པ་ཀི་སེ་ཐན་ནང་མི་གཅིག་ལ་དཔེ་ཆ་མེར་སྲེག་གི་ཉེས་འཛུགས་འོག་རུབ་རྡུང་བྱས་ནས་བསད་འདུག 

རྒྱ་གར་གྱི་ཁྱིམ་མཚེས་རྒྱལ་ཁབ་པ་ཀི་སེ་ཐན་ནང་དུ་མི་གཅིག་གིས་ཁ་ཆེའི་དཔེ་ཆ་མེར་སྲེག་བཏང་ཡོད་པའི་ཉེས་འཛུགས་འོག མི་མང་གིས་རུབ་རྡུང་བྱས་ནས་བསད་འདུག་ཀྱང་། རྗེས་སུ་མི་དེ་སེམས་པ་ཐང་པོ་མེད་མཁན་ཡིན་པའི་གནས་ཚུལ་ཕྱིར་ཐོན་འདུག 

ཟླ་༢ པའི་ཚེས་༡༤ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཚེས་༡༢ ཉིན་པ་ཀི་སེ་ཐན་ནང་ཡོད་པའི་པན་ཇབ་མངའ་སྡེའི་ནང་གི་གྲོང་གསེབ་ཅིག་ཏུ། མི་ཞིག་གིས་ཁ་ཆེའི་དཔེ་ཆ་རྩ་ཆེན་ཁཱོ་རན་ཞེས་པ་དེ་མེར་སྲེག་བཏང་བ་ཁ་ཆེའི་ལྷ་ཁང་གི་ཆོས་དཔོན་གྱི་བུས་མཐོང་སྐོར་གསལ་བསྒྲགས་བྱས་རྗེས། ལྷ་ཁང་དུ་མི་མང་པོ་འཛོམས་པ་དང་། མི་མང་ཚོས་མི་དེར་སྟ་རེ་དང་ལྕགས་རྒྱུག དབྱུག་པ་སོགས་ཀྱིས་བརྡུངས་ནས་བསད་འདུག རྗེས་སུ་མི་དེའི་ཕུང་པོ་ཤིང་སྡོང་ལ་དཔྱང་ནས་བཞག་ཡོད་འདུག 

པ་ཀི་སེ་ཐན་ནང་དུ་མི་མང་ཕལ་ཆེ་བ་ཁ་ཆེ་ཆོས་ལུགས་ཀྱི་རྗེས་འབྲངས་པ་ཡིན་ཁར། ཆོས་ལུགས་ལ་སྐུར་འདེབས་ཀྱི་ལས་དོན་ལ་ཞུགས་ཚེ་སྲོག་ཐོག་གི་ཉེས་ཆད་ཕོག་སྲིད་པ་རེད་འདུག སྐབས་རེར་སྒེར་གྱི་གནད་དོན་དང་འབྲེལ་ནས་དགྲ་ཤ་ལེན་ཆེད་དུ། ཕ་རོལ་བས་ཆོས་ལ་སྐུར་འདེབས་བྱས་མེད་ཀྱང་བྱས་ཡོད་པའི་ཉེས་འཛུགས་བྱས་ཏེ། རུབ་བརྡུངས་དང་རུབ་གསོད་ཀྱི་གནད་དོན་ལྷག་གི་ཡོད་ཁར། ལྷག་པར་དུ་ཆོས་ལུགས་ཐོག་ནས་གྲངས་ཉུང་མི་རིགས་ཡིན་མཁན་ཚོར་དམིགས་འབེན་བྱེད་སའི་ལག་ཆ་ཞིག་ཆགས་ཀྱི་ཡོད་འདུག 

