པ་ཀི་སི་ཐན་གྱི་ནང་དུ་ཆུ་ལོག་གི་རྐྱེན་པས་མི་མང་ས་ཡ་ལྔ་བཅུ་ལྷག་གིས་སྡོད་གནས་སྤོ་དགོས་བྱུང་འདུག

ཟླ་འདིའི་ཚེས་༢༩ ཉིན་(WION) ཞེས་པའི་གསར་ཁང་གིས་གནས་ཚུལ་སྤེལ་གསལ་ལྟར་ན། པ་ཀི་སི་ཐན་གྱི་ནང་དུ་ཆུ་ལོག་བྱུང་བའི་དབང་གིས་མི་མང་ས་ཡ་མང་པོ་ལ་འཚོ་བའི་དཀའ་ངལ་འཕྲད་བཞིན་ཡོད་པའི་གནས་ཚུལ་ཐོན་འདུག

པ་ཀི་སི་ཐན་གྱི་ཡུལ་དུ་འདས་པའི་ལོ་ངོ་བཅུའི་རིང་བྱུང་མ་མྱོང་བའི་ཆུ་ལོག་ཆེ་ཤོས་དེ་བྱུང་བའི་དབང་གིས་ད་ལྟའི་ཆར་མི་གྲངས་ཆིག་སྟོང་ལྷག་(༡,༡༢༩) འདས་གྲོངས་སུ་ཕྱིན་ཡོད་པ་དང་། མི་གྲངས་ལྔ་སྟོང་(༥,༠༠༠) ལྷག་ལ་གནོད་འཚེ་ཕོག་ཡོད་པ་མ་ཟད། སྡོད་ཁང་འབུམ་བདུན་(༧༢༦,༧༢༣) ལྷག་དང་ཟམ་པ་ཁྱོན་བསྡོམས་༢༡༠ ལྷག་ལ་གཏོར་བཤིག་བཏང་ཡོད་པའི་གནས་ཚུལ་ཐོན་འདུག

པ་ཀི་སི་ཐན་གྱི་ནང་དུ་ཆུ་ལོག་བྱུང་བའི་རྐྱེན་གྱིས་སྒོ་ཕྱུགས་འབུམ་བརྒྱད་དང་ཁྲི་བཞི་ལྷག་ལ་འཆི་སྐྱོན་བྱུང་ཡོད་པ་མ་ཟད། མི་མང་ས་ཡ་༥༠ ལྷག་གིས་རང་ཉིད་ཀྱི་སྡོད་གནས་ས་གནས་གཞན་དུ་སྤོ་དགོས་བྱུང་བ་སོགས་ཀྱི་དཀའ་ངལ་ཆེན་མོ་འཕྲད་བཞིན་ཡོད་པའི་གནས་ཚུལ་ཐོན་འདུག

པ་ཀི་སི་ཐན་གྱི་ནང་དུ་ཆར་དུས་ནི་ལོ་ལྟར་སྤྱི་ཟླ་བདུན་པ་ཙམ་ནས་འགོ་འཛུགས་བྱེད་ཀྱི་ཡོད་འདུག་ལ། འདས་པའི་བདུན་ཕྲག་ཁ་ཤས་ཀྱི་ནང་དུ་ཆར་པ་ཕོན་ཆེན་བསྟུད་མར་བབས་པའི་སྟབས་ཀྱིས། པ་ཀི་སི་ཐན་གྱི་ནང་དུ་ཡོད་པའི་རྫོང་ཁག་བརྒྱ་དང་ལྔ་བཅུ་ཡོད་པའི་ནང་ནས་རྫོང་ཁག་བརྒྱ་དང་བཅུ་ལ་ཆུ་ལོག་གི་དཀའ་ངལ་འཕྲད་བཞིན་ཡོད་འདུག་ལ། ད་ལྟའི་ཆར་པ་ཀི་སི་ཐན་ལ་ཆུ་ལོག་གིས་དབང་གིས་ཨ་སྒོར་ཐེ་འབུམ་$༥.༥ལྷག་གི་གྱོང་གུན་རག་ཡོད་པའི་གནས་ཚུལ་ཐོན་འདུག

ཆུ་ལོག་གི་རྐྱེན་པས་ལམ་ཁ་མང་པོ་ཆད་པ་དང་སྡོད་ཁང་མང་པོ་ཞིག་ཡོད་པ་མ་ཟད། ལོ་ཏོག་ལ་ཡང་གནོད་འཚེ་ཕོག་ཡོད་པས་ད་ལྟའི་ཆར་པ་ཀི་སི་ཐན་གྱི་ནང་དུ་ཊོ་མ་ཊོ་ཀི་ལོ་གཅིག་ལ་སྒོར་ལྔ་བརྒྱ་དང་བཙོང་ཀི་ལོ་གཅིག་ལ་སྒོར་གསུམ་བརྒྱ་ལྷག་གནས་ཀྱི་ཡོད་པ་སོགས་མི་མང་གི་འཚོ་བའི་ཐོག་ལ་ཡང་དཀའ་ངལ་ཆེན་མོ་འཕྲད་བཞིན་པར་བརྟེན། པ་ཀི་སི་ཐན་གྱིས་རྒྱལ་སྤྱིའི་ཚོགས་སྡེ་ཁག་ལ་རོགས་རམ་ཡོང་བའི་འབོད་སྐུལ་ཞུ་བཞིན་འདུག

ད་ལྟའི་ཆར་རྒྱ་ནག་དང་ཡུ་རོབ། དེ་བཞིན་འཛམ་གླིང་ས་ཁུལ་མང་པོའི་ནང་དུ་ཐན་པའི་དཀའ་ངལ་འཕྲད་བཞིན་ཡོད་ན་ཡང་། པ་ཀི་སི་ཐན་གྱི་ནང་དུ་ཆུ་ལོག་གི་དཀའ་ངལ་འཕྲད་བཞིན་ཡོད་པའི་གནས་ཚུལ་ཐོན་འདུག

གསར་འགོད་པ་བློ་བཟང་རྒྱ་མཚོ།