དབྱིན་ཇིའི་སྲིད་བློན་དགོངས་པ་ཞུ་དགོས་པའི་དགོས་འདུན་བཏོན་འདུག

ཟླ་འདིའི་ཚེས་༧ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། དབྱིན་ཇིའི་གྲོས་ཚོགས་ཀྱི་འཐུས་མི་མང་པོས་དབྱིན་ཇིའི་སྲིད་བློན་དགོངས་པ་ཞུ་དགོས་པ་ནན་བརྗོད་བྱས་པའི་གནས་ཚུལ་ཐོན་འདུག

དབྱིན་ཇི་སྲིད་བློན་བྷོ་རི་ཇོན་སན་(Boris Johnson) གྱིས་ཕྱི་ལོ་༢༠༢༠ ལོར་ཏོག་དབྱིབས་གཉན་རིམས་༡༩ པའི་དབང་གིས་རྒྱལ་ཁབ་ཁྱོན་ཡོངས་ལ་སྒོ་རྒྱ་བསྡམས་པའི་སྐབས་སུ། རང་ཉིད་ཀྱི་སྐྱེས་སྐར་གྱི་ཆེད་དུ་འདུ་འཛོམས་ཤིག་ཏུ་ཕྱིན་ཡོད་པས་ཁོང་ལ་ཉེས་ཆད་ཕོག་ཡོད་པ་དང་། ནད་ཡམས་དང་དམག་འཁྲུག་སོགས་ལ་བརྟེན་ནས་རྒྱལ་སྤྱིའི་ཁྱོན་ཡོངས་ཀྱི་ཟས་རིགས་ཀྱི་གོང་ཚད་འཕར་ཡོད་པའི་ཐོག་དབྱིན་ཇིའི་སྲིད་བློན་གྱིས་ལས་མི་ཚོའི་དཔྱ་ཁྲལ་མང་དུ་བཏང་ཡོད་པའི་གནས་ཚུལ་ཐོན་པ་མ་ཟད།མང་འཐུས་གྲོས་ཚོགས་ཚོགས་ཆུང་(House of common committee) གིས་གྲོས་ཚོགས་འཐུས་མི་ཨོ་ཝན་(Owen Paterson) གྱིས་ཁྲིམས་འགལ་གྱི་བྱ་བ་བྱས་པར་བརྟེན་ཉིན་གྲངས་སུམ་ཅུ་རིང་ལས་གནས་ནས་གནས་དབྱུང་དུ་བཏང་ཡོད་ཀྱང་། སྲིད་བློན་གྱིས་ཚོགས་ཆུང་གསར་འཛུགས་བྱས་ཏེ་ཞིབ་འཇུག་བྱེད་རྒྱུ་ཡིན་པ་སོགས་བརྗོད་ནས་རྗེས་སུ་གྲོས་ཚོགས་འཐུས་མི་ཁོང་ཉིད་དགོངས་པ་ཞུས་ཡོད་པ་ལས། གནས་དབྱུང་དུ་བཏང་མེད་པ་སོགས་ཀྱི་གནས་ཚུལ་བྱུང་ཡོད་པ་རེད།

དབྱིན་ཇིའི་སྲིད་བློན་གྱིས་ད་བར་ནོར་འཁྲུལ་གང་མང་བྱས་ཡོད་པར་བརྟེན། ད་ལྟའི་ཆར་གཡོན་ཕྱོགས་ཚོགས་པའི་འཐུས་མི་ཙམ་མིན་པར་གཡས་ཕྱོགས་ཚོགས་པའི་འཐུས་མི་དང་རང་ཉིད་ལ་རྒྱབ་སྐྱོར་བ་མང་དག་གིས་ཀྱང་ངོ་རྒོལ་དང་གྱེན་ལོག་བྱེད་བཞིན་ཡོད་འདུག ཁ་སང་རེས་གཟའ་ལྷག་པའི་ཉིན་གྱི་ཆུ་ཚོད་༢༤ ནང་དུ་བློན་ཆེན་དང་ལས་རོགས་ཁྱོན་བསྡོམས་བཞི་བཅུ་ལྷག་གིས་སྲིད་བློན་ད་ལྟ་ལས་གནས་ནས་དགོངས་པ་ཞུ་དགོས་པའི་དགོངས་འཆར་བཏོན་ནས། སོ་སོ་ལས་གནས་ནས་རྩ་དགོངས་ཞུས་ཡོད་འདུག

ད་ལྟའི་ཆར་དབྱིན་ཇིའི་སྲིད་བློན་གསར་པ་སུ་ཞིག་འོས་མིན་གྱི་ཐོག་ལ་གསར་འགྱུར་མང་པོ་ཐོན་བཞིན་འདུག་ལ། གལ་སྲིད་སྲིད་བློན་ད་ལྟ་ལས་གནས་ནས་རྩ་དགོངས་ཞུས་ན་ཡང་། སྟོན་དུས་མ་ཤར་གྱི་བར་དུ་སྲིད་བློན་གྱི་ལས་གནས་བཞེས་རྒྱུ་ཡིན་པའི་གནས་ཚུལ་ཐོན་འདུག

གསར་འགོད་པ་བློ་བཟང་རྒྱ་མཚོ།