ཐེངས་འདིར་པ་ཀི་སེ་ཐན་གྱི་སྲིད་བློན་ཨི་མེ་རན་ཁན་གྱིས་སྔར་ལྟར་མི་མང་གིས་ཁྲིམས་རང་གི་ལག་ཏུ་བླངས་ནས། རུབ་གསོད་བྱས་པའི་གནས་ཚུལ་དེར་སྐྱོན་བརྗོད་དང་ཞིབ་འཇུག་མཐིལ་ཕྱིན་བྱས་ནས་བྱ་སྤྱོད་སྤེལ་དགོས་པ་དང་། དེ་བཞིན་རང་གི་ལས་འགན་མ་སྒྲུབ་མཁན་གྱི་ཉེན་རྟོག་པ་ཚོར་ཡང་ཞིབ་འཇུག་བྱེད་དགོས་པའི་བཀའ་བཏང་ཡོད་འདུག གནས་ཚུལ་ཐོན་པར་གཞིགས་ན་ཉེན་རྟོག་པ་ས་གནས་དེར་སླེབས་དུས་མི་མང་ཚོས་ཉེན་རྟོག་པར་ཡང་དྲག་རྒོལ་བྱས་ཡོད་འདུག 

ད་ལྟའི་ཆར་དོགས་ཡོད་མི་སྣ་གཙོ་བོ་༡༥ འཛིན་བཟུང་བྱས་ཟིན་ཡོད་ཁར། ཉེས་འཛུགས་བྱས་ཡོད་པའི་མི་ན་༨༥ ཞིག་བཀག་ཉར་བྱས་འདུག དེ་བཞིན་ཉེས་ཅན་པ་མང་པོ་ཞིག་འཛིན་བཟུང་ཆེད་མུ་མཐུད་ནས་ལས་དོན་སྤེལ་བཞིན་ཡོད་པ་རེད། 

རུབ་གསོད་བཏང་བའི་མི་དེ་ནི་ལོ་ན་༥༠ ང་གྲངས་ཡིན་འདུག་པ་དང་། ནང་མིས་བརྗོད་དོན་ལྟར་ན་འདས་པའི་ལོ་༡༠ དང་༡༥ སྐབས་ནས་མི་དེའི་སེམས་ཁམས་ཐང་པོ་མེད་འདུག 

ཟླ་བ་གཉིས་ཀྱི་སྔོན་ལ་མངའ་སྡེ་དེའི་ནང་དུ་སིང་གྷ་ལའི་བཟོ་གྲྭའི་འགན་འཛིན་ཞིག་ལ་ཆོས་ལ་སྐུར་འདེབས་ཀྱི་ཉེས་འཛུགས་བྱས་ཏེ། མི་མང་གིས་མ་ཤི་བར་དུ་རུབ་བརྡུངས་བྱས་པ་དང་དེའི་རྗེས་སུ་ཕུང་པོ་མེར་སྲེག་བྱས་པའི་གནས་ཚུལ་ཐོན་ཡོད་པ་རེད། 

དེ་བཞིན་ཕྱི་ལོ་༢༠༡༤ ལོར་ལོ་ན་གཞོན་པའི་ཡེ་ཤུའི་ཁྱོ་ཤུག་གཉིས་ལ་ཁ་ཆེའི་དཔེ་ཆ་མེར་སྲེག་བཏང་བའི་ཉེས་འཛུགས་རྫུན་མ་བྱས་པས། མི་མང་གིས་ཁོ་གཉིས་རུབ་བརྡུངས་བྱས་དང་རྗེས་སུ་སོ་ཕག་སྲེག་སྦྱོར་བྱེད་ཡུལ་དུ་འཕངས་ནས་མེར་བསྲེགས་བཏང་ཡོད་པ་རེད། ཕྱིས་སུ་སོ་ཕག་སྲེག་སྦྱོར་བྱེད་ཡུལ་གྱི་སྦྱིན་བདག་དང་ཁྱོ་ཤུག་དེ་གཉིས་བར་ཨ་སྒོར་༩༧༠ ཡི་རྩོད་རྙོག་ཡོད་པས། སྦྱིན་བདག་དེས་ས་གནས་ཀྱི་ཁ་ཆེ་ལྷ་ཁང་བེད་སྤྱོད་ནས་ཉེས་འཛུགས་དེ་བརྒྱུད་སྐུལ་བྱས་པའི་གནས་ཚུལ་ཐོན་ཡོད་པ་རེད། །

གསར་འགོད་པ་སྐལ་བཟང་དོན་གྲུབ།