ཕུལ་དུ་བྱུང་བའི་འདྲེ་སྒྲུང་།

ལ་རྩེ་དཔེ་མཛོད་ཁང་གིས་འདྲེ་སྒྲུང་འགྲན་སྡུར་ལས་འཕྲོས་ནས་རྩོམ་རིག་ལ་མཐོང་ཆུང་བྱེད་མཁན་ཚོར་དྲན་གསོ་གཏོང་བ།

སེར་ཤུལ་རིན་ཆེན་དོན་གྲུབ།

རྩོམ་རིག་འཕེལ་རྒྱས་ཀྱི་གཞི་རྩ་གལ་ཆེ་ཤོས་ཤིག་ནི་སྤྱི་ཚོགས་ཁྲོད་དུ་རྩོམ་རིག་གི་རིན་ཐང་ལྟ་ཚུལ་ཡང་དག་པ་ཞིག་ཡོད་མེད་དེ་རེད།རྩོམ་རིག་གི་རིན་ཐང་ལྟ་ཚུལ་ནི་གཙོ་བོ་རྩོམ་རིག་སྨྲ་མཁན་དང་རྩོམ་རིག་ཤེས་མཁན་ཚོའི་བསམ་བློ་དང་ཀུན་སྤྱོད་ཀྱི་ཁྱབ་ཁུངས་ལས་ཡོང་དགོས་པ་ཡིན།བོད་བཙན་བྱོལ་སྤྱི་ཚོགས་ལ་མཚོན་ན་རྩོམ་རིག་གི་ནམ་མཁའ་ཡངས་ཤིང་ཆེ་བ་ཞིག་ད་དུང་གྲུབ་ཐུབ་མེད།གྲུབ་མ་ཐུབ་པའི་རྒྱུ་མཚན་གཅིག་གི་རྩོམ་རིག་སྨྲ་མཁན་ཚོས་རྩོམ་རིག་ལ་རིན་ཐང་མ་བཞག་པ་དང་། ཐ་ན་མཐོང་ཆུང་བྱས་པའི་མཇུག་འབྲས་ཤིག་རེད།སྣང་ཚུལ་འདིར་རྩོམ་རིག་གི་བྱ་བ་ཡར་རྒྱས་སུ་འགྲོ་བའི་རེ་འདུན་ཅན་ཞིག་གིས་བཟོད་ཐབས་མེད་པ་མ་ཟད་དེ་འབྲེལ་གྱི་གླེང་སློང་བྱེད་དགོས་ངེས་རེད་སྙམ།

འདིར་སྐབས་དོན་གླེང་བྱ་ནི།ཀུན་ཕན་ཐེབས་རྩ་ཚོགས་པས་ཁོངས་གཏོགས་ལ་རྩེ་དཔེ་མཛོད་ཁང་གིས་སྤྱི་ལོ་༢༠༡༣ལོའི་སྤྱི་ཟླ་༡༠བར་སྤེལ་བའི་འདྲེ་སྒྲུང་འགྲན་སྡུར་གྱི་སྐོར་ཡིན།དེ་ཡང་ཁོང་ཚོས་“བོད་ཀྱི་ཕུན་སུམ་ཚོགས་པའི་འདྲེ་སྒྲུང་གི་སྣང་ཚུལ་དེ་སྟོན་ཆེད།འདི་ལོའི་ཨ་རིའི་སྲོལ་རྒྱུན་གྱི་གདོན་འདྲེའི་དུས་ཆེན་དང་སྟབས་བསྟུན་གྱིས་ང་ཚོས་བོད་ཕྱི་ནང་གཉིས་ཀ་ནས་འདྲེ་སྒྲུང་ཤེས་མཁན་རྒན་གཞོན་རྣམས་ཀྱིས་ང་ཚོ་ལ་འདྲེ་སྒྲུང་གི་རྩོམ་ཡིག་བསྐུར་རྒྱུའི་འབོད་སྐུལ་ཞུ་བཞིན་ཡོད།འདྲེ་སྒྲུང་གི་རྩོམ་ཡིག་རྒྱལ་སྤྱི་ཁྱོན་ནས་བསྡུས་པའི་ནང་ནས་ཕུལ་བྱུང་འདྲེ་སྒྲུང་ལྔ་བདམས་རྗེས་ཡིག་སྒྱུར་ཞུས་ནས་སྤྱི་ཟླ་༡༠བའི་ཚེས་༢༤ཉིན་གྱི་དགོང་མོ་དམིགས་བསལ་གདན་ཞུས་སྐུ་མགྲོན་དང་།རྩོམ་རིག་གི་ཕུལ་བྱུང་བྱ་དགའ་ཐོབ་མྱོང་མཁན་སྐུ་ཞབས་སི་མོན་ཝན་སྦཱུ་དང་ཚོགས་ཁང་ལ་དངོས་ཞུགས་སམ་དྲ་ཐོག་ནས་ཞུགས་པའི་ཉན་པ་པོ་རྣམས་ཀྱིས་འདྲེ་སྒྲུང་ལྔ་པོ་དེ་ལ་འོས་འཕེན་གྱིས་རྩེ་ཕུད་གསུམ་བདམས་པ་ལ་རིམ་པ་གསུམ་གྱི་བྱ་དགའ་འབུལ་རྒྱུ་ཡིན།” ཞེས་གསལ་ཡོད།

