དྷ་སར་སེམས་དང་སྲོག་གི་བགྲོ་གླེང་དབུ་འཛུགས་གནང་།

ཟླ་འདིའི་ཚེས་༣༠ ཉིན་༸གོང་ས་མཆོག་དབུ་བཞུགས་ཐོག་དྷ་ས་བཞུགས་སྒར་ཕོ་བྲང་དུ་སེམས་དང་སྲོག་གི་བགྲོ་གླེང་ལྷན་ཚོགས་དབུ་འཛུགས་གནང་ཡོད་པ་དང་། ད་ཐེངས་ལྷན་ཚོགས་ཀྱི་བརྗོད་གཞི་གཙོ་བོ་བྱམས་བརྩེ་དང་། ཕན་ཚུན་འབྲེལ་བ། འགྱུར་བའི་འཕེལ་རིམ་བཅས་ཡིན་པ་རེད།

༸གོང་ས་མཆོག་གིས་ཐོག་མར་གོ་སྒྲིག་ཞུ་མཁན་ཡོངས་ལ་ཐུགས་རྗེ་ཞུ་མཛད་དེ་བཀའ་སློབ་བསྩལ་དོན། “དུས་རྒྱུན་ངོས་ཀྱིས་གཏམ་བཤད་བྱེད་སྐབས་ནཱ་ལེནྡྲ་ནས་བརྒྱུད་པའི་ནང་པའི་གཞུང་དང་། པ་ལིའི་སྲོལ་རྒྱུན་དབར་གྱི་ཁྱད་པར་དེ་པཱ་ལིའི་སྲོལ་རྒྱུན་དེ་གཙོ་བོ་སྟོན་པ་བཅོམ་ལྡན་འདས་ཀྱི་ལུང་གཙོ་བོར་བརྩི་བཞིན་ཡོད། འོན་ཀྱང་ལེགས་སྦྱར་སྐད་ཡིག་ལ་གཞི་བཅོལ་བའི་དཔལ་ནཱ་ལེནྡྲ་ནས་བརྒྱུད་པའི་ནང་པའི་གཞུང་ལུགས་ཀྱི་སྲོལ་རྒྱུན་ལམ་ལུགས་ནང་རིག་པ་གཙོ་བོར་བཟུང་ནས་སྟོན་པའི་བཀའ་ཡིན་ཡང་དེར་རྒྱུ་མཚན་ཡོད་མེད་དཔྱད་པ་བྱས་ནས་འགྲོ་བཞིན་ཡོད། དཔེར་ན་དཔལ་མགོན་འཕགས་པ་ཀླུ་སྒྲུབ་དང་ཟླ་བ་གྲགས་པ། སངས་རྒྱས་བསྐྱངས་ལ་སོགས་པའི་ནཱ་ལེནྡྲའི་མཁས་པའི་གཙུག་རྒྱན་དེ་དག་གིས་སངས་རྒྱས་ཀྱི་བཀའ་ལ་དྲང་ངེས་ཀྱི་རྣམ་གཞག་ཕྱེ་ནས་ཕེབས་ཡོད།  སྟོན་པ་བཅོམ་ལྡན་འདས་ཀྱིས་གདུལ་བྱའི་ཁམས་དང་མོས་པ། བསམ་པ་སོགས་དང་བསྟུན་ནས་དེ་དག་དང་འཚམས་པའི་ཆོས་གསུངས་པ་དང་།  དེ་ཡང་བཅོམ་ལྡན་འདས་རང་གིས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན།། ཞེས་གསུངས་ཡོད།  དེར་བརྟེན་བཅོམ་ལྡན་འདས་རང་གིས་ང་ཚོར་དཔྱད་པ་བྱ་རྒྱུའི་ཆོག་མཆན་གནང་ཡོད་”ཅེས་བཀའ་སློབ་གནང་།

