དྲུག་གཅིག་བྱིས་པའི་དུས་ཆེན་གླེང་བ།

རྫ་ཚེ་རིང་བཀྲ་ཤིས།
སངས་རྒྱས་ལ་ཕྱག་འཚལ་ལོ། བྱིས་པ་རྣམས་ཀྱི་ལུས་དང་སེམས་ལ་བདེ་ཐང་ལྡན་པའི་འཚར་ལོང་གི་མཁའ་དབུགས་བཟང་པོ་ཐོབ་པར་ཤོག་ཅིག
བོད་ནང་སོགས་སུ་དེ་རིང་མང་པོ་ཞིག་གིས་དྲུག་གཅིག་བྱིས་པའི་དུས་ཆེན་སྲུང་བརྩི་བྱེད་གྱིན་འདུག་མོད། གལ་ཆེའི་དུས་ཆེན་ཞིག་ཡིན་པའི་ཆ་ནས་ཡོང་ཁུངས་སོགས་ལ་ཅུང་ཟད་རྒྱུས་ལོན་བྱས་ན་དེ་ཡང་རྒྱུན་ཤེས་ཤིག་རེད་སྙམ།

དེ་ཡང་དཔྱད་གཞིའི་ཡིག་ཆ་ལྟར་ན། བྱིས་པའི་དུས་ཆེན་གྱི་ཐོག་མའི་ཡོང་སྟངས་དང་གོ་དོན་ནི་བྱིས་པའི་ཐོབ་ཐང་སྲུང་སྐྱོབ་དང་བྱིས་པ་ལ་མནར་གཅོད་དང་གནོད་འཚེ་གཏོང་བར་ངོ་རྒོལ་བཅས་གྱི་མཚོན་བྱེད་ཡིན་པ་མ་ཟད། མནར་གཅོད་ཕོག་པའི་བྱིས་པ་དག་ལ་དྲན་གསོ་བྱེད་པའི་ཆེད་དུའང་རེད།

ཐོག་མར་སྤྱི་ལོ་༡༩༢༥ ལོར་སུད་སུའི་གྲོང་ཁྱེར་ཇེ་ནི་ཝ་རུ་བསྐོང་འཚོགས་བྱས་པའི་བྱིས་པའི་བདེ་དོན་དང་འབྲེལ་བའི་རྒྱལ་སྤྱིའི་ཚོགས་འདུའི་ཐོག་རྒྱལ་སྤྱིའི་བྱིས་པའི་བདེ་སྐྱིད་སྐུལ་འདེད་ཚོགས་པས་ཐོག་མར་བྱིས་པའི་དུས་ཆེན་གྱི་བསམ་ཚུལ་བཏོན་ཞིང་། རྒྱལ་སྤྱིའི་ཁྱོན་གྱི་རྒྱལ་ཁབ་སོ་སོའི་རང་ཁོངས་སུ་བྱིས་པའི་དུས་དྲན་གྱི་ཉིན་མོ་གཏན་འབེབས་དགོས་པའི་འབོད་སྐུལ་བྱས་པར་རྒྱལ་ཁབ་མང་པོས་བསྔགས་བརྗོད་ཐོབ།