འདྲེ་སྒྲུང་འགྲན་སྡུར་འདིའི་མཇུག་འབྲས་སྤྱི་ལོ་༢༠༡༣ལོའི་ཟླ་༡༠ཚེས་༢༤ཉིན་དངོས་སུ་གསལ་བསྒྲགས་གནང་ཞིང་ཨང་དང་པོར་ཨ་སྒོར་༣༠༠དང་།ཨང་གཉིས་པར་ཨ་སྒོར་༢༠༠།ཨང་གསུམ་པ་གསུམ་ལ་ཨ་སྒོར་༥༠རེ་བྱ་དགའ་ཡོད་ཅེས་ཁྱབ་བསྒྲགས་གནང་།འདི་ལྟ་བུའི་ལས་འགུལ་སྤེལ་བ་ནི་བོད་ཀྱི་ཕུན་སུམ་ཚོགས་པའི་རྩོམ་རིག་གི་ཕྱོགས་ལ་ཞབས་འདེགས་ཤིག་ཡིན་པ་སྨྲོས་ཅི་དགོས་ཀྱང་།རྒྱལ་སྤྱིའི་ཁྱོན་ནས་བྱ་དགའ་ཐོབ་པའི་འགྲན་ཞུགས་རྩོམ་པ་པོ་དག་ལ་བྱ་དགའ་ཐོབ་པའི་གསལ་བསྒྲགས་དང་ལྷན་ཁོང་ཅག་ལ་གསལ་བསྒྲགས་གཞིར་བཟུང་བྱ་དགའ་དང་ཕྱག་ཁྱེར་སོགས་དུས་ཐོག་ཏུ་ཕུལ་ནས་བོད་ཀྱི་རྩོམ་རིག་གི་མཁྱེན་སྤྱོད་ལ་ཆེ་མཐོང་དང་།དཀའ་ཚགས་ཀྱི་རིན་འབབ།རྩོམ་རིག་གི་ཕྱོགས་ལ་མདུན་སྐྱོད་སྐུལ་སློང་དགོས་པ་ནི་“བོད་ཀྱི་ཕུན་སུམ་ཚོགས་པའི་རྩོམ་རིག་གི་ཆེད་དུ་”ཞེས་པའི་ལས་འགུལ་འདིའི་དགོས་ངེས་ཀྱི་ཡན་ལག་ཅིག་ཅི་ལ་མིན།

