ཕོ་མོ་འདྲ་མཉམ་ཞེས་སྤྲད་ཡོང་རྒྱུ་ཞིག་མེད།

བོད་ཀྱི་བང་ཆེན་སྤྱིའི་འདོན་ཐེངས་ ༥༣༨  ཕྱི་ལོ་ ༢༠༡༥/༤/༡༥

ད་ལྟའི་དུས་འདིར་འཛམ་གླིང་གི་ཤར་ནུབ་ཀུན་ཏུ་ཕོ་མོ་འདྲ་མཉམ་དགོས་པའི་འབོད་སྒྲ་དང་ལས་འགུལ་སྤེལ་མཁན་གང་མང་ཞིག་ཡོད་ལ། བཙན་བྱོལ་བོད་པའི་སྤྱི་ཚོགས་སུའང་བཤད་ཡམས་དེ་དབྱར་གྱི་ན་བུན་བཞིན་གང་སར་ཁྱབ་བཞིན་ཡོད། བཙན་བྱོལ་བོད་གཞུང་གི་ངོས་ནས་བུད་མེད་ཀྱི་ནུས་སྟོབས་གོང་མཐོར་སྤེལ་ཐབས་ཀྱི་སྐོར་ལ་སྲིད་བྱུས་ཤིག་ཀྱང་གཏན་འབེབས་གནང་ཡོད་ལ། སྤྱིར་བོད་པའི་སྤྱི་ཚོགས་ནང་གནའ་བོའི་དུས་སུ་ནུབ་ཕྱོགས་ཀྱི་ཡུལ་གྲུ་ཁག་དང། ཁ་ཆེའི་ཆོས་ལུགས་རྒྱུད་འཛིན་པའི་སྤྱི་ཚོགས་ནང་བཞིན་ཕོ་མོ་གཉིས་ཀྱི་དབར་དབྱེ་འབྱེད་ཀྱི་བསམ་བློ་ཤུགས་ཆེན་པོ་ཡོད་པ་བཞིན་དར་མ་མྱོང་ནའང། ཕོ་མཆོག་མོ་དམན་གྱི་ལྟ་ཚུལ་གཏན་ནས་མེད་པ་ཞིག་ཀྱང་ག་ལ་ཡིན། བོད་པའི་རིག་གནས་དེ་ཆོས་སྒྲུབ་པའི་མཐུན་རྐྱེན་ཙམ་དུ་གྱུར་པའི་སྐབས་སུ་ཆོས་སྒོར་ཞུགས་མཁན་ཡང་གཙོ་བོ་མི་སྐྱ་ཡིན་པས། དེ་དང་འབྲེལ་བའི་སྲུང་སྡོམ་གྱི་ཐོག་ནས་ཀྱང་བུད་མེད་དང་འབྲེལ་བའི་སྐྱོན་དག་གསལ་བཤད་བྱས་པའང་མང་པོ་ཡོད་པ་རེད།

གལ་སྲིད་ཆོས་སྒོར་ཞུགས་མཁན་བུད་མེད་མང་བ་ཡིན་ན་དགེ་སློང་མའི་འདུལ་ཁྲིམས་དང། དེ་བཞིན་ཆོས་གཞུང་ཁག་ཏུ་སྐྱེས་པ་དང་འབྲེལ་བའི་སྐྱོན་དག་བུད་མེད་རྣམས་ལ་ངེས་འབྱུང་གི་བསམ་བློ་བཅོས་མིན་སྐྱེ་ཆེད་གསུངས་པ་ཁག་སྤྱི་ཚོགས་ནང་དར་ཁྱབ་ཆེན་པོ་བྱུང་ཡོད་པ་སྨྲོས་མེད་རེད། གནའ་བོའི་དུས་རབས་སུ་ལུས་ཤུགས་ཀྱི་ངལ་རྩོལ་ལ་བརྟེན་ནས་འཚོ་བ་སྐྱེལ་རྒྱུ་ཁོ་ན་ཡིན་པའི་སྐབས་སུ་རང་བཞིན་གྱིས་བུད་མེད་ལས་སྐྱེས་པ་ངལ་རྩོལ་གྱི་ཐོག་ལ་ནུས་ཤུགས་ཆེ་བས། སྤྱི་ཚོགས་ནང་དབང་ཤུགས་ཀྱི་ཐོག་ནས་ཀྱང་རང་བཞིན་གྱིས་ཁྱད་པར་ཤོར་བ་ཞིག་ཏུ་གྱུར་ཡོད། ད་ལྟ་དུས་རབས་ཉེར་གཅིག་པ་འདི་ཉིད་ཀླད་ཤུགས་ལ་བརྟེན་ནས་ངལ་རྩོལ་བྱེད་པའི་སྐབས་སུ་ཕོ་མོ་གཉིས་ཀ་རང་བཞིན་གྱིས་འདྲ་མཉམ་ཡིན་དགོས་ལ། ལྷག་པར་དུ་བཙན་བྱོལ་བོད་པའི་སྤྱི་ཚོགས་ནང་ཤེས་ཡོན་གྱི་སྐབས་གོ་སྐབས་ཀྱང་བུ་མོ་དང་བུ་གཉིས་ལ་ཁྱད་པར་སྤུ་རྩེ་ཙམ་མེད་པར་གཅིག་མཚུངས་ཡིན་པས། དེ་ལུགས་ཀྱི་སྤྱི་ཚོགས་ནང་ཤུགས་རྐྱེན་དང་ནུས་པའང་གཅིག་མཚུངས་ཡིན་དགོས་པ་རེད།