དེ་རྗེས་རྒྱལ་སྤྱིའི་དམངས་གཙོའི་བུད་མེད་མཉམ་འབྲེལ་ཚོགས་པས་མེག་སི་ཁོ་རུ་ཚོགས་འདུ་ཞིག་གི་ཐོག་ཨོ་སི་ཐྲི་ཡའི་བུད་མེད་གནའ་འབྲེལ་གྱི་རྐང་འཛིན་ཚོགས་མི་(Helen Olongapo Luozuo)ཞིག་གིས་རྒྱལ་སྤྱིའི་བྱིས་པའི་དུས་ཆེན་སྲུང་བརྩི་བྱེད་སྟངས་དང་འབྲེལ་བའི་ཡར་ཞུ་བྱས། ཁོང་མོས། རྒྱལ་སྤྱིའི་དམངས་གཙོའི་བུད་མེད་མཉམ་འབྲེལ་གྱི་ངོས་ནས་རྒྱལ་སྤྱིའི་བྱིས་པའི་དུས་ཆེན་གྱི་འཆར་གཞི་བཀོད་ཟིན་པ་དང་། དེ་ཡང་ས་ཁུལ་སོ་སོའི་བྱིས་པ་དག་གི་འཚོ་བ་དང་བདེ་ཐང་། སློབ་གསོའི་ཐོབ་ཐང་བཅས་སྲུང་སྐྱོབས་འགན་ལེན་བྱེད་པའི་ཆེད་སྒྲུབ་བཞིན་པའི་འགན་འཁྲི་ཞིག་ཡིན། ཞེས་བསྟན་ཞིང་། དེ་ཡང་༡༩༤༢ལོའི་ཟླ་༦་ཚེས་༡༠ཉིན་འཇར་མན་ན་ཙིས་དམག་དཔུང་གིས་གྲོང་ཁུལ་ཞིག་གི་བྱིས་པ་༨༨དམར་གསོད་བྱས་པར་རྗེས་དྲན་བྱེད་པའི་ཆེད་དུ་ཡིན་ཞེས་ལབ་པར་མ་ཟད། མོས་རྒྱལ་སྤྱིའི་དམངས་གཙོའི་བུད་མེད་མཉམ་འབྲེལ་གྱི་དྲུང་ཡིག་ལས་ཁུང་གི་ཚབ་བྱས་ཏེ་སྤྱི་ཟླ་༦ཚེས་གཅིག་རྒྱལ་སྤྱིའི་བྱིས་པའི་ཉིན་མོར་གཏན་ཁེལ་བྱས་ན་འཚམས་པའི་བསམ་ཚུལ་བཏོན། དེ་ནས་ཅུང་མ་འགོར་བའི་ལོ་དེའི་སྤྱི་ཟླ་༡༡པའི་ཚེས་༢༢ཉིན་ཚོགས་འདུ་བརྒྱུད་ནས་སྤྱི་ཟླ་༦ཚེས་༡ཉིན་རྒྱལ་སྤྱིའི་བྱིས་པའི་དུས་ཆེན་དུ་གྲོས་འཆམས་བྱུང་། རྒྱ་ནག་རྒྱལ་ཡོངས་དམངས་གཙོ་བུད་མེད་མཉམ་འབྲེལ་གྱི་ལར་བསྟར་ཚོགས་མི་ཏིན་ལིན་ཟེར་བ་ཞིག་ཀྱང་ཚོགས་འདུ་དེར་ཞུགས་པར་མ་ཟད། ཚོགས་ཐོག་ཏུ་པེ་ཅིན་དུ་ཚུགས་ཉེར་ཡོད་པའི་ཡ་གླིང་བུད་མེད་འཐུས་ཚོགས་ཀྱི་གྲ་བསྒྲིགས་ཀྱི་ལས་དོན་སྐོར་ལ་ཡར་ཞུ་བྱས། སྤྱི་ལོ་༡༩༤༥ཟླ་༡༢ཚེས་༡༤ཉིན་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱིས་ལོ་རེའི་སྤྱི་ཟླ་༡༡་ཚེས་༢༠བྱིས་པའི་དུས་ཆེན་དུ་གཏན་འབེབས་བྱས་ཤིང་། མིང་ལ་རྒྱལ་སྤྱིའི་བྱིས་པའི་ཉིན་མོ་ཞེས་བཏགས།

ད་ལྟ་འཛམ་གླིང་གི་རྒྱལ་ཁབ་མང་པོ་ཞིག་གིས་དྲུག་པའི་ཚེས་གཅིག་ཉིད་བྱིས་པའི་དུས་ཆེན་དུ་སྲུང་བརྩི་ཞུ་བཞིན་ཡོད་ཅིང་། རྒྱ་ནག་ལ་མཚོན་ན་མཚོ་ངོགས་གཉིས་ཀྱི་དུས་ཚོད་མི་གཅིག་ཅིང་། ཀྲུང་གོ་གོང་ཁྲན་དང་སྲིད་གཞུང་གི་ངོས་ནས་སྤྱི་ལོ་༡༩༤༩ ལོའི་ཟླ་༡༢ ཚེས་༢༣ ཉིན་གྲོས་འཆམ་བྱུང་བའི་《རྒྱལ་ཡོངས་ལོ་རེའི་དུས་ཆེན་དང་རྗེས་དྲན་ཉིན་མོ་གུང་གསེང་བཅས་ཀྱི་བྱ་ཐབས་ཀྱི་ཁྲིམས་》ཞེས་པའི་ནང་དུ་དྲུག་པའི་ཚེས་གཅིག་བྱིས་པའི་དུས་ཆེན་དུ་གཏན་ཁེལ་བྱས་ཡོད། འོན་ཀྱང་ཐའེ་ཝན་གྱིས༡༩༣༡ལོར་ཀྲུང་ཧྭ་བྱིས་པའི་བྱམས་བརྩེའི་མཐུན་ཚོགས་ཀྱིས་ཞེས་པས་གྲོས་མགོ་བཏོན་པ་ལྟར་ལོ་རེའི་སྤྱི་ཟླ་༤ཚེས་༤ཉིན་ལ་གཏན་ཁེལ་བྱས་ཡོད་ཅིང་། ཉིན་དེ་རྒྱལ་ཡོངས་གུང་གསེང་གི་ཉིན་མོ་ཡིན་པ་དང་། གཏན་འབེབས་བྱས་འདི་ནི་ཀྲུང་གོ་གོ་མིན་སྲིད་གཞུང་གི་སྔར་གྱི་ལམ་ལུགས་རྒྱུན་སྐྱོང་བྱས་པ་ཞིག་ཆགས་ཡོད།