འོན་ཀྱང་རེབ་འདིའི་འགྲན་རྩོམ་གོ་སྒྲིག་པས་སྤྱི་ལོ་༢༠༡༣ལོའི་ཟླ་༡༠པའི་ཚེས་༢༤ཉིན་དྲ་ཐོག་ཏུ་གསལ་བསྒྲགས་སྤེལ་བ་ནས་སྤྱི་ལོ་༢༠༡༤ལོའི་ཟླ་༤ཚེས་༡༨དེ་ད་བར་ཟླ་བ་དྲུག་ལ་ཉེ་བའི་རིང་བྱ་དགའ་འཐོབ་མཁན་ཚོར་བྱ་དགའ་སོགས་གང་ཡང་གནང་མེད་པ་མ་ཟད། ཐ་ན་ཁྱེད་ལ་བྱ་དགའ་ཐོབ་སོང་ཞེས་གསལ་བརྡ་ཙམ་ཡང་བཏང་མེད། ངས་ཐེངས་མང་པོར་གོ་སྒྲིག་པར་ཡི་གེ་བསྐུར་ནས་འདིའི་སྐོར་ལ་བཀའ་འདྲི་ཞུས་ཀྱང་ཡིག་ལན་གཅིག་ཀྱང་མ་འབྱོར།བྱ་དགའ་འཐོབ་མཁན་གཞན་གཉིས་ལ་བཀའ་འདྲི་ཞུས་པའི་ཁོང་གཉིས་ལ་ཡང་བརྡ་ལན་གནང་མི་འདུགབྱ་དགའི་དངུལ་གྱི་གྲངས་ཀ་དང་རིན་ཐང་སོགས་ཀྱི་ཆ་ནས་རྩོམ་པ་པོ་སོ་སོར་ཕན་ཐོགས་ཆེན་པོ་ཡོང་ཐུབ་པ་ཞིག་མེད་མོད།ཆེ་ཆུང་ལ་མ་ལྟོས་པར་བརྡ་ལན་ཙམ་ཡང་མ་བྱས་པ་དེ་ནི་བྱ་དགའི་དངུལ་དེས་རྩོམ་པ་པོ་སོ་སོར་ཕན་མིན་ལ་མ་ལྟོས་པར་རྩོམ་པ་པོ་དང་།རྩོམ་རིག་གི་རིན་ཐང་ལ་རྩིས་མེད་དང་།ཁོང་ཚོས་བཤད་པའི་ཕུན་སུམ་ཚོགས་པའི་བོད་ཀྱི་རིག་གཞུང་ལ་དགའ་མཁན་དང་།དེའི་ཆེད་དུ་དཀའ་ལས་རྒྱག་མཁན་ཚོར་མཐོང་ཆུང་བླ་ན་མེད་པ་ཞིག་རེད།འགྲན་རྩོམ་འདིར་བྱ་དགའ་འཐོབ་མཁན་གྲལ་ན་ང་རང་ཡོད་པའི་རྒྱུ་མཚན་གྱིས་ངས་འདི་ལྟར་བཤད་པ་མ་ཡིན་པར་ཡར་སྤེལ་གྱི་མིང་ཐོག་ནས་རྩོམ་རིག་དང་།རྩོམ་པ་པོར་མཐོང་ཆུང་གི་རྣམ་འགྱུར་འདི་མ་བཟོད་པར་འདི་ལྟར་བཤད་པ་ཡིན།བོད་ཕྱི་ནང་གི་རྩོམ་རིག་སྣང་ཚུལ་གྱི་ཁྲོད་ན་རྦད་དེ་མ་འདྲ་བའི་ཆ་ཞིག་ཡོད་པ་ནི་བོད་ནང་གི་རྩོམ་རིག་ཤེས་མཁན་ཚོས་རྩོམ་པ་པོ་བསྐྱེད་བསྲིང་དང་།རྩོམ་རིག་ལ་གདེང་འཇོགལྷག་པར་དུ་འགྲན་རྩོམ་སོགས་ལ་དོ་སྣང་ཆེན་པོས་བྱ་དགའ་འཐོབ་མཁན་ལ་ལེགས་བསྟོད་དང་།ཕུལ་བྱུང་བརྩམས་ཆོས་ལ་གདེང་འཇོག་བྱེད།བཙན་བྱོལ་དུ་དེ་ལས་ལྡོག་འདི་ལྟར་ལེགས་སྤེལ་གྱི་མིང་ཐོག་ནས་རྩོམ་མཁན་ཚོར་མཐོང་ཆུང་དང་།སྣང་མེད་ཅི་དགར་བྱེད།རྒྱུ་མཚན་འདིས་བཙན་བྱོལ་རྩོམ་རིག་ལ་མུ་གེ་བྱུང་བ་རེད་ལ་ཕུལ་བྱུང་རྩོམ་པ་པོ་དང་བརྩམས་ཆོས་ཀྱི་དགུན་ཁ་དར་བའི་མཐུན་རྐྱེན་བསྐྲུན་པ་རེད།ཕུན་སུམ་ཚོགས་པའི་བོད་ཀྱི་རྩོམ་རིག་དང་རིག་གཞུང་བསམ་མཁན་ཚོས་རྗེས་མ་མུ་མཐུད་དེ་འདི་ལྟར་མི་གནང་བ་གལ་ཆེ་ལ།རྩོམ་པ་པོ་དང་།རྩོམ་རིག་ལ་དགའ་མཁན།རིག་གཞུང་འཛིན་སྐྱོང་ལ་གཞོལ་མཁན་ཚོར་འདི་ལྟར་སྣང་ཆུང་དང་མཐོང་ཆུང་མི་བྱེད་པའི་རེ་བ་ཞུ།།

