བདུན་ཕྲག་གཅིག་རིང་རྒྱ་བལ་གཉིས་ནང་བོད་མི་ཏོག་ནད་ཕོག་མཁན་བྱུང་མི་འདུག

ཟླ་འདིའི་ཚེས་༡༤ ཉིན་བོད་མིའི་སྒྲིག་འཛུགས་ཏོག་དབྱིབས་ཛ་དྲག་ལས་དོན་ཚོགས་ཆུང་གི་བདུན་རེའི་གསར་འགོད་གསལ་བསྒྲགས་ཐེངས་༡༠༦ པ་དང་མཉམ་དུ། འཕྲོད་བསྟེན་ལས་ཁུངས་ཀྱི་ལས་གཞི་གལ་ཆེ་ཁག་གཉིས་ཀྱི་ལས་དོན་ཞུ་ཕྱོགས་དང་དེའི་ཐད་འབོད་སྐུལ་ཁག་འགའ་དྷ་ས་ནས་དྲ་ལམ་བརྒྱུད་སྤེལ་བྱས་སོང་།

འདས་པའི་བདུན་ཕྲག་གཅིག་ནང་རྒྱ་བལ་ནང་གནས་སྡོད་བོད་མིར་ཏོག་ནད་ཕོག་མེད་པ་དང་། འགོག་དབྱེ་ཟུར་འཇོག་ཁང་དུ་བཞུགས་དགོས་མཁན་བྱུང་མེད་འདུག དེ་བཞིན་གསོ་རིག་ལུས་སེམས་གསོ་ཆེད་ཀྱི་སྨན་སྦྱིན་ཕུལ་མི་དགོས་པ་བཅས་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གི་ཚོགས་མི་བསྟན་འཛིན་བསོད་ནམས་ཀྱིས་གསུངས་སོང། 

ཁོང་གིས་མུ་མཐུད་གསུང་དོན། ད་ལྟའི་ཆར་རྒྱ་གར་ནང་ལོ་ན་༡༨ ཡན་གྱི་སྔོན་འགོག་སྨན་ཁབ་ཆ་ཚང་བརྒྱབ་ཟིན་པའི་མི་གྲངས་༥༠༡༢༡ དང་བལ་ཡུལ་ནང་སྔོན་འགོག་སྨན་ཁབ་ཆ་ཚང་བརྒྱབ་ཟིན་པའི་མི་གྲངས་༧༠༢༩། རྒྱ་གར་ནང་སྔོན་འགོག་སྨན་ཁབ་གཅིག་ལས་བརྒྱབ་མེད་པ་མི་གྲངས་༣༢༨ དང་། དེ་ནས་རྒྱ་གར་ནང་ལོ་ན་༡༨ མན་གྱི་ན་གཞོན་ལ་སྔོན་འགོག་སྨན་ཁབ་ཆ་ཚང་བརྒྱབ་ཟིན་པ་༡༥༩༢ དང་། བལ་ཡུལ་ནང་༡༠༩ དེ་བཞིན་སྔོན་འགོག་སྨན་ཁབ་གཅིག་ལས་བརྒྱབ་མེད་པ་རྒྱ་གར་ནང་མི་གྲངས་༣༧༢ དང་། བོད་མི་ལོ་ན་༦༠ ཡན་ལ་ནུས་ཤུགས་སྤོར་ཆེད་ཀྱི་སྨན་ཁབ་སྦུ་ས་ཊར་(Booster Shots) བརྒྱབ་ཟིན་པ་༣༧༢༡ དང་བལ་ཡུལ་ནང་༢༡༦ ད་དུང་འཕྲོད་ལས་པ་དང་། སྨན་ཞབས། མདུན་ཐོན་མདོང་ལེན་ཐོག་ཕྱག་ལས་གནང་མཁན་རྒྱ་གར་ནང་༥༨༩ དང་བལ་ཡུལ་ནང་༥ བཅས་ལ་ཡང་ནུས་ཤུགས་སྤོར་ཆེད་ཀྱི་སྨན་ཁབ་བརྒྱབ་ཟིན་འདུག མུ་མཐུད་གསུངས་གསལ་ལ་རྒྱལ་སྤྱིའི་ནང་ཏོག་ནད་ཀྱི་གནས་སྟངས་བཟང་རུ་འགྲོ་མུས་ཡིན་པ་དང་དེའི་རྐྱེན་གྱིས་ཕན་ཚུན་འགྲོ་བསྐྱོད་ཀྱི་གནས་སྟངས་ཡང་བཟང་རུ་ཕྱིན་ཡོད་པས། རྒྱ་གར་རྒྱལ་ཁབ་ཆེན་པོའི་ནང་དེ་ཙམ་གྱི་ཛ་དྲག་མིན་རུང་ཏོག་ནད་རྩ་མེད་དུ་ཕྱིན་མེད་པས་རྒྱལ་སྤྱིའི་འཕྲོད་བསྟེན་མཁས་པ་དང་ཚན་རིག་མཁས་པ་མང་པོས་ཟླ་བ་༦ པའི་ནང་རྦ་རླབས་བཞི་པ་སླེབས་སྲིད་པའི་ཉེན་ཚབས་ཡོད་པའི་ཚོད་དཔག་བྱེད་བཞིན་ཡོད་པ་གསུངས་སོང། 

