ནོ་སྦེལ་ཞི་བདེའི་གཟེངས་རྟགས་ཉིན་མོ་སྲུང་བརྩི་ཞུས་གནང་སོང་།

ཟླ་ ༡༢ ཚེས་ ༡༠ ཉིན་༸གོང་ས་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༣ འཁོར་བའི་དུས་ཆེན་གྱི་གཞུང་འབྲེལ་མཛད་སྒོ་དེ། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་འཚོགས་གནང་སོང་།

སྐབས་དེར་སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་འཇམ་དབྱངས་ཚེ་རིང་རྣམ་རྒྱལ་དང་། དམིགས་བསལ་སྐུ་མགྲོན་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇཱིཏ་ཀུ་མཱར་ (Shri Sujeet kumar)། ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་ཁྲིམས་རྩོད་པ་སྐུ་ཞབས་བཀྲ་ཤིས་རྒྱལ་མཚན་དང་རྒྱུན་ལས་འཐུས་མི་རྣམ་པ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་མི་མང་ནས་མཉམ་ཞུགས་གནང་སོང་།

མཛད་སྒོའི་ཐོག་བཀའ་ཤག་གི་གསུང་བཤད་ནང་དུ། འཛམ་གླིང་དུ་སྙན་གྲགས་ཆེ་བའི་གཟེངས་རྟགས་འདི་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བཞེས་མཛད་པ་ནི། ༸མགོན་པོ་གང་ཉིད་ཀྱིས་བོད་དོན་བདེན་མཐའ་གསལ་ཐབས་ཆེད་ཐོག་མཐའ་བར་གསུམ་དུ་འཚེ་མེད་ཞི་བའི་ཐབས་ལམ་རྒྱུན་འཁྱོངས་གནང་བ་དང་། རྒྱལ་སྤྱིའི་རྩོད་རྙོག་འདུམ་འགྲིག་དང་། འགྲོ་བ་མིའི་ཐོབ་ཐང་གི་གནད་དོན། གོ་ལའི་ཁོར་ཡུག་གི་གནད་དོན་ཐད་དགེ་མཚན་ལྡན་ཞིང་གཟིགས་རྒྱང་ཡངས་པའི་དགོངས་ཚུལ་འདོན་གནང་མཛད་པ་ལ་ནོ་བྷེལ་ཞི་བདེའི་གཟེངས་རྟགས་ཚོགས་ཆུང་གིས་ངོས་འཛིན་ཆེ་བསྟོད་ཞུས་པའི་མཚོན་བྱེད་ཅིག་ཡིན་ཅེས་དང་། དེ་རིང་། མཉམ་འབྲེལ་རྒྱལ་ཚོགས་སུ་འཛམ་གླིང་འགྲོ་བ་མིའི་ཐོབ་ཐང་གི་བསྒྲགས་གཏམ་གཏན་འབེབས་བྱས་ཏེ་མི་ལོ་ ༧༤ འཁོར་བའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་སྲུང་བརྩི་ཞུ་གི་ཡོད་ནའང་། འགྲོ་བ་མིའི་ལྷན་སྐྱེས་ཀྱི་ཐོབ་ཐང་རྣམས་བཙན་འཕྲོག་བརྡལ་བཤིག་གི་གནས་སྟངས་འཛམ་གླིང་ཕྱོགས་མཚམས་མང་པོར་ཁྱབ་ཡོད་པས། རྒྱལ་ཁབ་དང་། དབང་འཛིན་པའི་བཀོད་བྱུས་འོག་ཏུ་གནོད་འཚེ་མྱོང་མཁན་ཡོངས་ལ་གདུང་སེམས་མཉམ་བསྐྱེད་དང་། འགྲོ་བ་མིའི་ཐོབ་ཐང་རྩོད་ལེན་བྱེད་མཁན་སྤྱི་སྒེར་རྣམས་ལ་རྗེས་སུ་ཡི་རང་ཞུ་གི་ཡོད་ཅེས་གསུངས་འདུག 