ཐེངས་འདིའི་སྒྲུང་རྩོམ་འགྲན་སྡུར་ཁྲོད་བྱ་དགའ་ཐོབ་སོང་ཞེས་ལ་རྩེ་དཔེ་མཛོད་ཁང་གི་དྲ་རྒྱར་བཀོད་པ་ཁག

༡༽བྱ་དགའ་ཨང་དང་པོ་ཐོབ་པའི་འདྲེ་སྒྲུང་།གསོན་འདྲེ་རྒན་མོ།སྒྲུང་སྐུར་མཁན་ཁེ་ན་ཊའི་གྲོང་ཁྱེར་ཝན་ཁུ་ཝར་བཅའ་བཞུགས་གནང་བའི་ཆུ་སྐྱེས་སྒྲོལ་མ།

༢༽བྱ་དགའ་ཨང་གཉིས་པ་ཐོབ་པའི་འདྲེ་སྒྲུང་།འདྲེ་མོ་ཟངས་ཀྱི་མཆུ་ཏོ་ཅན།སྒྲུང་སྐུར་མཁན་རྒྱ་གར་འབྲས་སྤུངས་སྒོ་མང་དགེ་འདུན་རྒྱ་མཚོ།

༣༽བྱ་དགའ་ཨང་གསུམ་པ་ཐོབ་པའི་འདྲེ་སྒྲུང་།༼འོས་གྲངས་མང་ཉུང་གཅིག་པ།༽འདྲེས་དབང་སྒྱུར།སྒྲུང་སྐུར་མཁན་རྒྱ་གར་སེ་ར་བྱེས་སེར་ཤུལ་རིན་ཆེན་དོན་གྲུབ།

༣༽བྱ་དགའ་ཨང་གསུམ་པ་ཐོབ་པའི་འདྲེ་སྒྲུང་།༼འོས་གྲངས་མང་ཉུང་གཅིག་པ།༽

བོད།ངའི་ཕ་ཡུལ།ལྷ་འདྲེ་འཐབ་པའི་གཡུལ་ས།སྒྲུང་སྐུར་མཁན་ཨོ་སི་ཊོ་ལི་ཡའི་རྡོ་རྗེ་ཚེ་སྲུང་།

༣༽བྱ་དགའ་ཨང་གསུམ་པ་ཐོབ་པའི་འདྲེ་སྒྲུང་།༼འོས་གྲངས་མང་ཉུང་གཅིག་པ།༽

ཟླ་བ་མེད་པའི་མཚན་མོ།སྒྲུང་སྐུར་མཁན་རྒྱ་གར་རྡོ་རྗེ་གླིང་སམ་བྷོ་ཊའི་བོད་ཡིག་སློབ་གྲྭའི་རྡོ་རྗེ་རིན་ཆེན།

༢༠༡༤/༤/༡༦/ལ་བྲིས།