དབྱིན་ཇིའི་རྒྱལ་མོ་འདས་གྲོངས་སུ་ཕྱིན་འདུག

ཟླ་འདིའི་ཚེས་༩ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། དབྱིན་ཇིའི་རྒྱལ་མོ་ཨེ་ལི་ཛ་བྷེ་ཐེ་གཉིས་པ་དགུང་གྲངས་༩༦ ཐོག་དགོངས་པ་རྫོགས་ཡོད་པ་དང་། རྒྱལ་ཁབ་ཁག་གི་དབུ་ཁྲིད་ཚོས་ཚེ་འདས་ཁོང་ཉིད་ལ་མྱ་ངན་དང་ཁོང་གི་ཤུལ་ལུས་ནང་མི་ཚོ་ལ་ཐུགས་གསོའི་གསུང་འཕྲིན་གནང་ཡོད་པ་དང། ཁོ་མོ་ཡི་སྲས་རྒན་པ་དབྱིན་ཇིའི་རྒྱལ་ཁྲི་ལ་གསར་དུ་བསྐོས་བཞག་བྱས་ཡོད་པའི་གནས་ཚུལ་ཐོན་འདུག

ཟླ་འདིའི་ཚེས་༨ ཀྱི་ཕྱི་དྲོ་སི་ཀོཊ་ཞེས་པའི་དབྱིན་ཡུལ་གྱི་ས་ཆ་ཞིག་ཏུ་ཁོང་ཉིད་དགུང་གྲངས་༩༦ ཐོག་སྐུ་གྲོངས་ཡོད་པ་དང་། ཕྱི་ལོ་༡༩༥༢ ལོར་དབྱིན་ཇིའི་རྒྱལ་པོ་དགོངས་པ་རྫོགས་པའི་རྗེས་སུ་སྲས་མོ་ཨེ་ལི་ཛ་བྷེ་ཐེ་རྒྱལ་པོའི་ཁྲི་ལ་ཕེབས་ཡོད་པ་དང་། ཁོང་གིས་འདས་པའི་ལོ་ངོ་༧༠ ཐམ་པའི་རིང་དབྱིན་ཇིའི་རྒྱལ་སྲིད་བསྐྱངས་ཡོད་པ་མ་ཟད། ཁོ་མོ་ནི་དབྱིན་ཇིའི་ལོ་རྒྱུས་ཀྱི་ཁྲོད་དུ་རྒྱལ་སྲིད་དུས་ཡུན་རིང་ཤོས་སྐྱོང་མཁན་གྱི་རྒྱལ་མོ་དེ་ཆགས་ཡོད་འདུག

དབྱིན་ཇིའི་རྒྱལ་མོས་བདུན་ཕྲག་འདིའི་རེས་གཟའ་མིག་དམར་གྱི་ཉིན་ལི་ཛི་ཊི་རོབ་སི་(Liz Truss) དབྱིན་ཇིའི་སྲིད་བློན་གསར་པར་བསྐོས་བཞག་བྱས་ཡོད་པ་དང་། ཁོ་མོ་ནི་དབྱིན་ཇིའི་སྲིད་བློན་བཅོ་ལྔ་པ་དེ་ཆགས་ཡོད་འདུག

དབྱིན་ཇིའི་སྲིད་བློན་གསར་པས་དབྱིན་ཇིའི་རྒྱལ་མོ་ནི་དེང་རབས་དབྱིན་ཇི་རྒྱལ་ཁབ་ཀྱི་རྨང་གཞི་ཡིན་པ་དང་། ཁོང་གིས་དབྱིན་ཇི་བ་ཚོ་ལ་དགོས་པའི་བརྟན་ལྷིང་དང་སྟོབས་ཤུགས་བསྩལ་ཡོད་ཅེས་དང་། དེ་བཞིན་དབྱིན་ཇིའི་རྒྱལ་པོ་གསར་པའི་ཐོག་ལ་ཁོ་མོས། འདས་པའི་དུས་ཡུན་རིང་པོའི་ནང་དུ་མི་མང་པོས་ཁོང་གི་ཨ་མ་ལ་གུས་བརྩི་ཆེན་མོ་བྱས་ཡོད་པ་ལྟར་ང་ཚོས་ཁོང་ལ་ཡང་གུས་བརྩི་བྱེད་དགོས་ཞེས་བརྗོད་ཡོད་འདུག

