དེ་སྔོན་ཊོམ་གྱི་སྡོད་གནས་ནས་གསང་བའི་ཡིག་ཆ་༡༠༠ ཙམ་ཕྱིར་སོན་བྱུང་འདུག

ཉེ་ཆར་ཨ་རིའི་དབུས་རྟོག་ཞིབ་ལས་ཁང་གིས་སྲིད་འཛིན་ཟུར་པ་ཊོམ་གྱི་སྡོད་གནས་ཤིག་ཏུ་སྔོན་བརྡ་མེད་པའི་བསྔོགས་བཤེར་བྱས་ཏེ། གལ་ཆེན་གྱི་གསང་བའི་ཡིག་ཆ་མང་པོ་ཞིག་རྙེད་སོན་བྱུང་ནས་ཕྱིར་བླངས་ཡོད་ཀྱང་། གནས་ཚུལ་གསར་པ་ཞིག་ལ་ཟླ་བ་༧ གྱི་སྔོན་ལ་གསང་བའི་ཡིག་ཆ་༡༠༠ ཙམ་ཞིག་ཀྱང་ཊོམ་གྱི་སྡོད་གནས་ནས་ཕྱིར་སོན་བྱུང་ཡོད་པ་རེད་འདུག 

ཟླ་༨ པའི་ཚེས་༢༤ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཉེ་ཆར་ཨ་རིའི་རྒྱལ་ཡོངས་ཡིག་ཚགས་དང་ཟིན་ཐོ་ལས་ཁང་གིས་སྲིད་འཛིན་ཟུར་པ་ཊོམ་གྱི་ཁྲིམས་རྩོད་པར་བཏང་བའི་ཡི་གེ་ཞིག་ཕྱིར་བསྒྲགས་བྱས་འདུག་པ་དང་། དེའི་ནང་དུ་འཁོད་དོན་ལ་ཨ་རིའི་རྒྱལ་ཡོངས་ཡིག་ཚགས་དང་ཟིན་ཐོ་ལས་ཁང་གིས་སྲིད་འཛིན་དང་འབྲེལ་བའི་ཡིག་ཆ་མང་པོ་ཞིག་བོར་བརླག་སོང་བའི་གནས་ཚུལ་ཤེས་རྟོགས་བྱུང་རྗེས། ཕྱི་ལོ་༢༠༢༡ ལོ་ནས་སྲིད་འཛིན་ཟུར་པ་ཊོམ་གྱི་ཁྲིམས་རྩོད་པ་དང་མཉམ་དུ་གནད་དོན་དེའི་ཐད་འབྲེལ་བ་ཐེངས་མང་བྱས་ཏེ། མཐའ་མ་དེར་ཕྱི་ལོ་༢༠༢༢ ལོའི་ཟླ་༡ པོའི་ནང་སྲིད་འཛིན་ཟུར་པ་ཊོམ་གྱི་སྡོད་གནས་ནས་གསང་བའི་ཡིག་ཆ་ཤོག་སྒམ་༡༥ ཞིག་རྒྱལ་ཡོངས་ཡིག་ཚགས་དང་ཟིན་ཐོ་ལས་ཁང་ལ་ཕྱིར་སྤྲོད་བྱས་ཡོད་པ་རེད་འདུག ལག་སོན་བྱུང་བའི་ཡིག་ཆའི་ནང་དུ་ཡིག་ཆ་འདྲ་མིན་༡༠༠ ཙམ་དང་ཤོག་གྲངས་༧༠༠ ལས་མང་བ་ཡོད་ཁར། དེ་དག་ཁོངས་སུ་གསང་བ་ཆེ་ཤོས་ཀྱི་རིམ་པ་ཡིན་པའི་ཡིག་ཆ་དང་། དམིགས་བསལ་ཆོག་མཆན་དགོས་པའི་ལས་རིམ་ཁག་གི་ཡིག་ཆ་སོགས་ཡོད་པ་རེད་འདུག 