དེ་བཞིན་བོད་ས་སྟོད་སྨད་བར་གསུམ་དུ་རྒྱ་གཞུང་གིས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བའི་གནས་ཚུལ་རྒྱུན་ཆད་མེད་པར་འབྱུང་བཞིན་པའི་ཐོག །ལོ་ཤས་གོང་ནས་བཟུང་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་དང་། བོད་བརྒྱུད་ནང་བསྟན་རྒྱ་ནག་ཅན། རྒྱ་སྐད་ཁྱབ་སྤེལ་གྱི་སྲིད་ཇུས་འོག་ནས་བོད་ཕྲུག་རྣམས་གཏན་འཇགས་སློབ་གྲྭར་སྡེབ་བཅུག་གིས་བོད་ཀྱི་སྐད་ཡིག་སློབ་སྦྱོང་དང་བཀོལ་སྤྱོད་བཀག་སྡོམ་བཅས་བརྒྱུད། མི་རིགས་གཅིག་དང་། རིག་གཞུང་གཅིག ཆོས་ལུགས་གཅིག སྐད་ཡིག་གཅིག་གི་སྲིད་ཇུས་འགེབས་སྦས་མེད་པའི་སྒོ་ནས་བོད་མིར་བཙན་འགེལ་ལག་བསྟར་བྱེད་བཞིན་པ་ནི་བོད་མི་རིགས་ཀྱི་ངོ་བོ་རྒྱུན་འཛིན་ཐོག་ལོ་རྒྱུས་སུ་གྲགས་མ་མྱོང་བའི་ཉེན་ཚབས་ཆེན་པོ་ཞིག་ཡིན་པ་དང། མའོ་ཙེ་ཏུང་གིས་བོད་ནང་ངོ་རྒོལ་ལས་འགུལ་བྱུང་ན་དྲག་གནོན་གྱི་གོ་སྐབས་འཐོབ་རྒྱུར་དགའ་སྒུག་བྱེད་པ་ལྟར་རྒྱ་གཞུང་གིས་ད་དུང་དེ་ལྟ་བུའི་བསམ་ཕྱོགས་འཛིན་གྱི་ཡོད་ན་མ་གཏོགས། དགེ་སྐྱོན་གྱི་གནས་བབས་ལ་དཔྱད་ཞིབ་ཚད་ལྡན་བྱས་པའི་ཐོག་ནས། རྒྱལ་སྤྱིའི་ཁྲིམས་སྲོལ་དང་མཐུན་ཞིང་། མི་རིགས་མཐུན་སྒྲིལ་དང་རྒྱལ་ཁབ་བརྟན་ལྷིང་ལ་ཕན་པའི་དོན་དངོས་ཕུགས་ཕན་གྱི་ཐབས་ཚུལ་བསྟེན་དགོས་པ་གལ་ཆེན་པོ་ཡིན་ཞེས་དང་། བོད་མིའི་སྒྲིག་འཛུགས་ཀྱི་ངོས་ནས་འཚེ་མེད་ཞི་བ་དང་། གཉིས་ཕན། དབུ་མའི་ལམ། གྲོས་མོལ། རྒྱུན་གནས་ཐུབ་པ་བཅས་བརྒྱུད་ནས་བོད་རྒྱའི་དཀའ་རྙོག་སེལ་རྒྱུའི་སྲིད་ཇུས་འགྱུར་མེད་དུ་རྒྱུན་འཁྱོངས་བྱེད་དགོས་དོན་ནི། བོད་མི་ཡོངས་ལ་རང་ཉིད་ཀྱི་ངོ་བོ་མཚོན་པའི་ཆོས་དང་རིག་གཞུང་། སྐད་ཡིག ཁོར་ཡུག་བཅས་ཡུན་གནས་ཀྱི་ཁེ་ཕན་གཙོ་བོར་བཟུང་བ་ཞིག་ཡིན་པས། སྐབས་ ༡༦ པའི་བཀའ་ཤག་གི་ངོས་ནས་དངོས་ཡོད་གནས་ཚུལ་དང་མཐུན་ཞིང་། ཐབས་ལམ་ཡོད་རྒུ་རྩལ་སྤྲུགས་ཀྱིས་རྒྱ་གཞུང་ལ་མེས་འཚིགས་མེར་གཏུགས་ཀྱིས་གནད་དོན་སེལ་རྒྱུའི་རེ་བ་འཛིན་གྱི་ཡོད་ཅེས་སོགས་གསུངས་འདུག 

བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ནང་དུ། ཕྱི་ལོ་༡༩༨༩ ལོར་ནོ་སྦེལ་ཞི་བདེའི་གཟེངས་རྟགས་༸གོང་ས་མཆོག་ལ་འབུལ་བཞེས་ཀྱིས་འཇིག་རྟེན་ཞི་བདེའི་དེད་དཔོན་ཆེན་པོར་མངའ་གསོལ་བ་དང་ཆབས་ཅིག བོད་དོན་ལ་རྒྱལ་སྤྱིའི་ནང་གོ་རྟོགས་དང་དོ་སྣང་ཇེ་ཆེར་འགྲོ་རྒྱུར་རླབས་ཆེན་གྱི་ཕན་ཐོགས་བྱུང་ཡོད། དེ་ནི་འཚེ་བ་མེད་པའི་ཐབས་བྱུས་ལ་ཡིད་ཆེས་སླེབས་པའི་སྐུལ་འདེད་དང་བོད་མིའི་བདེན་དོན་ངོས་འཛིན་གྱི་མཚོན་རྟགས་རྨད་དུ་བྱུང་བ་ཞིག་ཏུ་གྱུར་སྟབས། གཞིས་བྱེས་བོད་མི་ཚང་མས་སོ་སོའི་སྒོ་གསུམ་གྱི་སྤྱོད་པ་འཚེ་མེད་ཞི་བའི་ལམ་ལ་ངེས་ཤེས་རྙེད་པའི་སྒོ་ནས་ཡིད་ཆེས་དང་དམ་བཅའ་བསྐྱར་ནན་ཞིག་འཇོག་ཐུབ་ཚེ་དུས་དྲན་འདི་སྲུང་བརྩི་ཞུ་གོ་ཆོད་ངེས་ཡིན། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡང་ཡིན་པས་མང་གཙོ་དང་། རང་དབང་ལྡན་པའི་རྒྱལ་ཁབ་ཁག་གི་མི་རྣམས་འགྲོ་བ་མིའི་ཐོབ་ཐང་གི་ཉིན་མོ་དགའ་སྤྲོ་ལྡན་པའི་ངང་སྲུང་བརྩི་ཞུ་བཞིན་ཡོད་ནའང་། བོད་ནང་ད་དུང་རྒྱ་ནག་དམར་གཞུང་གིས་དམ་དྲག་ཚ་ནན་གྱིས་ཕྱི་མི་བོད་ནང་འགྲོ་འོང་མི་ཆོག་པའི་མུར། འགྲོ་བ་མིའི་ཐོབ་ཐང་བརྡལ་བཤིག་གིས་བོད་མི་ཚོར་དྲང་བདེན་མིན་པའི་ཁྲིམས་གཅོད་དང་། ནག་མེད་ཉེས་འཛུགས་ཀྱིས་འཛིན་བཟུང་བཙོན་འཇུག་དང་གར་སོང་ཆ་མེད་གཏོང་བ། སྡུག་སྦྱོང་མནར་གཅོད། རང་མི་རིགས་ཀྱི་བླ་སྲོག་སྐད་ཡིག་དང་། ཆོས། རིག་གཞུང་བཅས་རྩ་མེད་གཏོར་བཤིག་སོགས་བཏང་དང་གཏོང་བཞིན་པར་འཛམ་གླིང་དབུ་ཁྲིད་རྣམས་ནས་རྒྱ་ནག་ལ་འགན་ཁུར་དགོས་པའི་བརྡ་ལན་གནང་དགོས་པའི་འབོད་སྐུལ་ཞུ་རྒྱུ་ཡིན། དུས་རབས་ཉེར་གཅིག་པ་འདིའི་ནང་གཅིག་བསྡུས་དབང་འཛིན་གྱི་ལམ་ལུགས་ད་མུར་གནས་པ་ཙམ་དུ་མ་ཟད་རྒྱ་ནག་དམར་གཞུང་ནི་བོད་ཙམ་མིན་པར་འཛམ་གླིང་ཁྱོན་ཡོངས་ཀྱི་བདེ་འཇགས་ལ་འགལ་རྐྱེན་ཆེ་ཤོས་དེ་ཡིན་པ་ནན་བརྗོད་བྱ་རྒྱུ་དང་། ཕྱོགས་མཚུངས་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འགོས་ཁྱབ་ལ་བསྙད་དེ་ཟླ་ཤས་སྔོན་ནས་བཟུང་བོད་ནང་གི་བོད་མི་ཚོར་འགྲོ་འདུག་སྤྱོད་གསུམ་གང་ཅིའི་ཐད་དཀའ་ངལ་འཕར་མ་ཞིག་བཟོ་བཞིན་པར་རྒྱ་གཞུང་ནས་དེ་དག་འཕྲལ་དུ་མཚམས་འཇོག་དགོས་པའི་སྐུལ་འདེད་བྱ་རྒྱུ་ཡིན། 

