས་ཁུའུ་ལི་(Christine Ching Kui Lee) ཞེས་པའི་བུད་མེད་ཅིག་རྒྱ་ནག་དམར་ཤོག་ཚོགས་པ་དང་གསང་འབྲེལ་ཡོད་པ་དང་། མོས་དབྱིན་ཇིའི་ཆབ་སྲིད་ཀྱི་ལས་དོན་ལ་ཐེ་བྱུས་དང་འགལ་རྐྱེན་བཟོ་བཞིན་ཡོད་པའི་ཉེན་བརྡ་བཏང་ཡོད་འདུག

དབྱིན་ཇིའི་གསང་བའི་ལས་ཁུངས་ནས་ཕྱི་ཟླ་༡ ཚེས་༡༣ ཉིན་ཕྱིར་བསྒྲགས་བྱས་པའི་ཉེན་བརྡ་དེའི་ནང་། ཁུའུ་ལི་ཡིས་“ཆབ་སྲིད་ཚོགས་པ་དང་། གྲོས་ཚོགས་འཐུས་མི། གྲོས་ཚོགས་འཐུས་མི་བྱེད་འདོད་ཡོད་མཁན། དེ་བཞིན་དབྱིན་ཡུལ་གྱི་ཆབ་སྲིད་ནང་དུ་ཞུགས་འདོད་ཡོད་པའི་མི་སྒེར་རྣམས་ལ་དཔལ་འབྱོར་གྱི་ཞལ་འདེབས་མཁོ་སྤྲོད་བྱེད་པ་དང་། ཕྱི་རྒྱལ་བའི་མིང་ཐོག་ནས་ཆབ་སྲིད་ཀྱི་ཚོགས་པ་ཁག་ལ་ཞལ་འདེབས་སློང་རོགས་”སོགས་བྱས་ཏེ་དབྱིན་ཇིའི་ཆབ་སྲིད་ལ་ཤུགས་རྐྱེན་སྤྲོད་རྒྱུར་འབད་བརྩོན་བྱེད་བཞིན་ཡོད་སྐོར་བཀོད་ཡོད་འདུག

ཁུའུ་ལི་ཡིས་མོའི་ལས་དོན་རྣམས་“དབྱིན་ཡུལ་གྱི་རྒྱ་མིི་ཚོའི་ཚབ་མཚོན་བྱེད་དང་། མི་རིགས་དང་རིག་གཞུང་སྣ་ཚོགས་ཀྱི་རང་བཞིན་རྒྱ་སྐྱེད་གཏོང་ཆེད་”ཡིན་པའི་འགྲེལ་བརྗོད་བྱས་ཡོད་འདུག་ཀྱང་། དབྱིན་ཇིའི་གསང་བའི་ལས་ཁུངས་ནས་མོའི་ལས་དོན་དེ་དག་“འཐབ་ཕྱོགས་གཅིག་སྒྱུར་ལས་ཁུངས་དང་གསང་འབྲེལ་ཐོག་ནས་བྱས་པ་ཞིག་ཡིན་པ་དང་། རོགས་དངུལ་རྣམས་རྒྱ་ནག་དང་ཧོང་ཀོང་དུ་ཡོད་པའི་ཕྱི་རྒྱལ་བ་ཚོས་མཁོ་སྤྲོད་བྱས་ཡོད་”སྐོར་བརྗོད་ཡོད་འདུག

དེ་མིན་ད་དུང་། དབྱིན་ཇིའི་གསང་བའི་ལས་ཁུངས་ཀྱིས་ཁུའུ་ལི་དང་འབྲེལ་བ་ཡོད་པའི་མི་སུ་ཞིག་ཡིན་རུང་དོགས་ཟོན་ནན་པོ་བྱེད་དགོས་པ་དང་། གལ་སྲིད་“དོགས་གཞི་ཆེ་བའི་འབྲེལ་བ་”བྱུང་ན། དབྱིན་ཇིའི་གྲོས་ཚོགས་ཀྱི་བདེ་སྲུང་འགན་འཛིན་ལ་འབྲེལ་བ་བྱེད་དགོས་པའི་སྐུལ་མ་བྱས་ཡོད་འདུག

དེང་སྐབས་རྒྱ་ནག་དང་མང་གཙོའི་འཛམ་གླིང་གཉིས་ཀྱི་འགལ་བ་ཉིན་རེ་བཞིན་ཇེ་དྲག་ཏུ་གྱུར་ནས། མང་གཙོའི་རྒྱལ་ཁབ་ཚོས་སོ་སོའི་ཆབ་དཔལ་རིག་གསུམ་གྱི་སྡེ་ཚན་རྣམས་ལ་རྒྱའི་མྱུལ་མའི་ཐབས་ལམ་སྣ་ཚོགས་ཀྱི་ཐོག་ནས་ཤུགས་རྐྱེན་སྤྲོད་ཀྱི་ཡོད་མེད་ཞིབ་འཇུག་གཟབ་ནན་བྱས་དང་བྱེད་བཞིན་པའི་སྒང་ཡིན་པས། ཨ་རིས་མཚོན་པའི་མང་གཙོའི་སྟོབས་ཆེན་རྒྱལ་ཁབ་ཁག་གི་ནང་དུ་རྒྱ་ནག་དམར་ཤོག་ཚོགས་པའི་ཆེད་དུ་གསང་བའི་ལས་དོན་བྱེད་མཁན་གྱི་ཚོང་པ་དང་། ཆབ་སྲིད་པ། ཚན་པ་མང་པོ་ཤེས་རྟོགས་ཡོང་གི་ཡོད་པ་རེད།

ལོ་སྔོན་མའི་ལོ་མཇུག་ཏུ་ཨ་རིའི་སྙན་གྲགས་ཆེ་བའི་ཚན་རིག་པ་དང་། ཧ་ཝར་ཌི་སློབ་ཆེན་གྱི་སློབ་དཔོན་ཆེན་མོ་ཆལ་སེ་ལཱི་བྷེར་(Charles Lieber) ལ་རྒྱ་ནག་དམར་ཤོག་ཚོགས་པ་དང་མཉམ་ལས་བྱས་ཏེ་ཨ་སྒོར་ཁྲི་ཕྲག་མང་པོ་བླངས་པའི་གནས་ཚུལ་རྣམས་སྦས་གསང་བྱས་པའི་ནག་ཉེས་ཕོག །

གསར་འགོད་པ་དཀོན་མཆོག་རབ་བརྟན།