འོན་ཀྱང་བུད་མེད་ཕལ་མོ་ཆེའི་བསམ་བློའི་ནང་གཞན་བརྟེན་གཙོ་བོ་བྱེད་པ་དེ་ཕོ་མོ་འདྲ་མཉམ་མི་ཡོང་བའི་རྒྱུ་རྐྱེན་ཉག་གཅིག་ཏུ་གྱུར་ཡོད། དེ་བཞིན་མི་མང་འདུ་འཛོམས་ཀྱི་སྐབས་སུ་བསམ་ཚུལ་གཅིག་མཚུངས་འདོན་ཐུབ་པ་དང། དྲི་བ་དང་སྐྱོན་བརྗོད་ཀྱང་གཅིག་མཚུངས་ཀྱིས་བྱེད་ཐུབ་པའི་གོམས་གཤིས་དེ་སླེབས་ཐུབ་པར་ཤུགས་རྒྱག་ཐུབ་ན། རང་བཞིན་གྱིས་བསམ་བློའི་ཐོག་ནས་གདེང་ཚོད་དང་སྤོབས་པ་སླེབས་རྒྱུར་ཕན་ཐོགས་ཡོད། རང་སྟོབས་ཀྱི་ནུས་པའི་ཐོག་ནས་སྐྱེས་པ་དང་བུད་མེད་གཉིས་འདྲ་མཉམ་ཡོང་བར་འབད་དགོས་པ་དང། ཕོ་མོ་འདྲ་མཉམ་ཡོང་བར་བུད་མེད་ཀྱི་ངོས་ནས་མི་འདང་བའི་ཆ་ཡོད་པའི་རིགས་ལ་གཞོགས་འདེགས་དང་མཐུན་འགྱུར་བྱེད་རྒྱུ་དེ་སྐྱེས་པའི་ལས་འགན་ཡིན་པ་ལས། གཞན་འདྲ་མཉམ་འདི་ཡིན་ཞེས་རྡོག་རྡོག་ཅིག་སྤྲད་ཡོང་རྒྱུ་གང་ཡང་མེད། སྐྱེས་པ་ལས་བུད་མེད་རིག་པ་རྣོ་ཞེས་མཁས་པ་མང་པོ་བསྡོམས་བརྒྱབ་ཡོད་པས་ཀླད་ཤུགས་ལ་བརྟེན་ནས་ངལ་རྩོལ་བྱེད་པའི་དུས་རབས་འདིར་བུད་མེད་དག་སྐྱེས་པ་ལས་མདུན་དུ་བསྐྱོད་ཐུབ་དགོས་པ་ཞིག་རེད།

