ནེ་རུ་གཙུག་ལག་སློབ་ཁང་དུ་བོད་པའི་སློབ་མ་རྣམས་ཀྱི་སློབ་ཡོན་རྒྱ་གར་སློབ་མ་དང་གཅིག་མཚུངས་བཟོས་འདུག 

རྒྱ་གར་ནང་གི་གཙུག་ལག་སློབ་ཁང་མང་པོ་ཞིག་གིས་བཙན་བྱོལ་བོད་མིའི་སློབ་མ་རྣམས་ལ། རྒྱ་གར་གྱི་མི་སེར་ཡིན་པའི་སློབ་མ་རྣམས་དང་གཅིག་མཚུངས་ཀྱི་སློབ་ཡོན་ལེན་གྱི་ཡོད་ཀྱང་། སྙན་གྲགས་ཆེ་བའི་ནེ་རུ་གཙུག་ལག་སློབ་ཁང་གིས་ཕྱི་ལོ་༢༠༡༩ ལོ་ནས་བོད་མའི་སློབ་མ་ཚོར་ཕྱི་རྒྱལ་སློབ་མ་དང་གཅིག་མཚུངས་ཀྱི་སློབ་ཡོན་ལེན་འགོ་བཙུགས་ནས་དཀའ་ངལ་ཆེན་པོ་འཕྲད་ཡོད་ཁར། སློབ་ཞུགས་བྱེད་མཁན་སློབ་མ་ཡང་ཉུང་དུ་ཕྱིན་ཡོད་པ་རེད་དེ། ཉེ་ཆར་གཙུག་ལག་སློབ་ཁང་དེས་བོད་མིའི་སློབ་མ་རྣམས་ཀྱི་སློབ་ཡོན་བསྐྱར་དུ་ཆག་ཡང་བཏང་ནས་རྒྱ་གར་སློབ་མ་དང་གཅིག་མཚུངས་སྤྲོད་དགོས་པའི་གསལ་བསྒྲགས་སྤེལ་འདུག 

དེ་ཡང་ཟླ་༧ པའི་ཚེས་༡ ཉིན་ནེ་རུ་གཙུག་ལག་སློབ་ཁང་གི་སློབ་འཇུག་ལས་ཁང་ནས་གསལ་བསྒྲགས་ཤིག་སྤེལ་ཏེ། སློབ་དུས་ཕྱི་ལོ་༢༠༢༢ ནས་༢༠༢༣ བར་ནེ་རུ་གཙུག་ལག་སློབ་ཁང་དུ་སློབ་འཇུག་བྱས་པའི་བོད་མིའི་སློབ་མ་ཚོས། རྒྱ་གར་གྱི་སློབ་མ་ཁག་དང་གཅིག་མཚུངས་ཀྱི་སློབ་ཡོན་སྤྲོད་དགོས་པའི་ཐག་གཅོད་བྱུང་ཡོད་སྐོར་བརྗོད་འདུག་པ་དང་། གནས་ཚུལ་དེར་དྲ་ལམ་ཁག་ཏུ་དགའ་བསུ་ཞུ་མཁན་མང་པོ་འདུག 

