ནིའུ་ཡོག་དང་ནིའུ་འཇར་སི་གསུམ་དུས་གོ་སྒྲིག་ཚོགས་ཆུང་གི་གསར་འགོད་གསལ་བསྒྲགས

ཆེད་ཞུ། འདི་ལོ་གསུམ་བཅུའི་དུས་དྲན་ཐེངས་ ༥༦ པར། འདི་ག་ནིའུ་ཡོག་དང་ནིའུ་འཇར་སིའི་མི་མང་རྣམས་མཉམ་འབྲེལ་རྒྱལ་ཚོགས་ཀྱི་ལས་ཁང་དང་། རྒྱ་ནག་གཞུང་ཚབ་ཁང་གི་མདུན་སོ་སོར་བོད་ནང་གི་ད་ལྟའི་དངོས་ཡོད་དཀའ་སྡུག་རྣམས་ཞུ་འབོད་ཆེད་གོམ་བགྲོད་བྱེད་སྐབས་ནང་ཁུལ་རྩོད་གླེང་ཕྲན་བུ་ཕྲན་བུ་བྱུང་བར་རང་བཞིན་དྲང་པོར་བཞུགས་པའི་མི་མང་རྣམས་རྒྱུ་མཚན་ཅི་ཡིན་མ་མཁྱེན་པར་ཐུགས་དོགས་བྱུང་བ་དང་། སྐབས་འཚོལ་རིང་ལུགས་པ་མིང་ངོ་མ་སྨོས་དང་མ་སྨོས་པ་ཅི་རིགས་ནས་འགན་འཁུར་གང་ཡང་མི་དགོས་པར་སྒྲོ་བཏགས་ལོག་བཤད་སྤེལ་བ་ལ་བསྒུགས་ཏེ་སྡོད་མཁན་ཉུང་ཤས་ཡོད་པ་རྣམས་ལ་ཡང་སྒྲོ་བཏགས་ལོག་བཤད་སྤེལ་རྒྱུའི་གོ་སྐབས་ཐོབ་པར། ལོ་རྒྱུས་དོན་གྱིས་མ་བཤད་ན། །ཡིད་མི་ཆེས་པའི་སྐྱོན་དུ་གྱུར། །ཅེས་གསུངས་པ་ལྟར་གཞི་རྩའི་གནས་ལུགས་རྒྱུ་མཚན་ཇི་བཞིན་མ་ཤེས་པར་བརྙན་པར་ཙམ་དང་། ལོག་བཤད་སྤེལ་མཁན་རྣམས་ཀྱི་བརྗོད་བབས་ཙམ་ལ་བལྟས་ན་ཐེ་མི་ཚོམ་པའི་ངེས་པ་མེད་སྟབས་གསལ་བཤད་སྙིང་བསྡུས་ཤིག་ཞུ་རྒྱུར། དེ་ཡང་འདི་ག་ཨ་རིའི་གྲོང་ཁྱེར་ནིའུ་ཡོག་དང་ནིའུ་འཇར་སི་ཁུལ་ལོ་ཤས་སྔོན་ནས་བོད་མིའི་རང་དབང་སྒེར་ལངས་ཀྱི་ཉིན་མོ་དྲན་གསོ་ཞུ་བའི་མཛད་སྒོར་ཁྲོམ་སྐོར་རུ་སྒྲིག་གི་འབོད་སྒྲ་དང་། སྡིངས་ཆའི་སྟེང་གི་གཏམ་བཤད་སོགས་གཅིག་མཚུངས་ཞིག་མ་བྱུང་བར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། དབུས་བོད་མིའི་སྒྲིག་འཛུགས་ཀྱི་བཞེངས་ཕྱོགས་དང་མཐུན་མིན། རྒྱ་རིགས་མི་མང་མང་པོ་ཞིག་ལ་ཕོག་ཐུག་འགྲོ་གཞི་སོགས་ཅི་རིགས་ཤིག་བྱུང་བ་འདི་ཐད། ད་ལམ་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པ་དང་། ས་གནས་བོད་ཀྱི་གཞོན་ནུ་ལྷན་ཚོགས། ས་གནས་བོད་ཀྱི་བུད་མེད་ལྷན་ཚོགས། ས་གནས་མདོ་ཁམས་ཆུ་བཞི་སྒང་དྲུག་ཨ་བོད་མཛའ་འབྲེལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཚོགས་པ་དྲུག་ཚོགས་འཇོམས་གོ་བསྡུར་ཀྱིས་ཐག་ཆོད་གཏན་འབེབས་བྱུང་བའི་སྙིང་པོར། ད་ནས་བཟུང་གསུམ་བཅུའི་དུས་དྲན་ཏེ་བོད་མིའི་རང་དབང་སྒེར་ལངས་ཀྱི་ཉིན་མོ་བསྲུང་བརྩི་ཞུ་རྒྱུའི་འགན་འཁུར་རྐང་ལེན་བོད་རིགས་སྤྱི་མཐུན་ཚོགས་པ་ནས་ཞུ་རྒྱུ་དང་། དུས་དྲན་བསྲུང་བརྩི་ཞུ་བའི་ངོ་བོ་གཞུང་འབྲེལ་མཛད་སྒོ་ཡིན་པ། གཞུང་འབྲེལ་མཛད་སྒོ་ཡིན་པ་གཞིར་བཞག་གིས་འབོད་སྒྲ་གཅིག་གྱུར་གཏན་འབེབས་བྱ་རྒྱུ། ཡུལ་ཁྲིམས་དང་མི་འགལ་བ་དང་། ཆེ་མཐོང་ལྡན་པའི་ངང་སྲུང་བརྩི་ཞུ་རྒྱུའི་གོ་སྒྲིག་ཚོགས་པ་དྲུག་མཉམ་རུབ་ཀྱིས་བྱ་རྒྱུ་དང་། དམིགས་བསལ་སྐུ་མགྲོན་དུ་གཞུང་འབྲེལ་མི་སྣ་ཆེད་དུ་གདན་ཞུ་འབུལ་རྒྱུ་དང་།་བཀའ་སློབ་གསུང་བཤད་གནང་མཁན་དང་། དམིགས་བསལ་སྐུ་མགྲོན་སུ་དང་སུ་གདན་ཞུ་དགོས་མིན་ཚོགས་གཙོ་དྲུག་ནས་ཐག་གཅོད་གཏན་འབེབས་བྱ་རྒྱུ་སོགས་ཕྱི་ལོ་ ༢༠༡༥ ཟླ་ ༡ ཚེས་ ༡༢ ཉིན་གྲོས་ཆོད་དོན་ཚན་གསུམ་ཅན་སྤྱི་མོས་ཐོག་ནས་བཞག་(པའི་གྲོས་ཆོད་ངོ་མ་ཟུར་སྦྱར་ཡོད་པ་ནས་མཁྱེན་པ་གནང་དགོས།) པ་ལྟར་ཚོགས་གཙོ་དྲུག་ནས་གསུམ་དུས་ཀྱི་འབོད་ཚིག་གཏན་འབེབས་ཞུས་པ་གཤམ་གསལ།

