པར་པ་བཀྲ་ཤིས་སྟོབས་རྒྱལ་ལ་གཟེངས་རྟགས།

ཟླ་འདིའི་ཚེས་༤ ཉིན་རྒྱ་གར་གསར་འགོད་ལྷན་ཚོགས་ཀྱིས་ཕྱི་ལོ་༢༠༡༥ ལོའི་མཆེ་མཐོང་ལྡན་པའི་རྒྱ་གར་རྒྱལ་ཡོངས་གསར་འགོད་ལས་རིགས་ཀྱི་གཟེངས་རྟགས་ཐོབ་མཁན་གྱི་མིང་གཞུང་དྲུག་བཏོན་པའི་ཁྲོད། པར་པ་བོད་མི་བཀྲ་ཤིས་སྟོབས་རྒྱལ་ལ་དམིགས་བསལ་བརྗོད་གཞིའི་གསར་འགོད་ཀྱི་གཟེངས་རྟགས་སྤྲད་རྒྱུ་རེད་འདུག

གསར་འགོད་ལས་རིགས་ཀྱི་གཟེངས་རྟགས་དེ་ཟླ་འདིའི་ཚེས་༡༦ རྒྱ་གར་གྱི་གསར་འགོད་པའི་ཉིན་མོར། རྒྱ་གར་གྱི་སྲིད་འཛིན་པར་ནཱབ་མུ་ཁར་ཇིས་ཀྱིས་གནང་རྒྱུ་རེད་འདུག

བཀྲ་ཤིས་སྟོབས་རྒྱལ་ནི་ལྡི་ལིར་རྟེན་གཞི་བྱས་པའི་རྒྱ་གར་གྱི་བང་ཆེན་གསར་ཁང་ལ། པར་གྱི་གསར་འགོད་པའི་ལས་ཀ་བྱས་ནས་ལོ་༩ འགྲོ་བཞིན་ཡོད་པ་དང། ཁོང་གིས་ཕྱི་ལོ་༢༠༡༤ ལོའི་རྒྱ་གར་གྱི་ཀ་ཤཱི་མིར་ཆུ་ལོག་དོན་རྐྱེན་བྱུང་སྐབས། ཉིན་གྲངས་༡༢ རིང་གསར་འགོད་བྱས་པའི་པར་དག་ལ་བརྟེན་ནས། ཐེངས་འདིའི་རྒྱ་གར་རྒྱལ་ཡོངས་གསར་འགོད་ལས་རིགས་གཟེངས་རྟགས་ཐོབ་པ་རེད་འདུག

དེ་བཞིན་ཁོང་གིས་བོད་དང་འབྲེལ་བའི་བརྗོད་གཞིའི་ཐོག་པར་རིས་གསར་འགྱུར་ཡང་ཁ་ཤས་བྲིས་ཡོད་འདུག་ལ། ཁོང་ནི་རྒྱ་གར་བྱང་ཕྱོགས་རྡོ་རྗེ་གླིང་ལ་སྐྱེས་པ་ཞིག་རེད་འདུག །
གསར་འགོད་པ་སྐལ་བཟང་དོན་གྲུབ།