དུས་ལ་འགྱུར་བ་ཕྱིན་ཟིན་པས་རྒྱ་ནག་གཞུང་གིས་དྲིལ་བསྒྲགས་ལོག་པ་སྤེལ་རྒྱུར་མཚམས་བཞག་ན་ལེགས།
ཁ་སང་ཨ་རིའི་གྲོས་ཚོགས་འོག་མའི་ཆེས་མཐོའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་ས་ལ་ཕེབས་ཡོད་པ་དང་། དེ་སྔོན་ཕྱི་ལོ་༢༠༡༧ ལོར་ཨ་རིའི་གཞུང་འབྲེལ་ཐོག་ནས་ཆེས་མཐོའི་སྐུ་ཚབ་ཚོགས་ཆུང་ཞིག་རྡ་སར་ཐེངས་གཅིག་ཕེབས་མྱོང་ཡོད་འདུག དེ་རིང་གི་སྐུ་ཚབ་དེ་ལོ་བདུན་གྱི་རྗེས་སུ་ཨ་རིའི་ཆེས་མཐོའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་སར་ཕེབས་པ་དང་པོ་དེ་ཡིན་འདུག་པ་དང་། ཐེངས་འདིར་ཨ་རིའི་གྲོས་ཚོགས་འོག་མའི་སྲིད་དོན་ཚོགས་པའི་གཉིས་ཀ་ནས་སྐུ་ཚབ་ཚོགས་མི་ཡོད་འདུག
ཕྱི་ཚེས་༡༨ ཉིན་བོད་དོན་རྒྱབ་སྐྱོར་མཚོན་ཆེད་དུ་ཕེབས་པའི་ཨ་རིའི་ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མི་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དུ་འབྱོར་ཡོད་པ་དང་། ཁ་སང་ཕྱི་དྲོ་བོད་མི་མང་སྤྱི་འཐུས་ལྷན་ཚོགས་དང་བོད་ཀྱི་འགྲེམས་སྟོན་ཁང་སོགས་སུ་ལྟ་སྐོར་ཕེབས་གནང་སོང་། དེ་རིང་སྤྱི་ཚེས་༡༩ ཉིན་གྱི་ཞོགས་པར་ཨ་རིའི་སྐུ་ཚབ་ཚོགས་ཆུང་རྣམ་པ་དང་། ལྡི་ལི་ལ་ཡོད་པའི་ཨ་རིའི་གཞུང་ཚབ་ཁང་གི་ལས་བྱེད་ཁག་ཅིག དེ་བཞིན་སྐུ་ཚབ་ཚོགས་མི་རྣམ་པའི་ནང་མི་བཅས་ནས་རྒྱལ་བའི་ཕོ་བྲང་དུ་༧ གོང་ས་སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་རྗེས། དབུས་བོད་མིའི་སྒྲིག་འཛུགས་གཞུང་འབྲེལ་གྱིས་ཐེག་ཆེན་ཆོས་གླིང་གཙུག་ལག་ཁང་དུ་ཕེབས་བསུ་དང་འཚམས་འདྲིའི་མཛད་སྒོ་ཞིག་གོ་སྒྲིག་ཞུས་ཡོད་པ་དེར་བཅར་སོང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་གཙོས་རྡ་སར་ཡོད་པའི་སེར་སྐྱ་མི་མང་དང་སློབ་ཕྲུག་སོགས་མི་བརྒྱ་ཕྲག་མང་པོ་མཉམ་ཞུགས་གནང་འདུག མཛད་སྒོའི་ཐོག་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་དང་ཨ་རིའི་སྤྱི་མཐུན་ཚོགས་པའི་འཐུས་མི། ཐེངས་འདིའི་སྐུ་ཚབ་ཚོགས་ཆུང་གི་སྣེ་ཁྲིད་པ་སྐུ་ཞབས་(Michael