༡། ༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཁྲི་ལོར་བརྟན་པར་ཤོག

༢། པཎ་ཆེན་རིན་པོ་ཆེ་མཆོག་སྐུ་ཚེ་ཁྲི་ལོར་བརྟན་པར་ཤོག

༣། བོད་ནང་འགྲོ་བ་མིའི་ཐོབ་ཐང་དགོས།

༤། གཞིས་བྱེས་བོད་མི་ ༡༤༣ ནས་བོད་བསྟན་སྲིད་མི་རིགས་ཆེད་གཅེས་པའི་རང་ལུས་མེ་མཆོད་ཕུལ་སོང་། དེ་ལས་མང་དུ་མི་འགྲོ་བའི་འགན་འཁུར་རྒྱ་གཞུང་ནས་ལེན་དགོས།

༥། པཎ་ཆེན་དགེ་འདུན་ཆོས་ཀྱི་ཉི་མས་དབུས་ཆབ་སྲིད་བཙོན་པ་ཡོངས་རྫོགས་འཕྲལ་དུ་གློད་གྲོལ་གཏོང་དགོས།

༦། ཞི་ཅི་ཕིན་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་མོལ་ཞུ་དགོས།

༧། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་ཕེབས་འཇུག་དགོས།

༨། བོད་ནང་གསར་འགོད་རང་དབང་དགོས།

༩། བོད་ནང་སྨྲ་བརྗོད་རང་དབང་དགོས།

༡༠། བོད་ལ་མིང་དོན་མཚུངས་པའི་རང་སྐྱོང་དགོས།

༡༡། མཉམ་འབྲེལ་རྒྱལ་ཚོགས། བོད་དོན་གླེང་སློང་དགོས།

ཞེས་སྤྱི་མོས་ཐོག་ནས་གཏན་འབེབས་ཞུས། དེ་ནས་ཕྱི་ལོ་ ༢༠༡༥ ཟླ་ ༡ཚེས་༡༦ ཉིན་དགོང་དྲོ་ཨ་བོད་མཛའ་འབྲེལ་ཚོགས་པའི་ཚོགས་གཙོ་ཕེབས་མ་ཐུབ་པ་མ་གཏོགས་ཚོགས་པ་གཞན་ལྔ་ཡི་ཚོགས་གཙོ་རྣམས་ཚོགས་འཛོམས་ཀྱིས་གསུམ་བཅུའི་དུས་དྲན་གོ་སྒྲིག་ཞུ་ཕྱོགས་གོ་བསྡུར་སྐབས། དོན་ཚན་གཞན་ཁག་མང་ཆེ་བ་སྤྱི་མོས་བྱུང་ཡང་གཏམ་བཤད་གནང་མཁན་སྐུ་མགྲོན་གདན་ཞུའི་ཐད། བོད་རང་བཙན་སློབ་ཕྲུག་ཚོགས་པའི་ཚོགས་གཙོ་བསྟན་འཛིན་སྒྲོལ་དཀར་ནས་གཏམ་བཤད་གནང་མཁན་ཁོངས་རང་གི་འདོད་པ་ཡོད་པའི་མི་འགྲོ་ཆ་ཚང་མ་སླེབས་སྟབས་གྲོས་ཆོད་ལ་འགྱུར་བ་གཏོང་གི་ཡོད་ལུགས་སོགས་མང་དག་ཅིག་བཤད་དེ་མཐའ་དོན། གཅིག་བྱས་ན་ང་ཚོ་ཚོགས་པ་གཉིས་ཕྱིར་འཐེན་བྱ་དགོས་ཆགས་ས་རེད། འོན་ཀྱང་ཨ་བོད་མཛའ་འབྲེལ་ཚོགས་པའི་ཚོགས་གཙོར་གོ་བསྡུར་གྱིས་ཇི་བྱེད་ལན་གསལ་རྗེས་སུ་བྱེད་ཀྱི་ཡིན་ཞེས་བརྗོད་དེ་ཚོགས་འདུ་ནས་ཕྱིར་ཐོན་སོང་ཞིང་། ཕྱི་ཚེས་ ༢༠ ཉིན་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་བསྟན་འཛིན་སྒྲོལ་དཀར་ནས་ང་ཚོ་ཚོགས་པ་གཉིས་གསུམ་དུས་གོ་སྒྲིག་ཆོགས་ཆུང་ནང་མཉམ་ཞུགས་བྱེད་པ་ལ་དོན་གནད་ཐག་གཅོད་སྐབས་སྤྱི་མོས་བྱུང་ན་རབས་དང་མ་བྱུང་ཚེ་མང་མོས་མི་དགོས་པར་ཚོགས་པ་གཅིག་གིས་འོས་སྦྱོར་བྱུང་ན་དམིགས་བསལ་གཏོང་དགོས་པ། དེ་ཡང་མ་བྱུང་ཚེ་ང་ཚོ་ཚོགས་པ་གཉིས་གསུམ་དུས་གོ་སྒྲིག་ཆོགས་ཆུང་ནང་མཉམ་ཞུགས་མི་དགོས་པའི་ཡི་གེ་སྤྲོད་དགོས་ཞེས་སོགས་དོན་ཚན་གསུམ་ཅན་གྱི་དབྱིན་ཡིག་རིང་པོ་ཞིག་དྲྭ་གནས་བརྒྱུད་འབྱོར་བར་ཡིག་ཐོག་ནས་ལན་འདེབས་བྱེད་ཀྱིན་བསྡད་ཚེ་གསུམ་དུས་ཆོག་མཆན་ཞུ་རྒྱུ་སོགས་ལས་དོན་གལ་ཆེ་མང་པོ་དུས་བཏུགས་ལ་བརྟེན་ངོ་ཐུག་ཚོགས་འཛོམས་ཀྱིས་ལེགས་ལམ་ཆེ་བའི་ཐག་གཅོད་གཅིག་འབྱུང་དུ་རེ་ནས་ཕྱི་ལོ་ ༢༠༡༥ ཟླ་༡ ཚེས་ ༢༢ དགོང་དྲོ་གསུམ་དུས་གོ་སྒྲིག་ཚོགས་ཆུང་གི་ཚོགས་གཙོ་དྲུག་ཛ་དྲག་ཚོགས་འཛོམས་གནང་བར་ཚོགས་འདུར་ངོ་ཕེབས་ཡོད་པ།ང་ཚོ་ཚོགས་པ་བཞི་ཡི་ཚོགས་གཙོ་བཞི་དང་། བོད་རང་བཙན་སློབ་ཕྲུག་ཚོགས་པའི་ཚོགས་གཙོ་བསྟན་འཛིན་སྒྲོལ་དཀར། བོད་རང་བཙན་སློབ་སློབ་ཕྲུག་ཚོགས་པའི་ཚོགས་མི་ཚེ་དཔའ། ཨ་བོད་མཛའ་འབྲེལ་ཚོགས་པའི་ཚོགས་གཙོའི་ཚབ་ཡིན་ཟེར་བ་ཐུབ་བསྟན་ནོར་བཟང་ཟེར་བ་བཅས་ངོ་འཛོམས་ཀྱིས་ཕན་ཚུན་སྦྱང་བཤད་བགྱིས་པར། བོད་རང་བཙན་སློབ་ཕྲུག་ཚོགས་པའི་ཕྱོགས་ནས་གདམ་ག་དོན་ཚན་གསུམ་ཅན་ནས་གང་ཡང་རུང་བ་ཞིག་ཁས་ལེན་དགོས་སྐོར་བསྐྱར་ནན་ཡང་ནན་དང་།  