ཉེ་ཆར་རྒྱ་ནག་དམར་ཤོག་ཚོགས་པའི་སྐབས་ཉི་ཤུ་པའི་ཚོགས་ཆེན་རྗེས་སུ་རྒྱ་ནག་གི་ཞིང་ཆེན་དང་གྲོང་ཁྱེར་ཁག་ནང་མི་མང་དང་། ལྷག་པར་དུ་མཐོ་སློབ་ཁག་གི་སློབ་མ་དང་དགེ་རྒན་སོགས་དངོས་སུ་ཕྱིར་ཐོན་ནས་འདུ་འཛོམས་དང་རྔམ་སྟོན་ཁྲོམ་སྐོར་བྱས་དང་བྱེད་མུས་མ་ཟད། ཁོང་ཚོའི་འབོད་ཚིག་གཙོ་བོ་ཁག་གཅིག་ནི། ང་ཚོར་སྲིད་དབང་སྒེར་གཅོད་མི་དགོས་པར་རང་དབང་མང་གཙོ་དགོས། དམར་ཤོག་ཚོགས་པ་མགོ་རྟིང་སློག ཞིའི་ཅིང་ཕིང་མར་བོབས། སྨྲ་བརྗོད་རང་དབང་དགོས། གསར་འགྱུར་ཕྱི་གསལ་ནང་གསལ་དགོས། ང་ཚོ་བྲན་གཡོག་བྱ་འདོད་མེད་ཅེས་སོགས་རྒྱ་གཞུང་གིས་ད་ལྟའི་སྲིད་བྱུས་འཛིན་བཞིན་པར་མོས་མཐུན་མེད་པའི་ཞི་རྒོལ་གཞི་རྒྱ་ཆེ་བ་བྱས་པར་རྒྱ་ནག་གཞུང་གི་ཆེས་མཐོའི་དཔོན་རིགས་ཚོས་འདས་པའི་ལོ་རྒྱུས་ལ་ཕྱི་མིག་བལྟས་ཏེ་ཕྱི་ལོ་ ༡༩༨༩ ལོའི་དྲུག་བཞིའི་དོན་རྐྱེན་གྱི་ཐབས་སྡུག་གནས་སྟངས་དེ་རིགས་བསྐྱར་དུ་མི་ཡོང་བ་དང་། ད་ལྟ་རྒྱ་ནག་ནང་འགྲོ་བཞིན་པའི་གནས་སྟངས་ཐད་རྒྱལ་སྤྱིའི་ཁྱོན་ནས་དོ་སྣང་ངེས་ཅན་གྱིས་དཔལ་འབྱོར་ཁེ་ཕན་ཙམ་ལ་གཞི་མ་བཞག་པར་རྒྱ་ནག་ནང་གི་འགྲོ་བ་མིའི་ཐོབ་ཐང་ཐད་ཡར་རྒྱས་ཡོང་ཐབས་ཆེད་སྐུལ་འདེད་བྱ་དགོས་པའི་འབོད་སྐུལ་བྱ་རྒྱུ་ཡིན།

ཕྱི་ལོ་ ༡༩༥༩ ལོ་ནས་བཟུང་བོད་དེ་རྒྱ་ནག་དམར་གཞུང་གིས་བཙན་དབང་འོག་ཧམ་བཟུང་བྱས་རྗེས་ཛ་དྲག་གི་གནས་སྟངས་ཇི་ཆགས་ཚང་མའི་དགོངས་པར་མངའ་གསལ་ལྟར་དུས་ད་ལྟའང་རྒྱ་ནག་གཞུང་གི་ངན་བྱུས་དང་། བཙན་གནོན་འོག་གཞིས་ལུས་བོད་མི་རྣམས་ཉིན་མཚན་འཁྱོལ་དཀའི་མནར་གཅོད་སྡུག་སྦྱོང་མྱངས་དང་མྱོང་བཞིན་པའི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་དང་། ད་བར་གཞིས་བཞུགས་རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་ཀྱི་ལྷག་བསམ་དང་། དཔའ་མཛངས་སྙིང་སྟོབས། བླ་ན་མེད་པའི་མཛད་རྗེས་བཅས་ལ་ཡི་རངས་བསྔགས་བརྗོད་བཅས་ཞུ་བཞིན་ཡོད། བོད་དོན་བདེན་མཐའ་གསལ་ཆེད་རང་དབང་ལུང་པར་ཡོད་པའི་བོད་མི་རྣམས་ནས་ཆིག་སྒྲིལ་གྱི་སྒོ་ནས་བོད་དོན་དྲིལ་བསྒྲགས་དང་ཞུ་སྐུལ་ལས་འགུལ་སོགས་ཀྱི་ཐོག་ལ་ནུས་པ་མཉམ་སྤུངས་དང་གོ་སྐབས་དམ་འཛིན་དགོས་པའི་ནན་སྐུལ་ཞུ་རྒྱུ་ཡིན།

དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་ནོར་ཝེའི་རྒྱལ་ས་ཨོ་སི་ལོར་ནོ་སྦེལ་ཞི་བདེའི་གཟེངས་རྟགས་ངོས་བཞེས་མཛད་སྐབས་ཀྱི་བཀའ་སློབ་གསུང་བཤད་གནང་བའི་དགོངས་དོན་དང་། བོད་བསྟན་སྲིད་དང་འགྲོ་བའི་དོན་དུ་བཀའ་སློབ་ལམ་སྟོན་རིམ་སྩལ་གནང་བ་ཁག སྒོས་སུ་༸རྒྱལ་བའི་ཐུགས་བསྐྱེད་དམ་བཅའ་བཞི་བཅས་བོད་མི་རྣམས་ཀྱིས་ཡང་ནས་ཡང་དུ་ཡིད་ལ་དྲན་ཅིང་དོན་དམ་གྱི་ལག་བསྟར་བྱ་རྒྱུ་གལ་འགངས་ཤིན་ཏུ་ཆེ་ཞེས་སོགས་གསུངས་འདུག 

སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་འཐུས་མི་འཇམ་དབྱངས་ཚེ་རིང་རྣམ་རྒྱལ་གྱིས། ཁོ་རང་གི་འཁྲུངས་ཡུལ་ལ་དྭགས་གཙོས་པའི་རྒྱ་གར་གྱི་མི་སེར་ཡིན་པ་ཧི་མ་ལ་ཡའི་རི་བརྒྱུད་ཁུལ་དུ། ཆོས་དང་རིག་གཞུང་སྐད་ཡིག་གོམས་གཤིས་སོགས་བོད་དང་འདྲ་མཚུངས་ཡིན་པས། བོད་ཀྱི་ཆོས་དང་རིག་གཞུང་ཉམས་ཆག་ཉག་ཕྲའི་སྐབས་སུ། ཁོ་ཚོ་ལ་༧གོང་ས་མཆོག་གིས་ཐུགས་རེ་ཆེན་པོ་གནང་གི་ཡོད་པ་དང་། ཧི་མ་ལ་ཡའི་རི་བརྒྱུད་པ་ཚང་མས་ཚོར་ཤུགས་ཆེན་པོས་རྒྱ་གར་གཞུང་ལ་ཞུ་བ་ཕུལ་དང་འབུལ་བཞིན་པ་ལྟར། ༧གོང་ས་མཆོག་ལ་རྒྱ་གར་གྱི་གཟེངས་རྟགས་མཐོ་ཤོས་བྷཱ་རཱཏི་རཏྣ་ཕུལ་རོགས་ཀྱི་རེ་བ་བརྒྱབ་ཀྱི་ཡོད་ཅེས་སོགས་གསུངས་གནང་སོང་། 

དེ་བཞིན་དམིགས་བསལ་སྐུ་མགྲོན་རྒྱ་གར་གྲོས་ཚོགས་འཐུས་མི་དང་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སུ་ཇཱིཏ་ཀུ་མཱར་གྱིས། ང་ཚོ་རྒྱ་གར་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ངོས་ནས། ནུས་པ་ཡོད་ཚད་བཏོན་ཏེ། བོད་ཕྱི་ནང་གི་མི་ཚོར་གདུང་སེམས་མཉམ་སེམས་བསྐྱེད་དང་། ཆབ་སྲིད་དང་བཟང་སྤྱོད་གང་གི་ཐོག་ནས་ཀྱང་བོད་དོན་ལ་རྒྱབ་སྐྱོར་གནང་རྒྱུ་ཡིན་པ་ཁས་ལེན་ཞུ་ཡི་ཡོད་ཅེས་སོགས་གསུངས་གནང་སོང་།།

གསར་འགོད་པ་སྐལ་བཟང་དོན་གྲུབ།