McCaul) མའེ་ཁོལ་་མེག་ཀོལ་ལགས་ཀྱིས་གཏམ་བཤད་གནང་དོན། དེ་རིང་ཨ་རིའི་སྲིད་དོན་ཚོགས་པ་གཉིས་ལས་གྲུབ་པའི་སྐུ་ཚབ་ཚོགས་ཆུང་ཞིག་འདིར་ཡོང་ནས་༧གོང་ས་མཆོག་མཇལ་རྒྱུ་བྱུང་བར་ཧ་ཅང་དགའ་པོ་བྱུང་། འདིར་ཡོད་པའི་ཁྱེད་རྣམ་པ་མང་པོ་ཞིག་གིས་རང་གི་ཕ་ཡུལ་བོད་དྲན་གྱི་ཡོད་ཀྱི་རེད། བོད་ལ་རྒྱ་དམར་གྱིས་བཙན་འཛུལ་བྱས་ནས་བོད་མི་སྟོང་ཚོ་མང་པོ་བསད་པ་དང་། ༧གོང་ས་མཆོག་གཙོས་པའི་བོད་མི་སྟོང་ཚོ་མང་པོ་རང་ཡུལ་དང་ཕ་མ། ཁྱིམ་མི་སོགས་བཞག་སྟེ་འདིར་ཡོང་ནས་ད་ཆར་ལོ་ངོ་༦༥ འདས་ཀྱི་ཡོད། འོན་ཀྱང་། འདིར་ཡོང་ནས་རང་གི་རིག་གཞུང་དང་སྐད་ཡིག་སྲུང་སྐྱོབ་བྱེད་བཞིན་ཡོད་པ་ནི་དགའ་འོས་པ་ཞིག་རེད། ངས་རྒྱ་གར་མི་མང་ལ་ཐུགས་རྗེ་ཆེ་ཞུ་འདོད་བྱུང་། རྒྱུ་མཚན་ནི་རྒྱ་གར་གྱིས་བོད་མི་ཚོ་ལ་རང་དབང་ངང་འདིར་སྡོད་བཅུག་པ་དང་། རིག་གཞུང་དང་སྐད་ཡིག་སོགས་སྲུང་སྐྱོབ་བྱེད་རྒྱུའི་གོ་སྐབས་སྤྲད་པ་ཐུགས་རྗེ་ཆེ་ཞུ་རྒྱུ་ཡིན། ངའི་རེ་བ་ལ་ཉིན་ཞིག་༧གོང་ས་མཆོག་གཙོས་པའི་བོད་མི་རྣམས་རང་ཡུལ་ལ་ལོག་ནས་ཞི་བདེའི་ངང་རང་ཡུལ་ལ་འདུག་རྒྱུ་ཡོང་བ་དེ་ཡིན། བོད་ནང་རྒྱ་ནག་གཞུང་གིས་བོད་ཀྱི་རིག་གཞུང་རྩ་གཏོར་གཏོང་ཐབས་བྱེད་ཀྱི་ཡོད་ཀྱང་། བོད་ཀྱི་རིག་གཞུང་དང་སྐད་ཡིག བོད་མིའི་སྙིང་སྟོབས་སོགས་ནམ་ཡང་མེད་པ་བཟོ་ཐུབ་ཀྱི་མ་རེད། ངོ་ལོ་བཅུ་ཕྲག་འགའ་ཤས་འདས་ཟིན་ན་ཡང་ད་དུང་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག་སོགས་ལ་བཙན་གནོན་བྱེད་བཞིན་ཡོད། འོན་ཀྱང་། ༧་གོང་ས་༧སྐྱབས་མགོན་ཆེན་པོ་མཆོག་གིས་དུས་རྟག་ཏུ་ཞི་བ་དང་འཚེ་བ་མེད་པའི་ཐོག་ནས་བཟོད་བསྲན་དང་། བསམ་གཞིག་གནང་གི་ཡོད། དེ་ཡིས་ག་རེ་མཚོན་གྱི་ཡོད་རེད་ཟེར་ན། རྒྱ་ནག་གཞུང་གིས་བོད་མི་རྣམས་ལ་བཙན་གནོན་ག་ཚོད་བྱས་ཀྱང་། བོད་ཀྱི་ཆོས་དང་རིག་གཞུང་། བོད་མིའི་སྙིང་སྟོབས་ནམ་ཡང་འཛམ་གླིང་འདི་ནས་ཡལ་མི་སྲིད་པ་མཚོན་པ་རེད། ང་ཚོ་ཁ་སང་རྡ་སར