ལྷག་པར་གཏམ་བཤད་གནང་མཁན་མི་འགྲོ་མང་མོས་མ་ཡིན་པར་ཚོགས་པ་གཅིག་ནས་འོས་སྦྱོར་བྱུང་ཚེ་དམིགས་བསལ་དགོས་སྐོར་སོགས་ནན་བརྗོད་བྱས་པར་མང་གཙོའི་འགྲོ་ལུགས་དང་མཐུན་གྱི་མེད་པ་མ་ཟད། གོང་དུ་ཚོགས་པ་དྲུག་གིས་གཏན་ལ་ཕབ་པའི་གྲོས་ཆོད་དང་ཡང་འགལ་གྱི་ཡོད་སྟབས་ང་ཚོ་ཚོགས་གཙོ་གཞན་དག་བཞིའི་ངོས་ནས་ཁས་ལེན་བྱེད་ཐབས་མ་ཤེས་སྟབས། ཁོང་ཚོ་གསུམ་ཁ་གཅིག་གྲགས་ཀྱིས་བརྗོད་དོན་སྙིང་པོར། ལས་དོན་བྱ་ཕྱོགས་ཚང་མར་དམིགས་བསལ་གཅིག་ཀྱང་མེད་པར་ཚང་མ་མང་མོས་དགོས་ཀྱི་ཡོད་ན་ང་ཚོར་རེ་བ་མེད་པ་གསལ་པོ་ཤེས་ཀྱི་འདུག་ང་ཚོ་བོད་རང་བཙན་སློབ་ཕྲུག་ཚོགས་པ་དང་། ཨ་བོད་མཛའ་འབྲེལ་ཚོགས་པ་གཉིས་གསུམ་བཅུའི་དུས་དྲན་གོ་སྒྲིག་ཚོགས་ཆུང་ནས་ཕྱིར་འཐེནབྱེད་ཀྱི་ཡིན།ཞེས་ཚིག་ཐག་ཆོད་པོས་བརྗོད་པར་ཡང་། ཚོགས་པ་གཞན་བཞིའི་ངོས་ནས་རྩ་བའི་ཕྱི་ཟླ་ ༡ཚེས་ ༡༢ ལ་བཞག་པའི་ཚོགས་གཙོ་དྲུག་གི་གྲོས་ཆོད་ལ་བརྩི་བཀུར་ཞུ་ཡི་ཡོད་ན་དོན་གནད་ཆུང་ཚགས་ཤིག་ལ་བརྟེན་ནས་ཁྱེད་ཅག་ཚོགས་པ་གཉིས་ཚོགས་པ་དྲུག་གི་ཁོངས་ནས་ཕྱིར་འཐེན་གནང་མ་དགོས་ན་རང་རེའི་ཆིག་སྒྲིལ་གྱི་ནུས་པ་ཉམས་དམས་སུ་མི་འགྲོ་བ་དང་། དགྲ་དགའ་གཉེན་སྡུག་མི་འབྱུང་བའི་དགེ་མཚན་ཆེ་ལུགས་སོགས་འབོད་བསྐུལ་ནན་ཏན་ཆེན་པོས་ཞུས་ཀྱང་ཉན་འཇོག་མ་བྱས་པར། སང་ཉིན་རང་མཉམ་ཞུགས་མི་བྱེད་པའི་རྒྱུ་མཚན་ད་ལྟ་བརྗོད་པ་ལྟར་ཡིག་ཐོག་བཀོད་དེ་སྤྲོད་རྒྱུ་ཡིན་ཞེས་རྣམ་འགྱུར་དྲག་པོ་སྟོན་བཞིན་པར་ཚོགས་འདུ་ནས་ཕྱིར་ཐོན་གནང་སོང་བར་བློ་ཕམ་ཆེ་ཡང་བྱ་ཐབས་གཞན་མ་བྱུང་ཡང་།དེ་སྔོན་ཚོགས་པ་དྲུག་