༧གོང་ས་མཆོག་གིས་ཆོས་ལུགས་ཀྱི་ཕན་ནུས་སྐོར་ལ་བཀའ་སློབ་གནང་དོན། “སྤྱིར་ངོས་ཀྱིས་འཛམ་གླིང་ནང་གི་ཆོས་ལུགས་གཙོ་ཆེ་བ་ཚང་མར་གུས་པ་བྱེད་ཀྱི་ཡོད། ལོ་ངོ་སྟོང་གི་རིང་ནས་ཆོས་ལུགས་དེ་དག་གིས་མིའི་ནང་གི་གཤིས་རྒྱུས་དང་འབྲེལ་བའི་བྱམས་བརྩེའི་ནུས་པ་གོང་འཕེལ་འགྲོ་རྒྱུར་ཕན་ཐོགས་ཧ་ཅང་བྱུང་ཡོད།  ངོ་མཚར་ལྡན་པ་རེད།  སྟོན་པ་རང་ཉིད་ཀྱིས་ང་ཚོར་ཆོས་རྣམས་ཀྱི་གནས་ལུགས་ལ་རྒྱུ་མཚན་ཐོག་ནས་དཔྱད་པ་བྱེད་དགོས་པ་བཀའ་གནང་བ་རེད།  དེར་བརྟེན་ལྟ་གྲུབ་ཐོག་ནས་ནང་པའི་ལྟ་གྲུབ་དེ་ཕྲན་བུ་མི་འདྲ་བ་ཞིག་འདུག སྤྱིར་མིའི་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་ཡར་རྒྱས་ཕུལ་དུ་ཕྱིན་པ་ཞིག་ཡོང་བར་རྒྱུ་མཚན་ལམ་ནས་རྩད་གཅོད་བྱ་རྒྱུ་དེ་ཧ་ཅང་གལ་ཆེན་པོ་འདུག དེ་ལས་ཟློག་སྟེ་གང་གསུངས་པ་ཐམས་ཅད་དེ་དེ་བཞིན་ནོ་ཟེར་ནས་འགྲོ་རྒྱུ་དེ་ཡག་པོ་མེད།  དེར་བརྟེན་ཁྱེད་རང་ཚོ་གོ་སྒྲིག་ཚོགས་པའི་ལས་དོན་ལ་བསྔགས་བརྗོད་ཡོད། འདས་པའི་ལོ་ཤས་རིང་ཁྱེད་ཚོས་སེམས་དང་སྲོག་གི་བགྲོ་གླེང་གོ་སྒྲིག་གནང་བར་བརྟེན་ཚན་རིག་པ་མང་པོ་ཞིག་དང་བགྲོ་གླེང་བྱ་རྒྱུ་བྱུང་། ཧ་ཅང་ཡག་པོ་བྱུང་འདུག ཐུགས་རྗེ་ཆེ། འདིར་ངོས་ཀྱི་གྲོགས་པོ་རྙིང་པ་མང་པོ་ཞིག་མཇལ་རྒྱུ་འདུག ཁྱེད་རྣམ་སྐུ་བགྲེས་པ་མཇལ་སྐབས་ད་ཆ་ངོས་རང་ཉིད་ཀྱང་རྒས་འདུག་བསམ་པ་དྲན་གྱི་འདུག (བཞད་མོ་བཞད་) ཁ་སང་ངོས་ཀྱིས་རྒྱ་གར་བ་གྲོགས་པོ་གཅིག་ལ་བརྗོད་རྒྱུ་བྱུང་། ངོས་རང་ད་ཆ་ལུས་པོ་རྒས་ནས་པུས་མོའི་ནུས་པ་རྫོགས་སྟབས་དཀའ་ངལ་འཕྲད་བཞིན་འདུག ངོས་ཀྱི་ལུས་པོའི་ནུས་པ་ཡོངས་རྫོགས་ཀླད་པའི་ནང་ཞུགས་འདུག་ཅེས་རྩེད་མོ་དང་སྦྲགས་བརྗོད་རྒྱུ་བྱུང་། (བཞད་མོ་བཞད་) འབྱུང་འགྱུར་ལོ་ངོ་བཅུ། བཅོ་ལྔ།  མང་ན་ལོ་ཉི་ཤུའི་རིང་ངོས་རང་གྲུང་ཐག་ཆོད་བྱས་ནས་སྡོད་ཀྱི་རེད།  ལུས་པོ་འཁོར་ལོའི་རྐུབ་སྟེགས་སྟེང་གནས་ཀྱང་ཁ་བདེ་ཐག་ཆོད་བྱས་ནས་སྡོད་ཀྱི་རེད་”ཅེས་བཞད་མོ་དང་འབྲེལ་བཀའ་སློབ་གནང་།

ལས་རིམ་གཙོ་སྐྱོང་བ་ལྕམ་སྐུ་སུ་སན་གྱིས་ད་ཐེངས་སེམས་དང་སྲོག་གི་བགྲོ་གླེང་ལྷན་ཚོགས་ཀྱི་བརྗོད་གཞི་གཙོ་བོ་བྱམས་བརྩེ་དང་། ཕན་ཚུན་འབྲེལ་བ། འགྱུར་བའི་འཕེལ་རིམ་བཅས་ཡིན་སྐོར་ལྷ་སྙན་སྒྲོན་འབུལ་ཞུས་པ་དང་། དེ་ཡང་ཉིན་དང་པོའི་བགྲོ་གླེང་གནང་མཁན་ཨ་རི་ནིའུ་ཡོག་གི་སྐྱེས་དངོས་རིག་པའི་འཕེལ་རིམ་གྱི་རྣམ་གཞག་སྐོར་ལ་ཚན་རིག་པ་གྲགས་ཅན་སྐུ་ཞབས་ཌེ་ཝི་ཌི་སོ་ལོན་(David Sloan Wilson) དང་། ཨ་རིའི་དབང་རྩའི་ཚན་རིག་པ་གྲགས་ཅན་སྐུ་ཞབས་རི་ཆ་ཌི་ཌེ་ཝི་ཌི་སན་(Richard Davidson) གཉིས་ཡིན་འདུག 

ཉིན་གཉིས་པའི་བགྲོ་གླེང་དེ་ཕྱི་ཚེས་༢ རེས་གཟའ་པ་སངས་ཉིན་༸གོང་ས་མཆོག་དབུ་བཞུགས་ཐོག་མཛད་རྒྱུ་དང་། སྐབས་དེར་བགྲོ་གླེང་གནང་མཁན་ལྷོ་ཨ་ཕི་རི་ཀའི་སི་ཊེན་ལེན་བྷོག་མཐོ་སློབ་ཀྱི་སེམས་ནད་བཅོས་ཐབས་ཐོག་མཁས་པ་ལྕམ་སྐུ་(Pumla GobodoMadikizela) དང་། ལས་རིམ་གཙོ་སྐྱོང་བ་སྐུ་ཞབས་ཨེ་རོན་སི་ཊན་(Aaron Stern) ཡིན་འདུག །

གསར་འགོད་པ་ཆོས་ཉིད་འོད་ཟེར།