མི་མང་ནས་དེའི་ཐད་དམིགས་བསལ་ཕྱི་ལ་ཕེབས་སྐབས་དང་མི་མང་འདུ་འཛོམས་སྐབས་ཁ་རས་གྱོན་དགོས་པ། དེ་བཞིན་ལག་པ་ངེས་པར་དུ་འཁྲུ་དགོས་པ་སོགས་ཀྱི་འབོད་སྐུལ་བྱས་སོང། 

བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་མྱོ་རྫས་ངན་གོམས་ཀྱི་ནད་པ་ཉམས་ཐག་ཨང་ཐོབ་ཅན་དང་། ན་གཞོན་བདག་མེད་དམ་སྡོད་གནས་མེད་རིགས་ལ་སྨན་བཅོས་ཀྱི་མཐུན་འགྱུར་རོགས་རམ་ཞུ་མུས་ཡིན་པ་དང་། བཅོས་ཐབས་ཁང་དུ་བཞུགས་རྒྱུའི་དཔལ་འབྱོར་གྱི་རྒྱབ་བསྐྱོར་བརྒྱ་ཆ་༡༠༠ ཞུ་མུས་ཡིན་པ། དེ་མིན་གྱི་ནད་པ་ཚོར་བརྒྱ་ཆ་༥༠ རོགས་རམ་མཐུན་འགྱུར་ཞུ་བཞིན་ཡོད་པས།  རང་རེའི་ས་གནས་ཀྱི་མཐུས་ཚོགས་དང་ས་གནས་བརྒྱ་དཔོན་ནམ་ས་གནས་བཅུ་དཔོན། དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་ལས་བྱེད་ནས་ས་གནས་སུ་དེ་དང་འབྲེལ་བའི་དཀའ་ངལ་ཡོད་རིགས་ཀྱི་གཞོན་སྐྱེས་བདག་མེད་རིགས་ཡོད་ཚེ། རང་ཁོངས་ཀྱི་ས་གནས་འགོ་འཛིན་ནམ་ས་གནས་སྨན་ཁང་འགན་འཛིན་ལ་འབྲེལ་བ་མཐུད་ཐབས་གནང་ཐབས་དགོས་པའི་འབོད་སྐུལ་བྱས་འདུག 