རྒྱལ་ཁབ་མང་པོ་ཞིག་གི་སོ་སོའི་རྒྱལ་ཁབ་ཀྱི་རིག་གནས་སྣང་ཚུལ་དང་བསྟུན་ནས་དུས་ཚོད་མི་འདྲ་བར་བརྩི་སྲུང་བཞིན་བཞིན་པའང་ཡོད་དེ། དཔེར་ན། འཇར་པན་དང་ལྷོ་ཀོ་རེ་ཡས་སྤྱི་ཟླ་༥ཚེས་༥ལ་གཏན་འབེབས་དང་།  རྒྱ་གར་གྱིས་སྤྱི་ཟླ་༡༡ཚེས་༡༤ལ་གཏན་འབེབས་བྱས་ཡོད་པ་ལྟ་བུ་རེད། འོན་ཀྱང་ཨ་རིར་མཚོན་ན་ཡུན་རིང་པོའི་བར་དུ་རྒྱལ་ཡོངས་རང་བཞིན་གྱི་བྱིས་པའི་དུས་ཆེན་ཞིག་བྱུང་མེད་པར་བཤད་ཅིང་། སྤྱི་ལོ་ཉིས་སྟོང་ཐམ་པའི་ལོ་དེར་ལོ་ན་བཞི་ལ་སོན་པའི་བུ་མོ་ཞིག་གིས་སྐབས་དེའི་སྲིད་འཛིན་ལས་ཐོག་པ་ཁི་ལིན་ཊོན་ལ་ཕྲུ་གུ་ཚོར་གཏོགས་པའི་ཉིན་མོ་ཞིག་དགོས་པའི་ཞུ་ཡིག་ཕུལ་བ་ལྟར་ཁི་ལིན་ཊོན་གྱིས་ལོ་རེའི་སྤྱི་ཟླ་༡༠ཚེས་༨ཉིན་ཕྲུ་གུའི་དུས་ཆེན་དུ་ཡོངས་བསྒྲགས་བྱས་ཤིང་། སྤྱི་ལོ་༢༠༠༡ལོར་བྷུ་ཤུ་སྲིད་འཛིན་དུ་སླེབས་རྗེས་ལོ་རེའི་སཔྱི་ཟླ་༦པའི་ཚེས་༣རྒྱལ་ཡོངས་བྱིས་པའི་དུས་ཆེན་དུ་གཏན་ཁེལ་བྱས། མདོར་ན། ཉི་མ་གཅིག་དང་དུས་ཚོད་གཅིག་ལ་ཁེལ་ཡོད་མེད་ལ་མ་ལྟོས་པར་དུས་ཚོད་འདི་ནི་བྱིས་པ་རྣམ་གྱི་བདེ་ཐང་དང་འཚོ་བ། སློབ་གསོ་དང་རང་དབང་གྱི་གལ་འགང་མཚོན་པའི་ཉིན་མོ་ཞིག་ཏུ་བརྩི་དགོས་ཤིང་། མེ་ཏོག་ལྟ་བུའི་བྱིས་པ་དེ་དག་གི་ལུས་སེམས་ཀྱི་འཚར་ལོང་ཆེད་ཕ་མས་གཙོས་པའི་མིའི་རིགས་ཡོངས་རྫོགས་ཀྱིས་མཉམ་དུ་འབད་པ་བྱེད་དགོས་སོ་ཞེས་ཞུའོ།། སྤྱི་ལོ་༢༠༡༥ཟླ་༦ཚེས་༡གི་ཉིན་གུང་ཐའེ་ཝན་ཡེ་ཤེས་འཁོར་ལོ་རུ་རྫ་ཚེ་རིང་བཀྲ་ཤིས་ཀྱིས་བྲེལ་སྟབས་སུ་བྲིས།