དྲ་ཐོག་བགྲོ་གླེང་ཐོག་༧གོང་ས་མཆོག་ནས་བཀའ་སློབ་བསྩལ།
ཟླ་༡ པོའི་ཚེས་ ༦ ཉིན་༸གོང་ས་མཆོག་ནས་རྒྱལ་སྤྱིའི་དགེ་ལྡན་ལྷན་ཚོགས་ཀྱིས་གོ་སྒྲིག་ཞུས་པའི་ཉིན་གྲངས་གཉིས་རིང་གི་གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པ་བཅས་ཀྱི་ཐོག་དཔེ་ཁྲིད་དགེ་རྒན་རྣམ་པའི་དྲ་ཐོག་བགྲོ་གླེང་དབུ་འབྱེད་ཀྱི་མཛད་སྒོར་དབུ་བཞུགས་དང་བཀའ་སློབ་བཀའ་དྲིན་བསྩལ་གནང་སོང་།
༧གོང་ས་མཆོག་ནས་བཀའ་སློབ་བསྩལ་དོན། དེ་རིང་གི་བགྲོ་གླེང་འདི་ནི་ཧ་ཅང་ཡག་པོ་བྱུང་། འཇམ་མགོན་བླ་མའི་བསྟན་པ་ལ། མང་དུ་ཐོས་པ་རྒྱ་ཆེན་བཙལ་བས་མཁས།། ཞེས་པ་ནི་ཐོས་པ་རྒྱ་ཆེན་པོ་བྱེད་པ་ཞིག་རེད། ང་ཚོར་དེ་སྔ་མཁན་ཆེན་ཞི་བ་འཚོས་དབུ་ཚད་ཟུང་འཇུག་ལམ་སྟོན་གནང་བ་རེད། བོད་གངས་ཅན་གྱི་རིས་སུ་མ་ཆད་པའི་མཁས་དབང་ཚོས་མཁན་ཆེན་བོ་དྷི་སཏྭའི་ལམ་སྟོན་ལྟར་གཞུང་པོ་ཏི་ལྔ་ཧ་ཅང་གལ་ཆེན་པོ་རེད། དེའི་ནང་མཛོད་འདུལ་ནི་གྲངས་འདྲེན་ལྟ་བུ་མ་གཏོགས་གནད་འགག་ཆེན་པོ་དམིགས་བསལ་མེད་ཀྱང་ཕར་ཕྱིན་དང་དབུ་མ་གཉིས་ནི་ཧ་ཅང་གལ་ཆེན་པོ་རེད། དབུ་མ་འཇུག་པ་གཙོ་བོར་གྱུར་བའི་རིགས་ཚོགས་དྲུག་ལ་ལྟ་རྒྱུ་ཡོད། དེ་བཞིན་ཚད་མའི་གཞུང་རྣམས་ལ་བལྟས་ཏེ་དབུ་ཚད་ཟུང་འཇུག་གིས་ལྟ་བའི་ཕྱག་སྲོལ་ཧ་ཅང་ཡག་པོ་ཞིག་འདུག
ང་ཚོ་བཙན་བྱོལ་ལ་སླེབས་ནས་གཙོ་བོ་གདན་ས་གསུམ་དང་བཀྲ་ཤིས་ལྷུན་པོ་བཅས་ནས་གཞུང་ཆེན་སློབ་གཉེར་གྱི་ཕྱག་སྲོལ་ཉམས་པ་མེད་པར་རྒྱུན་བཟུང་བཞིན་ཡོད། དེའི་ཐོག་ལ་རྣམ་གཡེང་གི་འགྲོ་སྟངས་ཅུང་ཙམ་ཡོང་གི་ཡོད་ཀྱང་དེ་སྔ་བོད་ལ་འབྲེལ་བ་ཁྱོན་ནས་མེད་པ་དཔེར་ན། ཚན་རིག་དང་སེམས་ཁམས་རིག་པའི་སྐོར་སློབ་གཉེར་རྒྱ་ཆེ་རུ་བཏང་བ་ལྟ་བུ་ཆགས་ཡོད། གང་ལྟར་གདན་ས་གསུམ་གཙོ་བོར་གྱུར་པའི་གཞུང་ཆེན་སློབ་གཉེར་ཡོད་པའི་གདན་ས་ཁག་ཧ་ཅང་གལ་ཆེན་པོ་རེད། དེ་དང་ཆབས་ཅིག་ཐོས་དོན་སྒྲུབ་ལ་གཞོལ། ཞེས་གསུངས་པ་ལྟར་ཐོས་པའི་དོན་རྒྱུད་ཐོག་ལ་བསྐྱལ་ནས་གཤིས་རྒྱུད་ལ་འགྱུར་བ་འགྲོ་བ་ཞིག་དགོས་ཀྱི་རེད་ལ། དེ་བྱུང་བ་ཡིན་ན་ཐོས་བསམ་སྒོམ་པ་ཡ་མ་བྲལ་བ་ཞིག་ཡོང་གི་ཡོད་པ་རེད།
དེ་རིང་འདིར་དགེ་བཤེས་རྣམ་པ་ཚོས་བགྲོ་གླེང་གནང་རྒྱུ་རེད། བློ་གསལ་གླིང་གི་མཁན་པོ་ཕེབས་འདུག་གམ། ཁོང་ལ་ངོས་རང་དམ་བཅའ་འཚོགས་རྒྱུར་ཧ་ཅང་དགའ་བོ་ཡོད། འོན་ཀྱང་ངོས་རང་དམ་བཅར་སྡོད་དགོས་པ་རེད་ཟེར་ན་ཅུང་རྙོག་གྲ་རེད་ཅེས་བཤད་རྒྱུ་བྱུང་། དེ་རིང་འདིར་ཁྱོད་རང་ཚོ་བགྲོ་གླེང་དམ་བཅའ་གནང་མཁན་ཚོར་ངོས་ཀྱིས་ལྟད་མོ་ལྟ་རྒྱུའི་གོ་སྐབས་ཧ་ཅང་ཡག་པོ་འདུག ཐུགས་རྗེ་ཆེ། གཞུང་ཆེན་བཀའ་པོད་ལྔ་གཙོ་བོར་གྱུར་པའི་རིགས་ཚོགས་སོགས་ལ་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད། ངོས་ལ་ཆ་བཞག་ན་དེ་སྔ་དཔེ་ཆར་བལྟས་པའི་སྐབས་སུ་ཁྲལ་ལྟ་བུ་ལས་གཞན་ཡོད་པ་མ་རེད། བར་སྐབས་དབུ་མ་འཇུག་པ་གཙོ་བོར་གྱུར་པའི་གཞུང་དེ་དག་ངོས་ཀྱི་རྒྱུན་མཁོའི་དཔེ་ཆའི་གྲས་སུ་བཞག་ཡོད། དབུ་མ་རིགས་ཚོགས་དྲུག་ནི་བསམ་བློ་གཏོང་བར་ཧ་ཅང་ཕན་ཐོགས་ཆེན་པོ་ཡོད། གཞུང་ཆེན་དག་ལ་དབུ་ཚད་ཟུང་གི་ཐོག་ནས་བསམ་བློ་གཏོང་དུས་སེམས་ལ་འགྱུར་བ་གཏོང་བ་རེད་མ་གཏོགས་རྟགས་གསལ་གཏོང་བའི་སྐད་ཆ་གཅིག་པུ་མ་རེད། དེར་བརྟེན་གཞུང་ཆེན་ལ་བལྟ་རྒྱུ་ཧ་ཅང་ཆེན་པོ་རེད་ཅེས་བཀའ་སློབ་བསྩལ་གནང་སོང་།།
གསར་འགོད་པ་སྐལ་བཟང་དོན་གྲུབ།