་ཡོད་པའི་དམངས་གཙོའི་ལྟེ་གནས་ཁག་ལ་ལྟ་སྐོར་ཕྱིན་པ་ཡིན། ཞི་ཅིན་ཕིང་གིས་དམངས་གཙོས་ལས་ཀ་བྱེད་ཀྱི་མ་རེད་ཟེར་གྱི་ཡོད། དེ་ཞི་ཅིན་ཕིང་ཁོ་རང་གི་ནོར་བ་རེད། དམངས་གཙོས་ལས་ཀ་བྱེད་ཀྱི་ཡོད། དམངས་གཙོ་ཡོད་སའི་མི་མང་ལ་རང་དབང་ཡོད། མི་མང་ལ་ཞི་བདེ་ཡོད། ཞི་ཅིན་ཕིང་གི་དབང་འོག་ཏུ་མི་མང་ཚོ་བྲན་གཡོག་རེད། དེ་བཞིན་རྒྱ་ནག་གཞུང་གིས་ང་ཚོར་ཉེན་བརྡའི་ཡི་གེ་ཞིག་བཏང་བྱུང་། ཡི་གེ་དེའི་ནང་བོད་དེ་དུས་རབས་༡༣ ནང་རྒྱ་ནག་གི་ཆ་ཤས་ཡིན་ཟེར་གྱི་ཡོད། འོན་ཀྱང་། རྒྱ་ནག་དམར་ཤོག་གཞུང་གིས་ང་ཚོ་ལ་བཀག་འགོག་བྱེད་ཐུབ་ཀྱི་མ་རེད། རྒྱུ་མཚན་དེ་དག་ལ་བརྟེན་ནས་ང་ཚོ་དེ་རིང་འདིར་ལ་སླེབས་ཡོད། ༧གོང་ས་མཆོག་གིས་ཤེས་རེད། བོད་མི་ཚོས་ཤེས་ཀྱི་རེད། ཨ་རིས་ཤེས་ཀྱི་རེད། རྒྱ་ནག་གིས་གང་བཤད་པ་དེ་བདེན་པ་མིན་པ་ཤེས་ཀྱི་རེད། ཨ་རིའི་གཞུང་གིས་བོད་རྒྱའི་དཀའ་རྙོག་སེལ་བའི་ཁྲིམས་འཆར་ལ་མང་མོས་ཀྱིས་རྒྱབ་སྐྱོར་ཐོབ་ནས་བདུན་ཕྲག་གཅིག་གི་རྗེས་སུ་ང་ཚོ་འདིར་ཡོང་ནས་བོད་མི་ཚོ་ལ་ཆོས་དང་རིག་གཞུང་། སྐད་ཡིག་སོགས་གཞན་དང་མི་འདྲ་བ་ཞིག་ཡོད་པར་བརྟེན། བོད་མི་ཚོ་རང་ཐག་རང་གཅོད་བྱེད་རྒྱུའི་ཐོབ་ཐང་སྤྲོད་དགོས་ཞེས་རྗོད་ཀྱི་ཡོད། དེ་བཞིན་ཁྲིམས་འཆར་དེས་རྒྱ་ནག་གཞུང་གིས་དྲིལ་བསྒྲགས་ལོག་པ་བྱེད་བཞིན་པ་དེ་ལ་ཐད་ཀར་ཁ་གཏད་གཅོག་གི་ཡོད། ཁྲིམས་འཆར་དེ་གང་མགྱོགས་ཨ་རིའི་སྲིད་འཛིན་གྱིས་མཚན་རྟགས་བཀོད་ནས་ཁྲིམས་ཆགས་རྒྱུ་རེད། ང་སྒེར་གྱིས་༧གོང་ས་མཆོག་མཇལ་ཁའི་སྐབས་སུ་༧གོང་ས་མཆོག་ནི་སྙིང་རྗེའི་རང་གཟུགས་ཡིན་པ་ཞིག་ཚོར་སོང་ལ། ཁོང་ནི་སྙིང་རྗེ་ཡི་རང་གཟུགས་རེད། མ་འོངས་པར་༧གོང་ས་མཆོག་གི་ཡང་སྲིད་ཡང་ཡང་ཕེབས་ནས་མི་རབས་མང་པོའི་རིང་འགྲོ་བ་མིའི་རིགས་ལ་གཟིགས་སྐྱོང་གནང་རྒྱུ་གསོལ་འདེབས་བྱེད་ཀྱི་ཡོད། ཨ་རི་ནི་ནམ་ཡང་བོད་དོན་ལ་རྒྱབ་སྐྱོར་བྱེད་མཁན་སྟོབས་ཤུགས་ཆེ་ཤོས་གཅིག་ཡིན་པས་མ་འོངས་པར་ཡང་། རྒྱབ་སྐྱོར་བྱེད་རྒྱུ་ཡིན་ཞེས་གསུངས་གནང་སོང་།