ཨ་རི་སྲིད་འཛིན་བྷ་ཌན་གྱིས་ཕྱི་ལོ་༢༠༠༡ ལོ་འཇིགས་སྐུལ་རིང་ལུགས་པས་ཨ་རི་ལ་གཏོར་རྒོལ་བྱས་རྗེས་ཁོ་མོས་ཨ་རི་དང་མཐུན་སྒྲིལ་ཇི་ལྟར་བྱས་ཡོད་པ་ལ་ཕྱིར་དྲན་དང་སྦྲགས། ཁོ་མོ་འདས་གྲོངས་སུ་ཕྱིན་པ་ལ་མྱ་ངན་ཞུས་ཡོད་པ་དང་། ཧྥ་རན་སི་སྲིད་འཛིན་གྱིས་ཁོ་མོ་ནི་སེམས་བཟང་ཅན་གྱི་རྒྱལ་མོ་ཞིག་དང་ཧྥ་རན་སིའི་གྲོགས་མོ་ཞིག་རེད་ཅེས་བརྗོད་འདུག དེ་བཞིན་ཁ་ན་ཌའི་སྲིད་བློན་གྱིས་རྒྱལ་མོ་ཁོང་ནི་ཁ་ན་ཌའི་མི་མང་ཀུན་གྱི་སེམས་ལ་ཡོད་པ་དང་། རྒྱལ་མོ་ཁོང་ནི་ཁ་ན་ཌའི་སྲིད་བློན་ཁོང་ཉིད་ཀྱིས་འཛམ་གླིང་ནང་ཆེས་དགའ་ཤོས་བྱེད་སའི་མི་སྣ་ཡི་གྲས་ཤིག་ཡིན་རབས་བརྗོད་ཡོད་པའི་གནས་ཚུལ་ཐོན་འདུག

གཞན་ཡང་རྒྱལ་མོ་ཁོང་ཉིད་འདས་གྲོངས་སུ་ཕྱིན་པར་༧གོང་ས་མཆོག་གིས་ཁོང་གི་ཤུལ་ལུས་སྲས་རྒན་པ་ཆལ་སི་ལ་ཐུགས་གསོའི་གསུང་འཕྲིན་ཞིག་བསྩལ་ཡོད་པའི་ནང་༧གོང་ས་མཆོག་གིས”ངོས་བོད་ནང་དགུང་ལོ་གཞོན་དུས་སུ་དུས་དེབ་ཁག་ཏུ་ཁོ་མོའི་ཁྲི་སྟོན་གྱི་པར་ལ་བལྟས་མྱོང་ཡོད་པ་དྲན་བྱུང་། ཁོང་ནི་དབྱིན་ཇིའི་རྒྱལ་སྲིད་དུས་ཡུན་རིང་ཤོས་སྐྱོང་མཁན་ཞིག་ཆགས་ཡོད་པས། དེ་ནི་འཇིག་རྟེན་ཐོག་འཚོ་གནས་བྱེད་བཞིན་པའི་མི་མང་པོ་ཞིག་ལ་དགའ་སྤྲོ་དང་བློ་བསྐྱེད། རྒྱུན་གནས་ཀྱི་དཔེ་མཚོན་ཞིག་ཏུ་གྱུར་ཡོད་ཅེས་དང་། དེ་བཞིན་ཁྱེད་ཀྱི་ཨ་མ་ནི་ང་ཚོ་ཚང་མས་གཅེས་སྤྲས་བྱེད་འོས་པའི་ཆེ་མཐོང་དང་གཟི་བརྗིད། ཞབས་ཞུའི་འདུ་ཤེས་དང་ལྡན་ལ་མི་ཚེ་དོན་སྙིང་ལྡན་པ་ཞིག་བསྐྱལ་ཡོད་པ་རེད་ཅེས་གསུངས་འདུག

དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་རྒྱལ་མོ་ཉིད་འདས་གྲོངས་སུ་ཕྱིན་པ་ལ་བློ་ཕམ་དང་བོད་མི་ཚང་མའི་ཚབ་བྱས་ནས་མྱ་ངན་དང་ཤུལ་ལུས་ནང་མི་རྣམས་ལ་སེམས་གསོའི་གསུང་འཕྲིན་བསྩལ་ཡོད་འདུག།

གསར་འགོད་པ།  བློ་བཟང་རྒྱ་མཚོ།