ཕྱོགས་འགལ་མ་རེད་གཞུང་འཛིན་རེད།

(བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས་༡༠༡༡ གི་ཆེད་བརྗོད། )
བཙན་བྱོལ་བོད་མིའི་སྤྱི་ཚོགས་སུ་རྒྱུ་མཚན་དང་དགོས་པ་གང་ཡང་མེད་པའི་རྩོད་རྙོག་ཆུང་ཙག་ཁ་ཤས་ཡོད་པ་དང་། རྩོད་རྙོག་དེ་དག་གི་ཆེད་དུ་ཆེ་ས་ནས་༧གོང་ས་༧སྐྱབས་མགོན་ཆེན་པོ་མཆོག་གི་མཚན་བེད་སྤྱོད་གཏོང་བ་དང་། ཆུང་ས་ནས་མི་མང་དཀྱུས་མ་ཕལ་ཆེ་བ་ཡིག་རྨོངས་ཡིན་པ་དག་ཀྱང་བེད་སྤྱོད་བཏང་ནས་འུར་ཟིང་སྣ་ཚོགས་སློང་གི་འདུག མང་གཙོའི་སྤྱི་ཚོགས་ནང་གཞུང་དང་འགོ་ཁྲིད་ཀྱི་ལས་དོན་བྱེད་ཕྱོགས་ལ་ངོ་རྒོལ་བྱེད་ཆོག་པ་དང་། བསམ་ཚུལ་གང་ཡོད་པ་དེ་ཐད་ཀར་བརྗོད་རྒྱུའི་རང་དབང་ཡོད་པ་མ་ཟད། རང་དབང་དེ་ལ་སྲུང་སྐྱོབ་ནན་པོ་དགོས་པ་དེའང་ཧ་ཅང་གལ་ཆེན་པོར་གྱུར་ཡོད། སྲིད་དོན་ཚོགས་པ་ཡོད་པའི་ཆབ་སྲིད་ཀྱི་ལམ་ལུགས་ནང་། གཞུང་འཛིན་ཚོགས་པའི་ལས་དོན་བྱེད་ཕྱོགས་ལ་ཕྱོགས་འགལ་ཚོགས་པའི་གྲོས་ཚོགས་འཐུས་མིས་སྐྱོན་བརྗོད་བྱེད་པ་དང་། ངོ་རྒོལ་བྱེད་པ་སོགས་ཀྱི་ལམ་ལུགས་ཡོད་པ་དང་དེའི་རྗེས་འབྲངས་མི་མང་གིས་གཞུང་འཛིན་ཚོགས་པར་ངོ་རྒོལ་བྱེད་པ་མང་གཙོའི་སྤྱི་ཚོགས་ནང་གང་མང་མཐོང་རྒྱུ་ཡོད།

ཕྱོགས་འགལ་ཚོགས་པས་གཞུང་གི་ལས་དོན་ལ་སྟངས་འཛིན་བྱེད་པ་དང་། ནོར་འཁྲུལ་ལ་ཡོ་བསྲང་བྱེད་ཆེད་ཕྱོགས་འགལ་ཚོགས་པ་ནི་མང་གཙོའི་ཆ་ལག་གལ་ཆེ་ཤོས་ཤིག་ཡིན་ལ། རྒྱ་གར་ལ་མཚོན་ན་ཕྱོགས་འགལ་ཚོགས་པའི་ཚོགས་གཙོ་ལ་བློན་ཆེན་གྱི་གོ་གནས་དང་གཅིག་མཚུངས་ཡོད། སྐབས་རེ་ཕྱོགས་འགལ་ཚོགས་པར་དགོས་ངེས་ཀྱི་ནུས་པ་མེད་པའི་སྐབས་གཞུང་འཛིན་ཚོགས་པས་རང་སྣང་གང་དྲན་བྱེད་པའི་ལམ་སྲོལ་ངན་པའང་མཐོང་རྒྱུ་ཡོད། མང་གཙོའི་སྤྱི་ཚོགས་ནང་འོས་བསྡུ་ཟིན་རྗེས་ཚོགས་པ་གང་རུང་ངམ། ཚོགས་པ་མང་པོ་མཉམ་འབྲེལ་གྱི་ཐོག་ནས་གཞུང་འཛིན་ཐུབ་ཙམ་ཡོད་ཀྱང་། གཞུང་གིས་ལས་དོན་གལ་ཆེ་ཁག་ལ་ཕྱོགས་འགལ་ཚོགས་པས་ལམ་ལྷོང་ཡོང་བར་འགལ་རྐྱེན་བཟོ་བཞིན་ཡོད། མང་གཙོའི་སྤྱི་ཚོགས་ནང་ཕྱོགས་འགལ་ཚོགས་པ་ཡོད་པས་ཕན་གནོད་གཉིས་ཀ་ཡོད་ཀྱང་། རྒྱ་ཆེ་ས་ནས་གནོད་ལས་ཕན་ཆེ་བ་སྨྲོས་མེད་རེད། འོན་ཀྱང་གཞུང་འཛིན་ཚོགས་པ་དང་དེའི་རྗེས་འབྲངས་ཀྱིས་གཞུང་ལ་ངོ་རྒོལ་བྱེད་སྲོལ་ཧ་ལམ་བྱུང་མེད།

