ནོར་ཝེ་ནང་སྤྱི་ཚོགས་རིང་ལུགས་ཀྱི་ཕྱོགས་འགལ་ཚོགས་པ་ཚོར་རྒྱལ་ཁ་ཆེན་པོ་ཐོབ་འདུག

ཐེངས་མང་པོར་འཛམ་གླིང་ནང་བདེ་སྐྱིད་ཀྱི་ཚད་གཞི་མཐོ་ཤོས་སུ་ངོས་འཛིན་བྱེད་ཡུལ་ནོར་ཝེ་ནང་དུ། ལོ་ངོ་༨ ཀྱི་རྗེས་སུ་གྲོས་ཚོགས་ཀྱི་འོས་བསྡུར་སྤྱི་ཚོགས་རིང་ལུགས་ཀྱི་ལྟ་བ་འཛིན་མཁན་ཕྱོགས་འགལ་སྲིད་དོན་ཚོགས་པའི་མཐུན་ཕྱོགས་ལ་རྒྱལ་ཁ་ཆེན་པོ་ཐོབ་འདུག

ཟླ་༩ པའི་ཚེས་༡༤ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ནོར་ཝེ་རྒྱལ་ཁབ་ཀྱི་རྒྱལ་ཡོངས་གྲོས་ཚོགས་འོས་བསྡུའི་འོས་ཤོག་བརྒྱ་ཆ་༩༧.༥ རྩིས་བཤེར་བྱས་ཟིན་པ་དང་བསྟུན། གྲུབ་དོན་དུ་ངལ་རྩོལ་སྲིད་དོན་ཚོགས་པའི་འགོ་ཁྲིད་ཇཱོ་ནེ་སེ་གྷར་གྱིས་སྣེ་ཁྲིད་པའི་སྤྱི་ཚོགས་རིང་ལུགས་ཀྱི་ལྟ་བ་འཛིན་མཁན་ཕྱོགས་འགལ་སྲིད་དོན་ཚོགས་པ་༥ ལས་གྲུབ་པའི་མཐུན་ཕྱོགས་ལ། གྲོས་ཚོགས་ནང་དུ་རྐུབ་སྟེགས་༡༠༠ ལྷག་ཐོབ་རྒྱུ་ཡིན་འདུག་པས། གཞུང་འཛིན་བྱེད་པའི་རྐུབ་སྟེགས་ཀྱི་གྲངས་ལས་བརྒལ་གྱི་ཡོད་པ་རེད། དེ་ཡང་ནོར་ཝེ་ཡི་གྲོས་ཚོགས་ནང་དུ་རྐུབ་སྟེགས་༡༦༩ ཡོད་པ་དང་མང་མོས་ཐོབ་ཆེད་དུ་རྐུབ་སྟེགས་གྲངས་ཉུང་མཐར་༨༥ དགོས་ཀྱི་ཡོད་འདུག ནོར་ཝེའི་སྲིད་བློན་གསར་པ་དེ་ངལ་རྩོལ་ཚོགས་པའི་འགོ་ཁྲིད་སྐུ་ཞབས་ཇཱོ་ནེ་སེ་གྷར་ཆགས་པའི་རེ་བ་ཆེན་པོ་ཡོད་འདུག 

སྐབས་སྔོན་མར་ཕྱོགས་འགལ་སྲིད་དོན་ཚོགས་པའི་མཐུན་ཕྱོགས་དེར་གྲོས་ཚོགས་ནང་རྐུབ་སྟེགས་༨༡ ཡོད་འདུག་པས། ཐེངས་འདིར་རྐུབ་སྟེགས་གྲངས་༡༩ ལྷག་འཕར་ཡོད་པ་རེད། 

འོས་བསྡུར་ཕམ་ཁ་བྱུང་མཁན་ལས་ཁུར་སྲིད་བློན་ལྕམ་སཱོལ་བྷེར་གྷ་ཡིས་ཕམ་ཁ་ཁས་ལེན་དང་སྦྲགས། རྒྱལ་ཁ་ཐོབ་མཁན་ལ་འཚམས་འདྲི་ཞུས་འདུག རྙིང་ཞེན་རིང་ལུགས་དང་བར་གནས་ཀྱི་སྲིད་དོན་ཚོགས་པའི་མཐུན་ཕྱོགས་ཀྱིས་ཕྱི་ལོ་༢༠༡༣ ལོ་ནས་ད་བར་ནོར་ཝེ་རྒྱལ་ཁབ་ཀྱི་སྲིད་དབང་བཟུང་ཡོད་པ་རེད། 

ཐེངས་འདིའི་འོས་བསྡུ་སྐབས་སུ་རྒྱལ་ཁབ་ཀྱི་རྡོ་སྣུམ་གྱི་ཐོན་ཁུངས་ལ་བརྟེན་པའི་དཔལ་འབྱོར་དང་། དེ་ལ་བརྟེ་ནས་ཁོར་ཡུག་གཏོར་སྐྱོན་གྱི་གནད་དོན་དེ་གླེང་གཞི་གལ་ཆེན་ཞིག་ཆགས་ཡོད་འདུག ཐེངས་འདིའི་འོས་བསྡུའི་རྒྱལ་ཁ་ཐོབ་མཁན་གྱི་སྲིད་དོན་ཚོགས་པའི་མཐུན་ཕྱོགས་ཀྱི་འགོ་ཁྲིད་ཇཱོ་ནེ་སེ་གྷར་གྱིས་རྡོ་སྣུམ་ལ་བརྟེན་པའི་དཔལ་འབྱོར་སྒྲོམ་གཞི་དེ་ནས་གཞན་ལ་རིམ་པས་འཕོ་འགྱུར་གཏོང་རྒྱུའི་ཁས་ལེན་བྱས་ཡོད་འདུག དེ་བཞིན་ཁོང་གིས་སྤྱི་ཚོགས་ནང་དཔལ་འབྱོར་ཆ་སྙོམས་བཟོ་ཆེད་དུ་ཡོང་འབབ་དམའ་བོ་དང་འབྲིང་བ་ཡིན་པའི་ནང་མི་ཚོས་དཔྱ་ཁྲལ་མར་བཅག་པ་དང་ཕྱུག་བདག་ཚོའི་དཔྱ་ཁྲལ་སྤར་རྒྱུ་ཁས་ལེན་བྱས་ཡོད་པ་རེད། །

གསར་འགོད་པ་སྐལ་བཟང་དོན་གྲུབ།