དེ་རྗེས་སུ་ཨ་རིའི་གྲོས་ཚོགས་འོག་མའི་འཐུས་མི་དང་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་(Gregory Meeks)གྷར་གེར་མེ་ཀེསེ་ལགས་ཀྱིས་གཏམ་བཤད་གནང་དོན། དེ་རིང་འདིར་འཛོམས་པ་ཧ་ཅང་དགའ་པོ་བྱུང་། ངས་ཐོག་མར་སྐུ་ཞབས་(Michael McCaul) མའེ་ཁོལ་མེག་ཀོལ་ལགས་ལ་སྐུ་ཚབ་ཚོགས་པ་འདིའི་སྣེ་ཁྲིད་པ་ཐུགས་རྗེ་ཆེ་ཞུ་འདོད་བྱུང་ལ། ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་དང་། བོད་དོན་ལ་རྟག་ཏུ་རྒྱབ་སྐྱོར་གནང་མཁན་(Nancy Pelosi)ནེན་སི་པེ་ལོ་སི་ལ་ཐུགས་རྗེ་ཆེ་ཞུ། དེ་བཞིན་བོད་རྒྱའི་དཀའ་རྙོག་སེལ་བའི་ཁྲིམས་འཆར་ཆེད་དུ་འགན་འཁུར་གཙོ་བོ་བཞེས་མཁན་(Jim Mcgovern)ཇེ་མེ་གྷན་ཝན་ལགས་ལ་ཐུགས་རྗེ་ཞུ། ང་ལ་མི་ཁག་ཅིག་གིས་གཟིགས་སྐོར་འདི་འདྲ་ཡོང་དོན་ཅི་ཡིན་ཞེས་དྲིས་བྱུང་། སྔོན་ཨ་རིའི་ནང་མི་རིགས་ནག་པོའི་ཐོབ་ཐང་རྩོད་ལེན་པ་(Marthin Luther King)མར་ཊིན་ལུ་ཐར་ཀིང་གིས་བརྗོད་པ་ཞིག་ལ། དྲང་བདེན་མིན་པའི་བྱ་སྤྱོད་གང་དུ་ཡོད་པ་དེ་ཡིས། དྲང་བདེན་གང་དུ་ཡོད་པ་དེ་ལ་གནོད་ཀྱི་ཡོད་པས། དྲང་བདེན་གྱི་ཆེད་དུ་འབོད་སྒྲ་སྒྲོག་དགོས་ཞེས་བརྗོད་པས་ང་ཚོས་ངེས་པར་དུ་དྲང་བདེན་ཆེད་དུ་འབོད་སྒྲ་སྒྲོག་དགོས།
དེ་རིང་ཞོགས་པར་༧གོང་ས་མཆོག་དང་མཇལ་རྒྱུའི་གོ་སྐབས་བྱུང། དེ་ནི་ངས་ནམ་ཡང་དྲན་གསོ་འོས་པའི་བསྐལ་བ་བཟང་པོ་ཞིག་ཡིན། དམིགས་བསལ་ཁོང་གི་ཐུགས་དགོངས་དང་བྱམས་བརྩེ། གཟིགས་རྒྱང་སོགས་དེ་དག་ནི་ངའི་མི་ཚེ་གང་བརྗེད་པར་དཀའ་བ་ཞིག་རེད། ང་ཚོ་ཨ་རིའི་སྲིད་དོན་ཚོགས་པ་གཉིས་ཀས་བོད་དོན་ཐོག་རྒྱབ་སྐྱོར་གནང་རྒྱུ་ནི་ནམ་ཡང་འགྱུར་མེད་ཡིན། བོད་ནང་རྒྱ་ནག་གཞུང་གིས་དཔལ་འབྱོར་ཡར་རྒྱས་ལ་ཁ་གཡར་ནས་བོད་མི་རྣམས་གནས་སྤོ་བཅུག་པ་དང་། བོད་པའི་བྱིས་པ་ཚོ་རྒྱ་གཞུང་གིས་བཅའ་སྡོད་སློབ་གྲྭའི་ནང་བཙན་གྱིས་བཅུག་པ་དང་། བོད་མིའི་རྩོམ་པ་པོ་དང་། དགེ་རྒན། ལས་འགུལ་བ་སོགས་རང་གི་ཐོབ་ཐང་རྩོད་ལེན་བྱེད་པ་ཙམ་གྱིས་བཙོན་ནང་འཇུག་གི་ཡོད། ཨ་རིའི་གཞུང་གིས་བོད་རྒྱའི་དཀའ་རྙོག་སེལ་བའི་ཁྲིམས་འཆར་དེ་གང་མགྱོགས་ཁྲིམས་ཆགས་ན་བོད་ཀྱི་རྩ་དོན་ལ་ཕན་པའི་རེ་བ་ཡོད་སོགས་གསུངས་གནང་སོང་།