བཙན་བྱོལ་བོད་པའི་སྤྱི་ཚོགས་སུ་སྲིད་དོན་ཚོགས་པ་གང་ཡང་མེད་ཀྱང་། རང་བཞིན་གྱིས་ཕྱོགས་ཁག་གཉིས་ལྟ་བུར་གྱུར་ཡོད་པ་ནི་མཐོང་གསལ་རེད། ད་ལྟའི་ཆར་གཞུང་གི་ལས་སྣེ་ཙམ་མ་ཡིན་པར་གཞི་རིམ་མི་མང་ནང་དུའང་དེ་ལྟ་བུའི་སྣང་ཚུལ་ཡོད་པ་དེ་མངོན་གསལ་དུ་གྱུར་ཡོད། ཕྱི་ལོ་༢༠༢༡ ལོར་སྤེན་པ་ཚེ་རིང་སྲིད་སྐྱོང་དུ་འོས་འདེམས་བྱུང་ནས་ད་ལྟའི་ཆར་གཞུང་འཛིན་པ་ཆགས་ཡོད་པ་དང་། ཁོང་ལ་རྒྱབ་སྐྱོར་བྱེད་མཁན་རྣམས་ཀྱང་གཞུང་འཛིན་ཚོགས་པའི་རྗེས་འབྲངས་ལྟ་བུར་གྱུར་ཡོད། སྤྱི་ཚོགས་ཟིང་ཟིང་ཆགས་པ་དང་། ལས་དོན་ལ་བར་ཆད་གང་བྱུང་ཡང་གཞུང་འཛིན་དེའི་སྐབས་སུ་བྱུང་བ་ཡིན་པས་འགན་འཁྲི་ལ་གཡོལ་ཐབས་གཏན་ནས་མེད། དེར་བརྟེན་སྲིད་སྐྱོང་སྤེན་པ་ཚེ་རིང་དང་ད་ལྟའི་བཀའ་ཤག་ལ་རྒྱབ་སྐྱོར་བྱེད་མཁན་ཞིག་ཡིན་ན་གཞུང་འཛིན་ཚོགས་པའི་ལས་དོན་ལ་བར་ཆད་མི་ཡོང་ཆེད་སྤྱི་ཚོགས་ཟིང་ཟིང་བཟོ་མི་རུང་བ་ཞིག་རེད། གལ་སྲིད་ཕྱོགས་འགལ་ཚོགས་པ་ཡིན་ན་ལས་དོན་བྱེད་ཕྱོགས་དེ་ལྟ་བུ་ཡོང་སྲིད་པ་ཞིག་རེད།