གིས་སྤྱི་མོས་ཐག་གཅོད་བྱུང་བ་བཞིན་གསུམ་བཅུའི་དུས་དྲན་གཞུང་འབྲེལ་གྱི་ངོ་བོའི་ཐོག་ནས་བསྲུང་བརྩི་ཞུ་རྒྱུ་དང།བརྗོད་ཚིག་ཀྱང་ཚོགས་པ་དྲུག་གི་ཚོགས་གཙོ་དྲུག་གིས་གཏན་འབེབས་བྱས་པར་འགྱུར་བ་གང་ཡང་མ་བཏང་བར་རང་འཇགས་ཐོག་འབོད་བསྐུལ་གསལ་བསྒྲགས་ནང་། དབུས་བོད་མིའི་སྒྲིག་འཛུགས་ཀྱི་ལམ་སྟོན་ལྟར་ལས་འགུལ་ཡུལ་ཁྲིམས་དང་མཐུན་པ། ཆེ་མཐོང་དང་ལྡན་པ་འབྱུང་ཐབས་སུ་ཚང་མས་ངག་གི་སྐད་འབོད་ཞི་འཇམ་དང་། ལུས་ཀྱི་སྤྱོད་ལམ་ཞི་དུལ་བག་ཡོད་ཐོག་ནས་དགོས་འདུན་བརྗོད་ཚིག་རྣམས་སྒྲ་དག་གསལ་གསུམ་གཞན་གྱི་ཡིད་ལ་འཇུག་པ་ཞིག་ཡོང་ཐབས་ལ་སྒོ་ཀུན་ནས་འབད་འབུངས་ཡོང་བ་དང་། འདི་ག་གསུམ་དུས་གོ་སྒྲིག་ཚོགས་ཆུང་གིས་གཏན་འབེབས་གོ་སྒྲིག་ཞུས་པའི་བརྗོད་ཚིག་དང་མི་མཐུན་པའི་འཕྲེད་དར་དང་། དར་ཆ། སྦྱར་པང་གི་རིགས་མི་སྒེར་རམ། ཚོགས་པ་སྐྱིད་སྡུག་སུ་འདྲ་ཞིག་ནས་ཀྱང་མཉམ་འཁྱེར་མི་དགོས་པའི་འབོད་བསྐུལ་ནན་ཏན་ཞུ་རྒྱུ་དང་། མདོར་ན། དེ་ཉིན་རང་ཅག་ནིའུ་ཡོག་དང་ནིའུ་འཇར་སི་ཁུལ་གྱི་བོད་རིགས་སེར་སྐྱ་རྒན་གཞོན་ཡོངས་རྫོགས་འབོད་སྒྲ་གཅིག་དང་རྣམ་འགྱུར་གཅིག་གི་ཐོག་ནས་མཉམ་བསྐྱོད་ཐུབ་ཐབས་ལ་ཚང་མས་ཐུགས་འཁུར་ཆེ་བཞེས་ཡོང་བའི་འབོད་སྐུལ་ཞུས་པ་ལས་མི་སུ་འདྲ་ཞིག་ཡིན་ཀྱང་། ཟུར་དུ་བོད་རང་བཙན་རྩོད་མི་ཆོག་དང་། རང་བཙན་གྱི་འཕྲེད་དར་འཕྱར་མི་ཆོག་ཅེས་ནམ་ཡང་ཞུས་མེད།འོན་ཀྱང་ཁོང་ཚོས་ང་ཚོ་གསུམ་དུས་གོ་སྒྲིག་བྱེད་བཞིན་པའི་ཚོགས་པ་བཞི་ཡི་མིང་ཐོག་ནས་གསལ་བསྒྲགས་བྱས་པའི་འཕྲེད་དར་སོགས་ཀྱི་པར་རིས་ཀྱི་བརྗོད་ཚིག་རྣམས་བསུབས་ཏེ་ཁོང་ཚོའི་རང་འདོད་ལྟར་གྱི་བརྗོད་ཚིག་འདྲ་མིན་གང་བྱུང་བྲིས་ཏེ་ང་ཚོའི་ངོ་དེབ་ནང་བཀྲམས་པ་དང་། ཕྱི་ཟླ་ ༣ ཚེས་ ༨ ཉིན་ཚེ་བརྟན་ལྷ་རྒྱལ་ཟེར་བ་དང་། ཐུབ་བསྟན་ནོར་བཟང་། མགོན་པོ། བསྟན་འཛིན་དབང་སྡུད། བློ་དགའ་ཟེར་བ་སོགས་མི་དྲུག་བདུན་ཞིག་ཚོགས་འདུ་འཚོགས་ཏེ་ང་ཚོ་ཚོགས་པ་བཞིའི་འགོ་འཁྲིད་པའི་ལས་འགུལ་ལ་སྐྱོན་བརྗོད་ཀྱི་གཏམ་བཤད་བརྙན་པར་བརྒྱབ་སྟེ་དྲྭ་རྒྱ་བརྒྱུད་ཁྱབ་བསྒྲགས་བྱས་པ། གསུམ་བཅུའི་དུས་དྲན་དངོས་གཞི་ཉིན་བོད་རྒྱལ་ཡོངས་རང་བཙན་ལྷན་ཚོགས་ཟེར་བ་སོགས་ནས་འཕྲེད་དར་དང་སྦྱར་པང་འདྲ་མིན་འཁྱེར་བའི་མི་བཅུ་གྲངས་ཤིག་ནས་སྐད་འབོད་འདྲ་མིན་རྒྱག་བཞིན་པར་ང་ཚོ་མི་མང་བྱིང་དང་མཉམ་འཛུལ་གྱིས་ཞི་འཇམ་བག་ཡོད་ངང་བསྐྱོད་བཞིན་པའི་མི་མང་ལ་ཁོང་ཁྲོ་སློང་ཐབས་དང་། ཟང་ཟིང་བཟོ་ཐབས་བྱས་པར། འབྲེལ་ཡོད་འགན་འཁུར་ལས་བྱེད་ཚོས་ཁྱེད་རང་ཚོ་གསུམ་བཅུའི་དུས་དྲན་བསྲུང་བརྩི་ཞུ་བར་ཡོང་བར་དགའ་བསུ་ཡོད། ལྷག་པར་ཚོགས་པ་བཞི་ཡིས་གོ་སྒྲིག་བྱས་པའི་གོམ་བགྲོད་འདིར་མཉམ་ཞུགས་གནང་འདོད་ཡོད་ཚེ་དེ་བས་དགའ་བསུ་ཡོད།  འོན་ཀྱང་ང་ཚོའི་གསལ་བསྒྲགས་སྔོན་སོང་ལྟར་ཚོགས་པ་དྲུག་གིས་གཏན་འབེབས་བྱས་པའི་འབོད་ཚིག་དང་། འཕྲེད་དར་ལས་གཞན་པའི་འཕྲེད་དར་སོགས་ཁྱེར་མ་ཡོང་རོགས། གལ་ཏེ་དེ་ལྟར་བྱས་ན་ང་ཚོས་ཁ་ནས་བརྗོད་ཡག་དང་། བྱ་སྤྱོད་ངོ་མའི་ཐོག་ནས་བྱེད་ཡག་གཉིས་མི་མཚུངས་པར་གྱུར་པ་མ་ཟད། སེམས་ཤུགས་མེ་ལྟར་འབར་བའི་མི་མང་ནང་དཀྲོག་རྐྱེན་དུ་འགྲོ་ཡི་འདུག་པས་དེ་ལྟར་མ་བྱེད་རོགས་ཞེས་སོགས་དགེ་སྐྱོན་གསལ་བཤད་དང་། འབོད་བསྐུལ་ཡང་ཡང་བྱས་པར་ཉན་འཇོག་ལྟ་ཅི། ང་ཚོ་ཡོང་མི་ཆོག་པ་ག་རེ་ཡིན་ནམ།ང་ཚོ་བོད་མི་མ་རེད་དམ། ཟེར་བ་སོགས་ཚིག་ངན་སྣ་ཚོགས་བརྗོད་པ། གསུམ་དུས་གོ་སྒྲིག་ཚོགས་ཆུང་གི་ཚོགས་མི་འགན་ཡོད་རྣམས་གར་འགྲོའི་སར་རྗེས་འདེད་ཀྱིས་ཚིག་ངན་སྣ་ཚོགས་བརྗོད་དེ་སྔོན་ཚུད་ནས་གྲྭ་སྒྲིག་ཡོད་པའི་དཔར་པས་ཁོ་པ་ཚོའི་སྤྱོད་ངན་མི་གསལ་བར་སྦས་ཏེ། ང་ཚོའི་གདོང་ལ་བལྟད་དེ་ནང་ཁུལ་ལབ་རེས་ཕྲན་བུ་བྱུང་བ་ཚུན་ཆད་དྲྭ་ཐོག་རྒྱང་བསྲིང་བྱས་ཏེ། སྔོ་ལོ་ལངས་ནས་འཕྱར་ཐབས་དང་། གཞིས་བྱེས་མི་མང་ཡོངས་རྫོགས་ཐུགས་ཕམ་འགྲོ་གཞི་བཟོས་པ་སོགས་བྱུང་སོང་བར་སེམས་ཕམ་ཤིན་ཏུ་ཆེན་པོ་བྱུང་བ་བཅས་ཀྱི་གསལ་བཤད་འདིས། སུ་བདེན་སུ་མི་བདེན་ནམ། ཡང་སྙིང་ནོར་འཁྲུལ་སུ་ཡིན་མིན་རྒྱ་ཆེའི་མི་མང་ནས་དབྱེ་ཞིབ་ཡོང་བའི་རེ་བ་ཡོད། མཐའ་དོན་ད་ལམ་བོད་རང་བཙན་སློབ་ཕྲུག་ཚོགས་པ་དང་། བོད་རྒྱལ་ཡོངས་རང་