ལོ་མང་རིང་ནས་བོད་དོན་རྒྱབ་སྐྱོར་བ་(Jim McGovern)ལགས་ཀྱིས་བརྗོད་དོན་ལ། དེ་རིང་ཞོགས་པ་༧གོང་ས་མཆོག་མཇལ་རྒྱུ་བྱུང་ལ། ཧ་ཅང་བསྐལ་བ་བཟང་པོ་ཡིན། ཕྱི་ལོ་༢༠༡༧ ལོར་བཞུགས་སྒར་རྡ་སར་ཐེངས་དང་པོ་ཡོང་བ་ཡིན། ཕྱི་ལོ་༢༠༡༥ ལོར་ནེན་སི་པེ་ལོ་སི་(Nancy Pelosi)དང་ལྷན་དུ་བོད་ལ་ཕྱིན་པ་ཡིན། བོད་ནང་དངོས་ཡོད་གནས་ཚུལ་གང་འདྲ་འདུག་ལྟ་ཆེད་ཕྱིན་པ་ཡིན་ཧ་ཅང་གིས་གནས་སྟངས་སྐྱོ་པོ་འདུག ངས་ད་ལྟ་བོད་པའི་བྱིས་པ་ཚོ་མཐོང་དུས་ང་ཚོས་ད་ལྟ་བྱེད་བཞིན་པའི་ལས་དོན་རྣམས་ནི་བོད་པའི་བུ་ཕྲུག་ཚོའི་ཆེད་དུ་ཡིན་པས། ང་ཚོས་ངེས་པར་དུ་མུ་མཐུད་ནས་ལས་ཀ་བྱས་ན། མ་འོངས་མདུན་ལམ་ཡག་པོ་ཞིག་ཡོང་ཆེད་ལས་ཀ་བྱེད་དགོས་ཀྱི་འདུག ངས་བོད་ནང་ཡོད་པའི་བྱིས་པ་ཚོ་དང་ཕྱི་ཕྱོགས་ལ་ཡོད་པའི་བོད་པའི་བྱིས་པ་ཚོ་མཐོང་དུས་སེམས་ཤུགས་ཤིག་སྦྱིན་གྱི་འདུག་ལ། རྡ་སར་ཡོད་པའི་བོད་ཀྱི་དམངས་གཙོ་མཐོང་དུས་དེ་ལས་སེམས་ཤུགས་ཤིག་དང་བློ་སྟོབས་ཤིག་སྦྱིན་གྱི་འདུག ཁྱེད་རྣམས་ཀྱིས་ཤེས་གསལ་ལ། བདུན་ཕྲག་གཅིག་གི་སྔོན་དུ་ཨ་རིའི་གཞུང་ནས་བོད་དོན་ཁྲིམས་འཆར་ཞིག་བཟོས་ཡོད་པ་དང་། དེས་རྒྱ་ནག་གཞུང་གིས་བོད་དེ་དུས་རབས་༡༣ ནས་རྒྱ་ནག་གི་ཆ་ཤས་ཡིན་ཞེས་པ་ལ་བརྡ་ལན་ཞིག་སྤྲད་ཡོད་རེད། རྒྱ་ནག་གི་ངོས་ནས་གནས་ཚུལ་རྫུན་མ་མ་སྤེལ་ན་ཡག་གི་རེད། དེ་ལས་ནོར་འཁྲུལ་རྣམས་བཟོ་བཅོས་བྱས་ན་ལེགས། དེ་འདྲ་བྱས་ན་རྒྱལ་སྤྱིའི་ངོས་ནས་རྒྱབ་སྐྱོར་བྱེད་ཀྱི་རེད། རྒྱ་ནག་གིས་གང་མགྱོགས་༧གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་བྱེད་རྒྱུའི་རེ་བ་བྱེད་ཀྱི་ཡོད། ཨ་རིའི་ངོས་ནས་ནམ་ཡང་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་ཡོད་ཅེས་གསུངས་གནང་སོང་། དེ་བཞིན་དུས་ཡུན་རིང་པོར་བོད་དོན་རྒྱབ་སྐྱོར་གནང་མཁན་གཙོ་བོའི་གྲས་དང་༧གོང་ས་མཆོག་གི་གྲོགས་པོ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་(Nancy