དྷ་སར་གནམ་ཐག་བགྲོད་ལམ་བཟོ་འཆར།

རྒྱ་གར་བྱང་ཕྱོགས་ཀྱི་ས་ཁུལ་བཙན་བྱོལ་བོད་མིའི་བསྟི་གནས་དྷ་རམ་ས་ལ་ནི་ད་ལྟ་ཡུལ་སྐོར་སྤྲོ་འཆམ་མང་ཤོས་ས་ཆ་ཞིག་ཆགས་ཀྱི་ཡོད་པས། རྒྱ་གར་གཞུང་གིས་དེང་དུས་ཀྱི་གྲོང་ཁྱེར་དུ་བསྒྱུར་འཆར་བྱས་ཏེ། གནམ་ཐག་བགྲོད་ལམ་བཟོ་རྒྱུ་ཡིན་པ་རེད།

དེ་ཡང་ཟླ་འདིའི་ཚེས་༡༧ ཉིན་ཧི་མ་ཅཱལ་མངའ་སྡེའི་སྤྱི་ཆབ་བློན་ཆེན་ཝིར་བྷཌེ་རས། དྷ་ཤོད་ནས་མེག་ལོར་བར་ལ་གནམ་ཐག་བགྲོད་ལམ་གྱི་ལས་འཆར་འགོ་འཛུགས་དབུ་འབྱེད་གནང་འདུག གནམ་ཐག་དེར་རིང་ཚད་མི་ཊར་༡,༦༣༨ དང་ཐག་ལམ་སྡོད་འཁོར་༢༤ དང་། ཆུ་ཚོད་གཅིག་ནང་འགྲུལ་མི་༡༠༠༠ སྐྱེལ་འདྲེན་བྱེད་ཐུབ་པའི་ཤོང་ཚད་ཡོད་པ་བཟོ་འཆར་འདུག དེ་ཡང་བཟོ་སྐྲུན་ལས་ཁང་གིས་ལོ་གཉིས་ནང་ཚུན་ལས་འཆར་མཇུག་བསྒྲིལ་དགོས་པ་གཏན་འབེབས་བྱས་འདུག

བློན་ཆེན་གྱིས་ལས་འཆར་དེ་མཇུག་བསྒྲིལ་ཚར་རྗེས། དྷ་ཤོད་ནས་མེག་ལོར་བར་ནམ་རྒྱུན་འགྲོ་ལམ་བརྒྱུད་སྐར་མ་༤༠ འགོར་གྱི་ཡོད་ཀྱང། གནམ་ཐག་བརྒྱུད་སྐར་མ་༡༠ འགོར་རྒྱུ་ཡིན་པ། དེ་ནི་གློག་གིས་གཏོང་གི་ཡོད་པས། མཁའ་རླུང་འབག་བཙོག་བྱེད་ཀྱི་མེད་པ། དྷ་སའི་འགྲོ་ལམ་ལ་འཚང་ཁ་མི་ཡོང་བར་ཕན་ཐོགས་ཡོད་སྐོར་སོགས་འགྲེལ་བརྗོད་བྱས་འདུག

ལས་འཆར་དེར་འགྲོ་སོང་ཧིན་སྒོར་ཐེར་འབུམ་༡.༤ གཏོང་འཆར་ཡོད་པ་དང་། དྷ་སར་ཡུལ་སྐོར་སྤྲོ་འཆམ་པའི་གྲངས་ཀ་ལོ་རེ་བཞིན་མང་དུ་འགྲོ་བཞིན་ཡོད་ཁར། འགྲོ་ལམ་གཞི་རྒྱ་ཆུང་བའི་རྐྱེན། འཚང་ཁ་ཐེབས་པའི་དཀའ་ངལ་ཆེན་པོ་ཡོད་པ་རེད། དེ་བཞིན་མི་རིགས་འདྲ་མིན་མང་པོ་འཛོམས་ཀྱི་ཡོད་པས། མེག་ལོར་གྱི་ས་ཁུལ་ཁག་དང། འགྲོ་ལམ་སོགས་ལ་ཀང་རཱ་རྫོང་གིས་ཉེན་སྲུང་བརྙན་ཆས་མང་དུ་བཏང་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།