བཙན་ལྷན་ཚོགས་ཟེར་བ་སོགས་ཀྱི་ཚོགས་མི་ཡིན་ཟེར་བ་མིང་རྒྱབ་ཁུར་བ་འགའ་ཞིག་གིས་ཆེད་མངགས་བཟོས་པ་ཞིག་ལས། ང་ཚོ་ནིའུ་ཡོག་དང་ནིའུ་འཇར་སི་ཁུལ་གྱི་སེར་སྐྱ་མི་མང་བརྒྱ་ཆ་དགུ་བཅུ་གོ་དགུ་མཐུན་ལམ་རྡོག་རྩ་ཆིག་སྒྲིལ་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་དང་། དབུས་བོད་མིའི་སྒྲིག་འཛུགས་ཀྱི་ཆབ་སྲིད་ལམ་སྟོན་འོག་ཤར་བསྐྱོད་བྱེད་མཁན་ཤ་དག་ཡིན་པས་བོད་མི་སྤྱི་དང་། ལྷག་པར་གཞིས་བཞུགས་རྒྱ་ཆེའི་མི་མང་རྣམས་ཐུགས་ཁྲལ་རྩ་བ་ནས་གནང་མི་དགོས་ཞེས་གོ་སྐབས་འདི་བརྒྱུད་ནས་སྙན་གསན་ཞུ་རྒྱུ་བཅས་ཚོགས་པ་བཞི་མཐུན་མོང་ནས།།

ཕྱི་ལོ་ ༢༠༡༥ ཟླ་ ༣ ཚེས་ ༢༤ ལ།། །།