དབྱིན་ཡུལ་སྲིད་བློན་གྱིས་གྲོས་ཚོགས་བར་མཚམས་འཇོག་རྒྱུའི་ཐབས་བྱུས་འཐེན་འདུག

དབྱིན་ཡུལ་ཡུ་རོབ་མཐུན་ཚོགས་ནས་ཕྱིར་འཐེན་གྱི་དུས་བཀག་ཚེས་གྲངས་སླེབས་ལ་ཉེ་བ་དང་བསྟུན། དབྱིན་ཡུལ་སྲིད་བློན་གསར་པ་བྷོ་རེ་སེ་ཇོན་སོན་གྱིས་གྲོས་ཚོགས་ནས་དུས་བཀག་ཚེས་གྲངས་དུས་འགྱངས་ཡོང་བར་རྒྱབ་སྐྱོར་དང་། གྲོས་མཐུན་མེད་པའི་ཐོག་ནས་ཕྱིར་འཐེན་བྱེད་པར་དགག་བྱ་བྱེད་མི་ཐུབ་པ་བཟོ་ཆེད་དུ། གྲོས་ཚོགས་ལས་ཉིན་ཟླ་བ་༡ ལས་མང་བའི་རིང་བར་མཚམས་འཇོག་རྒྱུའི་ཐབས་བྱུས་འཐེན་འདུག་པས། ཕྱོགས་འགལ་སྲིད་དོན་ཚོགས་པ་དང་མི་མང་ནས་ཐབས་བྱུས་དེས་མང་གཙོ་རྡོག་རོལ་བཏང་ཡོད་པའི་སྐྱོན་བརྗོད་ཀྱིས་ངོ་རྒོལ་ཆེན་པོ་བྱེད་བཞིན་འདུག

ཟླ་༨ པའི་ཚེས་༢༩ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཟླ་༩ པའི་ཚེས་༣ ཉིན་ནས་དབྱིན་ཡུལ་གྲོས་ཚོགས་འཚོག་རྒྱུ་ཡིན་འདུག་པ་དང་། ཟླ་༡༠ པའི་ཚེས་༣༡ ཉིན་ནི་དབྱིན་ཡུལ་ཡུ་རོབ་མཐུན་ཚོགས་ནས་ཕྱིར་འཐེན་དགོས་པའི་དུས་བཀག་ཚེས་གྲངས་ཡིན་པས། ཐེངས་འདིའི་གྲོས་ཚོགས་ལས་དོན་ནང་ཕྱོགས་འགལ་སྲིད་དོན་ཚོགས་པ་ཚོས་དབྱིན་ཡུལ་གྱི་སྲིད་བློན་ལ་ཡུ་རོབ་མཐུན་ཚོགས་ནས་ཕྱིར་འཐེན་གྱི་དུས་བཀག་ཚེས་གྲངས་དུས་འགྱངས་དགོས་པའི་རེ་སྐུལ་ཞུ་རྒྱུའི་གྲོས་ཆོད་འདོན་རྒྱུ་ཡིན་འདུག དེ་ཡང་དབྱིན་ཡུལ་གྱི་སྲིད་བློན་གསར་པ་བྷོ་རེ་སེ་ཇོན་སོན་གྱིས་ཟླ་༡༠ པའི་ཚེས་༣༡ ཉིན་དབྱིན་ཡུལ་དང་ཡུ་རོབ་མཐུན་ཚོགས་བར་གྲོས་མཐུན་ཞིག་འབྱུང་མིན་ལ་མ་ལྟོས་པར། དབྱིན་ཡུལ་ཡུ་རོབ་མཐུན་ཚོགས་ནས་དངོས་སུ་ཕྱིར་འཐེན་བྱེད་རྒྱུ་ཡིན་སྐོར་བརྗོད་བཞིན་ཡོད་པས། གལ་ཏེ་གྲོས་མཐུན་མེད་པར་ཕྱིར་འཐེན་བྱས་ཚེ། དབྱིན་ཡུལ་གྱི་དཔལ་འབྱོར་ལ་གྱོང་གུད་ཆེན་པོ་འབྱུང་རྒྱུ་ཡིན་པས། གྲོས་ཚོགས་འཐུས་མི་མང་པོ་ཞིག་གིས་ལམ་ཁ་དེར་དགག་བྱ་ཆེན་པོ་བྱེད་བཞིན་ཡོད་པ་རེད་འདུག་པས། དབྱིན་ཡུལ་སྲིད་བློན་གྱིས་གྲོས་ཚོགས་ནས་ཁོང་གི་ལས་དོན་ལ་དགག་བྱ་བྱེད་པའི་དུས་ཚོད་ཐུང་དུ་གཏོང་ཆེད་དུ། དབྱིན་ཡུལ་གྱི་རྒྱལ་མོར་ཟླ་༩ པའི་ཟླ་དཀྱིལ་ནས་ཟླ་༡༠ པའི་ཟླ་དཀྱིལ་བར་གྲོས་ཚོགས་ཀྱི་ལས་དོན་བར་མཚམས་འཇོག་པ་དང་། ཟླ་༡༠ པའི་ཚེས་༡༤ ཉིན་ནས་གྲོས་ཚོགས་ཚོགས་ཐེངས་གསར་པ་འཚོག་རྒྱུ་གལ་ཆེན་ཆགས་ཡོད་པས་དེ་ལྟར་ཡོང་བར་རྒྱལ་མོས་ངོས་ལེན་རྒྱབ་སྐྱོར་བྱེད་པའི་སྐུལ་མ་བྱས་འདུག རྒྱལ་མོས་ཀྱང་དེ་ལྟར་རྒྱབ་སྐྱོར་བྱས་འདུག་པས། གྲོས་ཚོགས་ནང་ཐག་གཅོད་དེའི་ཐོག་འོས་བསྡུའི་ལམ་ནས་དགག་བྱ་བྱེད་པའི་ལམ་ལུགས་མེད་པ་རེད་འདུག འོན་ཀྱང་ཕྱོགས་འགལ་སྲིད་དོན་ཚོགས་པའི་གྲོས་ཚོགས་འཐུས་མི་ཁག་ཅིག་གིས་ཐག་གཅོད་དེར་སེམས་འཚབ་འདོན་ཆེད་དུ། རྒྱལ་མོ་ལ་ཡི་གེ་བྲིས་ཏེ་ཐུག་འཕྲད་བྱེད་རྒྱུའི་རེ་སྐུལ་བྱས་འདུག་པ་མ་ཟད། གྲོས་ཚོགས་འཐུས་མི་ཁག་ཅིག་གིས་སྲིད་བློན་གྱི་ཐབས་བྱུས་དེ་ནི་མང་གཙོ་རྡོག་རོལ་བཏང་བ་ཡིན་སྐོར་བརྗོད་ནས་ཁྲིམས་ཁང་ལ་ཞུ་གཏུག་ཀྱང་བྱས་འདུག