Pelosi)ཀྱིས་གཏམ་བཤད་གནང་དོན། ཁྱེད་རྣམས་ཀྱིས་ཤེས་གསལ་ལ་བདུན་ཕྲག་སྔོན་མར་ཨ་རིའི་གཞུང་གིས་བོད་དོན་ཁྲིམས་འཆར་ཞིག་ལ་མང་མོས་ཀྱིས་རྒྱབ་སྐྱོར་ཐོབ་ཡོད། ཁྲིམས་འཆར་དེ་ལོ་མང་གོང་ནས་ལས་ཀ་བྱས་ནས་ད་ཆར་གྲུབ་འབྲས་ཐོན་ཡོད། ཐེངས་འདིའི་ཁྲིམས་འཆར་དེ་གཞན་དང་མི་འདྲ་བ་བོད་དོན་སྐོར་གྱི་གནད་དོན་ཁ་གསལ་བཟོ་ཐབས་ཆེད་དུ་ཡིན་པ་དང་། དེ་རིང་གི་ཁྲིམས་འཆར་དེའི་ཐོག་(Jim McGovern)ལགས་ཀྱིས་ཧ་ཅང་གིས་ནུས་པ་ཆེན་པོ་བཏོན་ཡོད་པས་ཐུགས་རྗེ་ཆེ་ཞུ་འདོད་བྱུང་ཞེས་དང་། དེ་བཞིན་ཁོང་མོ་བོད་ནང་འགྲོ་དུས་ཕོ་བྲང་པོ་ཏ་ལའི་ནང་ཕྱིན་པས་སྐབས་དེ་དུས་༧གོང་ས་མཆོག་གི་གཟིམ་ཁང་དུ་༧གོང་ས་མཆོག་གི་གཟིམ་ཁྲི་མཇལ་རྒྱུ་བྱུང་བས། ཚོར་སྣང་ཆེན་པོ་བྱུང་ཡོད་པ་སོགས་གསུངས་སོང་། དེ་བཞིན་ཁོང་མོས་༧གོང་ས་མཆོག་གི་ཐུགས་དགོངས་དང་ཐུགས་ཀྱི་བྱམས་བརྩེ། འགྲོ་བ་མིའི་རིགས་ལ་བཞག་པའི་ལེགས་སྐྱེས་རྣམས་དུས་ནམ་ཡང་གནས་ཀྱི་རེད། འོན་ཀྱང་རྒྱ་ནག་གཞུང་གི་འགོ་ཁྲིད་ཁྱོད་ཚོའི་བྱ་སྤྱོད་རྣམས་ཁྱོད་ཚོ་མེད་པར་གྱུར་རྗེས། སུས་ཀྱང་ངོས་འཛིན་ཐོབ་ཀྱི་མ་རེད་ཅེས་གསུངས། ད་དུང་༧གོང་ས་མཆོག་གིས་རྟག་ཏུ་གསུང་པ་བཞིན་ང་ཚོའི་རེ་བ་ནམ་ཡང་བརླག་མི་ཉེན། དམིགས་བསལ་བོད་པ་ཚོའི་རེ་བ་ནམ་ཡང་བརླག་མི་ཉེན། ནམ་ཞིག་ང་ཚོ་བོད་ལ་ལོག་པའི་དུས་ཤིག་འཆར་རྒྱུ་ཡིན་པས་འཐབ་རྩོད་མུ་མཐུད་ནས་བྱེད་དགོས་ཞེས་གསུངས་གནང་སོང་། དེ་བཞིན་གཞན་སྐུ་ཚབ་རྣམ་པས་ཀྱང་བོད་ལ་རྒྱབ་སྐྱོར་ཡོད་པ་དང་། བོད་དོན་འཐབ་རྩོད་མུ་མཐུད་ནས་བྱེད་དགོས་པ་སོགས་བརྗོད་གནང་སོང་། གཏམ་བཤད་གྲུབ་མཚམས་བོད་མིའི་སྒྲིག་འཛུགས་ཀྱི་སྲིད་སྐྱོད་སྤེན་པ་ཚེ་རིང་ནས་སྐུ་ཚབ་རྣམས་ལ་བོད་ཀྱི་ཤོག་དངུལ་རེ་དང་སྐུ་ཐང་རེ་ཕྱག་རྟགས་ཕུལ་སོང་།
གསར་འགོད་པ། བསོད་ནམས་ཕུན་ཚོགས།