ད་ལྟ་བཙན་བྱོལ་བོད་མིའི་ཆབ་སྲིད་ཀྱི་སྒྲོམ་གཞི་ལ་བཟོ་བཅོས་དང་འགྱུར་བ་ཞིག་གཏོང་འདོད་ཡོད་ནའང་། གྲོས་བསྡུར་དང་འཆམ་མཐུན་གྱི་ཐོག་ནས་བྱེད་ཐུབ་ན་མ་གཏོགས། ངོ་རྒོལ་དང་གནོན་ཤུགས་སྤྲད་ནས་འགྱུར་བ་གཏོང་རྒྱུ་ནི་ཕྱོགས་གང་ནས་བསམ་ཡང་གཏན་ནས་ཡོང་མི་སྲིད་པ་རེད། ལྷག་པར་དུ་འོས་འདེམས་བྱས་པའི་ཆབ་སྲིད་མི་སྣ་ཞིག་ལ་མཚོན་ན། རང་ཉིད་འདེམས་བྱེད་མི་མང་གིས་ངོ་རྒོལ་བྱས་ན་བསྐྱར་དུ་འོས་འདེམས་ཡོང་རྒྱུའི་རེ་བ་མེད་པས་གནོན་ཤུགས་ཆེན་པོར་འགྱུར་ཐུབ་པ་ལས། སྤྱི་ཚོགས་ཁ་ཕྱོགས་གཉིས་སུ་གྱུར་ཟིན་པའི་སྐབས་འདིར་རང་ཉིད་འདེམས་མཁན་མ་ཡིན་པའི་ཕྱོགས་ནས་ངོ་རྒོལ་བྱས་ན། མ་འོངས་པར་རྐུབ་སྟེགས་བརྟན་དུ་གཏོང་བ་ལས་ཞེད་སྣང་བྱེད་དགོས་དོན་གང་ཡང་མེད། སྤྱི་ཚོགས་ཟིང་ཟིང་བཟོ་བའི་སྣེ་ཁྲིད་མཁན་དག་གིས་གནད་དོན་འདི་གསལ་པོ་ཤེས་ནའང་། སྒེར་གྱི་ཁེ་ཕན་ཆུང་ཙག་ཙམ་གྱི་ཆེད་དུ་རང་ཉིད་ལ་ཡིད་ཆེས་བྱེད་མཁན་གྱི་རྒན་གོག་དང་ཡིག་རྨོངས་པ་རྣམས་བེད་སྤྱོད་ལོག་པར་གཏོང་གི་ཡོད།

མདོར་ན་སྲིད་སྐྱོང་སྤེན་པ་ཚེ་རིང་ལ་རྒྱབ་སྐྱོར་བྱེད་མཁན་ཞིག་ཡིན་ན། ཁོང་གིས་སྲིད་སྐྱོང་གནང་སྐབས་བོད་མིའི་སྒྲིག་འཛུགས་འཐོར་ཞིག་ཏུ་ཕྱིན་ན་རྩ་དོན་འཐབ་རྩོད་ལ་གྱོང་གུད་ཆེན་པོ་ཡིན་ཞིང་། དེའི་འགན་འཁྲི་གཙོ་བོ་སྐབས་དེའི་ལས་ཐོག་སྲིད་སྐྱོང་ལ་ཡོད་པས། རང་ཉིད་ཀྱིས་རྒྱབ་སྐྱོར་བྱེད་ཡུལ་སྲིད་སྐྱོང་ལ་ལོ་རྒྱུས་ནང་ནག་ཐིག་ཅིག་ཕོག་ན་འགྲིག་མིན་བསམ་བློ་གཏོང་དགོས་པ་ཞིག་རེད། བཙན་བྱོལ་བོད་མིའི་ཆབ་སྲིད་ཀྱི་སྒྲོམ་གཞི་འདིའི་ཐོག་ནས་རང་ཉིད་ཀྱི་སྣང་བར་མི་འགྲོ་བའི་མི་སུ་ཡིན་ཡང་མགོ་འགྱོགས་རྒྱུ་མེད་པ་ཞིག་བཟོ་ཐབས་གཏན་ནས་མེད་པས། ལག་རྨ་སོས་ཡོད་དང་། ཁ་རྨ་སོས་མེད་ཅེས་པ་ལྟར་མིའི་སེམས་ལ་ཕོག་ཐུག་གཏོང་བའི་ཚིག་ངན་འབའ་ཞིག་སྤྱི་ཚོགས་དྲ་ལམ་ཁག་ཏུ་བཀྲམ་ནས་ཕན་ཐོགས་མེད། གལ་སྲིད་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆར་འགྱུར་བ་གཏོང་དགོས་པའི་དབང་དུ་བཏང་ནའང་། སྤྱི་འཐུས་ཀྱི་རྩ་འབོར་གསུམ་ཆ་གཉིས་ཡན་གྱིས་རྒྱབ་སྐྱོར་མ་ཐོབ་བར་ཁ་དམག་ག་ཚོད་བརྒྱབ་ཀྱང་གནོད་ལས་ཕན་ཐོགས་སྣ་གཅིག་མེད།།