ཕྱི་ལོ་༢༠༡༩ ལོར་ནེ་རུ་གཙུག་ལག་སློབ་ཁང་དུ་བཙན་བྱོལ་བོད་པའི་སློབ་མ་༤༢ ཞིག་གིས་ཚུད་རྒྱུགས་བརྒྱ་ཆ་ལོན་ཡོད་འདུག་ཀྱང་། སྐབས་དེར་དེ་སྔོན་དང་མི་འདྲ་བར་བོད་པའི་སློབ་མ་རྣམས་ལ། སློབ་ཡོན་དེ་ཕྱི་རྒྱལ་སློབ་མ་དང་གཅིག་མཚུངས་ལེན་རྒྱུ་ཐག་གཅོད་བྱས་ཡོད་འདུག དེ་ཡང་འབྱུང་རིག་སློབ་མ་རྣམས་ལ་ལོ་རེར་སྡོད་ཁང་དང་ཁ་ལག་མ་ཚུད་པའི་སློབ་ཡོན་ཨ་སྒོར་༢༠༠ ནས་༢༤༠༠ ལ་སྤར་འདུག་པ་དང་། ཚན་རིག་སློབ་མ་རྣམས་ལ་ཨ་སྒོར་༢༠༠ ནས་༣༤༠༠ ལ་སྤར་ཡོད་འདུག་པས། སྤར་ཆའི་བརྒྱ་ཆ་ནི་༡༠༠༠ ལྷག་ཡིན་འདུག་ཁར། ཧིན་སྒོར་ལ་བསྒྱུར་ན་འབྱུང་རིག་སློབ་མར་འབུམ་གཉིས་མ་ཟིན་ཙམ་དང་།  ཚན་རིག་སློབ་མར་ཧིན་སྒོར་འབུམ་གཉིས་དང་ཁྲི་དྲུག་ཙམ་ཡིན་འདུག་པས། ལོ་དེར་ཚུད་རྒྱུགས་ལོན་པའི་སློབ་མ་༤༢ ནས་༣༢ སློབ་ཡོན་མཐོ་དྲགས་པའི་རྐྱེན་གྱིས་སློབ་ཞུགས་བྱས་མེད་འདུག སློབ་མ་ལྷག་མ་༡༠ ཡིས་གནད་དོན་དེ་སེལ་བའི་རེ་བ་བཅང་ནས་སློབ་ཞུགས་བྱས་འདུག་ཀྱང་། གནད་དོན་སེལ་ཐུབ་མེད་པས་སློབ་མ་༣ ལོ་ཕྱེད་རྗེས་སློབ་མཚམས་འཇོག་དགོས་འཁེལ་ཡོད་འདུག སྐབས་དེར་ནེ་རུ་གཙུག་ལག་སློབ་ཁང་གི་འཛིན་སྐྱོང་དང་། དབུས་གཞུང་གི་(Human Resource Development) བློན་ཆེན་ལས་ཁང་ལ། ལྡི་ལིའི་སྐུ་ཚབ་དོན་གཅོད། བོད་མིའི་སྒྲིག་འཛུགས། དེ་བཞིན་ཤུགས་རྐྱེན་ཡོད་པའི་བོད་མི་ཁག་ཅིག་སོགས་ཀྱིས་གནད་དོན་དེའི་ཐོག་ཞུ་གཏུག་བྱས་ཡོད་པ་དང་། དེ་བཞིན་བཙན་བྱོལ་བོད་མིའི་གྲོས་ཚོགས་ནང་དུ་ཡང་གནད་དོན་དེའི་ཐོག་གླེང་སློང་བྱུང་ཡོད་པ་རེད་དེ། དཀའ་ངལ་སེལ་ཐུབ་མེད་པ་རེད་འདུག 