སྲིད་བློན་ཁོང་གིས་ཐག་གཅོད་དེ་ནི་གྲོས་ཚོགས་ནས་དབྱིན་ཡུལ་ཡུ་རོབ་མཐུན་ཚོགས་ནས་གྲོས་མཐུན་མེད་པར་ཕྱིར་འཐེན་བྱེད་པར་དགག་བྱ་མི་ཡོང་ཆེད་དུ་མིན་པ་དང་། གྲོས་ཚོགས་ཚོགས་ཐེངས་གསར་པ་འགོ་འཛུགས་བྱས་རྗེས། དུས་བཀག་ཚེས་གྲངས་བར་ལས་དོན་དེའི་ཐོག་གྲོས་སྡུར་དང་འོས་བསྡུ་བྱེད་རྒྱུའི་དུས་ཚོད་ཡོད་སྐོར་བརྗོད་འདུག  གྲོས་ཚོགས་ཚོགས་ཐེངས་གསར་པའི་སྐབས་སུ་དབྱིན་ཡུལ་གྱི་རྒྱལ་མོས་གྲོས་ཚོགས་ནང་དུ་དབྱིན་ཡུལ་གཞུང་གི་ལས་དོན་འཆར་གཞི་དང་འབྲེལ་བའི་གཏམ་བཤད་སྤེལ་སྲོལ་ཡོད་འདུག་པ་དང་། དེའི་སྔོན་དུ་གྲོས་ཚོགས་བར་མཚམས་འཇོག་སྲོལ་ཡང་ཡོད་འདུག འོན་ཀྱང་ཐེངས་འདིར་ཆབ་སྲིད་ཀྱི་གནད་འགག་ཆེ་བའི་དུས་སྐབས་ཤིག་ལ། སྲིད་བློན་གྱིས་ཐབས་བྱུས་དེ་འཐེན་པར་དབྱིན་ཡུལ་གྱི་གྲོང་ཁྱེར་ཆེ་ཁག་མང་པོ་ཞིག་ནང་ངོ་རྒོལ་ལས་འགུལ་སྤེལ་ཡོད་ཁར། དྲ་ཐོག་ཞུ་གཏུག་གཅིག་ལ་མི་མང་ས་ཡ་གཅིག་ལས་མང་བས་མིང་རྟགས་བཀོད་ནས་སྲིད་བློན་ལ་དགག་བྱ་བྱས་འདུག དེ་བཞིན་གནད་དོན་དེ་ལ་བརྟེན་ནས་དབྱིན་ཡུལ་དངུལ་སྒོར་གྱི་འཛའ་ཡང་མར་ཆགས་ཡོད་པ་རེད་འདུག

ད་ལྟའི་ཆར་དབྱིན་ཡུལ་གྲོས་ཚོགས་ཀྱིས་སྲིད་བློན་གྱི་ཐབས་བྱུས་དེར་ལམ་ལྷོངས་མི་བྱུང་བའི་ཆེད་དུ། བདུན་ཕྲག་རྗེས་མའི་གྲོས་ཚོགས་ལས་དོན་སྐབས་སུ། སྲིད་བློན་གྱི་གཞུང་དེར་གདེངས་ཚོད་ཡོད་མེད་ཀྱི་འོས་བསྡུ་བྱས་ཏེ་སྲིད་བློན་དང་ཁོང་གི་གཞུང་དེ་འཕོ་འགྱུར་གཏོང་སྲིད་པ་རེད་འདུག འོན་ཀྱང་དེ་ལྟར་བྱུང་བར་སྲིད་བློན་ཁོང་གི་རྙིང་ཞེན་ཚོགས་པའི་གྲོས་ཚོགས་འཐུས་མིའི་རྒྱབ་སྐྱོར་ལ་བརྟེན་ནས་མ་གཏོགས། མང་མོས་ཐོབ་ཐབས་མེད་འདུག་པས། གྲོས་ཚོགས་འཐུས་མི་དེ་དག་གིས་སུ་ལ་རྒྱབ་སྐྱོར་བྱེད་མིན་གནད་འགག་ཆགས་འདུག

ཕྱི་ལོ་༢༠༡༦ ལོར་དབྱིན་ཡུལ་མི་མང་བརྒྱ་ཆ་༥༢ ཀྱིས་དབྱིན་ཡུལ་ཡུ་རོབ་མཐུན་ཚོགས་ནས་ཕྱིར་འཐེན་བྱེད་པར་རྒྱབ་སྐྱོར་བྱས་པ་ནས་བཟུང་། ད་བར་དབྱིན་ཡུལ་དང་ཡུ་རོབ་མཐུན་ཚོགས་བར་ཕྱིར་འཐེན་བྱས་རྗེས་ཁག་གཉིས་བར་གྱི་ཚོང་འབྲེལ། བདེ་འཇགས། ས་མཚམས་སོགས་ཀྱི་གྲོས་མཐུན་ལ་གྲོས་ཚོགས་ནས་རྒྱབ་སྐྱོར་ཐོབ་མེད་ཁར། སྲིད་བློན་གཉིས་སྔ་ཕྱིར་རྩ་དགོངས་ཞུས་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།