ཉེ་ཆར་ཟླ་༨ པའི་ཚེས་༨ ཉིན་ཊོམ་གྱི་སྡོད་གནས་སུ་ཨ་རིའི་དབུས་རྟོག་ཞིབ་ལས་ཁང་གིས་སྔོན་བརྡ་མེད་པའི་ཐོག་ནས་བསྔོགས་བཤེར་བྱས་ཡོད་འདུག་པ་དང་། དེ་ནི་ཨ་རིའི་ལོ་རྒྱུས་ནང་སྲིད་འཛིན་ཟུར་པ་ཞིག་གི་སྡོད་གནས་སུ་སྔོན་བརྡ་མེད་པའི་བསྔོགས་བཤེར་བྱས་པ་ཐེངས་དང་པོ་ཡིན་ཁར། དེ་འདྲ་ཞིག་བྱེད་པར་སྔོན་ཚུད་ནས་ཁྲིམས་དཔོན་གྱི་དྲུང་ནས་ཆོག་མཆན་ལེན་དགོས་ཀྱི་ཡོད་པ་རེད་འདུག སྐབས་དེར་མིང་འདོན་བྱེད་འདོད་མེད་པའི་ཨ་རིའི་ལས་བྱེད་ཅིག་གིས་བརྗོད་དོན་ལྟར་ན། ཨ་རིའི་དབུས་རྟོག་ཞིབ་ལས་ཁང་གིས་སྲིད་འཛིན་ཟུར་པ་ཌོ་ནལ་ཊོམ་གྱིས་ལས་ཡུན་རྫོགས་པའི་སྐབས་སུ། ཁྲིམས་འགལ་གྱི་ཐོག་ནས་རྒྱལ་ཁབ་ཀྱི་གསང་བ་དང་འབྲེལ་བ་ཡོད་པའི་ཡིག་ཆ་ཁག་ཅིག་འཁྱེར་ནས་སོང་ཡོད་པ་དང་། ཡིག་ཆ་དེ་དག་སྲིད་འཛིན་ཟུར་པ་ཁོང་གི་སྡོད་གནས་དེར་ཡོད་པའི་གནས་ཚུལ་དང་འབྲེལ་ནས། ཨ་རིའི་ཁྲིམས་ཞིབ་ལས་ཁང་གི་རིམ་པ་མཐོ་ཤོས་ནས་ས་གནས་དེར་སྔོན་བརྡ་མེད་པའི་བསྔོགས་བཤེར་བྱེད་པའི་ཆོག་མཆན་སྤྲད་ཡོད་སྐོར་བརྗོད་འདུག

ཕྱིས་སུ་ཁྲིམས་ཞིབ་ལས་ཁང་ནས་བསྔོགས་བཤེར་དེ་དང་འབྲེལ་བའི་ཆོག་མཆན་ཡིག་ཆ་ཕྱིར་བསྒྲགས་བྱས་སྐབས་སུ། དེའི་ནང་དུ་སྲིད་འཛིན་ཟུར་པ་ཊོམ་གྱིས་ཁྲིམས་འགལ་ཐོག་ནས་བདེ་སྲུང་དང་འབྲེལ་བའི་ཡིག་ཆ་ཉར་འཇོག་གིས་ཨ་རིའི་གསང་ཉུལ་གྱི་ཁྲིམས་དང་འགལ་ཡོད་པའི་དོགས་པ་བྱས་ཡོད་པ་རེད་འདུག 

སྐབས་དེར་དབུས་རྟོག་ཞིབ་ལས་ཁང་ལ་ཊོམ་གྱི་སྡོད་གནས་ནས་ཡིག་ཆ་ཚན་པ་༡༡ ལག་སོན་བྱུང་ཡོད་པ་དང་། ཡིག་ཆ་དེ་དག་ཀྱང་གསང་བ་ཆེ་ཤོས་ཀྱི་རིམ་པ་ཡིན་པའི་ཡིག་ཆ་ཡིན་ཁར། བརྒྱུད་ལམ་ཁག་ཅིག་ཏུ་ཡིག་ཆ་དེ་དག་ནང་རྡུལ་མཚོན་གྱི་ལས་གཞི་དང་འབྲེལ་བའི་ཡིག་ཆ་ཡོད་སྐོར་བརྗོད་བཞིན་འདུག 

བསྔོགས་བཤེར་དེ་དང་འབྲེལ་ནས་སྲིད་འཛིན་ཟུར་པ་ཊོམ་གྱིས་བརྗོད་དོན་ལ། ཁོང་དང་སྤྱི་མཐུན་ཚོགས་པའི་ཚོགས་མི་རྣམས་ལ་ཆེད་དུ་མངགས་ནས་དམིགས་འབེན་བྱེད་ཀྱི་ཡོད་པ་དང་། དེའི་རྒྱུ་མཚན་ནི་ཁོང་ལ་སྲིད་དོན་ཤུགས་རྐྱེན་དང་རྒྱབ་སྐྱོར་ཤུགས་ཆེན་ཡོད་པས། ཁོང་དང་སྤྱི་མཐུན་ཚོགས་པར་བཀག་འགོག་བྱེད་ཐབས་བྱེད་བཞིན་ཡོད་པ། ཁྲིམས་འགལ་དང་སྲིད་དོན་གྱི་དམིགས་ཡུལ་ལྡན་པའི་སྡུག་སྦྱོང་དེ་ཐེར་འདོན་བྱས་ཏེ་བཀག་འགོག་བྱེད་དགོས་སྐོར་བརྗོད་འདུག

ཟླ་༡༡ པའི་ནང་ཨ་རིའི་གྲོས་ཚོགས་གོང་འོག་གཉིས་ཀྱི་བར་མའི་འོས་བསྡུ་ཡིན་པས། ད་ལྟའི་གནད་དོན་དེ་ལ་བརྟེན་ནས་འོས་བསྡུར་ཤུགས་རྐྱེན་ཐེབས་ཉེན་ཆེན་པོ་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།