མང་གཙོ་དར་ཁྱབ་ཧ་ཅང་ཆེ་བའི་ཨ་རིའི་རྒྱལ་ཁབ་ཀྱི་སྲིད་འཛིན་གྱི་འོས་གཞིར་བུད་མེད་ཅིག་ལང་གི་ཡོད་པ་དང། ད་ལན་ཨ་རིའི་སྲིད་འཛིན་འོས་འདེམས་འདིའི་སྐབས་སུ་བུད་མེད་ཅིག་འདེམས་ཐུབ་ན་ཨ་རིའི་རྒྱལ་ཁབ་ཀྱི་ཟིན་ཐོ་གསར་པ་ཞིག་ཡིན་འདུག ད་ལན་འོས་གཞིར་ལང་མཁན་གྱི་བུད་མེད་དེ་ཡང་སྐྱེས་པ་མང་པོ་ཞིག་ལས་ཀྱང་ལྷག་པར་སྤོབས་པ་དང། ཤེས་ཡོན་སོགས་གང་ཐད་ནས་ཕུལ་དུ་བྱུང་བ་ཞིག་ཡིན་འདུག་པས་ལྟད་མོ་བལྟ་རྗེས་སུ་ཡོད། སྤྱིར་ནུབ་ཕྱོགས་པའི་སེམས་ནང་ཤར་ཕྱོགས་སུ་ཕོ་མོ་འདྲ་མཉམ་མེད་པ་དང། ཤར་ཕྱོགས་པའི་སེམས་ནང་དུ་ལོ་རྒྱུས་ནང་དུ་ནུབ་ཕྱོགས་པས་བུད་མེད་ལ་མཐོང་ཆུང་དང་དབྱེ་འབྱེད་ཆེན་པོ་བྱེད་མྱོང་བས་འཐབ་རྩོད་འདི་སླེབས་པ་ཞིག་ཏུ་ངོས་འཛིན་བྱེད་བཞིན་ཡོད། གང་ལྟར་ཡང་ལུས་ཁམས་གྲུབ་ཚུལ་གྱི་ཐོག་ནས་སྐྱེས་པ་དང་བུད་མེད་གཉིས་ལ་མི་འདྲ་བའི་ཆ་ཡོད་པ་ཙམ་ལས། གཞན་ཐོབ་ཐང་དང་གོ་སྐབས་གང་ཐད་ནས་གཅིག་པ་ཡིན་པ་ལས་ཆད་ལྷག་གང་ཡང་མེད་ཅེས་བཙན་བྱོལ་བོད་པའི་སྤྱི་ཚོགས་ནང་བརྗོད་ཆོག་ཆོག་ཅིག་ཏུ་གྱུར་ཡོད།

མདོར་ན་ལོ་འདིར་བོད་མིའི་སྒྲིག་འཛུགས་ཀྱི་སྲིད་སྐྱོང་འོས་བསྡུ་དང་སྐབས་བཅུ་དྲུག་པའི་སྤྱི་འཐུས་ཀྱི་འོས་བསྡུ་ཆེན་མོ་དུས་མཉམ་དུ་འཁེལ་ཡོད་སྟབས། འོས་གཞི་དེ་དག་ནང་དུ་བུད་མེད་འཚང་ཁ་ཤིག་ཤིག་གིས་ཕེབས་ཐུབ་པ་ཞིག་དགོས་པ་དང། འོས་གཞིར་ལང་པའི་སྐབས་སུ་རང་ཉིད་ཀྱི་འཆར་གཞི་དང་ལྟ་ཚུལ་དེ་དག་ཀྱང་ཁ་གསལ་གཏིང་གསལ་གྱི་ཐོག་ནས་བཤད་ཐུབ་པ་ཞིག་དགོས་པ་དེ་ཧ་ཅང་གལ་ཆེ། དེ་ལྟར་སྤྱི་ཚོགས་ཀྱི་སྣེ་ཁྲིད་མཁན་བུད་མེད་གང་མང་ཞིག་སླེབས་སོང་ན་བུད་མེད་ཀྱི་ངོས་ནས་མིག་དཔེ་ཡར་བལྟ་དང། གདེང་ཚོད་དང་སྤོབས་པ་སླེབས་པའི་ཆ་རྐྱེན་གལ་ཆེ་ཤོས་ཤིག་ཏུ་འགྱུར་ངེས་ཡིན། འོས་འཕེན་པའི་ངོས་ནས་བཤད་ཀྱང་སྐྱེས་པ་དང་བུད་མེད་གཉིས་འདྲ་མཉམ་ཡིན་པས། བུད་མེད་མང་ཙམ་ལ་རྒྱབ་སྐྱོར་གྱི་འོས་འཕེན་ཐུབ་པ་ཞིག་ཡོང་དགོས་པ་དེ་ཧ་ཅང་གལ་ཆེ། ཕོ་མོ་འདྲ་མཉམ་ཞེས་པ་དེ་དམིགས་བསལ་གྱིས་སྤྲད་བཞག་པ་ཙམ་དང། སྙིང་རྗེ་དང་གཟིགས་སྐྱོང་ཙམ་ལ་བརྟེན་དགོས་ན་དུས་ནམ་ཡང་ཕོ་མོ་འདྲ་མཉམ་ཆགས་མི་སྲིད་པ་རེད།།