བོད་མིའི་སྒྲིག་འཛུགས་ནས་གཉན་ནད་རེག་དུག་གི་ནད་པར་སྨན་གྲོན་གྱི་རོགས་རམ་དང་ཟླ་རེར་འཚོ་སྣོན་དོད་སྒོར་༣༠༠༠།༠༠ གནང་མུས་ཡིན་པ། བོད་མིའི་སྒྲིག་འཛུགས་ནས་གན་ནད་རེག་དུག་ཡོད་མེད་ཀྱི་བརྟག་དཔྱད་བྱེད་རྒྱུའི་རོགས་རམ་ཡང་ཞུ་མུས་ཡིན་པ་དང་ནན་ཏན་གྱིས་ནད་གཞི་ཡོད་མེད་ཀྱི་བརྟག་དཔྱད་སྔོན་ཚུད་ནས་བྱེད་དགོས་པ་དང་། དེས་ན་ཚ་གཞན་མང་པོ་ལས་སྐྱོབས་ཐུབ་པ། དེ་མིན་བརྟག་དཔྱད་མི་བྱེད་པར་ཡུན་རིང་ཕྱིན་ཚེ་ HIV ནད་འབུ་དེ་ AIDS ཡི་ངོ་བོར་འགྱུར་ནས་ཕྱིས་སུ་ནད་གཞི་གཞན་མང་དག་ཅིག་ཐོན་ནས་རང་ཉིད་ཀྱི་ལུས་སེམས་ལ་དཀའ་ངལ་འཕྲད་པ་དང་། སྨན་གྲོན་ཡིན་རུང་ཆེན་པོ་ཆགས་རྒྱུའི་དཀའ་ངལ་ཡོད་པ་གསུངས་སོང། དེ་བཞིན་གཉན་ནད་རེག་དུག་ཕོག་མཁན་ཚོར་སྤྱི་ཚོགས་ནས་ལྟ་སྟངས་མི་ལེགས་པ། ཚིག་རྩུབ་སྨྲོས་པ། ཕན་ཚུན་དབྱེ་འབྱེད་བྱེད་པ་ལ་སོགས་པའི་རྐྱེན་གྱིས་ནད་པར་རང་བཞིན་གྱིས་སེམས་ལ་དཀའ་ངལ་བྱུང་ནས་ན་ཚའི་གནས་སྟངས་འང་སྡུག་ཏུ་འགྲོ་རྒྱུ་དང་འགའ་ཞིག་སེམས་ཤུགས་ཆགས་ནས་སྨན་བཅོས་འཚམས་བཞག་དགོས་པ། ད་དུང་སྤྱི་ཚོགས་ནས་ཟུར་དུ་བསྡོད་དགོས་པ་དེ་འདྲའི་རྐྱེན་གྱིས་མཐའ་མ་ནད་པ་འདས་གྲོངས་སུ་འགྱུར་གྱི་ཡོད་པ་གསུངས་སོང་།

དེའི་རྗེས་བདེ་ལེགས་སྨན་ཁང་གི་སྨན་པ་འཇིགས་མེད་སྐལ་བཟང་གིས་གསུངས་གསལ། ད་ལྟའི་ཆར་རྒྱལ་སྤྱིའི་ནང་ཏོག་ནད་ཕོགས་མཁན་གྱི་མི་འབོར་ས་ཡ་༥༠༠ ཙམ་བྱུང་ཡོད་པ་དང་། རྒྱ་གར་ནང་ནད་མནར་བཞིན་པའི་མི་གྲངས་༡༡༠༠༠ ཙམ་ཡོད་པ་དང་། ཏོག་ནད་ན་མཁན་གྱི་མི་གྲངས་ཉིན་རེ་བཞིན་ཉུང་དུ་འགྲོ་བཞིན་ཡོད་རུང་། ཕྱིའི་རྒྱལ་ཁབ་རྒྱ་ནག་དང་ཧོང་ཀོང་སོགས་ནང་ཏོག་ནད་ཀྱི་རྐྱེན་པས་མི་ཚོགས་མང་པོར་འཕྲོད་བསྟེན་གྱི་དཀའ་ངལ་འཕྲད་མུས་ཡིན་པས། མི་དམངས་ནས་མུ་མཐུད་སྔོན་འགོག་གི་བྱེད་སྒོ་གང་ཐུབ་གནང་ཐབས་དང་ནད་རྟགས་ཐོན་ཚེ་ངེས་པར་དུ་སྨན་ཁང་ལ་བསྟེན་གཏུག་བྱེད་དགོས་པ། དེ་བཞིན་ལོ་ན་༡༢ ནས་༡༤ དབར་གྱི་ན་གཞོན་ཚོར་རྒྱ་གར་གཞུང་ངོས་ནས་སྔོན་འགོག་གི་སྨན་ཁབ་མཐུན་འགྱུར་སྦྱར་མུས་ཡིན་པས་གང་ཐུབ་ཀྱིས་སྨན་ཁབ་བཞེས་དགོས་པའི་འབོད་སྐུལ་བྱས་སོང།།

གསར་འགོད་པ་དོན་འགྲུབ་བཀྲ་ཤིས།