འདི་ལོའི་ཟླ་༤ པའི་ཚེས་༢༨ ཉིན་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་གཉིས་ནས། ནེ་རུ་གཙུག་ལག་སློབ་ཁང་གི་ཉེ་བའི་རིགས་བདག་ལྕམ་སན་ཏི་ཤྲི་ཌི་པན་ཌིཏ་དང་ཐུག་འཕྲད་ཀྱིས། བར་ལམ་བོད་ཕྲུག་སློབ་མ་ཚོར་མཐོ་སློབ་དེར་སློབ་འཇུག་ཞུས་སྐབས་སློབ་ཡོན་ཆེན་པོ་འབུལ་མ་ཐུབ་པའི་དཀའ་ངལ་འཕྲད་བཞིན་པའི་སྐོར་ཞུས་ཡོད་འདུག དེ་བཞིན་ཐུག་འཕྲད་དེར་མཉམ་ཞུགས་གནང་མཁན་ཞིག་གིས་གསུང་དོན་ལ། བར་ལམ་ལོ་མང་རིང་བོད་རིགས་སློབ་མ་རྣམས་ཧེ་རུ་གཙུག་ལག་མཐོ་སློབ་ནང་སློབ་འཇུག་ཞུ་སྐབས་སློབ་ཡོན་ཆེན་པོ་འབུལ་མ་ཐུབ་པའི་དཀའ་ངལ་ཞིག་འཕྲད་བཞིན་ཡོད་སྟབས། བཀའ་བློན་མཆོག་དང་དྲུང་ཆེ་གཉིས་ལྡི་ལིར་ཆེད་བསྐྱོད་ཀྱིས་གཙུག་ལག་སློབ་གཉེར་ཁང་འདིའི་ཉེ་བའི་རིགས་བདག་གིས་དབུས་འགན་འཛིན་རྣམས་མཇལ་འཕྲད་ཀྱིས་བོད་ཕྲུག་དེ་དག་རྒྱ་གར་ནང་སྐྱེས་པའི་བོད་མི་སྐྱབས་བཅོལ་བ་མི་རབས་གསུམ་པ་བཞི་པ་ཡིན་སྐོར་དང་། བུ་ཕྲུག་དེ་དག་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་(CBSE) ཀྱིས་ངོས་ལེན་ཡོད་པའི་རྒྱ་གར་ནང་རྟེན་གཞི་བྱས་པའི་སློབ་གྲྭ་ཁག་ནས་ཐོན་པ་ཤ་སྟག་ཡིན་པས། བུ་ཕྲུག་དེ་དག་གི་དཔལ་འབྱོར་གྱི་གནས་སྟངས་སོགས་གང་ཅིའི་ཐད་ནས་རྒྱལ་ཁབ་གཞན་པ་ལྟར་སློབ་ཡོན་ཆེན་པོ་འབུལ་ཐུབ་ཐབས་མེད་པས་དགོངས་བཞེས་གནང་རོགས་ཞུས་སྐབས། ཉེ་བའི་རིགས་བདག་གིས་དབུས་པས་འགན་འཛིན་རྣམས་ནས་གསན་བཞེས་གང་ལེགས་གནང་སོང་། དེ་འདྲ་སོང་ཙང་གྲུབ་འབྲས་ཐོན་པའི་རེ་བ་ཞུ་གི་ཡོད་ཅེས་གསུངས་གནང་འདུག 

དེ་སྔོན་ཝར་ན་སིར་ཡོད་པའི་(Banaras Hindu University) ལ་ཡང་གནད་དོན་དེ་འདྲ་ཞིག་བྱུང་སྐབས། བོད་མིའི་སྒྲིག་འཛུགས་ཀྱི་རོགས་རམ་འོག་གནད་དོན་སེལ་ཐུབ་ཡོད་སྐོར་འདུག

བོད་མིའི་གྲོས་ཚོགས་ནང་གནད་དོན་དེ་གླེང་སློང་བྱུང་སྐབས་ནེ་རུ་གཙུག་ལག་སློབ་ཁང་དུ་ཡོད་པའི་བོད་མིའི་སློབ་མ་ཁག་ཅིག་གིས། སློབ་ཁང་དེའི་སློབ་མས་རྒྱ་གར་དབུས་གཞུང་ལ་ངོ་རྒོལ་གྱི་ལས་འགུལ་སྤེལ་བའི་ནང་མཉམ་ཞུགས་བྱས་རྐྱེན། སློབ་ཡོན་སྤར་བ་ཡིིན་ཚུལ་གླེང་སློང་བྱུང་ཡོད་ནའང་། བདེན་པ་ཡིན་མིན་ཁ་གསལ་བྱུང་མི་འདུག།།

གསར་འགོད་པ་སྐལ་བཟང་དོན་གྲུབ།